Bible Reading Plan – Day 199

“Ningayifundi indlela yabezizwe,

ningashaywa luvalo ngezibonakaliso zasezulwini,

ngokuba abezizwe bezesaba.

₃Ngokuba imikhuba yabantu iyize,

lokhu kugawulwa umuthi ehlathini;

ngumsebenzi wesandla sesisebenzi ngembazo.

₄Bawenza ube muhle ngesiliva nangegolide,

bawubethela ngezipikili nangezando

ukuba ungazamazami.

₅Ungumsebenzi okhandiweyo, awukhulumi;

uyathwalwa nokuthwalwa,

ngokuba awuhambi.

Ungawesabi, ngokuba awenzi okubi,

nokuhle awunakukwenza.”

₆Akakho onjengawe Jehova;

umkhulu, igama lakho likhulu ngobuqhawe.

₇Ngubani ongekwesabe,

Nkosi yezizwe,

ngokuba uyimfanelo yakho,

ngokuba phakathi kwabo bonke

abahlakaniphileyo bezizwe

nakuyo yonke imibuso yabo akakho onjengawe.

₈Bayiziphukuphuku, bayiziwula bonke;

ngukulaya kwezithombe;

kungumuthi nje,

₉nezingcwecwe zesiliva

ezilethwe zivela eTharishishi

negolide lase-Ofiri,

umsebenzi wesisebenzi nowezandla zomkhandi,

kugqokiswe okuluhlaza nokububende,

kungumsebenzi wabahlakaniphileyo konke.

₁₀Kepha uJehova unguNkulunkulu weqiniso,

unguNkulunkulu ophilileyo neNkosi yaphakade;

ngentukuthelo yakhe umhlaba uyazamazama,

izizwe azinakuma ngokufutheka kwakhe.

₁₂Wawenza umhlaba ngamandla akhe,

walimisa izwe ngokuhlakanipha kwakhe,

ngokuqonda kwakhe waleneka izulu.

₁₃Lapho elizwakalisa izwi lakhe,

kungukuhlokoma kwamanzi ezulwini;

uzikhuphula izinkungu emikhawulweni yomhlaba,

enzele imvula unyazi,

awukhiphe umoya endlini yengcebo.

₁₄Bonke abantu bayiziphukuphuku,

abanakwazi;

bonke abakhandi bajabhiswa nezithombe zabo ezibaziweyo,

ngokuba izithombe zabo ezibunjiweyo zingamanga,

nomoya awukho kuzo.

₁₅Ziyize, umsebenzi wenkohliso;

ngesikhathi sokuhanjelwa kwabo ziyakubhubha.

₁₆Oyisabelo sikaJakobe akanjengalezo,

ngokuba nguye obumbile konke;

u-Israyeli uyisizwe sefa lakhe,

nguJehova Sebawoti igama lakhe.

₁₇Qoqa umshuqulo wakho ezweni

wena ohlezi ekuvinjezelweni.

₁₈Ngokuba usho kanje uJehova, uthi:

“Bheka, ngiyakubazwiba abakhileyo

ezweni ngalo mzuzwana,

ngibacindezele ukuze bakuzwe.”

₁₉Maye kimina ngenxa yokulimala kwami!

Ukushaywa kwami kunzima.

Kepha ngithi mina:

“Nempela lokhu kulusizi lwami,

ngiyakuluthwala.”

₂₀Itende lami lichithakele,

zonke izintambo zami zigqabukile;

abantwana bami basukile kimi,

kabasekho;

kasekho owokwelula itende lami

nowokumisa izilenge zami.

₂₁Ngokuba abelusi bayiziphukuphuku,

abamfunanga uJehova;

ngalokho abaphumelelanga,

nomhlambi wabo wonke uhlakazekile.

₂₂Bheka, kusondela izwi lombiko,

nokuzamazama okukhulu okuvela ezweni lasenyakatho,

ukuba kwenze imizi yakwaJuda ibe yincithakalo,

indawo yokuhlala kwamakhanka.

₂₃Ngiyazi, Jehova,

ukuthi indlela yomuntu ayikuye uqobo;

akukuyo indoda ukuba ihambe,

iqondise izinyathelo zayo.

₂₄Ngilaye, Jehova,

kepha ngokwahlulela,

kungabi ngentukuthelo yakho,

funa ungenze into engelutho.

₂₅Thulula ukufutheka kwakho phezu

kwabezizwe abangakwaziyo

naphezu kwemindeni engalibizi igama lakho,

ngokuba bamdlile uJakobe;

yebo, bamdlile bamqeda,

balichitha ikhaya lakhe.

₁₅“Othandiweyo wami unani endlini yami

lapho enza amacebo nabaningi na?

Inyama engcwele ingavela kuwe,

lokhu ujabula ngokwenza okubi, na?”

₁₆UJehova wabiza igama lakho

ngokuthi umnqumo oluhlaza obukekayo,

onezithelo ezinhle;

ngomsindo wesidumo esikhulu

uyakuphemba umlilo kuwo,

kwaphuke amagatsha awo.

“Masiwuchithe umuthi kanye nezithelo zawo,

simnqume ezweni labaphilayo,

igama lakhe lingabe lisakhunjulwa.”

₂₀Jehova Sebawoti,

mahluleli olungileyo,

ovivinya izinso nenhliziyo,

mangibone ukuphindisela kwakho kubo,

ngokuba ngibonakalisile indaba yami kuwe.

₁Ulungile wena Jehova,

noma ngimelana nawe;

ngiyakukhuluma nawe ngokwahlulela:

iphumelelani indlela yababi,

kungani ukuba babe nokuthula abakhohlisa nokukhohlisa, na?

₂Ubatshalile, futhi bagxilile;

bayakhula, bathela izithelo;

useduze nomlomo wabo,

kepha ukude nezinhliziyo zabo.

₃Kepha wena Jehova uyangazi,

uyangibona, uvivinya inhliziyo yami

ukuthi injani kuwe;

bakhiphe njengezimvu zokuhlatshwa,

ubalungisele usuku lokuhlatshwa.

₄Koze kube nini izwe lidabuka,

nemifino yonke yasendle ibuna, na?

Ngobubi babakhileyo khona

izinkomo nezinyoni ziyabhubha, ngokuba bathi:

“Akayikubona ukugcina kwethu.”

₅“Uma ugijimile nemigundatshani,

yakukhathaza,

ungancintisana kanjani namahhashi na?

Uma wethemba ezweni lokuthula kuphela,

uyakwenze njani ekukhukhumaleni kweJordani na?

₆Ngokuba nabafowenu nendlu kayihlo

nabo bakukhohlisile,

nabo bamemeza kakhulu emva kwakho;

ungabethembi, noma bekhuluma okuhle kuwe.”

₇“Ngiyishiyile indlu yami,

ngililahlile ifa lami,

nginikele othandiweyo womphefumulo wami

esandleni sezitha zakhe.

₈Ifa lami likimi

njengengonyama ehlathini;

lingiphumisele izwi;

ngalokho ngiyalizonda.

₉Ifa lami liyinqe elimanakanaka kimi,

amanqe angakulo alihaqile nxazonke;

hambani, nibuthe zonke izilwane zasendle,

nizilethe, zidle.

₁₀Abelusi abaningi basichithile isivini sami,

basinyathele phansi isabelo sami,

benze ifa lami elinxanelekayo ihlane elichithakeleyo.

₁₁Basenze incithakalo;

siyincithakalo, sikhala kimi;

izwe lonke lichithiwe,

kepha akakho okubeka enhliziyweni.

₁₂Abaphangi bafikele onke amaduli angenalutho,

ngokuba inkemba kaJehova iyadla,

kusukela komunye umkhawulo womhlaba

kuze kufike komunye,

nenyama enokuthula ayikho.

₁₃Bahlwanyele ukolweni,

bavuna ameva,

bakhandlekile bengasizakalanga;

yebo, niyakuba namahloni ngezithelo zenu

ngenxa yokufutheka okuvuthayo kukaJehova.”