To The Word – Day 130

“UJehova uyaduma eseSiyoni,

ezwakalise izwi lakhe eseJerusalema;

amadlelo abelusi ayakulila,

nesiqongo saseKarmeli siyakubuna.”

“Ngenxa yeziphambeko ezintathu zaseDamaseku,

yebo, ngenxa yezine, angiyikuguquka,

ngokuba babhula iGileyadi ngezibhulo ezibukhali zensimbi.

₄Kepha ngiyakuthuma umlilo endlini kaHazayeli,

uqede izindlu zobukhosi zikaBeni Hadadi.

₅Ngiyakwaphula imigoqo yaseDamaseku,

nginqume abakhileyo eBikati Aveni,

nophethe intonga eBeti Edene,

abantu base-Aramu bathunjelwe eKhiri,” usho uJehova.

“Ngenxa yeziphambeko ezintathu zaseGaza,

yebo, ngenxa yezine, angiyikuguquka,

ngokuba bathumba abantu ngokuthumba okupheleleyo

ukuba babakhaphele ku-Edomi.

₇Kepha ngiyakuthuma umlilo ogangeni lwaseGaza,

uqede izindlu zalo zamakhosi.

₈Ngiyakunquma abakhileyo e-Ashidodi,

nophethe intonga e-Ashikeloni,

ngiphendulele isandla sami e-Ekroni;

nensali yamaFilisti iyakuphela,” isho iNkosi uJehova.

“Ngenxa yeziphambeko ezintathu zaseTire,

yebo, ngenxa yezine, angiyikuguquka,

ngokuba bakhaphela abantu ngokuthumba okupheleleyo ku-Edomi,

bangakhumbuli isivumelwano sabazalwane.

₁₀Kepha ngiyakuthuma umlilo ogangeni lwaseTire,

uqede izindlu zalo zamakhosi.”

“Ngenxa yeziphambeko ezintathu zakwa-Edomi,

yebo, ngenxa yezine, angiyikuguquka,

ngokuba wamxosha umfowabo ngenkemba,

walahla isihe sakhe,

wagcina ulaka lwakhe,

wayilondoloza intukuthelo yakhe.

₁₂Kepha ngiyakuthuma umlilo eThemani,

uqede izindlu zamakhosi zaseBosira.”

“Ngenxa yeziphambeko ezintathu zabantwana bakwa-Amoni,

yebo, ngenxa yezine, angiyikuguquka,

ngokuba baqaqile abakhulelweyo kwaGileyadi

ukuba bayenze banzi imikhawulo yabo.

₁₄Kepha ngiyakuphemba umlilo ogangeni lwaseRaba,

uqede izindlu zalo zamakhosi ngokumemeza ngosuku lokulwa,

nangesiphepho ngosuku lwesivunguvungu.

₁₅Inkosi yabo iyakuya ekuthunjweni,

yona nezikhulu zayo kanyekanye,” usho uJehova.

“Ngenxa yeziphambeko ezintathu zakwaMowabi,

yebo, ngenxa yezine, angiyikuguquka,

ngokuba washisa amathambo enkosi yakwa-Edomi

aba ngumcako.

₂Kepha ngiyakuthuma umlilo kwaMowabi,

uqede izindlu zamakhosi zaseKeriyote,

uMowabi afe ngokuxokozela,

nangokumemeza,

nangokukhala kwecilongo.

₃Ngiyakunquma umahluleli phakathi kwakhe,

ngibulale zonke izikhulu zakhe kanye naye,” usho uJehova.

“Ngenxa yeziphambeko ezintathu zakwaJuda,

yebo, ngenxa yezine, angiyikuguquka,

ngokuba bawulahlile umthetho kaJehova,

abagcinanga izimiso zakhe,

namanga abo abadukisile,

abawalandelayo nawoyise.

₅Kepha ngiyakuthuma umlilo kwaJuda,

uqede izindlu zamakhosi zaseJerusalema.”

“Ngenxa yeziphambeko ezintathu zakwa-Israyeli,

yebo, ngenxa yezine, angiyikuguquka,

ngokuba bathengisile olungileyo ngesiliva,

nompofu ngamabhangqa ezicathulo.

₇Bazondelela amakhanda abampofu ukuba abe sothulini lomhlabathi,

bachezukisa indlela yabathobileyo;

indoda noyise baya entombininye,

ukuze balihlambalaze igama lami elingcwele,

₈bacambalale ezingutsheni ezithathwe zaba yisibambiso

eceleni kwawo onke ama-altare,

baphuze iwayini labahlawulisiweyo endlini kaNkulunkulu wabo.

₉“Nokho mina ngachitha ama-Amori ebusweni babo,

akuphakama kwawo kwakunjengokuphakama kwemisedari,*

ayenamandla njengama-oki;*

kepha ngachitha nokho izithelo zawo phezulu

nezimpande zawo phansi.

₁₀“Futhi mina nganikhuphula ezweni laseGibithe,

nganihambisa iminyaka engamashumi amane ehlane

ukuba nidle ifa lezwe lama-Amori.

₁₁Ngavusa kumadodana enu abaprofethi

nasezinsizweni zenu amaNaziri.*

Akunjalo, nina bantwana bakwa-Israyeli, na?” usho uJehova.

₁₂“Kepha naphuzisa amaNaziri iwayini,

ngokuthi: ‘Ningaprofethi.’

₁₃“Bhekani, ngiyakunicindezela endaweni yenu

njengengqukumbane icindezela,

igcwele izithungu.

₁₄Onejubane uyakuswela ukubaleka;

onamandla akayikuqinisa amandla akhe,

neqhawe aliyikuzikhulula.

₁₅Obambe umnsalo akayikuma;

onejubane ngezinyawo zakhe kayikuzikhulula,

nokhwele ihhashi akayikuzikhulula;

₁₆onesibindi phakathi kwamaqhawe

uyakubaleka ze ngalolo suku,” usho uJehova.

₂“Nginazile nina kuphela emindenini yonke yomhlaba;

ngalokho ngiyakunihambela ngabo bonke ububi benu.”

₃Kuhamba ababili kanyekanye,

uma bengavumelananga, na?

₄Ingonyama iyabhodla ehlathini,

ingenampango, na?

Ibongo lengonyama liyezwakalisa izwi lalo emphandwini walo,

uma lingabambanga lutho, na?

₅Inyoni iwela ogibeni emhlabathini,

ingenasihibe, na?

Ugibe luyaxhuma emhlabathini,

lungabambanga nokubamba, na?

₆Kungabethwa icilongo emzini,

bangesabi abantu, na?

Umuzi ungehlelwa ngokubi,

engakwenzamga uJehova, na?

₇Ngokuba iNkosi uJehova ayenzi lutho,

ingayambulanga imfihlakalo yayo ezincekwini zayo abaprofethi.

₈Ingonyama ibhongile,

ngubani ongayikwesaba na?

INkosi uJehova ikhulumile,

ngubani ongayikuprofetha na?

₉Zwakalisani ezindlini zamakhosi zase-Ashidodi,

nasezindlini zamakhosi zasezweni laseGibithe, nithi:

“Buthanani ezintabeni zaseSamariya,

nibone izidumo ezinkulu eziphakathi kwalo,

nokucindezelwa okukulo.”

₁₀“Ngokuba abakwazi ukwenza okulungileyo,” usho uJehova;

“babekelela ubudlova nokuphanga ezindlini zabo zamakhosi.”

“Isitha siyakulihaqa izwe,

sehlise kini izinqaba zenu,

ziphangwe izindlu zenu zamakhosi.”

“Njengalokhu umalusi ophula emlonyeni wengonyama

imilenze emibili noma inxenye yendlebe,

kanjalo abantwana bakwa-Israyeli bayakophulwa,

abahlala eSamariya ezingosini zezihlalo

naphezu kwezingubo zikasilika* zemibhede.”

₁₄“Ngokuba mhla ngiyakumhambela u-Israyeli

ngeziphambeko zakhe,

ngiyakuhambela nama-altare aseBethele,

kunqunywe izimpondo ze-altare,

ziwe phansi.

₁₅Ngiyakushaya indlu yasebusika kanye nendlu yasehlobo,

kuphele izindlu zophondo lwendlovu,

yebo, izindlu eziningi ziyakuphela,” usho uJehova.

₁Yizwani leli zwi,

nina zinkomo zaseBashani

enisentabeni yaseSamariya,

enicindezela abaphansi,

enichoboza abampofu,

enithi emakhosini enu: “Lethani, siphuze.”

₂INkosi uJehova ifungile ubungcwele bayo

ukuthi: “Bhekani, izinsuku ziyakunehlela

lapho niyakususwa ngezingwegwe,

nabaseleyo kini ngezindobo.

₃Niyakuphuma emifantwini,

kube yilowo nalowo ngoqondene naye,

nilahlwe eHermoni,” usho uJehova.

₄“Wozani eBethele, niphambeke,

naseGiligali, nandise iziphambeko,

nilethe imihlatshelo yenu ekuseni njalo,

nokweshumi kwenu kanye ngezinsuku ezintathu,

₅nishise umnikelo wokubonga ngokuvutshelweyo,

nimemezele iminikelo yesihle,

niyizwakalise,

ngokuba nithanda kanjalo,

bantwana bakwa-Israyeli,” isho iNkosi uJehova.

₆“Mina nganinika ukuhlanzeka kwamazinyo emizini yenu yonke

nokuswela isinkwa kuzo zonke izindawo zenu,

kepha anibuyelanga kimi,” usho uJehova.

₇“Futhi ngagodla kini imvula,

kusasele izinyanga ezintathu ukuba kuvunwe,

ngalinisa phezu komunye umuzi,

komunye umuzi angilinisanga;

esinye isiqephu saniselwa,

nesiqephu esinganiselwanga sasha.

₈Kwase kuhamba imizi emibili noma emithathu,

yaya komunye umuzi ukuyophuza amanzi,

kodwa ayaneliswanga;

kepha nokho anibuyelanga kimi,” usho uJehova.

₉“Nganishaya ngokuhamuka nesikhutha;

izivande zenu, nezivini zenu,

nemikhiwane yenu,

neminqumo yenu eminingi

kwadliwa yisibotho,

kepha nokho anibuyelanga kimi,” usho uJehova.

₁₀“Nganithumela isifo ngendlela yaseGibithe,

ngazibulala izinsizwa zenu ngenkemba,

ngathumba amahhashi enu,

ngenza ukuba ukunuka kwekamu* lenu

kukhuphukele nasemakhaleni enu,

kepha nokho anibuyelanga kimi,” usho uJehova.

₁₁“Nganichitha njengalokho

uNkulunkulu achitha iSodoma neGomora;

naninjengesikhuni esophulwe emlilweni,

kepha nokho anibuyelanga kimi,” usho uJehova.

₁₂“Ngalokho ngiyakwenze njalo kuwe Israyeli;

njengokuba ngiyakwenza lokhu kuwe,

zilungiselele ukuhlangana noNkulunkulu wakho, Israyeli.”

₁₃Ngokuba bheka, owabumba izintaba,

nowawudala umoya,

otshela umuntu umqondo wakhe,

owenza ukusa kube ngubumnyama,

onyathela ezindaweni eziphakemeyo zomhlaba,

igama lakhe linguJehova,

uNkulunkulu Sebawoti.

₂“Iwile intombi yakwa-Israyeli,

ayisayikuvuka;

iphonsiwe phansi,

akakho ongayivusa.”

“Umuzi owaphuma uyinkulungwane uyakushiya ikhulu,

nowaphuma uyikhulu uyakushiya ishumi kuyo indlu yakwa-Israyeli.”

“Ngifuneni, niphile.

₅Kepha ningalifuni iBethele,

ningangeni eGiligali,

ningadluleli eBeri Sheba,

ngokuba iGiligali liyakuthunjwa nokuthunjwa,

neBethele liyakuba yize.”

₆Funani uJehova, niphile,

funa afikele indlu kaJosefa njengomlilo,

udle, kungekho owucimayo eBethele.

₇Nina enihlanekezela ukwahlulela kube ngumhlonyane,

nilahle phansi ukulunga;

₈nimfune owenza isiLimela neMpambano,

ophendula ithunzi lokufa libe ngukusa,

ayenze imini ibe mnyama njengobusuku,

obiza amanzi olwandle,

awathululele ebusweni bomhlaba nguJehova igama lakhe

₉owenza ukuchitha ukuba kunyazime phezu kwabanamandla,

nencithakalo ukuba yehlele izinqaba.

₁₀Bayamzonda ofakazela ukulunga esangweni; okhuluma ubuqotho

banengwa nguye.

₁₁Ngalokho,

ngokuba ninyathela abampofu,

namukele kuye isipho samabele,

noma nakha izindlu ngamatshe abaziweyo

aniyikuhlala kuzo,

nokuba nitshala izivini ezinhle

aniyikuphuza iwayini lazo.

₁₂Ngokuba ngiyazi ukuthi iziphambeko zenu ziningi

nokuthi izono zenu zinkulu,

nina enicindezela abalungileyo,

namukela umvuzo,

nenichezukisa abampofu esangweni.

₁₃Ngalokho ohlakaniphileyo uyakuthula ngaleso sikhathi,

ngokuba kuyisikhathi esibi lesi.

₁₄Funani okuhle, hhayi okubi,

ukuze niphile,

abe nani uJehova uNkulunkulu Sebawoti kanjalo,

njengalokhu nisho.

₁₅Zondani okubi, nithande okuhle,

nimise ukwahlulela esangweni;

mhlawumbe uJehova uNkulunkulu Sebawoti uyakuba nomusa

kuyo insali yakwaJosefa.

“Ezigcawini zonke kuyakuba khona ukukhala,

nakuzo zonke izitaladi bayakusho ukuthi:

‘Maye, maye!’

babize umlimi ukuba akhale,

nabaziyo izililo ukuba balile;

₁₇nakuzo zonke izivini kuyakuba khona ukukhala,

ngokuba ngiyakudlula phakathi kwakho,” usho uJehova.

₁₈Wo kinina enifisa usuku lukaJehova!

Luyakunisizani usuku lukaJehova?

Lungubumnyama, alusikho ukukhanya.

₁₉Kunjengalokhu umuntu ebalekela ingonyama,

kuhlangane naye ibhere,*

noma engena endlini

encike ngesandla odongeni,

alunywe yinyoka.

₂₀Lungubumyama usuku lukaJehova,

alusikho ukukhanya,

nesigayegaye okungekho kuso ukukhazimula.

₂₁“Ngiyayizonda, ngiyayidelela imikhosi yenu,

angenameli imihlangano yenu.

₂₂Noma ninikela kimi ngeminikelo yenu

yokushiswa kanye neminikelo yenu yempuphu,

angiyenameli, futhi angibheki

iminikelo yenu yokubonga yamathole akhuluphalisiweyo.

₂₃Susa kimi umsindo wezihlabelelo zakho,

angiyikuzwa imvunge yezingubhu zakho.

₂₄Kepha ukwahlulela makugobhoze njengamanzi,

nokulunga njengomfula onganqamukiyo.

₂₅“Naletha kimi imihlatshelo neminikelo yempuphu ehlane

iminyaka engamashumi amane, nina ndlu ka-Israyeli, na?

₂₆Seniyakuthwala uSakuti inkosi yenu

noKhewani inkanyezi kankulunkulu wenu,

izithombe zenu enizenzele zona.

₂₇Ngiyakunenza ukuba nithunjelwe ngaphesheya kweDamaseku,”

usho uJehova ogama lakhe linguNkulunkulu Sebawoti.

₁Jehova, ngiphakamisela kuwena umphefumulo wami.

₂Nkulunkulu wami,

ngiyethemba kuwe;

mawungangijabhisi;

izitha zami mazingethabi ngami.

₃Yebo, akuyikujabha noyedwa kwabakulindelayo;

bayakujabha abaphambuka ngeze.

₄Ngazise imendo yakho, Jehova;

ngifundise izindlela zakho.

₅Ngihambise eqinisweni lakho, ungifundise,

ngokuba wena unguNkulunkulu wensindiso yami;

ngilindela wena usuku lonke.

₆Khumbula, Jehova, ububele bakho nomusa wakho,

ngokuba kukhona kwaphakade.

₇Ungazikhumbuli izono zobusha bami neziphambeko zami;

ngikhumbule ngokomusa

wakho ngenxa yobubele bakho, Jehova.

₈UJehova muhle, ulungile;

ngalokho ufundisa izoni indlela.

₉Abathobekileyo ubaholela kokulungileyo,

abathobekileyo ubafundisa indlela yakhe.

₁₀Zonke izindlela zikaJehova zingububele neqiniso

kulabo abagcina isivumelwano sakhe nezifakazelo zakhe.

₁₁Ngenxa yegama lakho, Jehova,

ngithethelele ukona kwami,

ngokuba kukhulu.

₁₂Ngumuphi umuntu omesaba uJehova na?

Nguyena oyakufundiswa nguye indlela ayakuyikhetha.

₁₃Umphefumulo wakhe uzakuhlala ngokwenama,

inzalo yakhe iyakuzuza izwe.

₁₄Ubuhlobo bukaJehova bukubo abamesabayo;

uyakubazisa isivumelwano sakhe.

₁₅Amehlo ami akuye uJehova njalo,

ngokuba nguyena okhipha izinyawo zami enetheni.

₁₆Phendukela kimi, ube nomusa kimi,

ngokuba nginesizungu, ngihluphekile.

₁₇Izinsizi zenhliziyo yami zikhulile;

ngikhiphe ezinhluphekweni zami.

₁₈Bheka ukuhlupheka kwami nosizi lwami,

ungithethelele zonke izono zami.

₁₉Bheka izitha zami, ngokuba ziningi;

ziyangizonda ngenzondo yonya.

₂₀Londoloza umphefumulo wami, ungikhulule;

mawungangijabhisi,

ngokuba ngiphephela kuwe.

₂₁Ukulunga nobuqotho makungilondoloze,

ngokuba ngilindele wena.

₂₂Nkulunkulu, hlenga u-Israyeli

kuzo zonke izinkathazo zakhe.