To The Word – Day 169

₂“Ngubani lo owenza mnyama isiluleko

ngamazwi angenalwazi na?

₃Bopha izinkalo zakho njengendoda;

ngizakukubuza, wena ungazise.

₄Wawukuphi,

lapho ngasekela umhlaba, na?

Ngitshele, uma ukwazi ukuqonda.

₅Ngubani owanquma izilinganiso zawo,

ngokuba uyakwazi phela!

Ngubani owelula umucu wokulinganisa phezu kwawo na?

₆Izisekelo zawo zabekwa phezu kwani na?

Ngubani owabeka itshe lawo legumbi,

₇lapho izinkanyezi zokusa zahlabelela kanyekanye,

nawo onke amadodana kaNkulunkulu ajabula, na?

₈“Ngubani owavalela ulwandle ngezicabha,

lapha lwabhoboka kungathi lwaphuma esiswini,

₉lapho ngabeka amafu aba yisambatho salo,

nesigayegaye saba yimbeleko yalo,

₁₀nalapho ngalumisela umncele wami,

ngamisa imigoqo nezicabha,

₁₁ngathi:

‘Uyakufika lapha, kepha ungadluli;

lapha amaza akho aziqhenyayo ayakumiswa,’ na?

₁₂“Emihleni yakho uyalile ukusa,

wazisa umthende wokusa indawo yawo

₁₃ukuba ubambe amagumbi omhlaba,

ababi bathintithwe kuwo, na?

₁₄Uguquka njengebumba lophawu lokunamathelisa;

konke kuqhamuka kungathi kwembesiwe.

₁₅Ababi sebenqatshelwe ukukhanya kwabo,

nengalo ephakemeyo yaphuliwe.

₁₆“Wake wangena emithonjeni yolwandle,

wahamba phansi otweni, na?

₁₇Amasango okufa uwavulelwe,

wabona amasango ethunzi lokufa, na?

₁₈Uqondile ububanzi bomhlaba na?

Yisho, uma ukwazi konke.

₁₉“Iphi indlela eya lapho kuhlala khona ukukhanya,

nobumnyama-ke, iphi indawo yabo,

₂₀ukuze ukuyise emkhawulweni wakho,

uqonde imikhondo yendlu yakho, na?

₂₁Angithi uyakwazi,

ngokuba wawusuzelwe,

nomumo wemihla yakho mkhulu, na?

₂₂“Wake wangena ezinqolobaneni zeqhwa,

wabona izinqwaba zesichotho,

₂₃engiziqongelele isikhathi sokuhlupheka

nosuku lokulwa nolwempi, na?

₂₄Iphi indlela eya lapho ukukhanya

kwahlukaniselwa khona,

nalapho umoya wasempumalanga

uhlakazekela khona emhlabeni, na?

₂₅Ngubani ovulele ukuchichima kwamanzi umsele

nonyazi lokuduma indlela,

₂₆ukunisa imvula emhlabeni

lapho kungekho muntu khona,

nasehlane elingenamuntu,

₂₇ukusuthisa ihlane kwahlongasibi,

nokuhlumisa uhlaza, na?

₂₈Kukhona uyise wemvula na?

Ngubani owazala amathonsi amazolo na?

₂₉Iqhwa lavela esiswini sikabani,

nesithwathwa sazalwa ngubani, na?

₃₀Amanzi ayacasha kungathi ayitshe;

ubuso botwa buhlangene.

₃₁“Ungabopha amaketanga esiLimela,

uthukulule izintambo zeMpambano, na?

₃₂Ungakhipha izinkanyezi ngesikhathi sazo,

uhole iBhere* nabantwana balo, na?

₃₃Uyazazi izimiso zasezulwini,

umise ukumisa kwazo emhlabeni, na?

₃₄“Ungaphakamisela izwi lakho emafwini,

ukuze amanzi amaningi akusibekele, na?

₃₅Ungathuma imibani ukuba ihambe,

isho kuwe, ithi: ‘Bheka, silapha’?

₃₆Ngubani obeke ukuhlakanipha phakathi komuntu,

ngubani onika ukuqonda enhliziyweni na?

₃₇Ngubani ongabala amafu ngokuhlakanipha,

ngubani ongathulula izimvaba zasezulwini,

₃₈lapho uthuli luphenduka isigaxa,

namagabade anamathelane, na?

₃₉“Uyazingelela ibhubesikazi impango,

usuthise iphango lamabhongo,

₄₀lapho elala emihumeni yawo,

ehlezi esikhundleni eqamekele, na?

₄₁Ngubani olungisela igwababa ukudla kwalo,

lapho amaphuphu alo ekhala kuNkulunkulu,

ezulazula ngokuswela ukudla, na?

₁“Uyazi yini isikhathi sokuzala kwamagogo,

uqaphela ukuzala kwezindluzelekazi, na?

₂Ungazibala izinyanga eziziqedayo,

uyasazi isikhathi ezizala ngaso, na?

₃Ziyakhonkobala, zizala amazinyane azo,

zikhiphe okwemihlelo yazo.

₄Amazinyane azo aqina,

akhulela endle;

ayahamba,

angabe esabuyela kuzo futhi.

₅“Ngubani ovumele imbongolo yasendle ukuba ihambe;

ngubani owathukulula izintambo zayo,

₆engenza ihlane libe yindlu yayo,

nezwe likasawoti libe yindawo yayo yokuhlala, na?

₇Ihleka umsindo wedolobha,

ingezwa ukumemeza komshayeli.

₈Okufunyanwa ezintabeni kuyidlelo layo:

ifuna zonke izinto eziluhlaza.

₉“Inyathi iyakuthanda ukukhonza,

ihlale ebusuku emkhombeni wakho, na?

₁₀Ungayibophela inyathi ngentambo emseleni,

ibhuqe izigodi emva kwakho, na?

₁₁Ungayethemba, ngokuba amandla ayo makhulu,

ushiye umshikashika wakho kuyo, na?

₁₂Ungakholwa yiyo ukuba ibuyise imbewu yakho,

iyibuthele esibuyeni sakho, na?

₁₃“Amaphiko entshe ayaphaphaza,

kepha angamakhombe nezimpaphe zothando na?

₁₄Ngokuba iyashiya amaqanda ayo emhlabathini,

iwafudumeze othulini.

₁₅Iyakhohlwa ukuthi unyawo lungawachoboza

nokuthi isilwane sasendle singawanyathela.

₁₆Iphatha kalukhuni amazinyane ayo,

kungathi awasiwo awayo;

ayinangebhe yokuthi umshikashika wayo ungaba yize.

₁₇Ngokuba uNkulunkulu wayenza ukuba ikhohlwe ukuhlakanipha,

akayabelanga ukuqonda.

₁₈Lapho indizela phezulu,

ihleka amahhashi nabagibeli bawo.

₁₉“Nguwe onika ihhashi amandla alo,

wembathisile intamo yalo umhlwenga oyephuzelayo, na?

₂₀Ulenze ukuba lixhume njengenkumbi na?

Indumo yokuthimula kwalo iyesabeka.

₂₁Liyaphanda ezigodini,

liyesasa ngamandla alo,

liyaphuma ukuhlangana nezimpi.

₂₂Liyahleka ingebhe, alesabi,

alibuyi phambi kwenkemba.

₂₃Isambo siyalikhehlezela

nomkhonto okhazimulayo, nengcula.

₂₄Ngolaka lwalo nangokufutheka kwalo liyagwinya umhlabathi;

alimi ngokukhala kwecilongo.

₂₅Ekuzwakaleni kwecilongo lithi:

‘Nakho-ke;’

lihogela ukulwa kusekude,

nendumo yezinduna nokumemeza kwazo.

₂₆“Uklebe uyandiza ngokuqonda kwakho,

awelulele ngaseningizimu amaphiko akhe, na?

₂₇Ukhozi lwenyukela phezulu ngezwi lakho,

lwakhe isidleke salo phezulu, na?

₂₈Luhlala esiweni, lwakha khona,

eweni ledwala eliyinqaba yalo.

₂₉Lulapho luhlola ukudla kwalo;

amehlo alo akubona kusekude.

₃₀Amazinyane alo amunca igazi;

lapho kukhona abagwaziweyo,

lukhona nalo.”

₂“Osolayo uyakuphikisana

noSomandla na?

Omkhuza uNkulunkulu makaphendule.”

₄“Bheka, angiyinto yalutho;

ngingakuphendula ngokuthini na?

Ngibeka isandla sami emlonyeni wami.

₅Ngikhulumile kanye,

angisayikuphendula,

yebo, kabili, kepha angiqhubeki.”

₇“Bopha izinkalo zakho njengendoda;

ngizakukubuza, wena ungazise.

₈Imbala uyachitha ukwahlulela kwami,

ungilahle ukuba ube ngolungileyo, na?

₉Unengalo njengoNkulunkulu,

ungaduma ngezwi elinjengelakhe, na?

₁₀Zihlobise ngobukhosi nangokuphakama,

wembathe udumo nenkazimulo.

₁₁Thulula ukuphuphuma kwentukuthelo yakho,

ubheke bonke abazidlayo, ubathobise.

₁₂Bheka bonke abaziphakamisayo,

ubehlise phansi,

unyathele ababi ezindaweni zabo.

₁₃Bafihle othulini kanyekanye,

ubophe ubuso babo endaweni ethukusiweyo.

₁₄Khona ngiyakukudumisa nami

ngokuthi isandla sakho sokunene singakusindisa.

₁₅“Ake ubheke uBehemoti* engamenza kanye nawe;

uyadla utshani njengenkabi.

₁₆Bheka-ke, amandla akhe asezinkalweni zakhe,

nezikhwepha zakhe zisemisipheni yesisu sakhe.

₁₇Uqinisa umsila wakhe njengomsedari;*

imisipha yamathanga akhe yalukene.

₁₈Amathambo akhe anjengemibhobo yethusi;

izimbambo zakhe zinjengemigoqo yensimbi.

₁₉Ungowokuqala wezidalwa zikaNkulunkulu;

ekwenziweni waphiwa inkemba yakhe.

₂₀Izintaba ziyamvezela ukudla,

lapho kudlala khona izilwane zonke zasendle.

₂₁Ulala phansi kwezihlahla ezinomthunzi

ekusitheni kwemihlanga nasemaxhaphozini.

₂₂Izihlahla ezinomthunzi ziyamsibekela ngomthunzi wazo;

iminyezane yasemfuleni iyamphahla.

₂₃Bheka, noma kuphuphuma umfula, akethuki;

uyaqalaba, noma iJordani ligijigijimela emlonyeni wakhe.

₂₄Angabanjwa ebhekile,

liqhunjuzelwe ikhala lakhe umkhala, na?

₁“Ungakhipha uLeviyathani* ngodobo,

ucindezele phansi ulimi lwakhe ngentambo, na?

₂Ungafaka igoda lomhlanga ekhaleni lakhe,

ubhoboze umhlathi wakhe ngodobo, na?

₃Uyakwenza imikhuleko eminingi kuwe,

akhulume kuwe amazwi athambileyo, na?

₄Uyakwenza isivumelwano nawe

ukuba umthathe abe yinceku kuze kube phakade na?

₅Ungadlala naye njengenyoni,

umbophele amantombazana akho, na?

₆Abathengi bangathengiselana ngaye,

bamahlukanise phakathi kwabahwebi, na?

₇Ungagcwalisa isikhumba sakhe ngezinhlendla,

nekhanda lakhe ngamathatha ezinhlanzi, na?

₈Beka isandla sakho kuye;

khumbula ukulwa;

awusayikukuphinda.

₉Bheka, ithemba lakho liyakhohlisa;

nangokumbona nje uyawiswa phansi.

₁₀Akakho onesibindi sokumvusa.

Ngubani, pho, ongema phambi kwami na?

₁₁Ngubani ongandulele ukuba ngimbuyisele na?

Konke okuphansi kwezulu kungokwami.

₁₂“Angiyikuthula ngezitho zakhe,

nangendaba yamandla akhe,

nangesimo sakhe esihle.

₁₃Ngubani ongakhumula isambatho sakhe esingaphandle;

ngubani ongangena phakathi kwemihlathi yakhe emibili na?

₁₄Izicabha zobuso bakhe ngubani ongazivula na?

Amazinyo akhe ayesabeka nxazonke.

₁₅Umhlane wakhe uyizinhla zezihlangu;

zinamathelisiwe njengangophawu.

₁₆Zisondelene esinye kwesinye,

kungangeni moya phakathi kwazo.

₁₇Zinamathelene;

zibambelene, azinakwahlukaniswa.

₁₈Ukuthimula kwakhe kubengezela ngokukhanya;

amehlo akhe anjengezinkophe zokusa.

₁₉Emlonyeni wakhe kuphuma izihlanti,

nezinhlansi zomlilo ziyaqhasha.

₂₀Emakhaleni akhe kuphuma umusi njengasesocweni esibilayo

nasemihlangeni eshayo.

₂₁Ukuphefumula kwakhe kokhela amalahle,

nelangabi liphuma emlonyeni wakhe.

₂₂Entanyeni yakhe kuhlala amandla,

nengebhe iyaxhuma phambi kwakhe.

₂₃Amanya enyama yakhe anamathelene;

abunjiwe kuye, awanakususwa.

₂₄Inhliziyo yakhe iqinile njengetshe,

yebo, iqinile njengetshe lokusila elingaphansi.

₂₅Ekuvukeni kwakhe abanamandla bayesaba;

ngenxa yevuso baphela amandla.

₂₆Noma inkemba ifinyelela kuye, ayinakusiza,

noma umkhonto nomcibisholo nengcula.

₂₇Insimbi uyishaya utshani,

nethusi ibunga.

₂₈Umcibisholo awunakumxosha;

amatshe endwayimana aphenduka amabibi kuye.

₂₉Izagila uzishaya amabibi;

uyahleka ukugunquza kwengcula.

₃₀Ingaphansi lakhe linjengezindengezi ezibukhali;

uyenaba njengesibhuqo odakeni.

₃₁Wenza inzulu ibile njengekhanzi;

wenza ulwandle lufane nomfuma wamafutha.

₃₂Wenza umgudu ukhazimule emva kwakhe;

kungathi utwa lungwevu.

₃₃Emhlabeni akukho okufana naye

owenziwa abe ngongesabiyo.

₃₄Ubona konke okuphakemeyo;

uyinkosi phezu kwabo bonke abantwana bokuzikhukhumeza.”

₂“Ngiyazi ukuthi ungenza konke;

alinakuvinjwa icebo lakho.

₃Ngubani ositheza iziluleko engenakwazi na?

Ngikhulumile lokho ngingakuqondanga,

izimangaliso ezinkulu kunami ebengingazazi.

₄“Ake ungizwe, kukhulume mina;

ngiyakukubuza, wena ungazise.

₅Ngangizwile ngawe ngokuzwa kwezindlebe,

kepha manje iso lami liyakubona.

₆Ngalokho ngiyazinenga,

ngizisole othulini nasemlotheni.”