To The Word – Day 123

₁Izwi likaJehova elafika kuJoweli

indodana kaPhethuweli.

₂Yizwani lokhu nina badala,

nibeke indlebe nina nonke enihlezi ezweni.

Kwake kwaba khona emihleni yenu noma emihleni yawobaba na?

₃Kutsheleni abantwana benu,

nabantwana benu abantwana babo,

nabantwana babo esinye isizukulwane.

₄Okushiywe yisibotho kudliwe yisikhonyane,

nokushiywe yisikhonyane kudliwe yizinkumbi,

nokushiywe yizinkumbi kudliwe yinkasa.

₅Phaphamani, zidakwa, nikhale,

nihhewule nonke eniphuza iwayini

ukuthi iwayini linqanyulelwe emlonyeni wenu.

₆Ngokuba kwenyukele ezweni lami

isizwe esinamandla nesingenakubalwa;

amazinyo aso angamazinyo engonyama,

namazinyo aso emihlathi angawengonyamakazi.

₇Sichithile umvini wami,

saxebula umkhiwane wami;

siwuxhozile nokuwuxhoza, sawulahla,

amagatsha awo sawenza aba mhlophe.

₈Khala njengentombi ebhince indwangu yamasaka

ngomyeni wobusha bayo.

₉Iminikelo yempuphu neminikelo yokuphuzwa

inqamukile endlini kaJehova;

abapristi, izikhonzi zikaJehova, bayalila.

₁₀Amasimu achithekile,

umhlabathi uyalila,

ngokuba amabele achithiwe;

iwayini elisha lishile,

amafutha ayawuma.

₁₁Jabhani, balimi, nihhewule nina baphathi bezivini

ngokolweni nangebhali,*

ngokuba isivuno samasimu sichithakele.

₁₂Umvini ubunile,

imikhiwane iwumile;

imipomegranati,* namasundu,

nemi-apula,*

nemithi yonke yasendle kubunile,

ngokuba intokozo ibunile phakathi kwamadodana abantu.

₁₃Bhincani, nikhale, bapristi,

nihhewule, nina zikhonzi ze-altare;

wozani nilale bonke ubusuku ezindwangwini zamasaka,

zikhonzi zikaNkulunkulu wami,

ngokuba iminikelo yempuphu neminikelo yokuphuzwa

kugodliwe endlini kaNkulunkulu wenu.

₁₄Ngcwelisani ukuzila ukudla,

nibize umhlangano;

buthani amalunga,

yebo, bonke abakhe ezweni,

endlini kaJehova uNkulunkulu wenu,

nikhale kuJehova.

₁₅Hawu lolo suku!

Ngokuba usuku lukaJehova lusondele,

lufika njengokuchitha kuvela kuSomandla.

₁₆Akunqunywanga ukudla kwethu phambi kwamehlo ethu,

intokozo nenjabulo endlini kaNkulunkulu wethu, na?

₁₇Imbewu iyabola phansi kwamagade ayo;

izingobo zichithakele,

izinqolobane zidiliziwe,

ngokuba amabele omile.

₁₈Yeka, ukububula kwezilwane!

Imihlambi yezinkomo ikhungathekile,

ngokuba ayinadlelo,

yebo, nemihlambi yezimvu izithwese icala.

₁₉Ngikhala kuwe Jehova,

ngokuba amadlelo asehlane adliwe ngumlilo,

nelangabi lishisile yonke imithi yasendle.

₂₀Yebo, nezilwane zasendle ziyakulangazelela,

ngokuba imifula yamanzi ishile,

nomlilo udlile amadlelo asehlane.

₁Bethani icilongo eSiyoni,

nihlabe umkhosi entabeni yami engcwele;

mabathuthumele bonke abakhe ezweni,

ngokuba luyeza usuku lukaJehova,

ngokuba lusondele;

₂usuku lobumnyama nolwesigayegaye,

usuku lwamafu nolobumnyama obukhulu,

njengokusa kwenekwe ezintabeni,

abantu abaningi abanamandla

abangazange babe ngabanjalo kwasendulo,

nabangasoze baba ngabanjalo emva kwabo

kuze kube naseminyakeni yezizukulwane ngezizukulwane.

₃Phambi kwabo kuyadla umlilo,

nasemva kwabo kushisa ilangabi;

izwe liphambi kwabo njengensimu yase-Edene,

nangasemva kwabo kuyihlane lencithakalo,

akukho okubabalekelayo.

₄Isimo sabo sinjengesimo samahhashi,

bagijima njengabamahhashi.

₅Bangqabashiya ngomsindo wezinqola eziqongweni zezintaba,

njengokuchochoza kwelangabi lomlilo elidla amabibi

nanjengabantu abanamandla, abahlelelwe ukulwa.

₆Phambi kwabo abantu bayathuthumela,

bonke ubuso buyaphaphatheka.

₇Bagijima njengamaqhawe,

bakhwela ezingangeni njengamadoda empi;

bahamba,

kube yilowo nalowo ngendlela yakhe,

abaphambanisi izindlela zabo.

₈Abahlohlolozani omunye nomunye;

bahamba,

kube yilowo nalowo ngendlela yakhe;

baziphonsa phakathi kwezikhali,

abakhawuli.

₉Batheleka emzini,

bagijima ogangeni;

bakhuphukela ezindlini,

bangena ngamafasitele njengesela.

₁₀Umhlaba uyazamazama phambi kwabo,

amazulu ayathuthumela;

ilanga nenyanga kuphenduka ubumnyama,

nezinkanyezi zisusa ukukhanya kwazo.

₁₁UJehova uzwakalisa izwi lakhe phambi kwempi yakhe,

ngokuba ibandla lakhe likhulu kakhulu,

nowenza izwi lakhe unamandla;

yebo, usuku lukaJehova lukhulu,

luyesabeka kakhulu;

ngubani ongaluthwala na?

₁₂“Kepha manje,” usho uJehova,

“phendukelani kimi ngenhliziyo yenu yonke,

nangokuzila ukudla, nangokukhala,

nangokulila.”

₁₃Niklebhule inhliziyo yenu,

hhayi izingubo zenu,

niphendukele kuJehova uNkulunkulu wenu,

ngokuba yena unomusa,

unobumnene,

wephuza ukuthukuthela,

unesihe esikhulu,

uhawukela nomubi.

₁₄Ngubani owaziyo uma engayikubuya,

ahawukele,

ashiye isibusiso emva kwakhe,

kube ngumnikelo wempuphu nomnikelo wokuphuzwa

kuJehova uNkulunkulu wenu, na?

₁₅Bethani icilongo eSiyoni,

ningcwelise ukuzila ukudla,

nibize umhlangano;

₁₆buthani abantu, ningcwelise ibandla,

niqoqe abadala, nibuthe izingane nabancelayo;

umyeni makaphume ekamelweni lakhe,

nomakoti emgonqweni wakhe.

₁₇Abapristi, izikhonzi zikaJehova,

mabakhale phakathi kompheme ne-altare, bathi:

“Hawukela abantu bakho, Jehova,

unganikeli isabelo sakho sibe yinhlamba,

ukuze abezizwe bababhinqe;

yini ukuba basho phakathi kwabantu, bathi:

‘Uphi uNkulunkulu wabo na?’ ”

₁₈UJehova wayesehawukela izwe lakhe,

wabahawukela abantu bakhe.

₁₉UJehova waphendula,

wathi kubantu bakhe:

“Bhekani, ngiyakunithumela amabele, newayini, namafutha,

nisuthe ngakho,

ngingabe ngisanenza inhlamba phakathi kwabezizwe.

₂₀“Ngiyakudedisela kude nani owasenyakatho,

ngimxoshele ezweni elomileyo nelichithakeleyo,

ubuso bakhe bube ngaselwandle lwasempumalanga,

umuva wakhe ube ngaselwandle lwasentshonalanga,

kukhuphuke ukunuka kwakhe,

kwenyuke iphunga lakhe elibi;”

ngokuba wenzile izinto ezinkulu.

₂₁Ungesabi, lizwe;

jabula, uthokoze,

ngokuba uJehova wenzile izinto ezinkulu.

₂₂Ningesabi, zilwane zasendle,

ngokuba amadlelo asehlane ayahluma,

nemithi ithela izithelo,

umkhiwane nomvini kuveza amandla akho.

₂₃Jabulani, bantwana baseSiyoni,

nithokoze kuJehova uNkulunkulu wenu,

ngokuba uninika imvula yokuqala ngokulunga,

unehlisela imvula,

eyokuqala neyamuva,

njengasekuqaleni.

₂₄Izibuya ziyakugcwala amabele,

nezikhongozelo ziyakuchichima iwayini namafutha.

₂₅“Ngiyakubuyisela kini iminyaka eyadliwa yisikhonyane,

nezinkumbi, nenkasa, nesibotho,

impi yami enkulu engayithuma phakathi kwenu.

₂₆Niyakudla nokudla, nisuthe,

nilidumise igama likaJehova uNkulunkulu wenu

oniphathe ngokumangalisayo;

abantu bami abayikujabha kuze kube phakade.

₂₇Niyakwazi ukuthi ngiphakathi kuka-Israyeli

nokuthi nginguJehova uNkulunkulu wenu,

akakho omunye;

abantu bami abayikujabha kuze kube phakade.

₂₈“Kuyakuthi ngasemuva ngithulule uMoya wami phezu kwayo yonke inyama;

amadodana enu namadodakazi enu ayakuprofetha,

abadala benu baphuphe amaphupho,

izinsizwa zenu zibone imibono;

₂₉naphezu kwezinceku nezincekukazi ngalezo zinsuku

ngiyakuthulula uMoya wami.

₃₀Ngiyakuveza izimangaliso ezulwini nasemhlabeni,

igazi, nomlilo, nezinsika zomusi.

₃₁Ilanga liyakuphenduka ubumnyama,

inyanga ibe yigazi,

lungakafiki usuku olukhulu nolwesabekayo lukaJehova.

₃₂Kuyakuthi bonke ababiza igama likaJehova

bakhululwe,

ngokuba entabeni yaseSiyoni naseJerusalema

kuyakuba ngabasindileyo,

njengalokho eshilo uJehova,

naphakathi kwabaseleyo kube ngababizwa nguJehova.

₁“Ngokuba ngalezo zinsuku nangaleso sikhathi,

lapho ngiyakubuyisa ukuthunjwa kukaJuda neJerusalema,

₂ngiyakubutha zonke izizwe,

ngizehlisele esigodini sikaJehoshafati,

ngahlulelane nazo khona ngenxa yabantu bami

nesabelo sami u-Israyeli,

ezibahlakazile phakathi kwezizwe,

zabela izwe lami.

₃Zenza inkatho ngabantu bami,

zanika umfana ngesifebe,

zathengisa ngentombazana ngenxa yewayini,

zaliphuza.

₉Memezelani lokhu phakathi kwabezizwe,

ningcwelise impi,

niwavuse amaqhawe;

mawasondele,

enyuke onke amadoda empi.

₁₀Khandani amakhuba enu abe yizinkemba,

ocelemba benu babe yimikhonto,

obuthakathaka asho ukuthi ngiyiqhawe.

₁₁Sheshani nifike nina bezizwe zonke nxazonke, nibuthane,

wehlisele khona amaqhawe akho, Jehova.

₁₂“Mabazivuse abezizwe,

benyukele esigodini sikaJehoshafati,

ngokuba ngahlulele bonke abezizwe nxazonke.

₁₃Fakani isikela,

ngokuba okuzakuvunwa sekuvuthiwe;

ngokuba isikhamo sewayini sigcwele,

nezikhongozelo ziyachichima,

ngokuba ububi babo bukhulu.”

₁₄Yizixuku ngezixuku esigodini sokwahlulela,

ngokuba usuku lukaJehova lusondele esigodini sokwahlulela.

₁₅Ilanga nenyanga kuba mnyama,

izinkanyezi zisusa ukukhanya kwazo.

₁₆UJehova uyaduma eseSiyoni,

ezwakalise izwi lakhe eseJerusalema;

izulu nomhlaba kuyazamazama,

kepha uJehova uyisiphephelo sabantu bakhe,

nenqaba yabantwana bakwa-Israyeli.

₁₇Bese nikwazi ukuthi nginguJehova uNkulunkulu wenu

engihlala eSiyoni, intaba yami engcwele;

iJerusalema liyakuba ngcwele,

abafokazi abasayikulidabula.

₁₈“Kuyakuthi ngalolo suku

izintaba ziconse iwayini elimnandi,

amagquma agobhoze ubisi,

yonke imifula yakwaJuda igobhoze amanzi;

kuyakuvela umthombo endlini kaJehova

oyakunisela isigodi saseShithimi.

₁₉IGibithe liyakuba yincithakalo,

u-Edomi abe yihlane lencithakalo

ngenxa yendluzula eyenziwe kubantwana bakwaJuda,

ngokuba bachithile igazi elingenacala ezweni labo.

₂₀Kepha uJuda uyakuhlala kuze kube phakade,

neJerusalema ezizukulwaneni ngezizukulwane.

₂₁Ngiyakuphindisela igazi labo engingakaliphindiseli,”

ngokuba uJehova wakhile eSiyoni.

₁Ngiyakukubonga ngenhliziyo yami yonke;

phambi kwawonkulunkulu ngiyakukuhubela.

₂Ngiyakukhuleka phambi kwethempeli lakho elingcwele,

ngibonge igama lakho ngenxa yomusa wakho neqiniso lakho,

ngokuba phezu kwakho konke uphakamisile igama lakho nezwi lakho.

₃Ngosuku engakhala ngalo wangiphendula;

wangiqunga isibindi,

wangipha amandla emphefumulweni wami.

₄Onke amakhosi omhlaba ayakukubonga, Jehova,

lapho ezwile amazwi omlomo wakho.

₅Yebo, ayakuhlabelela ngezindlela zikaJehova,

ngokuba inkulu inkazimulo kaJehova.

₆Ngokuba noma uJehova ephakeme,

uyanakekela nokho ophansi;

uyamazi ozidlayo ekude.

₇Noma ngihamba phakathi kwenhlupheko,

uyakungiphilisa;

uyakwelulela isandla sakho olakeni lwezitha zami,

esokunene sakho singisindise.

₈UJehova uyakufeza okwami;

Jehova, umusa wakho umi phakade;

ungashiyi imisebenzi yezandla zakho.

₁₇“ ‘Kuyakuthi ezinsukwini zokuphela, kusho uNkulunkulu,

ngiyakuthulula uMoya wami

phezu kwayo yonke inyama;

amadodana enu namadodakazi enu ayakuprofetha,

izinsizwa zenu zibone imibono,

abadala benu baphuphe amaphupho;

₁₈yebo, naphezu kwezinceku zami

nezincekukazi zami

ngiyakuthulula uMoya wami ngaleyo mihla,

ziyakuprofetha.

₁₉Ngiyakuveza izimangaliso ezulwini phezulu

nezibonakaliso emhlabeni phansi,

igazi, nomlilo, nokuthunqa komusi.

₂₀Ilanga liyakuphenduka ubumnyama,

inyanga ibe yigazi,

lungakafiki usuku olukhulu

noluqhamileyo lweNkosi.

₂₁Kuyakuthi yilowo nalowo

obiza igama leNkosi uyakusindiswa.’

“ ‘Ngayibona iNkosi phambi kwami njalo,

ngokuba ingakwesokunene sami,

ukuze nginganyakaziswa.

₂₆Ngalokho inhliziyo yami iyajabula,

nolimi lwami luyethaba;

ngisho nenyama yami iyakuhlala

ngokwethemba.

₂₇Ngokuba awuyikushiya umphefumulo wami eHayidese,*

futhi awuyikuvuma oNgcwele wakho

abone ukubola.

₂₈Wangazisa izindlela zokuphila;

uyakungigcwalisa ngokujabula ebusweni bakho.’