To The Word – Day 167

₁“Impela ukhona umthapho wesiliva,

nendawo yegolide abalicwengayo.

₂Insimbi iyakhishwa emhlabathini;

amatshe ayancibilikiswa abe yithusi.

₃Ubumnyama bubekelwa umkhawulo;

kuyacingwa kuze kube sekupheleni konke

amatshe esigayegaye nethunzi lokufa.

₄Baqhekeza umgodi kude nalapho behlala khona abantu,

lapho bekhohlakele khona lunyawo;

bayalenga, bajikajika kude nabantu.

₅Umhlaba-ke, kuwona kuvela ukudla,

kepha ngaphansi kwawo uyaphendukezelwa njengangomlilo.

₆Amatshe awo ayindawo yamasafire;*

inothuli lwegolide.

₇Lowo mgudu awaziwa yinqe,

neso loheshe aliwubonanga.

₈Izilwane ezinkulu azihambanga ngawo,

nengonyama ayidlulanga ngawo.

₉Uyelulela isandla sakhe etsheni lensengetsha,

agumbuqele izintaba kwasezimpandeni zazo.

₁₀Uqhekeza imihohoba emadwaleni;

iso lakhe liyabona konke okuyigugu.

₁₁Uyavimba imifula ukuba ingaconsi;

imfihlakalo uyayikhiphela ekukhanyeni.

₁₂“Kepha ukuhlakanipha kufumanisekaphi?

Iphi indawo yokuqonda na?

₁₃Umuntu kalazi inani lakho;

akutholakali ezweni labaphilayo.

₁₄Utwa luthi: ‘Akukho kimi;’

ulwandle luthi: ‘Akukho kimi.’

₁₅Akunakuzuzwa ngegolide;

intengo yakho ayinakulinganiswa nesiliva.

₁₆Kungelingane negolide lase-Ofiri,

neshohamu* eliyigugu, nesafire.*

₁₇Igolide nengilazi kungelingane nakho;

akunakwenaniswa ngezinto zegolide elicwengekileyo.

₁₈Akunakukhulunywa ngekorali* nangekristalu;*

intengo yakho iphezu kwamarubi.*

₁₉Itopazi* laseKushe alinakulinganiswa nakho,

kungelingane negolide elicwengekileyo.

₂₀“Ukuhlakanipha kuvelaphi na?

Indawo yokuqonda iphi na?

₂₁Kusithekile emehlweni abo bonke abaphilayo,

kufihliwe ezinyonini zezulu.

₂₂Ukubhujiswa nokufa kuthi:

‘Ngezindlebe zethu sizwile amahemuhemu akho.’

₂₃UNkulunkulu uyaqonda indlela yakho;

yena uyazi indawo yakho.

₂₄Ngokuba uyabeka imikhawulo yomhlaba,

abone konke okuphansi kwezulu.

₂₅Lapho emisela umoya ukusinda kwawo,

elinganisa amanzi ngezilinganiso,

₂₆lapho enzela imvula isimiso,

nonyazi lokuduma indlela,

₂₇khona wakubona, walanda ngakho,

wakuhlela, wakuphenya.

₂₈Wathi kubantu: ‘Bhekani, ukwesaba

iNkosi lokhu kungukuhlakanipha;

ukusuka ebubini kungukuqonda.’ ”

₂“Sengathi nga

nginjengasezinyangeni zakuqala,

njengasemihleni uNkulunkulu angigcina ngayo,

₃lapho isibani sakhe sasikhanya phezu kwekhanda lami,

ngihamba ebumnyameni ngokukhanya kwakhe,

₄yebo, njengasezinsukwini zokuvuthwa kwami,

lapho ubuhlobo bukaNkulunkulu babuphezu kwetende lami;

₅lapho uSomandla wabe esenami,

nabantwana bami babe besangizungeza;

₆lapho izinyathelo zami zagezwa ngamangqanga,

nedwala elalingakimi langithelela imifula yamafutha.

₇“Lapho ngaphuma ngaya esangweni ngasemzini,

ngalungisa isihlalo sami esigcawini,

₈izinsizwa zangibona, zacasha,

nezimpunga zasuka zema,

₉izikhulu zayeka ukukhuluma,

zabeka izandla emilonyeni yazo;

₁₀izwi labakhulu lathuliswa;

izilimi zabo zanamathela olwangeni lwabo.

₁₁Lapho indlebe yangizwa, yangibusisa,

nalapho iso langibona, langifakazela.

₁₂Ngokuba ngakhulula abampofu abakhalayo

kanye nentandane engenamsizi.

₁₃Isibusiso sobezakubhubha safika phezu kwami;

ngenza inhliziyo yomfelokazi ukuba ihube ngokujabula.

₁₄Ngembatha ukulunga,

kwaba yisambatho kimi;

ukwahlulelwa kwami kwakunjengengubo nomqhele kimi.

₁₅Ngaba ngamehlo ezimpumputhe nezinyawo zezinyonga.

₁₆Nganginguyise wabampofu;

indaba yengingamaziyo ngayiphenya.

₁₇Ngaphula imihlathi yowonayo,

ngahlwitha impango emazinyweni akhe.

₁₈“Ngase ngithi:

‘Ngiyakufa esidlekeni sami,

ngandise izinsuku zami zibe ngangesihlabathi.

₁₉Impande yami iyazivulela amanzi;

amazolo alala ubusuku bonke egatsheni lami;

₂₀udumo lwami lusha njalo kimi,

umnsalo wami wenziwa musha esandleni sami.’

₂₁“Abantu bangilalela belinda;

bathula ngesiluleko sami.

₂₂Emva kwamazwi ami ababe besakhuluma;

amazwi ami aconsela phezu kwabo.

₂₃Bangilindela njengemvula;

bangikhamisela imilomo yabo

njengokukhamisela imvula yamuva.

₂₄Ngabahleka bengenakukholwa;

ukukhanya kobuso bami kabakufiphazanga.

₂₅Uma ngangikhethile izindlela zabo,

ngangiyakuhlala emqoka,

ngahlalisa okwenkosi empini,

njengoduduza abalilayo.

₁“Kepha manje abancane

ngeminyaka kunami bayangihleka,

oyise babo engangibadelela

ukuba ngingababeki naphakathi kwezinja zezimvu zami.

₂Yebo, namandla ezandla zabo angangisiza kanjani,

abantu abaphelile iziphika, na?

₃Bondile ngokuswela nangendlala;

baququda ugwadule oluyize, olwaluyilohle nakuqala.

₄Bayakha imifino kasawoti ezihlahleni;

izimpande zezinwele zingukudla kwabo.

₅Bayaxoshwa phakathi kwabantu;

bamemeza emva kwabo njengasemva kwamasela.

₆Bahlala ezigodini ezesabekayo,

nesemihumeni yomhlaba, naseziweni.

₇Bayakhonya phakathi kwezihlahla;

phansi kwezimbabazane bayabuthana,

₈bengabantwana beziwula,

abantwana babangenamagama,

beshaywa, bexoshwa ezweni.

₉“Manje sengihaywa yibo,

yebo, sengiyisaga sabo.

₁₀Bayanengwa yimi, bemi kude nami;

abayeki ukungikhafulela ngamathe.

₁₁Bakhululile imichilo yabo,

bangithobisa;

balahlile itomu phambi kwami.

₁₂Ngakwesokunene kuvuka amachwensa;

agudlumeza izinyawo zami,

anginqwabelela izindlela zokubhubhisa.

₁₃Achitha umkhondo wami;

asebenzela ukubhujiswa kwami engazibambi.

₁₄Angena kungathi ngesikhala esibanzi;

phakathi kwencithakalo atheleka phezu kwami.

₁₅Ingebhe ithululwa phezu kwami;

njengomoya luyaxoshwa udumo lwami;

inhlalakahle yami iyadlula njengefu.

₁₆“Manje umphefumulo wami uthululiwe phakathi kwami;

izinsuku zosizi zingibambile.

₁₇Ebusuku amathambo ami ayabhotshozwa, asuke kimi;

ubuhlungu obungigedlayo abuphumuli.

₁₈Ngamandla amakhulu umzimba wami wonakele;

unamathela kimi njengentamo yesambatho sami.

₁₉Ungiphonsile odakeni;

sengifana nothuli nomlotha.

₂₀“Ngikhala kuwe,

kepha awungiphenduli;

ngimi lapha, uyangibuka nje.

₂₁Uyaguquka ukuze ungiphathe ngonya;

ngamandla esandla sakho uyangizingela.

₂₂Uyangiphakamisela emoyeni, ungikhwelisa kuwo,

wenze ukuba ngincibilike ngokuhlokoma kwesivunguvungu.

₂₃Ngokuba ngiyazi ukuthi ungiyisa ekufeni

nasendlini yokubuthana kwabaphilayo bonke.

₂₄“Kepha umuntu angelule isandla sakhe encithakalweni,

akhale uma esengozini, na?

₂₅Angimkhalelanga yini ozinsuku zakhe zazilukhuni na?

Umphefumulo wami awuhawukelanga abampofu na?

₂₆Lapho ngabheka okuhle,

kwafika okubi;

ngalindela ukukhanya,

kwafika ubumnyama.

₂₇Izibilini zami ziyaxhuxhuzela,

aziphumuli;

izinsuku zosizi zingehlele.

₂₈Ngihamba ngimnyama,

kungenziwanga yilanga;

ngisukuma ebandleni ngikhala.

₂₉Ngingumfowabo wamakhanka,

nomngane wezintshe.

₃₀Isikhumba sami simnyama,

siyebuza kimi;

amathambo ami ashile ngokushisa.

₃₁Ihabhu* lami seliphenduke isililo,

nomtshingo wami uyizwi labakhalayo.

₁“Ngenza isivumelwano namehlo ami:

ngingabuka kanjani intombi na?

₂Ngokuba siyini isabelo ebesiyakuvela

kuNkulunkulu phezulu,

nefa likaSomandla ebeliyakuvela ekuphakameni, na?

₃Akusikho ukubhubha kwabangalungile

nengozi kwabenza okubi na?

₄Yena akaboni izindlela zami,

abale izinyathelo zami zonke, na?

₅“Uma ngihambile ngamanga,

nonyawo lwami luphuthume enkohlisweni,

₆mangilinganiswe ngesilinganiso esilungileyo,

ukuze uNkulunkulu azi ukuphelela kwami.

₇Uma izinyathelo zami zichezukile endleleni,

inhliziyo yami yalandela amehlo ami,

uma kunamathela isisihla ezandleni zami,

₈mangihlwanyele, kudle omunye,

yebo, zisishulwe izithelo zami.

₉“Uma inhliziyo yami iyengwe ngowesifazane,

ngaqamekela ngasemnyango womakhelwane wami,

₁₀umkami makasilele omunye,

kuguqe abanye phezu kwakhe.

₁₁Ngokuba lokho ngabe kuyicala,

ngabe kungububi bokujeziswa.

₁₂Ngokuba kungumlilo odlayo kuze kube sekubhujisweni,

kusishulwe yonke inzuzo yami.

₁₃“Uma ngidelele ukwahlulelwa kwenceku yami

noma okwencekukazi yami,

lapho bephikisana nami,

₁₄ngiyakwenze njani,

lapho uNkulunkulu evuka,

nalapho engiphenya,

ngingaphendula ngokuthini na?

₁₅Owangenza mina esiswini,

wabenza nabo;

owasibumba esizalweni munye.

₁₆“Uma nginqabele abampofu abakufisayo,

ngenza amehlo omfelokazi ukuba afiphale,

₁₇ngadla ucezu lwami lwesinkwa ngingedwa,

ingaludlanga nentandane

₁₈hhayi, ikhulele kimi kwasebusheni bami njengakuyise;

kwasesizalweni sikamame ngangingumholi wabafelokazi

₁₉uma ngibone obhubhile ngokuswela isambatho,

kungekho okokuzimboza kompofu;

₂₀uma ukhalo lwakhe lungangibusisanga,

uma engafudunyezwanga nguboya bezimvu zami;

₂₁uma ngiphakamisele intandane isandla sami,

ngokuba ngabona usizo lwami esangweni,

₂₂maliwe ihlombe lami esiphangeni,

nengalo yami yaphulwe enkothweni yayo.

₂₃Ngokuba ngesaba ukubhujiswa nguNkulunkulu;

ngenxa yokuphakama kwakhe bengingenakwenza lutho.

₂₄“Uma ngibeke igolide libe yithemba lami,

ngathi egolideni elihle:

‘Ngithemba wena;’

₂₅uma ngithokozile, ngokuba imfuyo yami inkulu

nangokuba isandla sami sithole okuningi;

₂₆uma ngibone ukukhanya ukuthi kuyakhazimula,

nenyanga ukuthi ihamba ngencwazimulo,

₂₇kwayengwa inhliziyo yami esitha,

nomlomo wanga isandla sami,

₂₈nalokho kwakungububi bokujeziswa,

ngokuba ngangimphikile uNkulunkulu phezulu.

₂₉“Uma ngithokozile ngengozi yongizondayo,

ngaxhuma lapho eficwa ngokubi

₃₀kepha angivumelanga ulimi lwami ukuba lone

ngokucela ukuphila kwakhe ngesifungo

₃₁uma abantu betende lami bengashongo ukuthi:

‘Ngubani ongathola umuntu ongasuthanga ngenyama yakhe na?’ –

₃₂abafokazi kabalalanga phandle,

ngavulela izihambi iminyango yami –

₃₃uma ngisibekele iziphambeko zami njengo-Adamu

ngokufihla ububi bami esifubeni sami,

₃₄ngokuba ngesaba isixuku esikhulu,

ngaba novalo lokudelelwa ngabomndeni,

ngaze ngathula, angaphuma emnyango –

₃₅sengathi angaba khona ongizwayo

nantu uphawu lwami, makangiphendule uSomandla –

ngibe nencwadi ayilobileyo omelana nami!

₃₆Ngangiyakuyithwala emahlombe ami,

ngiyibophe ibe ngumqhele kimi,

₃₇ngimlandise ngomumo wezinyathelo zami,

ngisondele kuye njengesikhulu.

₃₈“Uma umhlaba wami ukhalile ngami,

nemisele yawo ililile kanyekanye;

₃₉uma ngidlile izithelo zawo ngingenamali,

ngenza ukuba bafe abaniniwo,

₄₀makuhlume ikhakhasi esikhundleni sikakolweni,

kuvele ukhula endaweni yebhali.”*

“Mina ngisemusha ngeminyaka,

nina nibadala;

ngalokho nganginamahloni,

ngesaba ukunitshela umqondo wami.

₇Ngathi: ‘Makukhulume izinsuku,

ubuningi beminyaka bazise ukuhlakanipha.’

₈Nokho kukhona umoya kumuntu;

ukuphefumula kukaSomandla kuyabaqondisa.

₉Abakhulu abahlakaniphile,

nabadala abaqondi ukwahlulela.

₁₀“Ngalokho ngithi: Ngizweni;

nami ngiyakusho umqondo wami.

₁₁Bhekani, ngilindele amazwi enu,

ngabeka indlebe emiqondweni yenu,

nisaphenya eniyakukusho.

₁₂Nganilalela nina;

bhekani, kwakungekho noyedwa owamahlula uJobe

nowaphendula amazwi akhe phakathi kwenu.

₁₃Maningasho ukuthi:

‘Sifumene ukuhlakanipha;

uNkulunkulu angamphengulula,

hhayi umuntu.’

₁₄Akahlelelanga mina amazwi akhe;

angiyikumphendula ngezinkulumo zenu.

₁₅“Bayakhungatheka, abasaphenduli;

baphelelwa ngamazwi.

₁₆Ngibalindele yini,

uma bengakhulumi, na?

Ngokuba bemi bengasaphenduli.

₁₇Nami ngiyakuphendula okwami,

ngitshengise nami umqondo wami.

₁₈Ngokuba ngigcwele amazwi;

umoya phakathi kwami uyangiqhubezela.

₁₉Bhekani, okuphakathi kwami kunjengewayini elingenambobo;

kucishe ukuqhuma njengezimvaba ezintsha.

₂₀Ngiyakukhuluma ukuba ngikhululeke;

ngiyakuvula izindebe zami ukuba ngiphendule.

₂₁Mangingakhethi ubuso bamuntu,

ngingathophi nobani.

₂₂Ngokuba angikwazi ukuthopha;

uma kunjalo, uMenzi wami angangisusa masinyane.

₁“Kepha manje, Jobe mawuzwe amazwi ami,

₂Bheka-ke, sengivula umlomo wami;

ulimi lwami lukhuluma emlonyeni wami.

₃Amazwi ami avela enhliziyweni yami eqotho;

okwaziwa yizindebe zami ziyakukhuluma ngesiminya.

₄Umoya kaNkulunkulu ungenzile,

nokuphefumula kukaSomandla kunginika ukuphila.

₅Uma ukwazi, ngiphendule;

zihlele phambi kwami, ume.

₆Bheka, nginjengawe maqondana noNkulunkulu:

ngibunjiwe nami ngebumba.

₇Bheka, ingebhe ngami ayiyikukugebhezisa,

nesandla sami esiphezu kwakho asiyikukusinda.

₈“Impela wakhuluma ezindlebeni zami,

ngezwa izwi lokukhuluma kwakho ukuthi:

₉Ngimsulwa, anginasiphambeko;

ngimhlophe, akukho okubi kimi.

₁₀Bheka, uthola amathuba ngami,

ungishaya isitha sakhe.

₁₁Ufaka izinyawo zami ezingongolweni,

aqaphele zonke izindlela zami.

₁₂“Bheka, ngiyakuphendula ukuthi awuthethanga kahle lokho,

ngokuba uNkulunkulu mkhulu kunomuntu.

₁₃Umphikiselani ngokuthi:

Akaphenduli nelilodwa lamazwi ami.

₁₄Ngokuba uNkulunkulu ukhuluma kanye,

yebo, nakabili, umuntu engakunaki.

₁₅Ephusheni nasembonweni wasebusuku,

lapho abantu behlelwe ngubuthongo obunzima,

bozela emacansini,

₁₆khona uyavula izindlebe zabantu,

abeke uphawu ekufundisweni kwabo,

₁₇ukuze aphambukise umuntu ekwenzeni kwakhe,

anqume ukuzidla kumuntu;

₁₈unqanda umphefumulo wakhe ekubhujisweni,

nokuphila kwakhe ukuba kungachithwa ngomkhonto.

₁₉Uyajeziswa ngobuhlungu nasecansini lakhe,

nangokulwa okungapheliyo emathanjeni akhe.

₂₀Inhliziyo iyanengwa ngukudla,

nomphefumulo wakhe uzonda ukudla okade ukufisa.

₂₁Inyama yakhe iyadliwa,

ingabe isabonwa;

amathambo akhe akade engabonakali aseqhamukile.

₂₂Umphefumulo wakhe uyasondela egodini,

nokuphila kwakhe kubabulali.

₂₃“Uma kukhona ingelosi kuye,

nehumusha noma yiliphi enkulungwaneni

lokuba litshele umuntu okumlungeleyo,

₂₄uNkulunkulu abeseba nomusa kuye, athi:

‘Mkhulule ukuba angehleli egodini,

sengitholile ihlawulo,’

₂₅inyama yakhe ibe ntsha kuneyomntwana,

abuyele emihleni yobusha bakhe,

₂₆khona uyakunxusa uNkulunkulu ukuba abe nomusa kuye,

abone ubuso bakhe ngokujabula,

abesebuyisela kumuntu ukulunga kwakhe.

₂₇Usehlabelela phambi kwabantu, uthi:

‘Ngonile, ngahlanekezela ukulunga,

kepha akwenziwanga kimi njengokufaneleyo:

₂₈uhlengile umphefumulo wami ukuba ungadluleli egodini;

ngiyakubona ukukhanya ngiphila.’

₂₉“Bhekani, konke lokhu uNkulunkulu uyakwenza

kabili, yebo, kathathu kumuntu

₃₀ukuba abuyise umphefumulo wakhe egodini,

akhanyiselwe ngokukhanya kwabaphilayo.

₃₁Yizwa, Jobe, ungilalele;

thula, mina ngizakukhuluma.

₃₂Uma unamazwi, ngiphendule;

khuluma, ngokuba ngifisa ukukuthethelela.

₃₃Uma ungenawo, ngilalele wena;

thula, ngiyakukufundisa ukuhlakanipha.”