To The Word – Day 53

₁“Bekani indlebe nina mazulu, ngiyakukhuluma;

umhlaba mawuzwe amazwi omlomo wami.

₂Imfundiso yami iyakuconsa njengemvula,

inkulumo yami ichiche njengamazolo,

njengomkhizo ohlazeni,

nanjengezihlambi etshanini,

₃ngokuba ngiyakumemezela igama likaJehova:

mnikeni uNkulunkulu wethu ubukhulu.

₄“Uyidwala, umsebenzi wakhe uphelele,

ngokuba zonke izindlela zakhe zingukulunga;

unguNkulunkulu wokuthembeka ongenakonakala;

ulungile, uqotho yena.

₅“Bonile kuye;

abasibo abantwana bakhe, kuyisici sabo;

bayisizukulwane esiphambeneyo nesiyisigwegwe.

₆UJehova nimvuza kanjalo

nina bantu abayiziwula nabangahlakaniphile na?

Akasiye uyihlo owakudala na?

Wakwenza, wakubumba.

₇“Khumbula izinsuku zasendulo,

ubheke iminyaka yezizukulwane ngezizukulwane;

buza kuyihlo, uyakukulandisa,

nasemalungeni akho, akutshele.

₈Lapho oPhezukonke wazinika izizwe ifa lazo,

lapho wahlukanisa abantwana babantu,

wamisa imikhawulo yezizwe

njengokomumo wabantwana bakwa-Israyeli.

₉Ngokuba isabelo sikaJehova singabantu bakhe;

uJakobe uyisiqephu sefa lakhe.

₁₀“Wamfumana ezweni eliyihlane,

nasoqwatheni lomkhulungwane kwahlongasibi,

wamzungeza, wamnakekela,

wamgcina njengenhlamvu yeso lakhe.

₁₁Njengokhozi olunyakazisa isidleke salo,

lubhakuza phezu kwamazinyane alo,

wawelula amaphiko akhe, wabathatha,

wabathwala ngezimpaphe zakhe.

₁₂UJehova yedwa wamhola,

akwabakho unkulunkulu wabezizwe naye.

₁₃“Wamkhwelisa ezindaweni eziphakemeyo zomhlaba,

wadla izithelo zamasimu,

wammuncisa izinyosi edwaleni,

namafutha eweni lensengetsha,

₁₄namangqanga ezinkomo,

nobisi lwezimvu,

namafutha amawundlu,

nezinqama zohlobo lwaseBashani,

nezimbuzi,

namanoni omongo kakolweni;

egazini lezithelo zomvini waphuza iwayini.

₁₅“UJeshuruni wayesekhuluphala,

wakhaba;

usukhuluphele, uzimukile,

uchachambile;

wayesemshiya uNkulunkulu owamenza,

walidelela iDwala lensindiso yakhe.

₁₆Bamvusela umhawu ngawonkulunkulu babezizwe,

bamthukuthelisa ngezinengiso.

₁₇“Bahlabela amademoni angesibo onkulunkulu,

onkulunkulu ababengabazi,

onkulunkulu abasha,

abasand'ukuqhamuka,

ababengesatshwa ngoyihlo.

₁₈IDwala elakuzalayo awusalinakekeli,

ukhohliwe uNkulunkulu owakudalayo.

₁₉“UJehova wakubona,

wanengwa yibo,

ngenxa yokuncokoloza kwamadodana akhe

namadodakazi akhe.

₂₀Wayesethi:

‘Ngiyakubafihlela ubuso bami,

ngibone ukugcina kwabo ukuthi kuyakuba yini;

ngokuba bayisizwe esiphambeneyo,

abantwana okungekho kubo ukukholwa.

₂₁Bangivusele umhawu ngokungesiye uNkulunkulu,

bangithukuthelisile ngamaze abo;

ngiyakubavusela umhawu ngabangesiso isizwe,

ngibathukuthelise ngesizwe esiyisiwula.

₂₂Ngokuba umlilo uphenjiwe entukuthelweni yami;

uyasha kuze kube sendaweni yabafileyo engaphansi,

uqede umhlaba nezithelo zawo,

wokhele izisekelo zezintaba.

₂₃“ ‘Ngiyakubanqwabelela izinhlupheko,

ngiqedele imicibisholo yami phezu kwabo.

₂₄Bayakuphela indlala,

baqedwe ngukushisa komzimba,

nayisifo esibuhlungu,

ngibathumele amazinyo ezilwane,

kanye nesihlungu sezikhasayo othulini.

₂₅Ngaphandle inkemba iyakwaphuca,

ingebhe phakathi emakamelweni:

izinsizwa nezintombi,

oncelayo kanye nempunga.

₂₆Bengiyakuthi: “Ngiyakubaphephula,

ngiqede inkumbulo yabo kubantu,”

₂₇uma bengingesabi ukuncokoloza kwezitha,

funa abamelene nabo baduke,

funa bathi: “Isandla sethu siphakeme,

uJehova akenzanga konke lokhu.” ’

₂₈“Ngokuba bayisizwe esimasu aso aphelile,

akukho ukuqonda kubo.

₂₉Sengathi nga behlakaniphile

ukuba bakuqonde lokho,

bazindle ngokugcina kwabo.

₃₀Emunye angaxosha kanjani inkulungwane;

ababili bangabhengula kanjani

izinkulungwane eziyishumi,

uma iDwala labo lingathengisanga ngabo,

uJehova ebengabakhapheli, na?

₃₁Ngokuba idwala labo alinjengeDwala lethu;

nezitha zethu ziyakubona.

₃₂Ngokuba umvini wabo

ungumvini waseSodoma

nowamasimu aseGomora;

izithelo zabo ziyizithelo zenyongo,

amahlukuzo abo amunyu;

₃₃iwayini labo liyisihlungu sawodrako,*

lingubuthi obesabekayo bamabululu.

₃₄Lokho akubekelelwe kimina,

kunamathelisiwe engcebeni yami na?

₃₅Ngeyami impindiselo nembuyiselo

ngesikhathi sokushelela konyawo lwabo,

ngokuba usuku lwabo lwengozi selusondele,

izinto abazilungiselweyo ziyakuphuthuma.

₃₆“Ngokuba uJehova uyakubahlulela abantu bakhe,

azihawukele izinceku zakhe,

lapho ebona ukuthi amandla abo aphelile,

kungekho omunye ovalelweyo noma okhululekileyo.

₃₇Uyakuthi: ‘Baphi onkulunkulu babo,

idwala ababephephela kulo,

₃₈ababedla amanoni emihlatshelo yabo,

beliphuza iwayini

lomnikelo wabo wokuphuzwa, na?

Mabavuke, banisize,

babe yisivikelo senu.

₃₉“ ‘Bonani manje ukuthi mina,

yebo, mina nginguye,

akakho unkulunkulu ngaphandle kwami;

mina ngiyabulala, besengiphilisa,

ngilimazile, kepha ngiyakupholisa;

akakho ongophula esandleni sami.

₄₀Ngokuba ngiyaphakamisela isandla sami ezulwini,

ngithi: Mina ngiyaphila kuze kube phakade:

₄₁uma ngilola inkemba yami ebenyezelayo,

nesandla sami sibambelela ekwahluleleni,

ngiyakubuyisela impindiselo kwabamelene nami,

ngibaphindisele abangizondayo.’

₄₂“Ngiyakudakisa imicibisholo yami ngegazi,

inkemba yami idle inyama,

ngegazi lababuleweyo nelabathunjwa,

kuqala kuwo amakhanda abaholi bezitha.

₄₃Yenanelani abantu bakhe nina zizwe,

ngokuba uyakuphindisela igazi lezinceku zakhe,

abuyisele impindiselo kwabamelene naye,

enzele izwi lakhe nabantu bakhe ukubuyisana.”

₂“UJehova wavela eSinayi,

wabaphumela evela eSeyiri,

wanyampuza entabeni yasePharanu,

weza ephuma ezigidini zendawo engcwele;

ngakwesokunene sakhe kwavutha umlilo.

₃Yebo, uyazithanda izizwe,

bonke abangcwele bakhe basesandleni sakho;

bahlala ngasezinyaweni zakho,

bamukele okwamazwi akho.

₄UMose wasiyaleza umthetho,

ifa lenhlangano kaJakobe.

₅Waba yinkosi eJeshuruni,

lapho izinhloko zabantu zazibuthene,

zonke izizwe zakwa-Israyeli zindawonye.

₆“Makaphile uRubeni, angafi;

amadoda akhe abe ngumumo omkhulu.”

“Yizwa, Jehova, izwi likaJuda,

umlethe kubantu bakubo;

izandla zakho mazimlwele,

ube lusizo kwabamelene naye.”

“AmaThumimi nama-Urimi* akho

akuye othembekileyo wakho,

owamvivinya eMasa,

owaphikisana naye ngasemanzini aseMeriba,

₉owathi ngoyise nangonina: ‘Angibabonanga,’

angabavuma futhi abafowabo,

angabazi abantwana bakhe,

ngokuba baliqaphele izwi lakho,

bagcina isivumelwano sakho.

₁₀Bafundisa uJakobe izahlulelo zakho,

no-Israyeli umthetho wakho;

babeka impepho phambi kwamakhala akho,

nomnikelo oshiswa wonke e-altare lakho.

₁₁Busisa, Jehova, amandla akhe,

uyamukele imisebenzi yezandla zakhe;

sicila ukhalo lwabo abamvukelayo,

nolwabamzondayo, ukuba bangaphindi bavuke.”

“Othandiweyo kaJehova uyakuhlala

elondwa nguye;

uyamsibekela usuku lonke,

ahlale phakathi kwamahlombe akhe.”

“Izwe lakhe malibusiswe nguJehova

ngamagugu asezulwini, nangamazolo,

nangotwa olwenabileyo phansi,

₁₄nangamagugu ezithelo zelanga,

nangamagugu ezinhlamvu zenyanga,

₁₅nangezinto ezinqabileyo zezintaba zamandulo,

nangamagugu amagquma angunaphakade,

₁₆nangamagugu omhlaba nokugcwala kwawo,

nangentando enhle yowahlala esihlahleni;

isibusiso masifike ekhanda likaJosefa

nasokhakhayini lowahlukaniswa nabafowabo.

₁₇Izibulo lenkunzi yakhe liludumo lwakhe,

nezimpondo zenyathi ziyizimpondo zakhe;

uyakuqhubukusha ngazo izizwe zonke ekugcineni komhlaba;

zinjalo izigidi zakwa-Efrayimi,

zinjalo izinkulungwane zakwaManase.”

“Yenama, Zebuloni, ekuphumeni kwakho,

nawe Isakare, ematendeni akho.

₁₉Bayakubizela izizwe entabeni,

bahlabele khona imihlatshelo yokulunga;

ngokuba bayakumunca inala yezilwandle,

nengcebo ethukusiweyo yesihlabathi.”

“Makabusiswe owandisa uGadi:

uhlezi njengengonyamakazi,

udwengula ingalo nokhakhayi.

₂₁Wazikhethela isabelo sokuqala,

ngokuba sasigodliwe lapho isabelo somahluleli;

wahamba nezinhloko zabantu,

wafeza ukulunga kukaJehova,

nezahlulelo zakhe kanye no-Israyeli.”

“UDani uyibhongo lengonyama, elixhumayo, liphuma eBashani.”

“Nafetali, wanelisiwe ngomusa,

ugcwele isibusiso sikaJehova:

yidla wena intshonalanga neningizimu.”

“U-Asheri makabusiswe phezu kwabantwana,

amukeleke kubafowabo,

acwilise unyawo lwakhe emafutheni.

₂₅Imigoqo yakho iyakuba ngeyensimbi neyethusi,

nanjengezinsuku zakho oba njalo amandla akho.

₂₆“Akakho ofana noNkulunkulu, Jeshuruni,

okhwela izulu ukuyokusiza,

nomkhathi ngokuphakama kwakhe.

₂₇UNkulunkulu wasendulo uyisiphephelo,

nangaphansi zikhona izingalo ezingunaphakade;

wazixosha izitha phambi kwakho,

wathi: ‘Chitha.’

₂₈U-Israyeli usehlezi elondekile;

umthombo kaJakobe wahlukene wodwa

ezweni lamabele nelewayini;

yebo, amazulu akhe aconsisa amazolo.

₂₉Ubusisiwe wena Israyeli;

ngubani ofana nawe,

isizwe esisindisiwe nguJehova

oyisihlangu sosizo lwakho,

oyinkemba yakho ephakanyisiweyo.

Izitha zakho ziyakuzithobela wena,

unyathele izindawo zabo eziphakemeyo.”

“Namuhla, uma nilizwa izwi lakhe,

₈ningazenzi lukhuni izinhliziyo zenu njengasekucunuleni

ngosuku lokulingwa ehlane,

₉lapho oyihlo bangilinga bengihlola,

noma bebona imisebenzi yami iminyaka engamashumi amane;

₁₀ngalokho nganengwa yileso sizukulwane,

ngathi: ‘Bayaduka njalonjalo enhliziyweni yabo,

abazazanga izindlela zami,’

₁₁ngaze ngafunga ekuthukutheleni kwami,

ngathi: ‘Abayikungena ekuphumuleni kwami.’ ”

“Namuhla, uma nilizwa izwi lakhe,

ningazenzi lukhuni izinhliziyo zenu

njengasekucunuleni,”

₁Ubusisiwe umuntu ongahambi ngeziluleko zababi,

ongemi endleleni yezoni,

ongahlali enkundleni yabaklolodayo,

₂kepha okuthokoza kwakhe kusemthethweni kaJehova,

ozindla ngomthetho wakhe imini nobusuku.

₃Unjengomuthi otshaliwe ngasemifuleni yamanzi,

othela isithelo sawo ngesikhathi sawo,

oqabunga lawo lingabuni,

nakho konke akwenzayo uyakuba nenhlanhla kukho.

₄Ababi abanjalo,

kepha banjengamakhoba aphephethwa ngumoya.

₅Ngalokho ababi abayikuma ekwahlulelweni,

nezoni ebandleni labalungileyo.

₆Ngokuba uJehova uyayazi indlela yabalungileyo,

kodwa indlela yababi yobhubha.