IzAga 14

₁Owesifazane ohlakaniphileyo uyakha indlu yakhe,

kepha oyisiwula uyayidiliza ngezandla zakhe.

₂Ohamba ngobuqotho uyamesaba uJehova,

kepha ophambanisa izindlela zakhe uyamdelela.

₃Emlonyeni wesiwula kukhona induku yokuziqhenya kwaso,

kepha izindebe zabahlakaniphileyo ziyabalondoloza.

₄Lapho kungekho khona izinkomo,

umkhombe awunalutho,

kepha inzuzo inkulu ngamandla ezinkabi.

₅Ufakazi oqinisileyo akaqambi amanga,

kepha ufakazi ongaqinisile uyaphafuza amanga.

₆Isideleli siyafuna ukuhlakanipha singakutholi,

kepha ukwazi kulula koqondayo.

₇Suka phambi komuntu oyisiwula,

ngokuba lapho awuboni izindebe zokwazi.

₈Ukuhlakanipha koqondileyo kungukuqonda indlela yakhe,

kepha ubuwula beziwula buyinkohliso.

₉Iziwula ziyadelela umnikelo wecala,

kepha phakathi kwabaqotho wamukelekile.

₁₀Inhliziyo iyazi ubumunyu bayo;

umfokazi akahlanganyeli intokozo yayo.

₁₁Indlu yababi iyachithwa,

kepha itende labaqotho liyahluma.

₁₂Kukhona indlela ebonakala sengathi ilungile kumuntu,

kepha ukuphela kwayo kuyindlela yokufa.

₁₃Nasekuhlekeni inhliziyo inobuhlungu,

nokuphela kwentokozo kulusizi.

₁₄Ohlehla ngenhliziyo uyasutha ngezindlela zakhe,

nomuntu omuhle ngemisebenzi yakhe.

₁₅Ongenalwazi uyakholwa ngamazwi onke,

kepha oqondileyo uyaqaphela ukunyathela kwakhe.

₁₆Ohlakaniphileyo uyesaba,

udeda ebubini,

kepha isiwula siyaqhosha,

singanaki lutho.

₁₇Isififane siyenza ubuwula,

kepha umuntu wamasu unokuthula.

₁₈Abangenalwazi badla ifa lobuwula,

kepha abaqondileyo baqheliswa ngokwazi.

₁₉Ababi bakhothama phambi kwabalungileyo,

namashinga ngasemasangweni abalungileyo.

₂₀Ompofu uyazondwa nangumakhelwane wakhe,

kepha ocebileyo unabaningi abamthandayo.

₂₁Odelela umakhelwane wakhe uyona,

kepha onomusa kwabampofu ubusisiwe.

₂₂Angithi bayaduka abaceba okubi na?

Umusa neqiniso kuyakuba ngokwabaqamba okuhle.

₂₃Wonke umshikashika unenzuzo,

kepha amazwi omlomo abanga ukuswela kuphela.

₂₄Umqhele wabahlakaniphileyo uyingcebo yabo,

umgexo weziwula ungubuwula.

₂₅Ufakazi oqinisileyo uyophula imiphefumulo,

kepha ophafuza amanga unenkohliso.

₂₆Ekumesabeni uJehova kukhona ithemba elinamandla;

abantwana bakhe bayakuba nesiphephelo.

₂₇Ukumesaba uJehova kungumthombo wokuphila,

ukuze kudedwe ezingibeni zokufa.

₂₈Udumo lwenkosi lungobuningi babantu,

kepha ukuswela abantu kungukuchithwa kwesikhulu.

₂₉Owephuza ukuthukuthela unokuqonda okuningi,

kepha isififane siyaphakamisa ubuwula.

₃₀Inhliziyo ezolileyo ingukuphila kwenyama,

kepha umhawu ungukubola kwamathambo.

₃₁Ocindezela ompofu usola uMenzi wakhe,

kepha onomusa koswelayo uyamdumisa.

₃₂Omubi uwiswa phansi ngobubi bakhe,

kepha olungileyo unethemba ekufeni kwakhe.

₃₃Ukuhlakanipha kuhlezi enhliziyweni yonokuqonda,

kepha phakathi kweziwula akwaziwa.

₃₄Ukulunga kuyaphakamisa isizwe,

kepha ukona kuyihlazo kubantu.

₃₅Isisa senkosi sikuyo inceku enokuqonda,

kepha intukuthelo yayo iyakuba kwehlazisayo.