To The Word – Day 143

₁Hlabelelani kuJehova ihubo elisha,

nihlabelele kuJehova,

mhlaba wonke.

₂Hlabelelani kuJehova, nibonge igama lakhe,

nimemeze insindiso yakhe imihla ngemihla.

₃Landani inkazimulo yakhe phakathi kwabezizwe,

izimangaliso zakhe phakathi kwabantu bonke.

₄Ngokuba mkhulu uJehova, udumisekile kakhulu;

uyesabeka phezu kwabo bonke onkulunkulu.

₅Ngokuba bonke onkulunkulu babezizwe bayizithombe,

kepha uJehova walenza izulu.

₆Udumo nobukhosi kusebusweni bakhe;

amandla nenkazimulo kusendlini yakhe engcwele.

₇Mnikeni uJehova nina mindeni yabantu,

mnikeni uJehova inkazimulo namandla.

₈Mnikeni uJehova inkazimulo yegama lakhe,

nilethe umnikelo,

ningene emagcekeni akhe.

₉Khulekani kuJehova,

nihlobe ubungcwele;

thuthumela ebusweni bakhe,

mhlaba wonke.

₁₀Thanini phakathi kwabezizwe: “UJehova uyinkosi,”

izwe lihlala liqinile, lingenakushukunyiswa;

uthetha amacala ezizwe ngobuqotho.

₁₁Malijabule izulu, umhlaba uthokoze;

maluhlokome ulwandle nokugcwala kwalo.

₁₂Mawename amasimu nakho konke okukuwo,

ijabule imithi yonke yehlathi

₁₃ebusweni bukaJehova, ngokuba uyeza,

yebo, uyeza ukwahlulela umhlaba;

uyakwahlulela izwe ngokulunga,

nezizwe ngokuthembeka kwakhe.

₁Bongani uJehova, nibize igama lakhe,

nizazise phakathi kwabantu izenzo zakhe.

₂Hlabelelani kuye, nimhubele,

nikhulume ngezimangaliso zakhe zonke.

₃Zibongeni egameni lakhe elingcwele;

mazithokoze izinhliziyo zabamfunayo uJehova.

₄Funani uJehova namandla akhe,

nifunisise ubuso bakhe njalo.

₅Khumbulani izimangaliso zakhe azenzileyo,

nezibonakaliso zakhe,

nezahlulelo zomlomo wakhe,

₆nina nzalo ka-Abrahama inceku yakhe,

nina bantwana bakaJakobe, abakhethiweyo bakhe.

₇Yena unguJehova uNkulunkulu wethu;

izahlulelo zakhe zisemhlabeni wonke.

₈Ukhumbulile isivumelwano sakhe kuze kube phakade,

izwi ayala ngalo izizukulwane eziyinkulungwane,

₉avumelana kuso no-Abrahama,

nesifungo sakhe ku-Isaka;

₁₀wasiqinisa kuJakobe,

saba ngumthetho,

naku-Israyeli, saba yisivumelwano esiphakade,

₁₁ethi: “Ngizakukunika izwe laseKhanani

libe yisabelo sefa lakho,”

₁₂lapho babe yingcosana ngomumo,

yebo, lapho babe yingcosana,

futhi babe yizihambi kulo.

₁₃Bazulazula ezizweni ngezizwe,

besuka kulo mbuso, beya kwabanye abantu.

₁₄Akavumelanga muntu ukubahlupha,

wajezisa amakhosi ngenxa yabo,

₁₅ethi: “Ningathinti abagcotshiweyo bami,

ningoni abaprofethi bami.”

₁₆Futhi wathuma indlala phezu kwezwe,

walwaphula uzime lwesinkwa.

₁₇Wathuma indoda phambi kwabo:

uJosefa wathengiswa abe yisigqila.

₁₈Balimaza izinyawo zakhe ngamaketanga,

waboshwa ngensimbi.

₁₉Kwaze kwaba yisikhathi elagcwaliseka ngaso izwi lakhe,

izwi likaJehova lamhola.

₂₀Inkosi yathuma yamthukulula,

umbusi wabantu wamkhulula.

₂₁Wamenza umphathi wendlu yakhe

nenduna yezinto zakhe zonke,

₂₂ukuze abophe izikhulu zakhe ngokuthanda kwakhe,

afundise amalunga akhe ukuhlakanipha.

₂₃U-Israyeli wayesefika eGibithe,

uJakobe wagogobala ezweni likaHamu.

₂₄Wandisa kakhulu abantu bakhe;

wabenza babe namandla kunezitha zabo.

₂₅Wayiguqula inhliziyo yabo ukuba bazonde abantu bakhe,

baphathe izinceku zakhe ngobuqili.

₂₆Wathuma uMose inceku yakhe,

u-Aroni abemkhethile.

₂₇Benza phakathi kwabo izibonakaliso zakhe

nezimangaliso ezweni likaHamu.

₂₈Wathuma ubumnyama,

wenza kwaba mnyama,

kepha baphambana namazwi akhe.

₂₉Waphendula amanzi abo aba yigazi;

wabhubhisa izinhlanzi zabo.

₃₀Izwe labo lagcwala amasele

nasezindlini zamakhosi abo.

₃₁Wakhuluma, kwavela izibawu

nezinsensane eminceleni yabo yonke.

₃₂Wabanika isichotho saba yimvula yabo,

amalangabi omlilo ezweni labo.

₃₃Washaya nemivini yabo nemikhiwane yabo;

waphula imithi yasezweni labo.

₃₄Wakhuluma, kwavela isikhonyane

nezinkumbi ezingenakubalwa.

₃₅Zona zadla imifino yonke yezwe lakubo,

zaqothula nezithelo zomhlabathi wabo.

₃₆Washaya namazibulo onke ezweni lakubo,

okokuqala kwamandla abo.

₃₇Wayesebakhipha benesiliva negolide,

kungekho ontengezelayo emindenini yakubo.

₃₈IGibithe lajabula ekuphumeni kwabo,

ngokuba ukwesaba kwabehlela.

₃₉Wendlala ifu lokubasibekela,

nomlilo wokukhanyisa ebusuku.

₄₀Bacela, waletha izigwaca,

wabasuthisa ngesinkwa sasezulwini.

₄₁Wavula idwala,

kwampompoza amanzi,

agobhoza emahlane njengomfula.

₄₂Ngokuba wakhumbula izwi lakhe elingcwele

no-Abrahama inceku yakhe.

₄₃Wayesekhipha abantu bakhe ngokujabula,

abakhethiweyo bakhe ngokuthokoza.

₄₄Wabapha amazwe abezizwe,

badla isithelo somsebenzi wabantu

₄₅ukuba baqaphele izimiso zakhe,

bagcine imithetho yakhe.

Haleluya!

₁Haleluya!

Bongani uJehova, ngokuba muhle,

ngokuba umusa wakhe umi phakade.

₂Ngubani ongalanda izenzo zamandla zikaJehova,

azwakalise lonke udumo lwakhe, na?

₃Babusisiwe abaqaphela ukwahlulela kwakhe,

owenza ukulunga ngezikhathi zonke.

₄Ngikhumbule, Jehova,

ngomusa onawo kubantu bakho,

ungihambele ngensindiso yakho,

₅ukuze ngibone inhlanhla yabakhethiweyo bakho,

ngithokoze ngentokozo yesizwe sakho,

ngizibonge kanye nefa lakho.

₆Sonile kanye nawobaba;

senzile okubi, sonakala.

₇Obaba abaqondanga izibonakaliso zakho eGibithe,

abakhumbulanga ubuningi bezenzo zakho zomusa;

bahlubuka ngaselwandle, uLwandle Olubomvu.

₈Nokho wabasindisa ngenxa yegama lakhe,

ukuze abonakalise amandla akhe.

₉Wakhuza uLwandle Olubomvu, lwasha;

wabaholela ekujuleni njengasehlane.

₁₀Wabasindisa esandleni sababazondayo,

wabakhulula esandleni sesitha.

₁₁Amanzi asibekela izitha zabo;

akwasala noyedwa kubo.

₁₂Khona bakholwa ngamazwi akhe,

bahlabelela udumo lwakhe.

₁₃Bashesha bakhohlwa imisebenzi yakhe,

abalindelanga isiluleko sakhe.

₁₄Bahaha nokuhaha ehlane,

bamlinga uNkulunkulu kwahlongasibi.

₁₅Wabanika abakufisayo,

kepha wathuma ukonda emiphefumulweni yabo.

₁₆Baba nomhawu ngoMose ekamu,*

nango-Aroni ongcwele kaJehova.

₁₇Umhlaba wavuleka,

wamgwinya uDathani,

wagqiba iviyo lika-Abiramu.

₁₈Kokheleka umlilo eviyweni labo;

ilangabi lashisa laqeda ababi.

₁₉Benza ithole eHorebe;

bakhuleka kuso isithombe esibunjiweyo.

₂₀Baguqula kanjalo inkazimulo yabo,

yaba njengenkabi edla utshani.

₂₁Bakhohlwa uNkulunkulu umsindisi wabo

owayezenzile izinto ezinkulu eGibithe,

₂₂izimangaliso ezweni likaHamu

nokwesabekayo ngaseLwandle Olubomvu.

₂₃Wathi ubezakubabhubhisa,

uma uMose okhethiweyo wakhe ebengemanga ebusweni bakhe ukubakhulumela,

ukuze amyekise intukuthelo yakhe, funa ababhubhise.

₂₄Badelela izwe elihle,

babengakholwa yizwi lakhe.

₂₅Bakhonona besematendeni abo;

babengalaleli izwi likaJehova.

₂₆Ngalokho waphakamisa isandla sakhe ngakubo

ukuba abawise ehlane,

₂₇awise nenzalo yabo phakathi kwabezizwe,

abahlakaze emazweni.

₂₈Bazihlanganisa noBali Peyori,

badla okuhlatshelwe abafileyo.

₂₉Bamcunula ngezenzo zabo;

kwabhoboka isifo phakathi kwabo.

₃₀Wayesesuka uFinehasi, wahlulela;

saphela isifo;

₃₁lokhu wakubalelwa njengokulunga

ezizukulwaneni ngezizukulwane kuze kube phakade.

₃₂Bamcunula ngasemanzini aseMeriba;

kwaba kubi kuMose ngenxa yabo.

₃₃Ngokuba baphambana noMoya wakhe;

wakhuluma ngamawala ngomlomo wakhe.

₃₄Abababhubhisanga abantu

uJehova abayaleza ngabo,

₃₅kepha bahlangana nabezizwe,

bafunda imisebenzi yabo.

₃₆Bakhonza izithombe zabo,

zaba lugibe kubo.

₃₇Amadodana namadodakazi abo

bawahlabela amademoni.

₃₈Bachitha igazi elingenacala,

igazi lamadodana abo namadodakazi abo

abawahlabela izithombe zaseKhanani;

izwe langcoliswa yigazi.

₃₉Bangcola kanjalo ngemisebenzi yabo,

baphinga ezenzweni zabo.

₄₀Intukuthelo kaJehova yokheleka ngakubantu bakhe;

ifa lakhe laba yisinengiso kuye.

₄₁Wabanikela esandleni sabezizwe;

ababazondayo bababusa.

₄₂Izitha zabo zabacindezela,

bathotshiswa phansi kwesandla sazo.

₄₃Kaningi wabakhulula;

kepha bahlubuka ngecebo labo,

bawiswa phansi ngobubi babo.

₄₄Nokho wanaka ukuhlupheka kwabo,

esezwile ukukhala kwabo.

₄₅Wabakhumbulela isivumelwano sakhe;

waphenduka ngokobuningi bomusa wakhe.

₄₆Wabatholisa ububele ebusweni babo bonke ababebathumbile.

₄₇Sisindise, Jehova Nkulunkulu wethu,

sibuthe kwabezizwe

ukuba sidumise igama lakho elingcwele,

sethabe ekukudumiseni.

₄₈Makabongwe uJehova uNkulunkulu ka-Israyeli

kusukela phakade kuze kube phakade.

Abantu bonke mabathi: “Amen.”

Haleluya!