Ihubo 104

₁Mbonge uJehova, mphefumulo wami;

Jehova Nkulunkulu wami, umkhulu,

wembethe udumo nobukhosi;

₂ogqoka ukukhanya njengengubo,

oweneka izulu njengendwangu;

₃obeka imishayo yezindlu zakhe emanzini,

owenza amafu abe yinqola yakhe,

ohamba ngamaphiko omoya;

₄owenza izingelosi zibe yimimoya,

izikhonzi zakhe zibe yilangabi lomlilo.

₅Umisile umhlaba phezu kwezisekelo zawo,

ukuze ungazanyazanyiswa kuze kube phakade naphakade.

₆Wawumboza ngolwandle njengengubo;

amanzi ema phezu kwezintaba.

₇Ngokukhuza kwakho abaleka,

ngezwi lokuduma kwakho ashesha asuka.

₈Enyuka izintaba, ehla izigodi,

aze afika endaweni owawuyimisele wona.

₉Umisile umncele ukuba angaweqi,

angabuyi ukusibekela umhlaba.

₁₀Uthumela imithombo ezigodini;

yona igijima phakathi kwezintaba.

₁₁Iyaphuzisa izilwane zonke zasendle,

izimbongolo zasendle zicime ukoma kwazo.

₁₂Izinyoni zezulu zakhile ngakuyo,

zizwakalisa izwi lazo phakathi kwamagatsha.

₁₃Uphuzisa izintaba okuvela emakamelweni akhe;

umhlaba uyaneliswa yisithelo semisebenzi yakho.

₁₄Uhlumisela izinkomo utshani

nemifino yokusiza umuntu,

ukuze aveze ukudla emhlabeni,

₁₅newayini elijabulisa inhliziyo yomuntu,

namafutha okukhazimulisa ubuso,

nesinkwa esiqinisa inhliziyo yomuntu.

₁₆Iyasutha imithi kaJehova,

imisedari* yaseLebanoni ayitshalileyo,

₁₇okwakhele kuyo izinyoni;

ugolantethe unendlu yakhe kuyo imisayipuresi.*

₁₈Izintaba eziphakemeyo ngezezimbuzi zasendle;

amawa ayisiphephelo sezimbila.

₁₉Wenza inyanga ibe ngeyokwahlukanisa izikhathi;

ilanga liyazi ukushona kwalo.

₂₀Wenza ubumnyama kube ngubusuku;

phakathi kwabo kuphuma izilo zonke zasehlathini.

₂₁Izingonyama ezintsha zibhongela impango,

zifuna ukudla kwazo kuNkulunkulu.

₂₂Liphuma ilanga,

bese zibuyela phansi zilale emihumeni yazo.

₂₃Bese kuphuma umuntu,

aye emsebenzini wakhe

nasekukhandlekeni kwakhe kuze kuhlwe.

₂₄Jehova, yeka ubuningi bemisebenzi yakho;

yonke uyenzile ngokuhlakanipha;

umhlaba ugcwele izidalwa zakho.

₂₅Nantu ulwandle, lukhulu, lubanzi;

lapho kukhona izilwanyana ezinwabuzelayo ezingenakubalwa,

izilwane ezincane nezinkulu.

₂₆Kuhamba khona imikhumbi,

uLeviyathani* lowo omenzile ukuba adlale kulo.

₂₇Zonke lezi zidalwa zibheka wena,

ukuze uzinike ukudla kwazo ngesikhathi esiyiso.

₂₈Uyazinika ukudla, zibuthe;

uvula isandla sakho, zisuthe ngokuhle.

₂₉Uyasitheza ubuso bakho, zethuke;

uyasusa umphefumulo wazo, zife,

zibuyele othulini lwazo.

₃₀Uyathumela umoya wakho, zidalwe;

wenza bube busha ubuso bomhlaba.

₃₁Inkazimulo kaJehova mayime kuze kube phakade;

uJehova kathokoze ngemisebenzi yakhe,

₃₂yena obheka umhlaba, besewuthuthumela,

othinta izintaba, zithunqe.

₃₃Ngiyakumhubela uJehova kukho konke ukuphila kwami;

ngiyakuhlabelela kuNkulunkulu wami ngisekhona.

₃₄Ukuzindla kwami makube mnandi kuye;

mina mangithokoze kuJehova.

₃₅Izoni maziphele emhlabeni,

kungabe kusaba khona ababi.

Mbonge uJehova, mphefumulo wami.

Haleluya!