UHezekeli 19

₂“ ‘Unyoko wayeyingonyamakazi enjani

phakathi kwezingonyama!

Yabuthisa phakathi kwamabhongo,

yondla amawundlu ayo.

₃Yakhulisa elinye lamawundlu ayo,

laba yibhongo;

lafunda ukubamba impango,

ladla abantu.

₄Izizwe zezwa ngalo,

labanjwa emgodini wazo;

zaliyisa ngezingwegwe ezweni laseGibithe.

₅“ ‘Nxa isilindile,

yabona ukuthi ithemba layo liphelile;

yathatha elinye lamawundlu ayo,

yalenza ibhongo.

₆Lahambahamba phakathi kwezingonyama, liyibhongo;

lafunda ukubamba impango,

ladla abantu.

₇Labhidliza izinqaba zabo,

lachitha imizi yabo,

izwe lachitheka nokugcwala kwalo ngomsindo wokubhonga kwalo.

₈Izizwe zase zilihlelela nxazonke,

zivela emazweni,

zeneka phezu kwalo inetha,

labanjwa emgodini wazo.

₉Zalifaka endlwaneni evaliweyo ngezingwegwe,

zaliyisa enkosini yaseBabele,

zalingenisa ezinqabeni

ukuba izwi lalo lingabe lisezwakala ezintabeni zakwa-Israyeli.

₁₀“ ‘Unyoko wayenjengomvini,

usahlezi ngokuthula,

utshalwe ngasemanzini;

wawunezithelo namahlumela ngenxa yamanzi amaningi.

₁₁Wawunezingatsha ezinamandla ezaba yizintonga zababusayo;

isiqu sawo sasiphakeme phakathi kwamaqabunga amaningi,

waze wabonakala phezulu phakathi kwamahlumela awo amaningi.

₁₂Kepha wasishulwa ngokufutheka,

waphonselwa phansi,

umoya wasempumalanga womisa izithelo zawo;

isiqu sawo esiqinileyo saphulwa,

sabuna, umlilo wasiqeda.

₁₃Manje usutshaliwe ehlane ezweni elishileyo nelomileyo.

₁₄Umlilo uphumile esiqwini sawo,

wadla amagatsha awo nezithelo zawo,

kwaze kwangabe kusaba khona kuwo igatsha eliqinileyo,

nantonga yokubusa.’

Lokhu kuyisililo; makube yisililo.”