Argelaos

Argelaos is een van Herodes die Grote se seuns. Na die dood van sy vader ontvang Argelaos die beheer oor Judea, Samaria en Idumea. Argelaos is vanaf 4 v.C. tot 6 n.C. heerser oor hierdie gebiede.

Argelaos was besonder ongewild omdat hy met ʼn ysterhand regeer het. ʼn Afvaardiging van belangrike Jode en Samaritane kla oor hom by keiser Augustus. In reaksie hierop raak die keiser van Argelaos ontslae en verban hom na Gallië.

Hierna word Judea ʼn Romeinse provinsie wat deur ʼn prefek bestuur is.

Argelaos word slegs een keer in die Nuwe Testament, in Matteus 2:22, vermeld. Daar staan dat Josef en Maria met Jesus uit Egipte na die land van Israel wil terugkeer, maar toe hulle hoor dat Argelaos sy vader as koning van Judea opgevolg het, is hulle bang om terug te gaan. Hulle besluit om eerder na Galilea te gaan en hulle in die dorpie Nasaret te vestig.