To The Word – Day 189

₁Yeka ukuhlala kodwa komuzi owawunabantu abaningi!

Usungumfelokazi owawunezizwe eziningi.

Owawuyinkosikazi phakathi kwezifunda usungobuswayo.

₂Uyakhala nokukhala ebusuku,

izinyembezi zawo zisezihlathini zawo;

kawunamduduzi phakathi kwazo zonke izithandwa zawo;

bonke abangane bawo bawuphathe ngenkohliso,

sebe yizitha zawo.

₃UJuda uthunjiwe ngenxa

yokuhlupheka nobugqila obuningi;

uhlala phakathi kwabezizwe,

katholi ukuphumula;

bonke abamzingelayo bamfica ephakathi kobuhlungu.

₄Izindlela zaseSiyoni ziyalila

ngokuba kungeziwa emikhosini emisiweyo;

onke amasango achithekile,

abapristi balo bayabubula;

izintombi zalo ziyahlupheka,

nalo linomunyu.

₅Abamelene nalo sebe yinhloko,

izitha zalo zinokuthula,

ngokuba uJehova ulihluphile

ngenxa yobuningi beziphambeko zalo;

izingane zalo ziye ekuthunjweni ebusweni bezitha.

₆Bonke ubukhosi bumukile

endodakazini yaseSiyoni;

izikhulu zalo sezinjengezindluzele ezingafumani idlelo,

zihambile zingenamandla ebusweni babaxoshayo.

₇IJerusalema liyakhumbula ezinsukwini

zokuhlupheka kwalo nezinsizi zalo

konke okuhle okwakukhona ezinsukwini zasendulo;

lapho abantu balo bewela esandleni sezitha,

kungekho olisizayo,

abamelene nalo balibona,

bahleka ukuchithwa kwalo.

₈IJerusalema lalonile kakhulu;

ngalokho seliyisinengiso;

bonke ababelidumisa sebelidelela

ngokuba bebone ubunqunu balo;

seliyabubula nalo, libuyela emuva.

₉Ukungcola kwalo

kwakusemaphethelweni alo,

alikhumbulanga ukuphela kwalo;

lehlile ngokumangalisayo, alinamduduzi.

Bheka, Jehova, ukuhlupheka kwami,

ngokuba isitha sizikhulisile.

₁₀Isitha selulile isandla saso

phezu kwakho konke okumnandi kwalo,

ngokuba sibonile ukuthi abezizwe

bangene endlini yalo engcwele,

owabayala ukuthi abayikungena ebandleni lakho.

₁₁Bonke abantu balo bayabubula,

befuna isinkwa sabo;

banika okumnandi kwabo ngokudla

ukuba babuyise umphefumulo.

Bheka, Jehova, ubhekisise,

ngokuba ngiyadelelwa.

₁₂“Akulutho kinina nonke enidlula

ngendlela na?

Bhekani, nibone

ukuba kukhona yini ubuhlungu

obunjengobuhlungu bami engehlelwe yibo,

uJehova angihluphe ngabo ngosuku lokufutheka kwentukuthelo yakhe.

₁₃“Ephezulu ungithumele umlilo

emathanjeni ami, wawahlula;

wenekele izinyawo zami inetha,

wangibuyisela emuva.

Ungenze incithakalo,

ngiphele amandla usuku lonke.

₁₄“Iziphambeko zami zaboshwa ngesandla sakhe,

zaba yijoka;

zalukwa, sezisentanyeni yami;

wakhubekisa amandla ami.

INkosi inginikele esandleni sabo engingenakumelana nabo.

₁₅“INkosi ilahlile onke amaqhawe ami phakathi kwami;

ingibizele umhlangano ukuphahlaza izinsizwa zami;

iNkosi inyathele njengasesikhamweni sewayini

intombi eyindodakazi yakwaJuda.

₁₆“Ngiyakhala ngalokhu;

iso lami, iso lami liyamululeka izinyembezi,

ngokuba umduduzi wami obeyakubuyisa umphefumulo wami ukude nami.

Abantwana bami bachithekile,

ngokuba isitha sahlulile.”

₁₇ISiyoni liyelula izandla zalo,

akakho oliduduzayo.

UJehova uyalile ngoJakobe ukuba abamzungezayo babe yizitha zakhe.

IJerusalema linjengesinengiso phakathi kwabo.

₁₈“UJehova ulungile,

ngokuba ngihlubukile izwi lakhe.

Ake nizwe, bantu bonke,

nibone ubuhlungu bami.

Izintombi zami nezinsizwa zami ziye ekuthunjweni.

₁₉“Ngazibiza izithandwa zami, zangikhohlisa.

Abapristi bami namalunga ami bafela emzini,

besafuna ukudla ukuba babuyise umphefumulo wabo.

₂₀“Bheka, Jehova, ngokuba nginosizi;

izibilini zami ziyaxhaphazela.

Inhliziyo yami iphendukile phakathi kwami,

ngokuba ngihlubukile nokuhlubuka.

Endle yinkemba eyaphucayo,

ekhaya ngukufa.

₂₁“Bezwile ukuthi ngiyabubula,

kepha anginamduduzi.

Zonke izitha zami zizwile ukuhlupheka kwami;

ziyathokoza ukuthi nguwe okwenzileyo.

Ululethile usuku olumemezileyo,

kepha ziyakuba njengami.

₂₂“Mabufike bonke ububi bazo ebusweni bakho,

wenze kuzo njengokwenza kwakho kimi

ngenxa yazo zonke iziphambeko zami,

ngokuba ukububula kwami kukhulu,

nenhliziyo idangele.”

₁Yeka ukwembesa kweNkosi indodakazi yaseSiyoni

amafu ngentukuthelo yayo.

Uphonsile ubuhle buka-Israyeli emhlabeni busuke ezulwini,

angasikhumbulanga isenabelo sezinyawo zayo

ngosuku lwentukuthelo yayo.

₂INkosi igwinyile onke amakhaya

kaJakobe ingahawukelanga.

Ngentukuthelo yayo, ibhidlizile izinqaba zendodakazi yakwaJuda,

yazidilizela emhlabathini,

yangcolisa umbuso nezikhulu zawo.

₃Yanquma ngokufutheka kolaka lwayo

zonke izimpondo zakwa-Israyeli,

yabuyisela emuva isandla sayo sokunene ebusweni bezitha,

yashisa uJakobe ngomlilo wamalangabi odla nxazonke.

₄Yansala umnsalo wayo njengesitha,

yema njengomelene nathi ngesokunene sayo,

yabulala konke okwakumnandi emehlweni ethu.

Etendeni lendodakazi yaseSiyoni yathulula ukufutheka kwayo njengomlilo.

₅INkosi isinjengesitha,

imgwinyile u-Israyeli;

yagwinya zonke izindlu zakhe zobukhosi,

yachitha izinqaba zakhe;

yandisile endodakazini yakwaJuda ukukhala nokulila.

₆Yachitha idokodo layo njengelensimu,

yaqeda indawo yayo yokuhlangana.

UJehova wenza ukuba kukhohlakale

imikhosi emisiweyo namasabatha eSiyoni,

wadelela ngokufutheka kolaka lwakhe inkosi nompristi.

₇INkosi yalilahla i-altare layo,

yanengwa yindlu yayo engcwele,

yanikela izingange zezindlu zayo zamakhosi esandleni sesitha.

Ziphakamise izwi endlini kaJehova njengasosukwini lomkhosi omisiweyo.

₈UJehova wayecebile ukuchitha ugange

lwendodakazi yaseSiyoni;

wawelula umucu wokulinganisa,

akabuyisanga isandla sakhe ekuchitheni;

wenza ukuba kukhale ugange nodonga,

kudangale kanyekanye.

₉Amasango alo ashona emhlabathini;

wachitha, wayaphula imigoqo yalo.

Inkosi nezikhulu zalo baphakathi kwezizwe,

lapho kungekho khona umthetho.

Nabaprofethi balo abatholi mbono kuJehova.

₁₀Amalunga endodakazi yaseSiyoni

ahlezi emhlabathini, athule;

athele uthuli emakhanda awo,

abhince indwangu yamasaka.

Izintombi zaseJerusalema zithobisela phansi amakhanda azo.

₁₁Amehlo ami ayaphela izinyembezi,

izibilini zami ziyaxhaphazela;

isibindi sami sithululelwe emhlabathini

ngenxa yokuchitheka kwendodakazi yabantu bami,

ngokuba izingane nabancelayo bayadangala ezigcawini zomuzi.

₁₂Bathi konina: “Aphi amabele newayini?”

lapho bedangala njengababulawayo ezigcawini zomuzi,

imiphefumulo yabo ithululelwe ezifubeni zawonina.

₁₃Ngingafakaza ngokuthini ngawe,

ngikufanise nani,

ndodakazi yaseSiyoni, na?

Ngingakulinganisa nani ukuba ngikududuze,

ntombi eyindodakazi yaseSiyoni na?

Ngokuba ukuchitheka kwakho kukhulu njengolwandle.

Ngubani ongakuphulukisa na?

₁₄Abaprofethi bakho bakubonele imibono eyize nobuwula;

abambulanga ukona kwakho ukuba babuyise ukuthunjwa kwakho.

Kepha bakubonele iziprofetho eziyize nezikhohlisayo.

₁₅Bonke abadlula ngendlela bakushayela ihlombe,

bancimfe, banikine amakhanda abo ngenxa yendodakazi yaseJerusalema ngokuthi:

“Yiwo lo muzi owawubizwa ngokuthi

ubuhle obupheleleyo nentokozo yomhlaba wonke na?”

₁₆Zonke izitha zikukhamisela umlomo wazo,

zincimfa, zigedla amazinyo, zithi:

“Siwugwinyile.

Impela yilo usuku esilulindele;

sesilufumene, silubonile.”

₁₇UJehova wenzile lokhu abekucebile;

uligcwalisile izwi lakhe,

ayeyale ngalo ezinsukwini zasendulo;

ubhidlizile engenasihawu,

wenza ukuba isitha sithokoze phezu kwakho,

waphakamisa uphondo lwabamelene nawe.

₁₈Izinhliziyo zabo zikhala eNkosini;

wena lugange lwendodakazi yaseSiyoni,

izinyembezi mazehle njengemifula imini nobusuku.

Mawungazivumeli ukuphumula,

inhlamvu yeso lakho ingayeki.

₁₉Vuka ukhale ebusuku ekuqaleni kwemilindo,

uthulule inhliziyo yakho njengamanzi phambi kobuso beNkosi;

phakamisa izandla zakho kuyo ngenxa yokuphila kwezingane

ezidangala ngendlala ezingosini zezitaladi zonke.

₂₀“Bheka, Jehova,

ubone ukuthi wenzile kanjalo kubani.

Abesifazane bayakudla yini izithelo zabo,

izingane eziphathiweyo kahle, na?

Abaprofethi nabapristi bayakubulawa endlini engcwele yeNkosi, na?

₂₁“Balele phansi ezitaladini,

abasha nabadala.

Izintombi zami nezinsizwa zami ziwile ngenkemba.

Wababulala ngosuku lwentukuthelo yakho,

wabulala ungahawukelanga.

₂₂“Wabiza njengasosukwini lomhlangano

izesabiso zami nxazonke;

akubangakho ngosuku lwentukuthelo

kaJehova owasindayo nowasalayo.

Labo engangibaphathile, ngabondla,

izitha zami zibaqedile.”

₁Ngingumuntu obone ukuhlupheka

ngentonga yentukuthelo yakhe.

₂Ungiholile, wangihambisa ebumnyameni,

kungesikho ekukhanyeni.

₃Impela uyangiphendulela isandla sakhe

ephinda njalo zonke izinsuku.

₄Ugugisile inyama yami nesikhumba sami,

waphula amathambo ami.

₅Ungakhele, wangihaqa

ngenyongo nangokushikashikeka.

₆Ungihlalisile ebumnyameni

njengabakade bafa.

₇Ungibiyele ukuze ngingaphumi,

wenza amaketanga ami ukuba asinde.

₈Nalapho ngikhala ngicela ukusindiswa,

uyavalela umkhuleko wami.

₉Ubiyele izindlela zami ngamatshe abaziweyo,

wagwegwisa imikhondo yami.

₁₀Ukimi njengebhere* eliqamekelayo

nengonyama ezindaweni ezisithekileyo.

₁₁Wachezukisa izindlela zami, wangidwengula,

wangenza incithakalo.

₁₂Wansala umnsalo wakhe,

wangimisa ngibe yisigcibisholo somcibisholo.

₁₃Wahlaba izinso zami

ngemicibisholo yesambo sakhe.

₁₄Sengingohlekwayo kubantu bonke,

ngihaywa usuku lonke.

₁₅Wangisuthisa ngokubabayo,

wangigcwalisa ngomhlonyane.

₁₆Waphula amazinyo ami ngohlalwane,

wangembesa umlotha.

₁₇Walahla kude nokuthula umphefumulo wami,

ngakhohlwa inhlanhla.

₁₈Ngathi:

“Amandla ami nethemba lami kuJehova kuphelile.”

₁₉Khumbula ukuhlupheka kwami nosizi lwami,

umhlonyane nenyongo.

₂₀Umphefumulo wami uyakukhumbula nokukukhumbula,

uthobile phakathi kwami.

₂₁Kepha yilokhu engiyakukubuyisela enhliziyweni yami,

ngalokho nginethemba:

₂₂ngumusa kaJehova ukuthi asiqediwe,

ngokuba ububele bakhe abupheli.

₂₃Busha ekuseni njalo;

ukuthembeka kwakho kukhulu.

₂₄UJehova uyisabelo sami,

usho umphefumulo wami;

ngakho ngiyakwethemba kuye.

₂₅UJehova muhle kwabamethembayo,

kumphefumulo omfunayo.

₂₆Kuhle ukumethemba nokulindela ngokuthula

ukusindisa kukaJehova.

₂₇Kuhle kumuntu ukuba athwale ijoka

ebusheni bakhe.

₂₈Makahlale yedwa, athule,

lapho emthwesa lona.

₂₉Makabeke umlomo wakhe othulini;

mhlawumbe kungaba khona ithemba.

₃₀Makanike isihlathi sakhe komshayayo,

asuthe ngenhlamba.

₃₁Ngokuba uJehova akayikulahla

kuze kube phakade.

₃₂Ngokuba noma edabukisile,

uyakuhawukela nokho ngokobukhulu bomusa wakhe.

₃₃Ngokuba akahluphi,

angadabukisi abantwana babantu ngenxa yokuba ekuthanda.

₃₄Ukuphahlaza phansi kwezinyawo

zonke iziboshwa zasemhlabeni,

₃₅nokuchezukisa imfanelo yomuntu

phambi kobuso boPhezukonke,

₃₆nokona umuntu ecaleni lakhe,

iNkosi ayikuboni lokhu na?

₃₇Kwasho ubani, kwenzakala,

iNkosi ingakuyalelanga, na?

₃₈Akuphumi okuhle nokubi

emlonyeni woPhezukonke na?

₃₉Ukhononelani umuntu ophilayo,

umuntu ojeziswa ngezono zakhe, na?

₄₀Masiphenye, sicinge izindlela zethu,

sibuyele kuJehova.

₄₁Masiphakamise izinhliziyo zethu kanye nezandla zethu

kuNkulunkulu ezulwini.

₄₂Siphambukile, sahlubuka;

wena awukuyekelanga.

₄₃Wazembesa ulaka, wasixosha,

wabulala, ungahawukelanga.

₄₄Wazembesa ifu,

ukuze imikhuleko yethu ingafinyeleli.

₄₅Usenze umphucuzo nemfucumfucu

phakathi kwabantu.

₄₆Zonke izitha zethu

zisikhamisele imilomo yazo.

₄₇Uvalo nomgodi kusehlele,

ukubhujiswa nokuchithwa.

₄₈Iso lami liyamululeka imifula yamanzi

ngenxa yokuchithwa kwendodakazi yabantu bami.

₄₉Iso lami liyamululeka, alinqamuki;

akukho ukukhawuka,

₅₀aze abheke uJehova,

abone esezulwini.

₅₁Iso lami lenza umphefumulo wami ube buhlungu

ngenxa yawo onke amadodakazi omuzi wakithi.

₅₂Abayizitha zami ngeze

bangizingele nokungizingela njengenyoni.

₅₃Banqume ukuphila kwami emgodini,

bangiphonsa ngetshe.

₅₄Amanzi aminzisa ikhanda lami.

Ngathi: “Nginqunyiwe.”

₅₅Ngalibiza igama lakho, Jehova,

ngisemgodini phansi.

₅₆Wezwa izwi lami;

ungasithezi indlebe yakho

lapho ngikhalela ukusizwa.

₅₇Wasondela ngosuku

lokubiza kwami, wathi: “Ungesabi.”

₅₈Nkosi, umela indaba yomphefumulo wami,

uyahlenga ukuphila kwami.

₅₉Jehova, uyabona ukoniwa kwami;

thetha indaba yami.

₆₀Uyabona konke ukuphindisa kwabo

nawo onke amacebo abo ngami.

₆₁Uyezwa inhlamba yabo, Jehova,

nawo onke amacebo abo ngami,

₆₂izindebe zabangivukeleyo

nemicabango yabo ngami izinsuku zonke.

₆₃Bheka ukuhlala kwabo nokuvuka kwabo;

ngihaywa yibo.

₆₄Uyakubaphindisela, Jehova,

ngokwemisebenzi yezandla zabo.

₆₅Uyakubanika isimbozo senhliziyo,

isiqalekiso sakho sibe phezu kwabo.

₆₆Uyakubaxosha ngentukuthelo,

ubabhubhise,

bangabe besaba khona phansi kwezulu likaJehova.

₁Yeka ukufiphala kwegolide

nokuguquka kwegolide elihle!

Amatshe endlu engcwele ahlakazekile

ezingosini zazo zonke izitaladi.

₂Amadodana anqabileyo aseSiyoni,

elingene negolide elihle,

yeka ukuthiwa kwawo ayizitsha zebumba,

imisebenzi yezandla zombumbi!

₃Namakhanka ehlisa,

ancelise amazinyane awo.

Indodakazi yabantu bami isinonya, njengezintshe zasehlane.

₄Ulimi loncelayo lunamathela

olwangeni lwakhe ngokoma.

Izingane zicela isinkwa,

kepha akakho ozihlephulelayo.

₅Abakade bedla okumnandi

sebechithakele ezitaladini.

Ababekhuliswa ngokububende sebesingatha izala.

₆Ukona kwendodakazi yabantu bami

kukhulu kunesono saseSodoma

elachithwa ngokuphazima kweso,

kungasondelanga zandla kulo.

₇Abakhulu balo babehlambulukile kunongqoqwane,

babe mhlophe kunobisi;

imizimba yabo yayibomvana kunekorali,*

isimo sabo sasinjengesafire.*

₈Ubuso babo sebumnyama kunelahle,

abaziwa ezitaladini.

Isikhumba sabo sinamathela emathanjeni abo,

sishwabene, saba njengomuthi.

₉Babe ngcono ababebulawa

ngenkemba kunababebulawa ngendlala,

ababuna behlatshiwe ngokuswela ukudla kwensimu.

₁₀Izandla zabesifazane abahawukelayo

zapheka izingane zabo;

zazingukudla kwabo ngokuchithwa kwendodakazi yabantu bami.

₁₁UJehova ufezile ukufutheka kwakhe,

uthululile ukufutheka kwentukuthelo yakhe;

uphembile umlilo eSiyoni oqedile izisekelo zalo.

₁₂Amakhosi omhlaba

ayengakholwa kanye nabo bonke abakhileyo ezweni

ukuthi abamelene nabo nezitha zabo

babeyakungena emasangweni aseJerusalema.

₁₃Kungenxa yezono zabaprofethi balo nobubi babapristi balo

ababechitha igazi labalungileyo phakathi kwalo.

₁₄Bazulazula njengezimpumputhe ezitaladini,

bengcolile ngegazi

ngangokuba zazingenakuthintwa izingubo zabo.

₁₅“Chezukani, ningcolile!”

bamemeza kubo:

“Chezukani, chezukani, ningathinti!”

Lapho bebaleka bezulazula,

bathi phakathi kwabezizwe:

“Abasayikugogobala lapha.”

₁₆Ubuso bukaJehova buyabahlakaza,

akasayikubanakekela.

Abahloniphi ubuso babapristi,

kababanga namusa kumalunga.

₁₇Amehlo ethu ayaphela ukubheka usizo lwethu oluyize;

ekulindeni kwethu silindela isizwe esingenakusindisa.

₁₈Bazingela izinyathelo zethu

ukuba singahambi ezigcawini zethu.

Ukugcina kwethu kuseduze,

izinsuku zethu zigcwele,

yebo, ukugcina kwethu kufikile.

₁₉Abasixoshayo babenejubane kunezinkozi zezulu;

basizingela ezintabeni,

basiqamekela ehlane.

₂₀Umoya wamakhala ethu,

ogcotshiweyo kaJehova,

wabanjwa emigodini yabo,

esathi ngaye:

“Phansi kwethunzi lakhe

siyakuphila phakathi kwezizwe.”

₂₁Jabula, uthokoze,

ndodakazi yakwa-Edomi,

ohlala ezweni lase-Uzi.

Indebe iyakudlulela nakuwena;

uyakudakwa, uzenze nqunu.

₂₂Ububi bakho sebuphelile,

ndodakazi yaseSiyoni,

kasayikukuthumba.

Ububi bakho,

ndodakazi yakwa-Edomi,

uyakubuhambela,

azambule izono zakho.

₁Khumbula, Jehova, esehlelwe yikho;

bheka, ubone ihlazo lethu.

₂Ifa lethu seliphendulelwe abafokazi,

nezindlu zethu kwabezizwe.

₃Siyizintandane, asinababa;

omame banjengabafelokazi.

₄Amanzi ethu siyawaphuza ngemali,

izinkuni zethu ziza ngentengo.

₅Abasixoshayo basezintayeni zethu;

sikhathele, asinakuphumula.

₆Sinike isandla sethu kulo iGibithe

nakulo i-Asiriya ukuba sisuthe isinkwa.

₇Obaba bona abasekho;

thina sithwala ububi babo.

₈Izigqila ziyasibusa;

akakho osikhulula esandleni sabo.

₉Sithola ukudla kwethu ngokuzidela amathambo

ngenxa yenkemba yasehlane.

₁₀Isikhumba sethu siyasha njengeziko

ngokushisa kwendlala.

₁₁Balala nabesifazane eSiyoni,

izintombi zasemizini yakwaJuda.

₁₂Izikhulu zaphanyekwa ngezandla zabo;

ubuso babadala ababuhloniphanga.

₁₃Izinsizwa zathwala amatshe okugaya,

abantwana bakhubeka phansi kwezinkuni.

₁₄Abadala baphelile esangweni,

nezinsizwa ekuhlabeleleni kwazo.

₁₅Intokozo yenhliziyo yethu iphelile;

ukusina kwethu kuphenduke ukulila.

₁₆Umqhele uwile ekhanda lethu.

Maye kithina, ngokuba sonile!

₁₇Ngalokho inhliziyo yethu idangele;

ngalezi zinto amehlo ethu afiphele,

₁₈ngenxa yentaba yaseSiyoni echithekile,

zize zihambe kuyo izimpungushe.

₁₉Wena Jehova umi phakade;

isihlalo sakho sobukhosi

sikhona ezizukulwaneni ngezizukulwane.

₂₀Usikhohlelwani kuze kube phakade,

usishiye izinsuku eziningi, na?

₂₁Sibuyisele kuwe Jehova, siyakubuya;

yenza izinsuku zethu zibe zintsha njengasendulo,

₂₂ngokuba usilahlile nokusilahla,

wasithukuthelela kakhulu.

₁UNkulunkulu uMninimandla onke,

uJehova, uyakhuluma, ubiza umhlaba

kusukela ekuphumeni kwelanga kuze kube sekushoneni kwalo.

₂ESiyoni eliphelele ebuhleni

uNkulunkulu uqhamile ekukhanyeni.

₃UNkulunkulu wethu uyeza, akayikuthula;

umlilo udla phambi kwakhe;

uphahlwe yisivunguvungu esikhulu.

₄Ubiza izulu ngaphezulu

kanye nomhlaba ukuba ahlulele isizwe sakhe:

₅“Buthelani kimi abangcwele bami

abenza isivumelwano nami ngomhlatshelo.”

₆Izulu lishumayela ukulunga kwakhe,

ngokuba uNkulunkulu ungumahluleli. Sela*

₇“Yizwa, sizwe sami, ngiyakukhuluma;

Israyeli, ngizakufakaza kuwe ukuthi:

NginguNkulunkulu,

uNkulunkulu wakho.

₈Angiyikukujezisa ngenxa yemihlatshelo yakho;

iminikelo yakho yokushiswa iphambi kwami njalo.

₉Angiyikuthatha nkunzi endlini yakho

nampongo ezibayeni zakho.

₁₀Ngokuba zingezami zonke izilwane zehlathi,

nezinkomo zasezintabeni eziyizinkulungwane.

₁₁Ngiyazazi zonke izinyoni zasezintabeni,

nezilwane zasendle zaziwa yimi.

₁₂Uma bengilambile,

bengingekutshele wena,

ngokuba ungowami umhlaba wonke nokugcwala kwawo.

₁₃Ngiyakudla yini inyama yezinkunzi,

ngiphuze igazi lezimpongo, na?

₁₄Nikela kuNkulunkulu umnikelo wokubonga,

uzigcwalise izithembiso zakho koPhezukonke;

₁₅ngibize ngosuku lwenhlupheko;

ngiyakukukhulula,

wena uyakungidumisa.”

₁₆Kepha komubi uNkulunkulu uthi:

“Yini ukuba ushumayele izimiso zami,

uphathe isivumelwano sami ngomlomo wakho,

₁₇ingani uyazonda ukuqondiswa,

amazwi ami uwalahla emva kwakho, na?

₁₈Uma ubona isela, uvumelana nalo;

neziphingi uhlanganyela nazo.

₁₉Umlomo wakho uwuyekela ebubini;

ulimi lwakho luqamba inkohliso.

₂₀Uhlala uhleba umfowenu;

unyevuza indodana kanyoko.

₂₁Lokho ukwenzile, ngathula;

ushaye sengathi nginjengawe;

ngizakukulaya, ngikubeke phambi kwamehlo akho.

₂₂“Qaphelani lokho nina enikhohlwa uNkulunkulu,

funa nginidwengule,

kungabikho osindisayo.

₂₃Onikela ngomnikelo wokubonga uyangidumisa;

oqaphela indlela yakhe

ngiyakumbonisa insindiso kaNkulunkulu.”