UJobe 14

₁“Umuntu ozelwe ngowesifazane

imihla yakhe mifushane,

igcwele ukuyaluza.

₂Uyavela njengembali, abune;

ubaleka njengethunzi, angemi.

₃Konje uvulela onjalo amehlo akho,

ungingenise ekwahluleweni nawe, na?

₄Ngubani ongaveza okuhlambulukileyo kukho

okungcolileyo na?

Kakho noyedwa.

₅Uma imihla yakhe inqunyiwe,

umumo wezinsuku zakhe ukuwe,

ubekile umkhawulo wakhe,

aze angadluli,

₆ungambheki, aphumule,

ukuze athokoze ngosuku lwakhe njengomqashwa.

₇“Ngokuba kukhona ithemba emthini:

uma unqunywa, ungabuye uhlume,

nehlumela lawo aliyikuphela.

₈Noma impande yawo iguga emhlabathini,

nesiphunzi sawo sifela othulini,

₉ngephunga lamanzi uyakuhluma,

uveze izingatsha njengesithombo.

₁₀Kepha umuntu ofileyo uphelile;

umuntu ogqabukileyo uphi na?

₁₁Njengamanzi anyamalele elwandle,

nomfula oshileyo ome,

₁₂kanjalo umuntu ulala phansi,

angabe esavuka;

lize lingabikho izulu abayikuvuka,

bangaphaphanyiswa ebuthongweni babo.

₁₃Sengathi ungangifihla endaweni yabafileyo,

ungisithe kuze kudlule intukuthelo yakho,

unginqumele isikhathi,

ungikhumbule.

₁₄Uma umuntu efa,

uyakubuye aphile na?

Bengiyakulinda zonke izinsuku zomshikashika wami,

kuze kufike ukumuka kwami.

₁₅Ubuyakubiza, mina ngiphendule;

ubuyakulangazelela umsebenzi wezandla zakho,

₁₆yebo, khona ubuyakubala izinyathelo zami,

ungaqapheli isono sami.

₁₇Isiphambeko besiyakuvalelwa esikhwameni,

besewusibekela ukona kwami.

₁₈“Impela intaba iyawa, idilike;

idwala liyasuswa endaweni yalo;

₁₉amanzi ayagubha amatshe;

ukuphuphuma kwawo kuyakhukhula uthuli lomhlaba;

kanjalo uyachitha nethemba lomuntu.

₂₀Uyamsukela kuze kube phakade,

amuke;

uyaguqula ubuso bakhe, ummukise.

₂₁Amadodana akhe ayadunyiswa,

engazi yena;

ayeyiswa, engakuqondi.

₂₂Inyama yakhe iyezwa ubuhlungu bayo kuphela;

umphefumulo wakhe uzidabukela wona kuphela.”