To The Word – Day 94

₁Thumani amawundlu ombusi wezwe

aphume eSela ngasehlane,

aye entabeni yendodakazi yaseSiyoni.

₂Kuyakuthi njengezinyoni ezizulazulayo,

njengamaphuphu ahlakazekileyo,

abe njalo amadodakazi akwaMowabi

emazibukweni ase-Arinoni.

₃“Lulekanani, nenze izinqumo,

ubeke isithunzi sakho njengobusuku

phakathi kwemini,

nithukuse abaxoshiweyo,

ningadaluli ababalekileyo.

₄Abaxoshiweyo bakwaMowabi mabahlale kuwe;

mawube yisivikelo kubo ebusweni bomchithi.”

Lapho umcindezeli esephelile,

nokuchitha sekuyekiwe,

nabanyathelayo sebeqediwe ezweni,

₅kuyakumiswa isihlalo sobukhosi ngomusa,

kuhlale kuso ngeqiniso

etendeni likaDavide

umahluleli ofuna ukwahlulela esheshisa ukulunga.

₆Sizwile ngokuziphakamisa kukaMowabi

ukuthi uphakeme kakhulu,

nangokuzidla kwakhe

nokuziqhenya kwakhe nentukuthelo yakhe

nokuphafuza kwakhe okuzenzisayo.

₇Ngalokho uMowabi uyaklewula ngoMowabi;

bonke bayakuklewula.

Niyakukhala ngezigaxa zezithelo zomvini

ezomileyo zaseKhiri Haresheti

nidabukile kakhulu.

₈Ngokuba amasimu aseHeshiboni abunile

kanye nomvini waseSibima;

amakhosi ezizwe achithile amagatsha awo;

afinyelela naseJazeri, edukela nasehlane;

amahlumela awo elulwa,

awela ulwandle.

₉Ngalokho ngiyakukhalela umvini waseSibima

njengokukhala kweJazeri,

ngikumanzise, Heshiboni, ngezinyembezi zami,

nawe Elehale,

ngokuba phezu kwezithelo zakho nokuvuna kwakho

kuwile ukumemeza kwempi.

₁₀Ukuthokoza kususiwe kanye nokujabula ensimini;

nasezivinini akuhlatshelelwa, akujatshulwa;

abanyathelayo abalinyatheli iwayini ezikhamweni;

ngenze ukuba kuphele ukumemeza.

₁₁Ngalokho inhliziyo yami

iyakhala njengehabhu* ngoMowabi,

nokuphakathi kwami ngeKhiri Heresi.

₁₂Kuyakuthi lapho uMowabi esebonakala,

azikhathaze endaweni ephakemeyo,

aye endlini yakhe engcwele ukuba athandaze,

angaphumeleli.

“IDamaseku liyakususwa,

lingabe lisaba ngumuzi,

libe yinxiwa nencithakalo

₂eshiyiwe kuze kube phakade,

neyakuba ngeyemihlambi ebuthisa khona,

ingesatshiswa muntu.

₃Inqaba iyakuphela kwa-Efrayimi,

nombuso eDamaseku,

nensali e-Aramu,

kube njengodumo lwabantwana bakwa-Israyeli,”

usho uJehova Sebawoti.

₄“Kuyakuthi ngalolo suku

udumo luka Jakobe lube buthakathaka,

kuzace ukukhuluphala kwenyama yakhe.

₅Kuyakuba njengomvuni ovuna amabele asemi

nengalo yakhe evuna izikhwebu,

kube njengokukha izikhwebu esiGodini samaRefa.

₆Kepha umkhothozo uyakusala khona njengokushaywa kweminqumo:

izithelo ezimbili noma ezintathu enhlokweni phezulu,

ezine noma eziyisihlanu emagatsheni omuthi,”

usho uJehova uNkulunkulu ka-Israyeli.

₇Ngalolo suku abantu bayakumbheka uMenzi wabo,

namehlo abo ayakumbuka oNgcwele ka-Israyeli.

₈Abayikubheka ama-altare abo,

umsebenzi wezandla zabo,

bangabuki okwenziwe yiminwe yabo,

o-Ashera* nama-altare empepho.

₁₀Ngokuba ukhohliwe uNkulunkulu wokusindiswa kwakho,

awukhumbulanga idwala lamandla akho;

ngalokho noma utshala izithombo ezimnandi,

uhlwanyele amahlumela angaziwayo,

₁₁ngosuku lokutshala kwakho,

lapho ubiyela,

nangokusa kokuhlwanyela kwakho,

lapho wenza ukuba kuqhakaze,

ukuvuna kuyakubaleka ngosuku losizi

nolobuhlungu obungenakupholiswa.

₁₂Wo kukho ukuhlokoma kwezizwe eziningi

ezihlokoma njengokuhlokoma kwezilwandle,

nomsindo wokuxokozela kwabezizwe

abaxokozela njengokuxokozela kwamanzi amaningi.

₁₃Izizwe ziyaxokozela njengokuxokozela kwamanzi amaningi,

kodwa uyakuzisola, zibalekele kude,

zixoshwe njengamakhoba asezintabeni phambi komoya,

nothuli olushwilayo phambi kwesiphepho.

₁₄Ngesikhathi sokuhlwa, bheka, yingebhe;

kungakasi azisekho.

Yilesi esiyisabelo sabasiphangayo,

nenkatho yabasamukayo.

₁Wo kuwena lizwe lokuhashaza kwamaphiko

eliphesheya komfula waseKushe,

₂elithuma izigijimi ngolwandle

nangemikhumbi yemihlanga phezu kwamanzi.

Hambani nina zithunywa ezinejubane,

niye esizweni esidephileyo nesikhazimulayo,

kubantu abesabekayo lapha nasekudeni,

isizwe esinamandla amakhulu nesinyathelayo,

esilizwe laso lidatshulwe yimifula.

₃Nonke nina enakhileyo ezweni

nani nonke enihlezi emhlabeni

bhekani, lapho ibhanela* liphakanyiswa ezintabeni;

zwanini, lapho icilongo libethwa.

₄Ngokuba uJehova ushilo kimi kanje, wathi:

“Ngiyakubheka ngithule, ngisendaweni yami,

njengokubalela okukhazimula ekukhanyeni kwelanga,

njengefu lamazolo ekufudumaleni ngesikhathi sokuvuna.”

₅Ngokuba kungakafiki ukuvuna,

nokukhahlela sekuphelile,

nembali isiphenduka isithelo esivuthiweyo,

uyakunquma amahlumela ngawocelemba,

awasike amagatsha, awasuse.

₆Ayakushiywa ndawonye abe ngawamanqe asezintabeni

nawezilwane zasemhlabeni;

amanqe ayakuhlala ehlobo phezu kwawo,

nazo zonke izilwane zomhlaba

ziyakuhlala ebusika phezu kwawo.

₇Ngaleso sikhathi kuyakulethwa isipho kuJehova Sebawoti

yibo abantu abadephileyo nabakhazimulayo,

sivela kubantu abesabekayo lapha nasekudeni,

isizwe esinamandla amakhulu nesinyathelayo,

esilizwe laso lidatshulwe yimifula,

endaweni yegama likaJehova Sebawoti,

intaba yaseSiyoni.

Bheka, uJehova ukhwele phezu kwefu elinejubane,

uyeza eGibithe;

onkulunkulu baseGibithe bayathuthumela ebusweni bakhe,

nezinhliziyo zabaseGibithe ziphela amandla phakathi kwabo.

₂“Ngiyakuvusa abaseGibithe

ukuba bamelane nabaseGibithe,

balwe, kube yilowo nalowo nomfowabo,

kube yilowo nalowo nomakhelwane wakhe,

umuzi nomuzi,

umbuso nombuso.

₃Umoya waseGibithe uyakuba yize ngaphakathi kwalo;

ngiyakuchitha amasu alo;

bayakufuna onkulunkulu,

nezinyanga, nabanamadlozi, nabathakathi.

₄Ngiyakubanikeza abaseGibithe

esandleni senkosi elukhuni,

nenkosi enamandla iyakubusa phezu kwabo,”

isho iNkosi uJehova Sebawoti.

₅Amanzi ayakuphela elwandle,

umfula wome, ushe.

₆Imifula iyakunuka,

imifudlana yaseGibithe iyakuncipha, yome,

kubune umhlanga nebungu.

₇Kuyakuba khona uqwathule ngaseNayile,

ngasogwini lweNayile,

nakho konke okutshaliwe ngaseNayile kuyakoma,

kuhlakazwe, kungabe kusababikho.

₈Abadobi bayakukhala, balile,

bonke abaphonsa udobo eNayile;

nabeneka amanetha emanzini bayakudabuka.

₉Bayakujabha abasebenza ngefilakisi* eliklayiweyo

kanye nabaluki belineni.

₁₀Izisekelo zalo ziyakwaphulwa,

bonke abasebenza ngokuqashwa badabuke ngenhliziyo.

₁₁Izikhulu zaseSowani ziyiziwula impela,

nesiluleko sabaluleki

abahlakaniphileyo bakaFaro siphendukile ubuwula;

ningasho kanjani kuFaro ukuthi:

“Mina ngiyindodana yabahlakaniphileyo,

ngiyindodana yamakhosi asendulo,” na?

₁₂Pho, baphi abahlakaniphileyo bakho na?

Mabakutshele, bakwazise

lokhu akucebile uJehova Sebawoti ngeGibithe.

₁₃Izikhulu zaseSowani ziphendukile iziwula,

izikhulu zaseNofi zikhohlisiwe;

balidukisile iGibithe

abangamatshe amagumbi ezizwe zalo.

₁₄UJehova uthulule umoya ophambeneyo phakathi kwabo,

baze balintengantengise iGibithe kuyo yonke imisebenzi yalo

njengesidakwa sintengantenga ebuhlanzweni baso.

₁₅IGibithe aliyikuba namsebenzi

oyakwenziwa yikhanda nomsila,

negatsha lesundu nomhlanga.

₁Makabongwe uJehova, idwala lami,

ofundisa izandla zami ukuhlasela

neminwe yami ukulwa,

₂umusa wami nenqaba yami,

umbhoshongo wami ophakemeyo nomkhululi wami,

isihlangu sami, nengiphephela kuye,

nothobisa abantu bami phansi kwami.

₃Jehova, uyini umuntu ukuba umazi,

nendodana yomuntu ukuba uyikhumbule, na?

₄Umuntu ufana nomoya;

izinsuku zakhe zinjengethunzi elidlulayo.

₅Thobisa amazulu akho, Jehova, wehle;

thinta izintaba, zithunqe.

₆Imibani mayinyazime, ubahlakaze;

thuma imicibisholo yakho, ubaphithizise.

₇Yelula isandla sakho phezulu,

ungikhulule, ungophule emanzini amakhulu

nasesandleni sabafokazi

₈abamlomo wabo ukhuluma inkohliso,

nesandla sabo sokunene singesokunene samanga.

₉Ngiyakuhlabelela kuwe Nkulunkulu isihlabelelo esisha;

ngogubhu olunezintambo eziyishumi ngiyakukuhubela.

₁₀Nguye onika amakhosi insindiso,

okhulula inceku yakhe uDavide enkembeni elimazayo.

₁₁Ngikhulule, ungophule esandleni sabafokazi

abamlomo wabo ukhuluma inkohliso,

nesandla sabo sokunene singesokunene samanga.

₁₂Lapho amadodana ethu enjengezithombo ezikhulileyo ebusheni bazo,

namadodakazi ethu enjengamatshe amagumbi abaziwe ngendlela yokwakhiwa kwezindlu zamakhosi;

₁₃lapho izingobo zethu zigcwele,

ziveza izinhlobo ngezinhlobo,

nezimvu zethu zizala ngezinkulungwane,

yebo, ngezinkulungwane eziyishumi emadlelweni ethu;

₁₄lapho izinkabi zethu zithweswe kakhulu,

nalapho kungekho ukufohla kwesitha nokungena empini nezikhalo ezitaladini zethu,

₁₅babusisiwe abantu abanjalo;

babusisiwe abantu abaNkulunkulu

wabo unguJehova.