To The Word – Day 102

₁Duduzani, nibaduduze abantu bami,

usho uNkulunkulu wenu.

₂Qungani iJerusalema isibindi,

nimemeze kulo ukuthi ukulwa kwalo sekuphelile

nokuthi buhlanguliwe ububi balo,

ngokuba lamukeliswe esandleni sikaJehova ngokuphindiweyo

ngazo zonke izono zalo.

₃Izwi liyamemeza lithi:

“Lungisani ehlane indlela kaJehova,

nihlelembe oqwathuleni umgwaqo

kaNkulunkulu wethu.

₄Zonke izigodi ziyakuphakanyiswa,

zonke izintaba namagquma kuyakwehliswa;

amagebhugebhu ayakuhlelenjwa,

nemigoxigoxi iyakuba yithafa.

₅Inkazimulo kaJehova iyakubonakaliswa,

yonke inyama ikubone kanyekanye,

ngokuba umlomo kaJehova ukhulumile.”

₆Izwi liyakhuluma lithi: “Memeza!”

Ngathi: “Ngiyakumemezani na?”

Inyama yonke ingutshani,

bonke ubuhle bayo bunjengembali yasendle.

₇Utshani buyabuna,

imbali iyavuthuluka,

ngokuba umoya kaJehova uyaphephetha kukho.

Impela abantu bangutshani.

₈Utshani buyabuna,

imbali iyavuthuluka,

kepha izwi likaNkulunkulu wethu

limi kuze kube phakade.

₉Khuphukela entabeni ende,

wena, Siyoni, obika okujabulisayo,

uphakamise ngamandla izwi lakho,

wena Jerusalema obika okujabulisayo,

uliphakamise ungesabi,

usho emizini yakwaJuda ukuthi:

“Bhekani, nangu uNkulunkulu wenu.”

₁₀Bhekani, iNkosi uJehova iyeza ngamandla;

ingalo yayo iyakumbusela;

bhekani, umvuzo wayo inawo,

inkokhelo yayo iphambi kwayo.

₁₁Iyakwalusa umhlambi wayo njengomalusi,

ibuthe amawundlu ngemikhono yayo,

iwagone esifubeni sayo,

ihole kahle izindlezane.

₁₂Ngubani olinganise amanzi ngentende yesandla sakhe,

walinganisa izulu ngeminwe eyeluliweyo,

wahlanganisa uthuli esilinganisweni,

walinganisa izintaba ngezikalo*

namagquma ngezisindo, na?

₁₃Ngubani oqondisile uMoya kaJehova,

wamfundisa engumluleki wakhe, na?

₁₄Walulekana nobani waze wamqondisa,

wamfundisa indlela yokwahlulela,

wamnika ukwazi,

wamazisa indlela yokuqonda, na?

₁₅Bheka, izizwe zinjengethonsi kwasesitsheni,

zibalwa njengothuli lwesilinganiso;

bheka, iziqhingi uyaziphakamisa njengothuli olucolekileyo.

₁₆ILebanoni alanele ukubaswa,

nezilwane zalo azanele ukuba zibe ngumnikelo wokushiswa.

₁₇Zonke izizwe zinjengento engelutho

phambi kwakhe,

zibalwa njengokungelutho nokuyize kuye.

₁₈Niyakumfanisa uNkulunkulu nobani,

nimlinganise namuphi umfanekiso, na?

₁₉Yisithombe yini esibunjiwe yisisebenzi,

sanamekwa ngegolide ngumkhandi,

sancibilikiselwa amaketanga esiliva, na?

₂₀Ompofu kunokuba anikele ngomnikelo onjalo

uyakhetha umuthi ongaboliyo,

azifunele isisebenzi esihlakaniphileyo

ukuba simise isithombe esibaziweyo esingenakuzanyazanyiswa.

₂₁Anazi yini? Anizwa yini?

Anitshelwanga yini kwasekuqaleni,

aniqondanga kwasekusekelweni komhlaba, na?

₂₂Nguye ohlezi esiyingelezini somhlaba –

abakhile kuwo banjengezintethe –

noweneka izulu njengendwangu,

alelule njengetende ukuba kuhlalwe kulo,

₂₃nowenza izikhulu zibe yinto engelutho,

nabahluleli ukuba babe yize.

₂₄Yebo, banele ukutshalwa nje,

yebo, banele ukuhlwanyelwa nje,

yebo, isiqu sanele ukugxila emhlabathini,

abesephephetha kubo, babune,

isivunguvungu sibasuse njengamabibi.

₂₅“Niyakungifanisa

nobani ukuba ngifane naye?”

usho oNgcwele.

₂₆Phakamiselani amehlo enu phezulu, nibone.

Ngubani odalile lezo zinto na?

Nguye okhipha ibandla lazo ngezibalo,

abize zonke ngamagama;

ngobuningi bamandla akhe

nangobukhulu bezikhwepha zakhe

ayisilali neyodwa.

₂₇Usholoni wena Jakobe,

ukhulumelani wena Israyeli, ukuthi:

“Indlela yami isithekile kuJehova,

ilungelo lami lidlulile kuNkulunkulu wami,” na?

₂₈Awazi yini? Awuzwanga na?

UJehova unguNkulunkulu ongunaphakade;

udalile imikhawulo yomhlaba;

akapheli amandla, akakhathali,

nokuqonda kwakhe akunakuphenywa.

₂₉Nguye omupha oyethileyo amandla,

nakongenamandla uyandisa izikhwepha.

₃₀Izinsizwa ziyaphela amandla,

zikhathale,

nabasha bawa nokuwa,

₃₁kepha abamethembayo uJehova

bayathola amandla amasha,

bayakhuphuka ngamaphiko njengezinkozi,

bagijime bengakhathali,

bahambe bengapheli amandla.

₁“Thulani phambi kwami nina ziqhingi,

izizwe zithole amandla amasha.

Mazisondele, andukuba zikhulume,

sisondelane ekwahluleleni.

₂“Ngubani ovusile ukulunga

kuphume empumalanga,

akubize ukuba kumlandele,

anikele izizwe phambi kwakhe,

amenze ukuba abuse amakhosi,

abenze babe njengothuli ngenkemba yakhe,

nanjengamabibi aphephezeliswayo

ngomnsalo wakhe, na?

₃Uyabaxosha, adlule kahle

ngezindlela angazihambanga ngezinyawo.

₄Ngubani okusebenzileyo, wakwenza, na?

Nguye owazibiza izizukulwane kwasekuqaleni:

mina Jehova engingowokuqala

nenginguye nakwabokuphela.”

₅Iziqhingi ziyakubona, ziyesaba;

imikhawulo yomhlaba iyathuthumela;

isondele, isifikile.

₆Yilowo nalowo usiza umakhelwane wakhe;

uthi komfowabo: “Yiba nesibindi.”

₇Umbazi uqunga umkhandi isibindi,

nololonga ngesando uqunga oshaya isikhandelo isibindi,

ethi ngokunamathelisa: “Kuhle,”

ekubethela ngezipikili,

funa kunyakaziswe.

₈“Kepha wena Israyeli, nceku yami,

wena Jakobe engikukhethileyo,

nzalo ka-Abrahama othandiweyo wami,

₉wena engikuthathile emikhawulweni yomhlaba,

ngakubiza emagumbini awo,

ngathi kuwe:

‘Wena uyinceku yami,’

ngikukhethile, angikulahlanga;

₁₀ungesabi, ngokuba mina nginawe;

ungapheli amandla,

ngokuba mina nginguNkulunkulu wakho;

ngiyakuqinisa, futhi ngiyakusiza,

yebo, ngiyakusekela ngesandla sokunene sokulunga kwami.

₁₁“Bheka, bonke abafuthekela wena

bayakuba namahloni, bajabhe;

abamelene nawe bayakuba njengento engelutho,

babhubhe.

₁₂Uyakubafuna, ungabafumani kodwa,

labo bantu abaxabana nawe;

abalwa nawe bayakuba njengento engelutho nanjengeze.

₁₃Ngokuba yimina Jehova uNkulunkulu wakho

obamba isandla sakho sokunene,

nothi kuwe: Ungesabi,

mina ngiyakusiza.

₁₄Ungesabi wena mpethu, Jakobe,

nani bantu bakwa-Israyeli;

mina ngiyakukusiza,” usho uJehova;

uMhlengi wakho ungoNgcwele ka-Israyeli.

₁₅“Bheka, ngiyakukwenza ukuba ube yisibhulo

esisha esibukhali esinamazinyo;

uyakubhula izintaba, uzicolisise,

wenze amagquma abe njengamakhoba.

₁₆Uyakuwahlakaza, umoya uwasuse,

isivunguvungu siwachithe;

wena uyakuthokoza ngoJehova,

uzibonge ngoNgcwele ka-Israyeli.

₁₇“Abampofu nabaswelayo bafuna amanzi, kepha awakho,

nolimi lwabo luphele ukoma;

mina Jehova ngiyakubaphendula,

mina Nkulunkulu ka-Israyeli angiyikubashiya.

₁₈Ngiyakuvula imifula emadulini angenalutho

nemithombo phakathi kwezigodi;

ngiyakwenza ihlane libe yichibi lamanzi,

nomhlabathi owomileyo ube yiziphethu zamanzi.

₁₉Ngiyakutshala umsedari* ehlane,

umtholo, nombomvana, nomnqumo,

ngibeke kwahlongasibi umsayipuresi,*

nomthidari,* nomkhoba kanyekanye,

₂₀ukuze babone, bazi,

baqaphele, baqonde kanyekanye

ukuthi isandla sikaJehova sikwenzile lokhu

nokuthi oNgcwele ka-Israyeli wakudala.

₂₁“Lethani indaba yenu,” usho uJehova,

“nisondeze izizathu zenu,” isho iNkosi kaJakobe.

₂₂“Mabazisondeze,

basitshele okuyakwenzeka;

izinto zakuqala ziyini na?

Mabasitshele zona

ukuba sizibeke ezinhliziyweni zethu,

sazi ukuphela kwazo,

noma nisizwise okuzayo.

₂₃Sitsheleni okuzayo ngesikhathi esizayo,

sazi ukuthi ningonkulunkulu;

yebo, yenzani okuhle noma okubi,

simangale, sikubone kanyekanye.

₂₄Bhekani, nivela kokungekho,

nemisebenzi yenu ayiyinto yalutho;

uyisinengiso onikhethileyo.

₂₅“Ukhona engimvusile esenyakatho,

wafika, nasempumalanga,

ukuba abize igama lami;

uyakwehlela phezu kwezikhulu njengaphezu kodaka,

njengombumbi exova ibumba.

₂₆Ngubani owakushoyo kwasekuqaleni ukuba sazi,

nangaphambili ukuba sisho sithi: ‘Uqinisile,’ na?

Cha, akakho okumemezileyo,

akakho nokuzwisileyo,

akakho nozwayo amazwi enu.

₂₇Ngingowokuqala othi kulo iSiyoni:

‘Bheka, babheke,’

nginike iJerusalema umbiki wendaba ethokozisayo.

₂₈Kepha lapho ngibheka,

akukho muntu,

akakho phakathi kwabo umluleki

ongaphendula ngazwi,

lapho ngibabuzayo.

₂₉Bheka, bayize bonke;

imisebenzi yabo ayiyinto yalutho,

nezithombe zabo ezibunjiweyo zingumoya nokuyize.

₁“Bheka inceku yami engiyisekelayo,

okhethiweyo wami othokoza ngaye

umphefumulo wami;

nginikele umoya wami phezu kwakhe,

uyakukhiphela izizwe ukwahlulela.

₂Akayikukhala, adazuluke,

angezwakalisi izwi lakhe ezitaladini.

₃Umhlanga ofecekileyo akayikuwaphula,

umongo othunqayo akayikuwucima;

uyakukhipha ukwahlulela ngeqiniso.

₄Akayikudangala, aphele amandla,

aze amise ukwahlulela emhlabeni;

neziqhingi ziyakuhlalela umthetho wakhe.”

₅Usho kanje uNkulunkulu uJehova

owadala izulu, waleneka,

nowawendlala umhlaba nokuvela kuwo,

nowanika abantu abakuwo ukuphefumula

nomoya kwabahamba kuwo, uthi:

₆“Mina Jehova ngikubizile ngokulunga,

ngiyakubamba isandla sakho, ngikugcine,

ngikubeke ube yisivumelwano sabantu

nokukhanya kwabezizwe,

₇ukuze uvule amehlo ezimpumputhe,

ukhiphe iziboshwa etilongweni

nabahlezi ebumnyameni etilongweni.

₈“NginguJehova; yilo igama lami;

angiyikunika omunye inkazimulo yami,

nezithombe ezibaziweyo udumo lwami.

₉Izinto zakuqala zifikile,

sengimemezela izinto ezintsha;

zingakaqhamuki, ngiyanizwisa zona.”

₁₀Mhubeleni uJehova ihubo elisha,

nodumo lwakhe,

kusukela emikhawulweni yomhlaba,

nina enehlela elwandle nakho konke okukulo,

nina ziqhingi nabakhileyo kuzo.

₁₁Ihlane nemizi yalo makujabule

nemizana abakhileyo kuyo abakwaKedari,

bahube abakhile emadwaleni,

benanele beseziqongweni zezintaba.

₁₂Mabanike uJehova udumo,

bamemezele udumo lwakhe eziqhingini.

₁₃UJehova uyaphuma njengeqhawe;

njengendoda yempi uyavusa ukushisekela kwakhe;

uyakhala, yebo, uyabangalasa,

enze ubuqhawe phezu kwezitha zakhe.

₁₄“Sekuyisikhathi eside ngithulile,

ngathula ngazibamba;

sengiyakukhala njengobelethayo,

ngiphefuzele, ngibitoze kanyekanye.

₁₅Ngiyakwenza ize izintaba namagquma,

ngomise yonke imifino yawo,

ngenze imifula ibe yiziqhingi,

ngenze amachibi ukuba ashe.

₁₆Ngiyakuhambisa izimpumputhe ngendlela ezingayaziyo;

emikhondweni ezingayaziyo ngiyakuzihola;

ngiyakwenza ubumnyama bube ngukukhanya phambi kwazo,

namagebhugebhu ukuba ahlelenjwe;

ngiyakwenza lezi zinto ngingazishiyi.

₁₇Bayakubuyiselwa emuva,

bajabhe nokujabha

labo abethemba ezithombeni ezibaziweyo,

abasho ezithombeni ezibunjiweyo ukuthi:

‘Ningonkulunkulu bethu.’

₁₈“Yizwani nina zithulu;

bhekani nina zimpumputhe,

ukuze nibone.

₁₉Ngubani oyimpumputhe ngaphandle kwenceku yami,

nesithulu njengesithunywa sami engisithumayo, na?

Ngubani oyimpumputhe njengopheleleyo,

oyimpumputhe njengenceku kaJehova, na?

₂₀Ubona izinto eziningi,

kepha awuqapheli;

izindlebe zakhe zivulekile,

kepha akezwa.”

₂₁Kwaba kuhle kuJehova ngenxa yokulunga kwakhe

ukuba akhulise umthetho, awudumise.

₂₂Kepha laba bangabantu abaphangiweyo nabamukiweyo;

bonke bacushiwe emigodini,

bafihliwe ematilongweni;

bangabokuphangwa,

akakho obophulayo,

yebo, bayimpango,

kungekho oshoyo ukuthi: “Buyisa.”

₂₃Ngubani phakathi kwenu obeka indlebe kulokhu,

aqaphele, ezwele isikhathi esizayo, na?

₂₄Ngubani owanikela uJakobe ukuba aphangwe,

no-Israyeli kubo abaphangi, na?

Angithi nguJehova, esonile kuye,

nabangavumanga ukuhamba ngezindlela zakhe,

nabangawulalelanga umthetho wakhe?

₂₅Wayesethela phezu kwakhe ukufutheka kwentukuthelo yakhe,

namandla empi;

kwamvuthela nxazonke,

kepha akakwazanga;

kwamshisa, kepha akakubekanga enhliziyweni yakhe.

₁Kepha manje usho kanje uJehova

owakudalayo wena Jakobe,

nowakubumba wena Israyeli, uthi:

“Ungesabi ngokuba ngikuhlengile,

ngikubizile ngegama lakho;

ungowami.

₂Lapho udabula emanzini,

mina nginawe;

nasemifuleni, ayiyikukukhukhula;

lapho uhamba emlilweni, awuyikusha,

nelangabi aliyikukushisa.

₃Ngokuba nginguJehova uNkulunkulu wakho,

oNgcwele ka-Israyeli,

uMsindisi wakho;

ngiyanika iGibithe libe yihlawulo lakho,

iKushe neSheba esikhundleni sakho.

₄Ngenxa yokuba ubuyigugu emehlweni ami,

futhi ubudumile, uthandekile kimi,

ngiyakunika abantu esikhundleni sakho,

nezizwe esikhundleni sokuphila kwakho.

₅Ungesabi, ngokuba nginawe;

ngiyakuyiletha inzalo yakho iphume empumalanga,

ngikubuthe nasentshonalanga.

₆Ngiyakusho kuyo inyakatho,

ngithi: ‘Balethe,’

nakuyo iningizimu: ‘Ungabagodli.’

Lethani amadodana ami akude,

namadodakazi ami

ukuba aphume emikhawulweni yomhlaba,

₇onke abizwe ngegama lami,

nengiwadalele inkazimulo yami,

engiwabumbile nengiwenzile.”

₈Lethani abantu abayizimpumputhe abanamehlo

nezithulu ezinezindlebe.

₉Izizwe zonke mazibuthelwe ndawonye,

abantu bonke babuthane;

ngubani phakathi kwabo ongamemezela lokhu,

asizwise izinto zakuqala;

mabalethe ofakazi babo ukuba balungisiswe,

bezwe, bathi: “Kuyiqiniso.”

₁₀“Ningofakazi bami,” usho uJehova,

“nenceku yami engiyikhethileyo

ukuba nazi, ningethembe,

niqonde ukuthi nginguye;

ngaphambi kwami akwenziwanga uNkulunkulu,

nangasemva kwami akayikuba khona.

₁₁Mina, mina nginguJehova,

ngaphandle kwami akakho umsindisi.

₁₂Ngimemezele, ngisindisile, ngizwisile,

kungakabikho unkulunkulu wabezizwe phakathi kwenu;

yebo, ningofakazi bami,” usho uJehova,

“mina nginguNkulunkulu.

₁₃Yebo, kwasendulo nginguye;

akakho ongophula esandleni sami;

lapho ngisebenza,

ngubani ongakuvimbela na?”

₁₄Usho kanje uJehova, uMhlengi wenu,

oNgcwele ka-Israyeli, uthi:

“Ngenxa yenu ngithumele eBabele,

ngiyakwehlisa bonke njengababaleki,

namaKaledi ngemikhumbi yokujabula kwawo.

₁₅NginguJehova oNgcwele wenu,

uMdali ka-Israyeli, iNkosi yenu.”

₁₆Usho kanje uJehova owenza indlela elwandle,

nomkhondo emanzini anamandla,

₁₇okhipha izinqola namahhashi,

impi namandla;

kuyalala kanyekanye, akusenakuvuka;

kucishile, kucinyiwe njengomongo.

₁₈“Ningakhumbuli izinto zakuqala,

ningazindli ngezindaba zasendulo.

₁₉Bhekani, ngiyakwenza okusha;

kuyakuqhamuka manje,

angithi niyakwazi na?

Yebo, ngiyakwenza indlela ehlane

nemifula kwahlongasibi.

₂₀Izilwane zasendle ziyakungidumisa,

amakhanka nezintshe,

ngokuba ngiveza amanzi ehlane

nemifula kwahlongasibi

ukuphuzisa abantu bami abakhethiweyo,

₂₁laba bantu engizenzele bona

ukuba bashumayele udumo lwami.

₂₂“Kepha awungibizanga, Jakobe,

ngokuba wadinwa yimi, Israyeli.

₂₃Awulethanga kimi izimvu zakho zomnikelo wokushiswa,

awungidumisanga ngemihlatshelo yakho;

angikukhonzisanga ngeminikelo,

angikudinisanga ngenhlaka.

₂₄Awungithengelanga umhlanga othaphukayo ngemali,

awungisuthisanga ngamanoni emihlatshelo yakho,

kepha ungisebenzisile ngezono zakho,

ungidinisile ngobubi bakho.

₂₅“Mina, mina nginguye

owesula iziphambeko zakho ngenxa yami;

angiyikukhumbula izono zakho.

₂₆Ngikhumbuze, masahlulelane;

yisho wena ukuba ulungisiwe.

₂₇Uyihlo wokuqala wona,

abahumushi bakho bangihlubukile.

₂₈Ngidumazile izikhulu zendlu engcwele,

ngimenzile uJakobe abe yisiqalekiso,

no-Israyeli abe yisithuko.

“ ‘Bheka, ngiyathuma isithunywa sami phambi kobuso bakho

esiyakulungisa indlela yakho phambi kwakho.’