JOB 9

₂“Ek weet dit is soos jy sê:

Wie kan sy saak teen God wen?

₃As jy 'n saak teen Hom sou wou voer,

sou jy Hom nie eers op een vraag uit duisend kon antwoord nie.

₄Die wysheid en krag van God is groot:

wie kan Hom teëstaan en niks oorkom nie?

₅Hy verskuif berge sonder dat hulle dit self agterkom;

in sy toorn maak Hy hulle tot niet.

₆Hy laat die aarde ruk, weg van sy fondamente af,

en sy pilare bewe.

₇Hy gee opdrag aan die son en dit kom nie op nie,

Hy verseël die sterre en hulle skyn nie.

₈Hy het die hemel soos 'n tent gespan, Hy alleen,

en Hy hou die golwe van die see in bedwang.

₉Hy het die Beer en Orion gemaak,

die Sewester en die sterrebeelde in die suide.

₁₀Wat Hy doen, is groot en ondeurgrondelik,

wonder op wonder.

₁₁“As Hy by my verbygaan, gewaar ek Hom nie,

Hy sweef verby, maar ek kom dit nie agter nie.

₁₂As Hy op iets beslag wil lê, wie sal Hom keer?

Wie sal vir Hom sê: ‘Wat doen U?’

₁₃God hou sy toorn nie terug nie:

Rahab se helpers lê platgeslaan voor Hom.

₁₄Sou ek kon antwoord op wat Hy vra?

Hoe sou ek my woorde teen Hom kies?

₁₅Al was my saak reg,

sou ek nog nie kon antwoord op wat Hy vra nie,

ek sou Hom, my Regter, net om genade kon smeek.

₁₆As ek na Hom sou roep en Hy my sou antwoord,

sou ek nie kon glo dat Hy my gehoor het nie,

₁₇want dit is Hý wat my met 'n stormwind pynig,

wat my baie wonde slaan sonder dat ek dit verdien,

₁₈wat my nie 'n kans gun om asem te skep nie,

maar my deurdrenk met bitter lyding.

₁₉As dit gaan oor krag,

is Hý die sterke,

as dit gaan oor reg,

wie anders as Hý kan 'n klag teen my inbring?”

₂₀“Al is my saak reg, my woorde sou my skuldig maak;

al is ek ook onskuldig, ek sou oor my woorde veroordeel word.

₂₁Ek ís onskuldig!

Ek gee nie meer om vir my lewe nie,

ek wil nie meer lewe nie.

₂₂Eintlik is dit om 't ewe, daarom dink ek:

of 'n mens skuldig is of onskuldig, God vernietig jou tog.

₂₃As 'n vloedramp skielik die dood bring,

lag God oor die wanhoop van die onskuldiges.

₂₄Hy gee die wêreld oor in die mag van die goddelose,

en Hy maak die regters partydig.

As dit nie Hy is wat dit doen nie, wie dan?

₂₅My dae skiet vinniger as 'n naelloper verby,

hulle vlieg verby sonder dat ek iets goeds beleef,

₂₆hulle gaan vinnig by my verby soos papirusbote,

soos 'n arend wat afskiet op sy prooi.

₂₇“As ek sou dink: ek wil ophou kla,

ek wil my houding verander en vrolik wees,

₂₈dan word ek bang dat ek nog swaarder sal kry,

omdat ek weet dat God my nie

onskuldig gaan bevind nie.

₂₉Aangesien ek tóg skuldig bevind sal word,

waarom sou ek my moeg maak?

₃₀Al sou ek my was met sneeu,

al sou ek my hande skoon was met seep,

₃₁God sou my weer in 'n modderpoel gooi,

sodat my klere my tot 'n aanstoot maak.

₃₂Hy is nie 'n mens soos ek

dat ek op sy vrae sou kon antwoord nie,

dat ons in 'n hofsaak teen mekaar betrokke sou kon raak nie.

₃₃As daar maar iemand was

wat in die saak tussen ons kon oordeel,

wat oor ons albei onpartydig kon regspreek,

₃₄as daar maar iemand was

wat God se straf van my kon wegneem,

sodat sy verskrikking my nie skielik oorval nie,

₃₅dan sou ek sonder vrees kon praat.

Maar soos sake nou met my staan, kan ek nie.”