UJobe 22

₂“Umuntu angaba yinsizakalo kuNkulunkulu

ukuba ohlakaniphileyo abe nosizo kuye na?

₃Kuyintokozo yini kuSomandla,

uma ulungile,

kuyinzuzo kuye, uma wenza izindlela zakho ziphelele, na?

₄“Kungokumesaba kwakho akusolayo,

angene nawe ekwahlulelweni, na?

₅Ububi bakho abubukhulu yini?

Izono zakho azinakuphela.

₆Ngokuba uthathe ngeze izibambiso kumfowenu,

wahlubula abampofu izingubo zabo.

₇Awumphuzisanga owomileyo amanzi,

wamgodlela olambileyo ukudla.

₈Umuntu onamandla, izwe lingelakhe;

onodumo uyahlala kulo.

₉Umukisile abafelokazi bengenalutho;

izingalo zezintandane zaphuliwe.

₁₀Ngalokho izingibe ziyakuhaqa;

uvalo oluzumayo luyakwethusa.

₁₁Ukukhanya kwakho kuphenduke ubumnyama,

ukuze ungaboni,

nesikhukhula samanzi siyakusibekela.

₁₂“UNkulunkulu akakho ekuphakameni kwezulu na?

Bheka inhloko yezinkanyezi ukuthi iphakeme kangaka.

₁₃Uthi wena: ‘UNkulunkulu wazini na?

Angahlulela engale kwesigayegaye na?

₁₄Amafu ayamsibekela ukuze angaboni;

uyahamba esiyingelezini sezulu.’

₁₅Uyakugcina indlela yamandulo eyahanjwa yizoni na?

₁₆Yizo ezahlwitha kungakabi yisikhathi,

ezisisekelo sazo sathululwa njengomfula,

₁₇nezathi kuNkulunkulu: ‘Suka kithina,

ngokuba uSomandla ubeyakwenzani kubo na?’

₁₈Kepha nguye owayegcwalisa izindlu zabo ngokuhle.

Amasu ababi akude nami.

₁₉“Abalungileyo bayakukubona, bathokoze;

abangenasici bayabaklododela ngokuthi:

₂₀‘Impela ababesivukela sebechithiwe,

nabakushiyileyo umlilo ukuqedile.’

₂₁“Mawujwayelane naye, ube nokuthula;

ngalokho okuhle kuyakufika kuwe.

₂₂Mawamukele umthetho emlonyeni wakhe,

ubeke amazwi akhe enhliziyweni yakho.

₂₃Uma ubuyela kuSomandla, uyakwakhiwa,

uma udedisa okubi kude etendeni lakho,

₂₄ubeke igolide lakho othulini,

nelase-Ofiri phakathi kwamatshe eminonjana.

₂₅USomandla uyakuba yigugu lakho,

nesiliva elikhazimulayo kuwe,

₂₆ngokuba lapho uyakuthokoza ngoSomandla,

uphakamisele kuNkulunkulu ubuso bakho.

₂₇Uyakukhuleka kuye, akuzwe,

wena ugcwalise izithembiso zakho.

₂₈Uma unquma indaba, uyakuyenzelwa,

ukukhanya kukhanye ezindleleni zakho.

₂₉Uma zehla, uyakuthi: ‘Phezulu!’

abesephakanyiswa ozithobileyo.

₃₀Abantu abangemsulwa uyakubakhulula nabo,

bakhululwe ngobumhlophe bezandla zakho.”