To The Word – Day 127

₁“Beka icilongo emlonyeni wakho;

onjengokhozi wehlela indlu kaJehova;

ngokuba beqile isivumelwano sami,

baphambuka emthethweni wami.

₂Bakhala kimi ngokuthi:

‘Nkulunkulu wethu,

thina Israyeli siyakwazi.’

₃U-Israyeli ukulahlile okuhle;

isitha siyakumxosha.

₄Bona bazibekela amakhosi engavelanga kimi;

bamisa izikhulu, ngingazi;

isiliva labo negolide labo bakwenza kwaba yizithombe zabo,

ukuze banqunywe.

₅Ithole lakho, Samariya, linengekile;

intukuthelo yami iyabavuthela;

koze kube nini bengakwazi ukuba msulwa na?

₆Ngokuba livela ku-Israyeli;

umkhandi walenza, alisiye uNkulunkulu;

yebo, ithole laseSamariya liyakuba yizihlephu.

₇“Ngokuba bahlwanyele umoya,

bayakuvuna isivunguvungu;

izele alinahlumela, alivezi impuphu;

uma liyiveza,

iyakuqedwa ngabafokazi.

₈U-Israyeli uyagwinywa;

manje sebephakathi kwabezizwe

njengesitsha okungekho intokozo kuso.

₉Ngokuba benyukele e-Asiriya

bezihambele njengezimbongolo zasendle;

u-Efrayimi uyaqasha ngenkokhelo yothando.

₁₀Noma beqasha phakathi kwabezizwe,

manje sengiyakubabutha,

bakhululwe kancane emthwalweni wenkosi yezikhulu.

₁₁“Ngokuba u-Efrayimi wandisile ama-altare aba ngukona;

ama-altare ayakuba ngukona kuye.

₁₂Noma ngimlobela imithetho yami kaningi,

iyashaywa okungaziwayo.

₁₃Imihlatshelo yeminikelo yami bayihlaba,

bayidle inyama,

kepha uJehova akayenameli.

Useyakhumbula ububi babo,

abahambele ngezono zabo,

babuyele eGibithe.

₁₄Ngokuba u-Israyeli ukhohliwe uMdali wakhe,

wakha izindlu zamakhosi,

noJuda wandisile imizi ebiyelweyo,

ngiyakuthuma umlilo emizini yakhe,

uqede izindlu zayo zobukhosi.”

₁Ungajabuli, Israyeli,

kube ngukuthokoza njengokwabezizwe,

ngokuba umukile kuNkulunkulu wakho ngokufeba,

wathanda inkokhelo kuzo zonke izibuya zamabele.

₂Isibuya nesikhamo sewayini akuyikubafunza,

iwayini elisha liyakumkhohlisa.

₃Abayikuhlala ezweni likaJehova;

u-Efrayimi uyakubuyela eGibithe,

nase-Asiriya bayakudla okungcolileyo.

₄Abayikuthululela uJehova iwayini;

imihlatshelo yabo ayiyikuba mihle kuye,

isinkwa sabo sibe njengesinkwa sabalilayo;

bonke abasidlayo bayakungcola,

ngokuba isinkwa sabo siyakuba ngesephango,

singangeni endlini kaJehova.

₅Niyakwenze njani ngosuku lomhlangano

nangosuku lomkhosi kaJehova na?

₆Bhekani,

ngokuba bemukile ekuchithweni

iGibithe liyakubabutha,

iNofi libembele;

izinto zabo zamagugu zesiliva ziyakudliwa yizimbabazane,

kube ngameva ematendeni abo.

₇Ziyafika izinsuku zokuhanjelwa,

izinsuku zempindiselo zisondele;

u-Israyeli uyakukwazi.

Umprofethi uyakuba njengesiwula,

umuntu onomoya ahlanye ngenxa yobuningi bobubi bakho

nangobutha obukhulu;

₈umprofethi engumlindi ka-Efrayimi kanye noNkulunkulu wami,

ugibe lomthiyi wezinyoni lukuzo zonke izindlela zakhe,

nobutha busendlini kaNkulunkulu wakhe.

₉Bazonakalisile ngokujulileyo njengasezinsukwini zaseGibeya;

uyakhumbula ububi babo,

uyabahambela ngezono zabo.

₁₀“Ngamfumana u-Israyeli njengezithelo zomvini ehlane,

ngabona oyihlo njengolibo emkhiwaneni

ngesikhathi sawo sokuqala.

Kepha bafika eBali Peyori,

bazahlukanisela okunezinhloni,

baba yizinengiso njengalokho abakuthandayo.

₁₁Udumo luka-Efrayimi luyakundiza,

lumuke njengenyoni,

kungabikho ukuzala, nonesisu,

nokukhulelwa.

₁₂Noma bekhulisa abantwana babo,

nokho ngiyakubaphuca bona kungasali muntu;

yebo, maye kubo,

lapho ngimuka kubo!

₁₃U-Efrayimi, njengalokho ngibone eTire,

utshalwe endaweni emnandi,

kepha u-Efrayimi uyakukhiphela umbulali abantwana bakhe.

₁₄“Banike, Jehova uyakunikani?

Banike isisu esiphuphumayo namabele omileyo.

₁₅“Bonke ububi babo buseGiligali;

ngalokho ngabazonda khona;

ngenxa yobubi bezenzo zabo ngiyakubaxosha endlini yami,

angisayikubathanda;

zonke izikhulu zabo zingabahlubuki.

₁₆U-Efrayimi ushayiwe,

impande yabo yomile,

abayikuthela izithelo.

Noma bezala,

ngiyakubulala okuthandekayo kwesisu sabo.”

₁₇UNkulunkulu wami uyakubalahla,

ngokuba abamlalelanga,

babe ngabazulazulayo phakathi kwabezizwe.

₁U-Israyeli wayengumvini owenabileyo,

ngokobuningi bezithelo zakhe wandisa ama-altare akhe;

ngokobuhle bezwe lakhe wenza izinsuku ezinhle.

₂Inhliziyo yabo yayahlukene;

uyakuwaphula ama-altare abo,

achithe izinsika zabo.

₃Yebo, manje bayakuthi:

“Asinankosi,

ngokuba asimesabanga uJehova;

kepha inkosi ingasenzelani na?”

₄Bakhuluma amazwi nje,

befunga amanga,

benza isivumelwano;

bese kumila ukwahlulela njengenhlungunyembe emiseleni yamasimu.

₅Abakhileyo eSamariya bayakuba novalo

ngenxa yamathole aseBeti Aveni,

ngokuba abantu balo bayakulila ngawo,

abapristi bezithombe bakhale ngawo ngenxa yodumo lwawo

ukuthi lumukile kuwo.

₆Iyakuyiswa e-Asiriya ibe yisipho kuyo inkosi uJarebi;

u-Efrayimi uyakwamukela ihlazo,

u-Israyeli ajabhe ngeziluleko zakhe.

₇Inyamalele inkosi yaseSamariya njengebazelo ebusweni bamanzi.

₈Izindawo eziphakemeyo zase-Aveni,

isono sakwa-Israyeli, ziyakuchithwa;

ameva namakhakhasi ayakukhuphukela ema-altare abo;

bayakuthi kuzo izintaba: “Sisibekeleni,”

nakuwo amagquma: “Welani phezu kwethu.”

₉“Kwasezinsukwini zaseGibeya wonile, Israyeli;

bema khona;

impi nabo abobubi ayiyikubafica eGibeya na?

₁₀Lapho ngithanda, ngiyabajezisa;

abantu babahlanganyele ekubabopheleni ebubini obubili.

₁₁U-Efrayimi uyisithole esifundisiweyo,

esithanda ukubhula amabele;

kepha mina ngiyekile intamo yaso enhle;

sengiyakumbophela u-Efrayimi,

uJuda alime,

uJakobe azidubele.

₁₂Zihlwanyeleleni ngokulunga,

niyakuvuna ngomusa;

qathani umqatho wenu;

sekuyisikhathi sokumfuna uJehova,

aze afike, anise ukulunga phezu kwenu.

₁₃Nilime ububi,

navuna okubi;

nidlile izithelo zamanga,

ngokuba nethemba endleleni yenu

nakubo ubuningi bamaqhawe enu.

₁₄Kuyakuvela ukuxokozela phakathi kwabantu bakho,

zichithwe zonke izinqaba zakho,

njengalokho uShalimani achitha iBeti Aribeli ngosuku lokulwa,

unina echotshozwa phezu kwabantwana.

₁₅Kanjalo iBethele liyakwenza kini ngenxa yobubi benu obukhulu;

ekuseni inkosi yakwa-Israyeli iyakunqunywa nokunqunywa.

₁“Lapho u-Israyeli esengumntwana ngamthanda,

ngayibiza indodana yami iphume eGibithe.

₂Lapho bebabiza,

kwaba yilokhu besuka kubo;

babahlabela oBali,

bashisela izithombe ezibaziweyo impepho.

₃Nokho mina ngamcathulisa u-Efrayimi;

ngabaphatha ngezingalo zami,

kepha abazanga ukuthi ngabaphulukisa.

₄Ngabadonsa ngezintambo zomuntu,

ngamagoda othando;

ngaba kubo njengophakamisa ijoka entanyeni yabo,

ngagobela kubo, ngabanika ukudla.

₅“Abayikubuyela ezweni laseGibithe,

owase-Asiriya abe yinkosi yabo,

ngokuba benqaba ukubuya, na?

₆Inkemba iyakutheleka emizini yabo,

iqede imigoqo yayo,

ibadle ngenxa yeziluleko zabo.

₇Abantu bami bahlose ukuhlehla kimi;

noma bebabizela kongaPhezulu kangakanani,

akakho oziphakamisayo.

₈“Ngingakunikela kanjani, Efrayimi,

ngikukhaphele, Israyeli, na?

Ngingakwenza kanjani ube njenge-Adima,

ngikubeke ufane neSeboyimi, na?

Inhliziyo iyaphenduka phakathi kwami,

sonke isihawu sami sivusiwe.

₉Angiyikwenza ukufutheka kwentukuthelo yami,

ngingabuyeli ukumchitha u-Efrayimi,

ngokuba nginguNkulunkulu,

angisiye umuntu;

ngingoNgcwele phakathi kwenu,

angiyikufika ngolaka.

₁₀Bayakulandela uJehova oyakubhonga njengengonyama,

ngokuba uyakubhonga,

abantwana bakhe bavele entshonalanga ngokuthuthumela.

₁₁Bayakuvela ngokuthuthumela eGibithe njengezinyoni,

nanjengejuba ezweni lase-Asiriya,

ngibahlalise ezindlini zabo,” usho uJehova.

₁₂U-Efrayimi ungizungezile ngamanga,

nendlu yakwa-Israyeli ngenkohliso;

uJuda usazulazula kuNkulunkulu nakoNgcwele othembekileyo.

₁U-Efrayimi uyadla umoya,

ulandela umoya wasempumalanga;

uyandisa imihla yonke amanga nencithakalo;

benza isivumelwano ne-Asiriya,

namafutha ayiswa eGibithe.

₂UJehova unokuphikisana noJuda futhi;

uyakuhambela uJakobe ngenxa yezindlela zakhe,

ambuyisele ngokwezenzo zakhe.

₃Esiswini wabamba umfowabo ngesithende,

nasebudodeni bakhe walwa noNkulunkulu;

₄walwa nengelosi, wanqoba;

wakhala, wanxusa kuyo;

yamfumana eBethele,

yakhuluma naye lapho.

₅NguJehova uNkulunkulu Sebawoti,

nguJehova igama lakhe lodumo.

₆Ngalokho buyela wena kuNkulunkulu wakho,

ugcine umusa nokulunga,

ulindele uNkulunkulu wakho njalonjalo.

₇IKhanani linesilinganiso esikhohlisayo esandleni salo,

lithanda ukukhahlameza.

₈U-Efrayimi uthi:

“Impela ngicebile, ngithole imfuyo;

kukho konke ukuzuza kwami abayikufumana bubi obuyisono.”

₉“Kepha mina nginguJehova uNkulunkulu wakho kwasezweni laseGibithe;

ngisezakukuhlalisa ematendeni

njengasezinsukwini zemikhosi emisiweyo.

₁₀Ngikhulumile kubaprofethi,

ngandisile imibono,

ngifanekisile ngesandla sabaprofethi.”

₁₁Uma iGileyadi linobubi,

impela bayakuba ngabachithiwe;

uma behlabela izinkunzi eGiligali,

ama-altare abo ayakuba njengezinqwaba

ngasemiseleni yamasimu.

₁₂UJakobe wabalekela ezweni lase-Aramu,

u-Israyeli wakhonzela umfazi,

walusa umhlambi ngenxa yomfazi.

₁₃UJehova wakhuphula u-Israyeli eGibithe ngomprofethi,

wagcinwa ngomprofethi.

₁₄U-Efrayimi ucunulile ngokubabisayo;

icala lakhe legazi liyakuphonswa phezu kwakhe;

iNkosi yakhe ibuyisele kuye ihlazo lakhe.

₁Lapho u-Efrayimi ekhuluma,

kwavela ukuthuthumela;

wayephakeme kwa-Israyeli,

kepha wazitholela icala ngoBali, wafa.

₂Manje benezela ekoneni,

bazenzele imifanekiso ebunjiweyo ngesiliva labo

nezithombe ngokuqonda kwabo,

zonke ziyimisebenzi yezinyanga;

bakhuluma ngabo, bathi:

“Bahlaba abantu,

kepha banga amathole.”

₃Ngalokho bayakuba njengamafu okusa,

nanjengamazolo amuka ekuseni,

nanjengamakhoba aphephethwa esibuyeni

nomusi ophuma ngefasitele.

₄“Nokho nginguJehova uNkulunkulu wakho

kwasezweni laseGibithe;

ngaphandle kwami awazi Nkulunkulu,

nomsindisi akakho ngaphandle kwami.

₅Mina ngakwazi ehlane ezweni lokoma.

₆Basutha njengamadlelo abo;

basutha, nenhliziyo yabo yaphakama;

ngalokho bangikhohliwe.

₇Ngase ngiba njengengonyama kubo,

ngiqamekela endleleni njengengwe.

₈Ngitheleka phezu kwabo njengebhere*

elaphuciwe amawundlu alo,

ngidwengula ubhedu lwenhliziyo,

ngibadle njengengonyamakazi,

isilwane sasendle sibaqaqe.

₉“Ngukuchithwa kwakho, Israyeli,

ngokuba uphambene nami,

usizo lwakho.

₁₀Iphi inkosi yakho manje

ukuba ikusindise emizini yakho yonke;

nabahluleli bakho, wena owathi:

‘Ngiphe inkosi nezikhulu’?

₁₁Ngikunike inkosi ngentukuthelo yami,

ngayisusa ngolaka lwami.

₁₂Ububi buka-Efrayimi buboshiwe,

isono sakhe sibekelelwe.

₁₃Imihelo yobelethayo iyakumehlela;

uyindodana engahlakaniphile,

ngokuba kuyisikhathi sokuba angemi lapho kuqhamuka abantwana.

₁₄“Ngiyakubahlenga esandleni sendawo yabafileyo,

ngibahlawulele ekufeni;

ziphi izifo zakho, kufa,

kuphi ukuchitha kwakho,

ndawo yabafileyo, na?

Ukuguquka kufihlekile emehlweni ami.

₁₅“Noma enezithelo phakathi kwabafowabo,

kuyakufika umoya wasempumalanga,

umoya kaJehova ovela ehlane;

besewujabha umthombo,

isiphethu sishe;

uyakuphanga ingcebo yakhe,

zonke izinto ezinxanelekayo.

₁₆ISamariya liyakuthwala icala lalo,

ngokuba lihlubukile uNkulunkulu walo;

bayakuwa ngenkemba,

izingane zabo zichotshozwe,

abakhulelweyo babo baqaqwe.”

₁Buyela kuJehova uNkulunkulu wakho, Israyeli,

ngokuba ukhubekile ngobubi bakho.

₂Thabathani amazwi,

nibuyele kuJehova,

nithi kuye:

“Susa konke okubi,

wamukele okuhle,

sinikele ngemilomo yethu njengangezinkunzi.

₃I-Asiriya aliyikusisindisa,

asisayikukhwela amahhashi,

singasasho kuyo imisebenzi yezandla zethu ukuthi ngonkulunkulu bethu,

ngokuba intandane iphiwa umusa kuwe.”

₄“Ngiyakuphulukisa ukuhlehla kwabo,

ngibathande ngesihle,

ngokuba intukuthelo yami ibuyile kubo.

₅Ngiyakuba njengamazolo ku-Israyeli;

uyakukhahlela njengomnduze,

enabise izimpande zakhe njengeLebanoni.

₆Imixhantela yakhe iyakuxhantela,

ubuhle bakhe bube njengomnqumo,

iphunga lakhe libe njengeLebanoni.

₇Bayakubuya, bahlale emthunzini wakhe,

babuye baphile njengamabele,

bakhahlele njengomvini,

igama lakhe lodumo libe njengomvini waseLebanoni.

₈Efrayimi, ngisenendabani nezithombe na?

Mina ngiyakumphendula, ngimbheke;

nginjengomsayipuresi* oluhlaza,

kimina izithelo zakho ziyafunyanwa.”

₉Ngubani ohlakaniphile, aqonde lezi zinto;

ngubani onomqondo, azazi, na?

Ngokuba izindlela zikaJehova zilungile;

abalungileyo bayakuhamba ngazo,

kepha abaphambukayo bayakukhubeka ngazo.