NgokukaLuka 24

₁Kepha ngosuku lokuqala lweviki, kuntwela ngenzansi, bafika ethuneni bephethe amakha ababewalungisile. ₂Bafumana itshe ligingqiwe ethuneni. ₃Kuthe bengena, abasifumananga isidumbu seNkosi uJesu. ₄Kwathi besasambathekile yilokho, bheka, nanko amadoda amabili emi ngakubo, enezingubo ezicwebezelayo. ₅Besesaba bekhothamela phansi ngobuso, athi kubo: “Nifunelani ophilayo kwabafileyo na? ₆Kakho lapha, kepha uvukile; khumbulani ukukhuluma kwakhe kini eseseGalile, ₇ethi: ‘INdodana yomuntu imelwe ukukhashelwa ezandleni zabantu abayizoni, ibethelwe, ivuke ngosuku lwesithathu.’ ” ₈Bawakhumbula-ke amazwi akhe.

₉Base bebuya ethuneni, babika konke lokho kwabayishumi nanye nakubo bonke abanye. ₁₀KwakungoMariya Magdalena, noJowana, noMariya unina kaJakobe; nabanye ababe kanye nabo babatshela abaphostoli lokho. ₁₁Kepha lawo mazwi aba njengokukhuluma okuyize kubo, kabaze bakholwa yibo. ₁₂Khona uPetru wasuka, wagijimela ethuneni, wakhothama, wabona izindwangu zizodwa; wamuka, waya ekhaya emangele ngokwenzekileyo.

₁₃Bheka-ke, ababili babo babehamba ngalona lolo suku, beya emzaneni othiwa i-Emawuse, ukude neJerusalema amastadiyu* angamashumi ayisithupha. ₁₄Babekhulumisana omunye nomunye ngazo zonke lezo zinto ezehlakeleyo. ₁₅Kwathi besakhuluma bebuzana, uJesu uqobo wasondela, wahambisana nabo. ₁₆Kepha amehlo abo abebambekile ukuba bangamazi.

₁₇Wathi kubo: “Zindaba zini lezi enikhuluma ngazo omunye nomunye nihamba na?” Base bema benyukumele. ₁₈Omunye, nguKleyophase igama lakhe, waphendula, wathi kuye: “Wena uyisihambi eJerusalema, ungoyedwa ongazazi izinto ezenzekileyo khona ngalezi zinsuku na?”

₁₉Wayesethi kubo: “Zinto zini na?”

Bathi kuye: “NgoJesu waseNazaretha obengumprofethi onamandla ngesenzo nangezwi phambi kukaNkulunkulu nabantu bonke, ₂₀ukuthi abapristi abakhulu nababusi bethu bamkhaphela ukunqunyelwa ukufa, baze bambethela esiphambanweni. ₂₁Thina-ke besethemba ukuthi nguye ozakuhlenga u-Israyeli; kodwa phezu kwalokho konke sekulusuku lwesithathu lezo zinto zenzekile. ₂₂Futhi nabesifazane abathile bakithi basethusile, ababeyile ethuneni ekuseni; ₂₃kuthe bengasifumani isidumbu sakhe, bafika bathi babone nombono wezingelosi ezithi uyaphila. ₂₄Nabathile babakithi baya ethuneni, bakufumana kunjalo njengokuba beshilo abesifazane, kodwa yena uqobo abambonanga.”

₂₅Wayesethi kubo: “O nina eningaqondiyo nenilibele enhliziyweni ukukholwa yikho konke abakushilo abaprofethi! ₂₆UKristu ubengamelwe yini ukuhlupheka ngalokho, aze angene enkazimulweni yakhe na?” ₂₇Wayesethathela kuMose nakubaprofethi bonke, wabachasisela emibhalweni okuqondene naye.

₂₈Base besondela emzaneni ababeya kuwo yena washaya sengathi udlulela phambili. ₂₉Bamncengisisa bathi: “Hlala nathi, ngokuba sekuzakuhlwa, nemini isiyadlula.” Wangena wahlala nabo.

₃₀Kwathi esehlezi nabo ekudleni, wathabatha isinkwa, wabonga, wasihlephula, wabanika. ₃₁Amehlo abo ayesevuleka, bamazi; wayesenyamalala kubo. ₃₂Bathi omunye komunye: “Inhliziyo yethu ibingavuthi yini phakathi kwethu, lapho ekhuluma kithi endleleni, nalapho esivulela imibhalo, na?”

₃₃Base besuka ngasona leso sikhathi, baphindela eJerusalema, bafumana abayishumi nanye nababe nabo behlangene ndawonye, ₃₄bethi: “Impela iNkosi ivukile, ibonakele kuSimoni.” ₃₅Base belanda nabo okwenzekileyo endleleni, nokuthi yaziwa kanjani yibo ekuhlephuleni isinkwa.

₃₆Besakhuluma lokho, yena uqobo wema phakathi kwabo, wathi kubo: “Ukuthula makube kinina.”

₃₇Kepha bashaywa luvalo, besaba bethi babona ithongo. ₃₈Wayesethi kubo: “Nikhathazekeleni na? Kuvelelani imizindlo ezinhliziyweni zenu na? ₃₉Bhekani izandla zami nezinyawo zami ukuthi yimina uqobo; ngiphatheni, nibone, ngokuba ithongo alinanyama namathambo, njengokuba ningibona nginakho.”

₄₀Esekushilo lokho wababonisa izandla nezinyawo. ₄₁Kepha bengakakholwa ngenxa yentokozo bemangala, wathi kubo: “Ninakho ukudla lapha na?” ₄₂Bamnika iqatha lenhlanzi eyosiweyo neqa lezinyosi. ₄₃Wakuthatha, wadla phambi kwabo.

₄₄Wayesethi kubo: “Yiwo lawo mazwi ami engawakhuluma kini ngisenani okuthi: ‘Kumelwe ukugcwaliseka konke okulotshwe ngami emthethweni kaMose, nakubaprofethi nasemaHutsheni.’ ”

₄₅Khona wayesevula ingqondo yabo, ukuze baqonde imibhalo. ₄₆Wathi kubo: “Kulotshiwe kanje ukuthi uzakuhlupheka uKristu, avuke kwabafileyo ngosuku lwesithathu, ₄₇kushunyayelwe egameni lakhe ukuphenduka, kube ngukuthethelelwa kwezono ezizweni zonke, kuqalwe eJerusalema. ₄₈Nina-ke ningofakazi balezi zinto. ₄₉Bhekani, ngiyathumela kini isithembiso sikaBaba; kepha hlalani emzini, nize nembathiswe amandla avela phezulu.”

₅₀Wabahola, baze bafika ngaseBethaniya, waphakamisa izandla zakhe, wababusisa. ₅₁Kwathi esababusisa, wahlukana nabo, wenyuselwa ezulwini. ₅₂Bakhuleka kuye, baphindela eJerusalema benokuthokoza okukhulu. ₅₃Babekhona ethempelini njalo bemdumisa uNkulunkulu.