U-Isaya 24

₁Bheka, uJehova wenza ize umhlaba, awuchithe,

agumbuqele ubuso bawo,

ahlakaze abakhileyo kuwo.

₂Kuyakuthi njengakubantu kube njalo kumpristi,

nanjengasencekwini kube njalo enkosini yayo,

nanjengasencekukazini kube njalo enkosikazini yayo,

nanjengakumthengi kube njalo kumthengisi,

nanjengakotshelekayo kube njalo kobolekayo,

nanjengakobiza inzalo kube njalo kokhokha inzalo.

₃Umhlaba uyakuba yize leze,

uphangwe nokuphangwa,

ngokuba uJehova ukhulumile izwi lakhe.

₄Umhlaba uyalila, ubune;

izwe liyaphela amandla, linyamalale,

abaphakemeyo bomhlaba badangale.

₅Umhlaba wonakalisiwe phansi kwabakhileyo kuwo,

ngokuba beqile imithetho,

badlulile ezimisweni,

baphulile isivumelwano esiphakade.

₆Ngalokho isiqalekiso sidlile umhlaba,

nabakhileyo kuwo batholiswa icala;

ngalokho abakhileyo emhlabeni bayashiswa,

kusale abantu abayingcosana nje.

₇Iwayini elisha liyalila,

umvini uyahhuma,

bonke ababethokoza ngenhliziyo bayabubula.

₈Ukujabula kwezigubhu kunqamukile,

ukuxokozela kwabajabulayo kuphelile,

nenjabulo yehabhu* ikhawukile.

₉Abasayikuphuza iwayini ngesihlabelelo;

uphuzo olunamandla luyakubaba kubo abaluphuzayo.

₁₀Umuzi oyihlane ubhidliziwe;

zonke izindlu zivaliwe

ukuba kungangeni muntu.

₁₁Kukhalwa ngewayini ezitaladini;

yonke intokozo inyamalele;

injabulo yezwe idlulile.

₁₂Emzini kusele incithakalo;

isango livithiziwe, lachithwa.

₁₃Ngokuba kuyakuba njalo emhlabeni phakathi kwabantu,

njengokushaywa kweminqumo

nanjengokukhothoza,

lapho sekuvuniwe.

₁₄Laba bayaphakamisa izwi labo, bamemeze;

bajabula ngobukhosi bukaJehova entshonalanga.

₁₅Ngalokho mdumiseni uJehova empumalanga,

nasogwini lolwandle

igama likaJehova uNkulunkulu ka-Israyeli.

₁₆Siyezwa amahubo avela emikhawulweni yomhlaba, athi:

“Udumo malube koLungileyo!”

Kepha mina ngithi: “Ngifile, ngifile!

Maye kimi!”

Abakhohlisi bakhohlisile,

yebo, abakhohlisi bakhohlisile nokukhohlisa.

₁₇Ukwesaba, nomgodi, nogibe kuphezu kwakho

wena owakhileyo emhlabeni.

₁₈Kuyakuthi obalekela umsindo wokwesaba

awele emgodini;

okhuphuka emgodini uyakubanjwa lugibe,

ngokuba amafasitele aphezulu avuliwe,

nezisekelo zomhlaba ziyazamazama.

₁₉Umhlaba uyaphuka nokwaphuka,

umhlaba uyavithizwa nokuvithizwa,

umhlaba uyazanyazanyiswa nokuzanyazanyiswa.

₂₀Umhlaba uyatengezela nokutengezela njengesidakwa,

uyantengantenga njengexhiba;

isiphambeko siyakuba nzima phezu kwawo,

uwe, ungabe usavuka futhi.

₂₁Kuyakuthi ngalolo suku uJehova ahambele

ibandla lasezulwini phezulu,

namakhosi omhlaba emhlabeni.

₂₂Bayakubuthelwa ndawonye

njengeziboshwa zibuthelwa emgodini,

bavalelwe etilongweni,

bajeziswe emva kwezinsuku eziningi.

₂₃Inyanga ekhazimulayo isiyakuyangaza,

nelanga elinkemuzelayo liyakujabha,

ngokuba uJehova Sebawoti uyakuba yinkosi

entabeni yaseSiyoni naseJerusalema,

abe yinkazimulo phambi kwamalunga akhe.