To The Word – Day 172

₁Igama elihle lingcono kunamafutha amahle,

nosuku lokufa lungcono kunosuku lokuzalwa.

₂Kungcono ukuya endlini yokulila

kunokuya endlini yedili,

ngokuba lokho kungukuphela kwabantu bonke;

nophilayo makakubeke enhliziyweni yakhe.

₃Usizi lungcono kunokuhleka,

ngokuba ngokudabuka kobuso

inhliziyo yenzelwa okuhle.

₄Inhliziyo yabahlakaniphileyo isendlini yokulila,

kepha inhliziyo yeziwula isendlini yentokozo.

₅Kungcono ukuzwa ukukhuza kohlakaniphileyo

kunokuba umuntu ezwe ukuhlabelela kweziwula.

₆Njengokucacamba kwezintathawe eziphansi kwekhanzi,

kunjalo ukuhleka kweziwula.

Nalokho kuyize.

₇Impela ukucindezela kuyamhlanyisa ohlakaniphileyo,

nokuthengwa ngomvuzo kuchitha ingqondo.

₈Kungcono ukuphela kwendaba kunokuqala kwayo;

onomoya obekezelayo ungcono kunoziphakamisayo.

₉Ungasheshi ukuthukuthela emoyeni wakho,

ngokuba ulaka luhlala ezifubeni zeziwula.

₁₀Ungasho ukuthi:

“Kwenziwa kanjani ukuba izinsuku zokuqala

zazizinhle kunalezi na?”

Ngokuba awubuzi kanjalo ngokuhlakanipha.

₁₁Ukuhlakanipha kuhle njengefa,

yebo, kunenzuzo kwabalibonayo ilanga,

₁₂ngokuba kusemthunzini wokuhlakanipha

njengasemthunzini wemali,

kepha inzuzo yokwazi

ingeyokuba ukuhlakanipha

kulondoloza ukuphila kwalowo onakho.

₁₃Bona umsebenzi kaNkulunkulu,

ngokuba ngubani ongelula lokho akugobileyo na?

₁₄Yenama ngosuku lwenhlanhla,

kepha ngosuku olubi qonda ukuthi

nalolu uNkulunkulu ulwenzile njengalolo,

ukuze umuntu angafumani lutho

oluyakuba khona emva kwakhe.

kukhona olungileyo obhubhile ekulungeni kwakhe,

kukhona nomubi owelula ukuphila kwakhe ebubini bakhe.

₁₆Ungabi ngolungileyo ngokudluleleyo,

ungazenzi ohlakaniphileyo kakhulu;

uzichithelani na?

₁₇Ungabi mubi ngokudluleleyo,

ungabi yisiwula;

uyakufelani kungakabi yisikhathi na?

₁₈kuhle ukuba ubambelele kulokhu,

yebo, ungabuyisi isandla sakho nakulokho,

ngokuba owesaba uNkulunkulu

uyakuphumelela kukho konke.

₁₉Ukuhlakanipha kumenza ohlakaniphileyo

ukuba abe namandla kunababusi abayishumi abasemzini.

₂₀Ngokuba akukho muntu emhlabeni

olungileyo kangaka ukuba enze okuhle, angoni.

₂₁Ungabeki inhliziyo yakho

emazwini onke akhulunywayo,

funa uzwe inceku yakho ikuthuka,

₂₂ngokuba kaninginingi inhliziyo yakho

iyazi ukuba nawe ubathukile abanye.

“Ngiyakuhlakanipha,”

kepha kwakusala kude nami.

₂₄Okude nokujulile kakhulu,

ngubani ongakufumana na?

₂₅Ngase ngiphenduka

ukuba inhliziyo yami yazi, ihlole,

ifune ukuhlakanipha nendikimba yezindaba

ukuyokwazi ububi ukuthi bungubuwula,

nobuwula ukuthi bungubuhlanya.

₂₆Ngase ngifumana okubaba kunokufa:

owesifazane onhliziyo yakhe iyizingibe namanetha,

nezandla zakhe ziyizibopho;

omuhle phambi kukaNkulunkulu uyakuphunyuka kuye,

kepha isoni siyakubanjwa nguye.

“Ngibeka okunye kokunye

ukuba ngithole indikimba yezindaba,

₂₈nokusafunwa ngumphefumulo wami,

ngingakakufumani kodwa:

indoda inye phakathi kwenkulungwane ngiyifumene,

kepha owesifazane phakathi kwabo bonke labo angimfumananga.

₂₉Bheka, lokhu kuphela ngikufumene

ukuthi uNkulunkulu wamenza umuntu waba qotho,

kepha bona bafunile amacebo amaningi.”

₁Ngubani onjengohlakaniphileyo na?

Ngubani owazi ukuchasisela indaba na?

Ukuhlakanipha komuntu kuyakhanyisa ubuso bakhe,

nobulukhuni bobuso bakhe buyaguqulwa.

₂Ngithi: Gcina izwi lenkosi

ngenxa yesifungo ngoNkulunkulu.

₃Ungasheshi ukusuka ebusweni bayo,

ungemi endabeni embi,

ngokuba yenza konke ekuthandayo.

₄Ngokuba izwi lenkosi liyabusa;

ngubani ongasho kuyo ukuthi: “Wenzani na?”

₅Ogcina umyalo akayikwazi okubi:

nenhliziyo yohlakaniphileyo

iyakwazi isikhathi nokwahlulela,

₆ngokuba kukhona isikhathi nokwahlulela ezindabeni zonke;

nokho ububi bomuntu bukhulu phezu kwakhe,

₇lokhu engazi okuyakuba khona,

ngokuba ngubani ongamtshela ukuthi kuyakuba kanjani na?

₈Akukho muntu onamandla phezu komoya ukuba awuthiye,

futhi akakho obusa phezu kosuku lokufa;

ukukhululwa akukho empini,

nobubi abunakukhulula umninibo.

₁₁Ngabuye ngabona phansi kwelanga

ukuthi ukujaha akuyi ngabanejubane,

nokulwa ngamaqhawe,

nesinkwa ngabahlakaniphileyo,

nengcebo ngabaqondileyo,

nomusa ngabanokwazi,

ngokuba bonke bahlangabezana nesikhathi nethuba.

₁₂Ngokuba umuntu akasazi isikhathi sakhe;

njengezinhlanzi ezibanjwa enetheni elibi

nezinyoni ezibanjwa ogibeni,

kanjalo amadodana abantu abekelwa isihibe

ngesikhathi esibi,

lapho siwehlela ngokuzumayo.

₁₇Amazwi abahlakaniphileyo ezwakalayo ekuthuleni

mahle kunokumemeza kobusa phakathi kweziwula.

₁₈Ukuhlakanipha kungcono kunezikhali zokulwa,

ngokuba oyedwa owonayo angachitha okuhle okuningi.

₁Izimpukane ezifileyo

zenza amafutha omthaki ukuba anuke, abile;

kanjalo ubuwula obuncane

bulingana nokuhlakanipha nodumo.

₂Inhliziyo yohlakaniphileyo

ingakwesokunene sakhe,

kepha inhliziyo yesiwula ingakwesokhohlo.

₃Yebo, nasendleleni esihamba ngayo isiwula,

siyaphela ingqondo,

sisho kubo bonke ukuthi siyisiwula.

₄Uma umoya wombusi ukuvukela,

ungashiyi indawo yakho,

ngokuba ukubekezela kuvimba izono ezinkulu.

₅Kukhona ububi engibubonile phansi kwelanga,

bunjengephutha elivela kumbusi:

₆ubuwula bubekwa ezindaweni eziningi eziphakemeyo,

kepha abacebileyo bahlala kweziphansi.

₇Ngibonile izinceku zikhwele amahhashi,

nezikhulu zihamba phansi njengezinceku.

₈Omba umgodi uyakuwela kuwo,

nodiliza ugange uyakulunywa yinyoka.

₉Okhipha amatshe uyakulinyazwa yiwo,

nobanda izinkuni uyakuba sengozini ngazo.

₁₀Uma insimbi ibuthuntu,

umuntu engaloli usiko,

uyakhamelela ngamandla;

kepha okusizayo ukuphumelelisa kungukuhlakanipha.

₁₁Uma inyoka iluma ingakalunjwa,

umlumbi akasizi lutho.

₁₂Amazwi omlomo wohlakaniphileyo anomusa,

kepha izindebe zesiwula ziyasigwinya sona.

₁₃Ukuqala kwamazwi omlomo waso angubuwula,

nokugcina kokukhuluma kwaso kungubuhlanya obubi.

₁₄Isiwula siyandisa amazwi,

nokho umuntu akazi okuyakuba khona;

nalokho okuyakuba ngasemva kwakhe,

ngubani ongamtshela lokho na?

₁₅Umshikashika weziwula uyaziqoba,

ukuze zingazi nokuya emzini.

₁₆Maye kuwe lizwe onkosi yakho ingumntwana,

nezikhulu zakho zinedili ekuseni!

₁₇Ubusisiwe wena lizwe onkosi yakho iyindodana yabakhulu,

nezikhulu zakho zinedili ngesikhathi,

ziziqinise, zingadakwa.

₁₈Ngobuvila obukhulu indlu iyabola,

nangokwenqena kwezandla iyavuza.

₁₉Idili lenzelwa ukuhleka,

newayini liyenamisa ukuphila,

kepha imali iyimpendulo yakho konke.

₂₀Ungayiqalekisi inkosi nasemicabangweni yakho,

ungabathuki abacebileyo nasekamelweni lakho lokulala,

ngokuba inyoni yezulu iyakulihambisa izwi,

nokunamaphiko kuyakuyilanda indaba.

₁Thuma isinkwa sakho ebusweni bamanzi,

ngokuba uyakusifumana

emva kwezinsuku eziningi.

₂Yabela abayisikhombisa nabayisishiyagalombili,

ngokuba awukwazi okubi okuyakuba semhlabeni.

₃Uma amafu egcwele imvula,

ayayithulula emhlabeni;

futhi uma kuwa umuthi ngaseningizimu

noma ngasenyakatho,

endaweni lapho uwa khona umuthi,

uyakuba lapho.

₄Oqaphela umoya akayikuhlwanyela;

obheka amafu kayikuvuna.

₅Njengalokhu ungazi indlela yomoya ukuthi iphi,

nokubunjwa kwamathambo esizalweni sokhulelweyo,

kanjalo awuyazi nemisebenzi kaNkulunkulu owenza konke.

₆Hlwanyela imbewu yakho kusasa,

ungaphumuzi isandla sakho nakusihlwa,

ngokuba awazi ukuthi yiyiphi eyakuphumelela,

yilena noma yileyo,

noma ziyakuba zinhle zombili ngokufanayo.

₇Ukukhanya kumnandi,

yebo, kuhle emehlweni ukubona ilanga.

₈Noma umuntu ekhona iminyaka eminingi,

makathokoze ngayo yonke,

akhumbule nokho nezinsuku zobumnyama

ukuthi njengokuba ziziningi,

konke okufikayo kuyize.

₉Thokoza, nsizwa,

ebusheni bakho,

inhliziyo yakho ikuphe ukwenama

emihleni yobunsizwa bakho,

uhambe ngezindlela zenhliziyo yakho

njengokubona kwamehlo akho,

kepha yazi ukuthi ngakho konke lokho

uNkulunkulu uyakukungenisa ekwahlulelweni.

₁₀Khipha usizi enhliziyweni yakho,

udlulise okubi emzimbeni wakho,

ngokuba ubusha nobunsizwa buyize.

₁Futhi khumbula uMdali wakho

emihleni yobusha bakho,

zingakafiki izinsuku ezimbi,

ingakasondeli iminyaka osho ngayo ukuthi:

“Angithokozi ngayo;”

₂yebo, lingakabi mnyama ilanga,

nokukhanya, nenyanga,

nezinkanyezi, namafu engakabuyi emva kwemvula,

₃ngalolo suku lapho abalindi bendlu beyakuthuthumela,

amadoda anamandla agobe,

abasilikazi bayeke ngokuba beyingcosana,

abalunguza emafasiteleni bafiphazelwe,

₄iminyango ivalwe esitaladini,

lapho umsindo wokusila uncipha,

umuntu avuke ngezwi lenyoni,

izintombi zonke zokuhlabelela zithuliswe;

₅nalapho abantu besaba imimango

izesabiso zibe sendleleni,

umalimondi* ukhahlele,

intethe itotobe,

izithelo zesihlahla sekaphari*

zingabe zisaba namandla,

ngokuba umuntu useya endlini yakhe ephakade,

nabalilayo bazulazula esitaladini;

₆yebo, lingakagqabuki igoda lesiliva,

nokhamba lwegolide lungakaphahlazwa,

nembiza ingakafi ngasemthonjeni,

nesondo lingakaphuki ngasemgodini wamanzi,

₇uthuli lubuyele emhlabathini,

njengokuba lwalunjalo,

umoya ubuyele kuNkulunkulu owawunikayo.

₈“Ize leze,” usho uMshumayeli,

“konke kuyize.”

₁₃Nakhu ukuphela kwendaba,

lapho sekuzwakele konke:

Mesabe uNkulunkulu,

ugcine imiyalo yakhe,

ngokuba lokho kungokwabantu bonke.

₁₄Ngokuba uNkulunkulu uyakuyisa

uyakuyisa yonke imisebenzi

ekwahlulelweni kanye nakho konke

okufihliweyo, noma kuhle noma kubi.