Bible Reading Plan – Day 188

₂“Kepha wena Betlehema Efratha,

omncane ukuba ube phakathi kwemindeni yakwaJuda,

ngiyakuphunyelwa ngovela kuwe,

ozakuba ngumbusi kwa-Israyeli,

okuvela kwakhe kusukela endulo ezinsukwini zaphakade.”

₃Ngalokho bayakukhashelwa,

bese yibuyela insali yabafowabo kubantwana bakwa-Israyeli.

₄Uyakuma, aluse ngamandla kaJehova nangokuphakama kwegama

likaJehova uNkulunkulu wakhe;

sebeyakuhlala,

ngokuba uzakuba mkhulu

kuze kube semajukujukwini omhlaba.

₅Ukuthula kuyakuba yilokhu:

lapho umAsiriya engena ezweni lakithi,

anyathele ezindlini zethu zobukhosi,

siyakumvusela abelusi abayisikhombisa

nezikhulu zabantu eziyisishiyagalombili.

₆Bayakuchitha izwe lase-Asiriya ngenkemba,

nezwe lakwaNimrode ezintubeni zalo,

asophule kumAsiriya,

lapho engena ezweni lakithi,

nalapho enyathela emikhawulweni yethu.

₇Insali yakwaJakobe iyakuba phakathi kwabantu abaningi

njengamazolo avela kuJehova,

ngengezihlambi otshanini ezingahlaleli muntu,

zingahlaleli abantwana babantu.

₈Insali yakwaJakobe iyakuba phakathi kwezizwe,

phakathi kwabantu abaningi,

njengengonyama phakathi kwezilwane zasehlathini,

njengebhongo lengonyama phakathi kwemihlambi yezimvu,

elithi lapho lidabula,

linyathele, lidwengule,

kungekho owophulayo.

₉Masiphakanyiswe isandla sakho phezu kwezitha zakho,

zinqunywe zonke izitha zakho.

₁₀“Kuyakuthi ngalolo suku,” usho uJehova,

“nginqume amahhashi akho phakathi kwakho,

ngichithe izinqola zakho,

₁₁ngiyinqume imizi yasezweni lakho,

ngizidilize zonke izinqaba zakho.

₁₂Ngiyakunquma ukulumba esandleni sakho,

kungabe kusabakho kuwe abahlola imihlola.

₁₃Ngiyakunquma izithombe zakho ezibaziweyo

nezinsika zakho phakathi kwakho,

ungabe usakhonza imisebenzi yezandla zakho.

₁₄Ngiyakubasiphula o-Ashera* bakho phakathi kwakho,

ngiyichithe imizi yakho.

₁₅Ngiyakwenza impindiselo ngentukuthelo nangokufutheka

kuzo izizwe ezingalalelanga.”

₁Ake nizwe akushoyo uJehova, ethi:

“Suka ulwe phambi kwezintaba,

uzwise amagquma izwi lakho.

₂Zwanini, zintaba,

ukuphikisana kukaJehova,

nani zisekelo zomhlaba eziqinileyo,

ngokuba uJehova unokuphikisana nabantu bakhe,

uyakumelana nabo.

₃“Bantu bami, ngenzeni kini;

kuyini enginikhathaze ngakho na?

Ngiphenduleni.

₄Nganikhuphula ezweni laseGibithe,

nganihlenga endlini yezigqila,

ngathuma phambi kwenu oMose, no-Aroni, noMiriyamu.

₅Bantu bami, ake nikhumbule

okwacetshwa nguBalaki inkosi yakwaMowabi,

nalokho amphendula ngakho uBileyamu indodana kaBeyori,

nokwakuphakathi kweShithimi neGiligali,

nize nazi izenzo ezilungileyo zikaJehova.”

₆Ngiyakusondela kuJehova nginantoni,

ngikhothame kuNkulunkulu ophezulu, na?

Ngiyakufika ngiphethe iminikelo yokushiswa,

nginamathole amnyaka munye, na?

₇UJehova uyakwenamela izinkulungwane zezinqama

nezinkulungwane eziyishumi zemifula yamafutha na?

Ngiyakunika izibulo lami ngenxa yesiphambeko sami,

isithelo sesisu sami ngenxa yesono senhliziyo yami, na?

₈Ukutshelile, muntu, okuhle;

uJehova ufunani kuwe,

kungabi ngukwenza ukulunga kuphela nokuthanda umusa,

uhambe noNkulunkulu wakho ngokuthobeka, na?

₉Izwi likaJehova liyamemeza kuwo umuzi.

Ukwesaba igama lakho ngukusindiswa;

zwanini induku noyimisileyo.

₁₀Kusekhona inzuzo embi endlini yababi,

ne-efa* elincane eliqalekiswayo, na?

₁₁“Ukhona ohlanzekile onesilinganiso esibi

nesikhwama sezisindo ezikhohlisayo na?

₁₂“Abacebileyo bawo bagcwele ubudlova,

nabakhileyo kuwo bakhuluma amanga,

nolimi lwabo lunenkohliso emlonyeni wabo.

₁₃Ngalokho mina ngiyakugulisa ngokushaya,

ngikuchithe ngenxa yezono zakho.

₁₄Lapho udlayo, awuyikusutha,

kube khona ukulamba phakathi kwakho;

uyakususa, ungakhululi kodwa,

nokukhululayo ngiyakukukhaphela enkembeni.

₁₅“Uyakutshala, ungavuni kodwa;

uyakunyathela iminqumo, ungazigcobi kodwa ngamafutha,

nezithelo zomvini, ungaliphuzi nokho iwayini.

₁₆Izimiso zika-Omri ziyagcinwa,

nazo zonke izenzo zendlu ka-Ahabi;

nihamba ngamacebo abo;

ngalokho ngiyakunenza incithakalo

nabakhileyo khona into encimfelwayo;

niyakuthwala ihlazo labantu bami.”

₁Maye kimi!

Ngokuba nginjengokuvunwa kwezithelo zasehlobo,

njengokukhothozwa komvini;

akukho hlukuzo lokudliwa;

umphefumulo wami uyafisa ikhiwane eliyingqalabutho.

₂Abathembekileyo babhubhile emhlabeni,

akakho oqotho phakathi kwabantu;

bonke baqamekela igazi;

bayazingelana, kube yilowo nalowo umfowabo ngenetha.

₃Izandla zabo ziphezu kokubi ukukuthuthukisa;

isikhulu sinesicelo,

umahluleli ubheka umvuzo;

omkhulu ukhuluma ngesifiso somphefumulo wakhe;

bayakwalukanisa.

₄Omuhle wabo unjengobobe,

olungileyo mubi kunothango lwameva;

usuku lwabalindi bakho nolokuhanjelwa kwakho lufikile;

sekuyakuba ngukukhungatheka kubo.

₅Ningamethembi umngane,

ningakholwa ngumhlobo;

gcina iminyango yomlomo wakho kuye olala ngasesifubeni sakho.

₆Ngokuba indodana idelela uyise;

indodakazi ivukela unina;

umalokazana uvukela uninazala,

nezitha zomuntu ngamadoda endlu yakhe.

₇Kepha mina ngiyakumbheka uJehova;

ngiyakulindela uNkulunkulu wokusindiswa kwami;

uNkulunkulu wami uyakungizwa.

₈Ungathokozi ngami, sitha sami;

ngokuba uma ngiwile, ngiyakuvuka;

lapho ngihlezi ebumnyameni,

uJehova uzakuba ngukukhanya kwami.

₉Ngiyakuthwala ulaka lukaJehova,

ngokuba ngonile kuye,

aze amele indaba yami,

angenzele ukwahlulelwa,

angiphumisele ekukhanyeni,

ngibone ukulunga kwakhe.

₁₀Isitha sami siyakukubona,

sisitshekelwe ngamahloni,

esona besithi kimi:

“Uphi uJehova uNkulunkulu wakho?”

Amehlo ami ayakusibona;

manje siyakunyathelwa njengodaka lwasezitaladini.

₁₁Kuyakufika usuku lokwakha izingange zakho;

ngalolo suku umkhawulo wakho uyakudediselwa kude.

₁₂Ngalolo suku bayakufika kuwe

bevela e-Asiriya nasemizini yaseGibithe,

kusukela eGibithe kuze kube seMfuleni,*

kusukela elwandle kuze kube selwandle,

kusukela entabeni kuze kube sentabeni.

₁₃Kepha izwe liyakuba yincithakalo

ngenxa yabakhileyo kulo ngezenzo zabo.

₁₄Yalusa abantu bakho ngentonga yakho,

izimvu zefa lakho

ezihlala zodwa ehlathini phakathi kweKarmeli;

mazaluke eBashani nakwaGileyadi njengasezinsukwini zasendulo.

₁₅“Njengasezinsukwini zokuphuma kwakho ezweni laseGibithe

ngiyakubabonisa izimangaliso.”

₁₆Abezizwe bayakubona,

babe namahloni ngamandla abo onke,

babeke isandla sabo emlonyeni wabo,

izindlebe zabo zibe yizithulu.

₁₇Bayakukhotha uthuli njengenyoka,

baphume bethuthumela njengezinto ezinabuzelayo emhlabathini

ezindaweni zazo ezivalelweyo,

bafike ngokuqhaqhazela kuJehova uNkulunkulu wethu,

besabe ngenxa yakho.

₁₈Ngubani onguNkulunkulu onjengawe

othethelela insali yefa lakho ububi bayo,

uyiyekele isiphambeko sayo, na?

Akabambeleli entukuthelweni yakhe kuze kube phakade,

ngokuba wenamela umusa.

₁₉Uyakubuye asibekezelele,

anyathele phansi ububi bethu;

yebo, uyakuphonsa zonke izono zabo ekujuleni kolwandle.

₂₀Uyakunika uJakobe ukuthembeka no-Abrahama umusa

owakufungela obaba kwasezinsukwini zasendulo.