UJeremiya 30

“ ‘Sizwile izwi lokuthuthumela,

elokwesaba kungengelokuthula.

₆Ake nibuze, nibone, uma owesilisa

wake wabeletha na?

Ngibonelani onke amadoda

enezandla zawo ezinkalweni njengobelethayo,

ubuso bonke buphaphathekile, na?

₇Maye, lukhulu lolo suku,

alukho olunjengalo!

Kuyisikhathi sokuhlupheka kukaJakobe,

kepha uyakusindiswa kukho.

₈“ ‘Kuyakuthi ngalolo suku,’ usho uJehova Sebawoti,

‘ngilaphule ijoka entanyeni yabo,

ngigqabule izibopho zabo,

abafokazi bangabe besabakhonzisa,

₉kepha bakhonze uJehova uNkulunkulu wabo,

noDavide inkosi yabo engiyakubavusela yena.

₁₀“ ‘Ungesabi wena Jakobe,

nceku yami,’ usho uJehova,

‘ungapheli amandla, Israyeli,

ngokuba bheka,

ngiyakukusindisa usekude,

nenzalo yakho ezweni lokuthunjwa kwayo;

uJakobe uyakubuya, aphumule, agcineke,

angesatshiswa muntu.

₁₁Ngokuba mina nginawe,’ usho uJehova,

‘ukuba ngikusindise,

ngokuba ngiyakuqeda ngokupheleleyo

zonke izizwe engikuhlakazele kuzo,

kepha wena angiyikukuqeda,

kodwa ngiyakukulaya

ngokwahlulela, ngingakwenzi ube ngongenacala.’

₁₂“Ngokuba usho kanje uJehova, uthi:

“ ‘Ukulimala kwakho akunakuphulukiswa,

nesilonda sakho sinzima.

₁₃Akakho omela icala lakho ukuba uboshwe;

umuthi wokuphilisa awunawo.

₁₄Zonke izithandwa zakho zikukhohliwe,

azisakufuni,

ngokuba ngikushayile ngokushaywa

kwezitha, ngokulaywa kononya,

ngenxa yobuningi bokona kwakho,

nangokuba izono zakho zandile.

₁₅Ukhalelani ngokulimala kwakho

ukuthi ubuhlungu bakho abunakuphulukiswa na?

Ngenxa yobuningi bokona kwakho

nangokuba izono zakho zandile

ngenze lokho kuwe.

₁₆“ ‘Ngalokho bonke abakudlayo bayakudliwa,

nabo bonke abamelene nawe bayakuthunjwa bonkana,

nabakuphangayo bayakuphangwa,

nabo bonke abakwamukayo

ngiyakubanikela ukuba bamukwe.

₁₇Ngokuba ngiyakubuyisela ukuphila kuwe,

ngelaphe izilonda zakho,’ usho uJehova,

‘ngokuba bakubize ngokuthi Oxoshiweyo

neSiyoni elingafunwa muntu.’

₁₈“Usho kanje uJehova, uthi:

“ ‘Bheka,

ngiyakukubuyisa ukuthunjwa kwamatende kaJakobe,

ngiwahawukele amakhaya akhe;

umuzi uyakwakhiwa enxiweni lawo,

indlu yamakhosi ihlale njengokufaneleyo.

₁₉Kuyakuphuma kubo udumiso nezwi labathokozayo;

ngiyakubenza babe baningi,

bangabi ngabayingcosana,

ngibadumise, bangeyiswa.

₂₀Abantwana bakhe bayakuba njengakuqala,

ibandla lakhe lime phambi kwami,

ngijezise bonke abamcindezelayo.

₂₁Isikhulu sakhe siyakuba ngesiphuma kuye,

nombusi wakhe uyakuvela phakathi kwakhe;

ngiyakumsondeza, asondele kimi,

ngokuba ngubani oke waba nesibindi

sokusondela kimi na?’ usho uJehova.

₂₂“ ‘Niyakuba ngabantu bami,

mina ngibe nguNkulunkulu wenu.’ ”

₂₃Bheka, isivunguvungu sikaJehova!

Ukufutheka kwakhe kuphumile,

isivunguvungu esichithayo;

siyakwehlela phezu kwamakhanda ababi.

₂₄Ukufutheka okuvuthayo kukaJehova akuyikubuya,

aze enze, aze afeze umgomo wenhliziyo yakhe;

ezinsukwini zokugcina niyakukuqonda.