UGenesise 49

₂“Qoqanani, nizwe,

nina madodana kaJakobe,

nimlalele u-Israyeli uyihlo.

₃“Rubeni, uyizibulo lami wena,

amandla ami,

ukuqala kwezikhwepha zami,

ingqongqo ngesithunzi,

ingqongqo ngamandla.

₄Uyachichima njengamanzi,

awuyikuba nabungqongqo,

ngokuba wakhwela embhedeni kayihlo, wawona;

wakhwela okhukhweni lwami.

₅“OSimeyoni noLevi bayizelamani;

izinkemba zabo ziyizikhali zobudlwangudlwangu.

₆Ungangeni emkhandlwini wabo,

mphefumulo wami;

ungahlangani nebandla labo,

nhliziyo yami,

ngokuba ngolaka lwabo babulala abantu;

ngobudlova babo basika izinkabi umsipha.

₇Makuqalekiswe ulaka lwabo, ngokuba

lwalunamandla,

nentukuthelo yabo,

ngokuba yayinonya;

ngizakubahlukanisa kwaJakobe,

ngibasakaze kwa-Israyeli.

₈“Juda,

abafowenu bazakukudumisa wena;

isandla sakho siyakuba sesijingweni sezitha zakho;

amadodana kayihlo ayakukukhothamela.

₉UJuda uyibhongo lengonyama.

Wenyuke empangweni,

ndodana yami.

Uguqile, ulele njengengonyama nanjengengonyamakazi;

ngubani oyakumvusa na?

₁₀Intonga yobukhosi ayiyikusuka kuJuda,

nozime lokubusa phakathi kwezinyawo zakhe,

aze afike yena olufanele lona;

nezizwe ziyakumlalela.

₁₁Ubopha ithole lembongolo yakhe emvinini,

ithole lembongolokazi yakhe emvinini omuhle;

uhlanza izingubo zakhe ewayinini,

nezambatho zakhe egazini lezithelo zomvini.

₁₂Amehlo akhe ayaklwela iwayini,

amazinyo akhe amhlophe ubisi.

₁₃“UZebuloni uyakwakha ngasogwini lolwandle,

abe sosebeni lwemikhumbi;

umkhawulo wakhe uzakuba ngaseSidoni.

₁₄“U-Isakare uyimbongolo enamandla,

elala phakathi kwezibaya.

₁₅Wabona indawo yakuphumula ukuthi inhle,

nezwe ukuthi limnandi;

wafolisa ihlombe ukuba athwale,

waba yinceku yempoqo.

₁₆“UDani uyakuthetha amacala abantu bakhe,

njengesinye sezizwe zakwa-Israyeli.

₁₇UDani uyakuba yinyoka endleleni,

inhlangwana emkhondweni eluma izithende zehhashi,

awe nyovane olikhweleyo.

₁₈“Ngiyihalele insindiso yakho, Jehova.

₁₉“UGadi, iviyo liyakumcindezela,

kepha yena uyakucindezela isithende salo.

₂₀“Ku-Asheri kuvela amanoni abe ngukudla kwakhe;

uyakuveza isilovela samakhosi.

₂₁UNafetali uyindluzelekazi ethukululekileyo;

uveza amazwi amnandi.

₂₂“UJosefa uyingatsha entsha ethelayo,

ingatsha ethela ngasemthonjeni;

amagatsha akhe akhwela odongeni.

₂₃Abacibishelayo bayamkhathaza,

bayamdubula, bayamzingela;

₂₄kepha umnsalo wakhe uhlala uqinile;

amandla ezandla zakhe aqiniswa

ngezandla zoMninimandla kaJakobe,

okuvela kuye uMalusi netshe lika-Israyeli,

₂₅ngoNkulunkulu kayihlo ozakukusiza,

ngoSomandla ozakukubusisa

ngezibusiso zasezulwini phezulu,

nangezibusiso zasotweni olukhona phansi,

nangezibusiso zamabele nezesizalo.

₂₆Izibusiso zikayihlo zinamandla

kunezibusiso zawokhokho bami,

kuze kube semkhawulweni wokugcina wezintaba ezimiyo;

ziyakuba phezu kwekhanda likaJosefa phakade,

nasokhakhayini lwakhe owahlukaniswa nabafowabo.

₂₇“UBenjamini uyimpisi ehomfuzayo;

ekuseni uyadla impango,

kusihlwa uyahlukanisa akuphangileyo.”