To The Word – Day 96

Njengesaqhwithi sivuthuza entlango

uya kwenjenjalo xa ezayo umhlaseli:

uya kuza ephuma ezweni eloyikekayo.

₂Ndiwalamile umbono wezehlo zenkohlakalo:

ungcothoza nomxhaphazi bayazenzela.

Phakathi, maElam; hlaselani!

Nani, maMedi, zirhawuleni izixeko!

Ngoku uThixo uya kuphelisa ukungcungcutheka;

nditsho ingcinezelo eze neBhabheli.

₃Ke ngoko nditsho ndahlasimla;

nditsho ndapena-pena ziintlungu,

ndangathi ngumfazi kunkqonkqoza inimba.

Izintw' endizivayo ziyandikhamnqisa;

Kambe ke endikuvileyo ndiyanazisa,

izintw' endizibonayo ziyandimangalisa.

₄Ewe, ingqondo yam imile;

suke ndangenwa bubuphaku-phaku;

kukade ndilangazelela urhatya,

nalu ke lunditsho ndangcangcazela.

₅Naso ke isidlo sesilungile;

kungokunje sebesophula.

Phantsi sebandlele iingubo;

ewe, kuyatyiwa kuyaselwa.

Hayi bo, phakamani, matshawe;

kubi, thambisan' amakhaka.

₆INkosi indiyalele yenjenje:

“Hamba umisele intlola;

yona maze ikuthethe ekubonileyo.

₇Yakubona iinqwelo zamahashe,

mhlawumbi abaqabele iidonki noba ziinkamela,

maze ibaqwalasele ngononophelo.”

₈Ke idindala lidanduluke lathi:

“Imini nobusuku, mnumzana, ndimile,

ndithe bhuxe emboniselweni.

₉Ngephanyazo nje gqi inqwelo itsalwa ngamahashe.

Umqhubi udanduluka esithi:

‘Hi-i-i! Yaw' iBhabheli!

Imifanekiso yezithixo zakhona nantso ibubusaza emhlabeni.’ ”

₁₀Nina ke, maSirayeli, mawethu,

senifana nengqolowa exushwe ziinyawo esandeni.

Kambe ke endikuvileyo ndiyanazisa,

ndibhengeza endikuxelelwe *nguNdikhoyo uSomandla-onke,

nditsho uThixo kaSirayeli.

Kukho obiza eSeyire:

“Khawutsho, mlindi, buntangani obu busuku?

Khawundixelele, kuxesha liphi ebusuku?”

₁₂Umlindi uphendula athi:

“Sekumbovu kuse, kodwa ubusuku buyeza kwakhona.

Xa usenomkro ungabuza;

ewe, uze ubuye ubuze kwakhona.”

Nina barhwebi baseDedan

abaxhwarhe kumahlathi elama-Arabhu,

₁₄abo banxaniweyo baphen' amanzi;

nina bantundini baseTema,

ziphen' ukutya iimbacu.

₁₅Kaloku zizisindisa kuloo mikhonto,

leyo seyirholwe yada yajoliswa,

ngokunjalo nezo ntolo zingxashiweyo,

ewe, zipheph' ifuthe lemfazwe.

Khanitsho! Kwenzeka ntoni kanye?

Ngani niphezu kwezindlu nje?

₂Kutheni kuyimikhwazo nje esixekweni?

Uthetha ntoni lo mbhiyozo wenu?

Sesani isiphithi-phithi nengxokozelo?

Ewe, amagorha enu ahambile,

kambe ke akafelanga dabini.

₃Kaloku iindwalutho zenu zasik' umoya;

ngenene zibaleke zingakhange zaxhathalaza.

Nithinjwe ningalekuzanga noku kukanye;

suka nafulathela ningenawo nomkrwelo.

₄Yiyo loo nto ndisuke ndathi:

“Bhekelani phaya; mkani kum!

Ndiyekeni nditshw' esikrakra ngenxa yabam abahambileyo.

Sukani kum; kahleni ngentuthuzelo!”

₅Liyeza ithuba leNkosi *uNdikhoyo onamandla onke,

ithuba lokuphakuzela nokujokwa;

umhla wesiphithi-phithi.

Kuya kuba njalo ke kwiNtili yeMibono.

Suka yangugiqe-giqe esixekweni,

iindonga zenz' ubutyobo, gcimfi-gcimfi!

Zatsho kwahlahlamba izikhalo zabazibikayo;

ewe, neentaba zivile zatsho zaphendula!

₆Atsho abophelela amafa-nankosi ase-Elam,

eza selegqabadula ephalisa;

ingezontolo, ef' amacala zizixhobo!

Kaloku namaKiri awabambil' amakhaka;

ewe, selechophile elindel' uphakathi.

₇Ke yona loo ntili entle kunene kaJuda,

kanye le yendyebo, ibizama-zama,

kungeyonqwelo, kuyinto nje!

Amajoni amahashe selengxangile

ethe xhonkxosholo kumasango eJerusalem.

₈Suka ke yangufohle-fohle novithe-vithe;

kaloku amaxhadi kaJuda afadalele!

Kuthe ke kwakuba nje

suka nina naya kulanda izixhobo

phaya eBhete-yahare.

₉Nasibona isixeko sikaDavide,

nâso siphanjwe ziintanda.

Nagcina amanzi kwiqula elingezantsi,

₁₀nazijonga izakhiwo zaseJerusalem,

suka nazichitha ezinye zazo

ukuze nilungise ngazo udonga lwesixeko.

₁₁Apha ngaphakathi esixekweni

nakha iqula elinguvimba,

nisenzela ukulondoloza amanzi

lawo aphuma kweliya lidala.

Kambe ke kuyo yonke loo nto

tu ukuziduba ngalowo ungumcwangcisi –

animkhathalelanga lowo wayisekayo kwamandulo.

₁₂Ngelo thuba iNkosi uNdikhoyo onamandla onke

uthe efuna nihlahlambe nitshw' esikrakra,

xa ebesithi niza kugugula nitsho ngezokuzila.

₁₃Suka nina naguya nabhiyoza,

naxhela zigusha zinkomo kwanjeya;

natya nenyama, nalebela ngotywala, nisithi:

“Masonwabe sitye sisele;

ikakade siyafa ngomso!”

₁₄UNdikhoyo uSomandla-onke uthethe nam wathi:

“Ngenene obu bubi abuyi kuxolelwa.”

Ewe, ufunge wathi kode kufiwe kunjalo.

Utshilo ke uMhlekazi uNdikhoyo uSomandla-onke!

Bhombolozani, zinqanawa zaseTashishe!

Kaloku yona iTire itshabalele;

okwakuzizindlu nezibuko ngamabhodlo nje!

Ewe, zisuke zavakala zona iindaba;

abebevela eKiti baxelelwa bevile.

₂Yithini cwaka, nina bemi baselunxwemeni,

nditsho nina barhwebi baseSidon,

nina banyuswe ngabemi bolwandle

₃abadada kumanz' anzongo-nzongo,

bathengi abayithengisayo ingqolowa,

nditsho leya ikhula kwelaseJiputa,

eyitsho iTire yayimalike yezizwe.

₄Dana unyoshoze, wena Sidon,

nawe, Tire, nqaba yolwandle!

Kaloku inzonzobila yolwandle iyakhalaza, ithi:

“Mna kaloku andizange ndalunywa;

ewe, mna andizange ndazala;

zange ndikhulise nyana nantombi!”

₅Olu daba lothi lungafika eJiputa

asuke ke wona ajijitheke

xa esiva ngokutshabalala kweTire.

₆Bhombolozani ngesingqala, nina bemi bonxweme;

welelani kwelaseTashishe.

₇Ngaba esi sesiya sixeko solonwabo iTire?

Ngaba sesiya sasungulwa ngonoquku mandulo?

Siso na esathumela iintlola phesheya kolwandle

ukuze sandise isizwe?

₈Kodwa kodwa ngubani umcebi wale ntlekele;

ifakwe ngubani iTire kulo mgxobhozo,

yona eyayikade iphaka iimbasa?

Abarhwebi bayo fudula ingamatshawe;

hay' isidima sabo ehlabathini jikelele!

₉*NguNdikhoyo uSomandla-onke oyicebileyo,

khon' ukuze aliphelise ikratshi labo,

lutsho ludake udumo lwabaziwayo.

₁₀Sarhakani niwulime umhlaba njengaseJiputa,

nditsho kuni, maTashishe.

Kaloku akusekho zibuko eTire.

₁₁UNdikhoyo usolule isandla sakhe

sawel' ulwandle, zangcangcazel' izikumkani.

Ugunyazisile mayela nelamaKanana;

iinqaba zakhona ziza kudilizwa.

₁₂UNdikhoyo wathi kwiSidon:

“Liphelil' ixesha leziyolo, Sidon;

ubuntombi bakho bonakele.

Ningade nisabele kwelamaKiti,

kodwa nalapho akukho buyambo.”

₁₃Khangelani elamaKaledi,

namhlanje alisento yanto.

Ama-Asiriya alenza laphutha,

latsho layintlango yezilwanyana.

Suka balirhawula neemboniselo zalo,

avuthulula zinqaba,

alitsho langamabhodlo.

₁₄Bhombolozani, zinqanawa zaseTashishe,

inqaba elithemba lenu itshabalele!

₁₆“Thath' isigingci ujikelez' isixeko,

henyukazindin' eselide laphutha.

Sikhalise untyiloze ngengoma kwakhona,

ukuze ubuye udle ngendeb' endala.”

₁*UNdikhoyo uza kulibharhis' ihlabathi;

uya kubetha kutsho kube senkangala;

uya kulitsho lenz' uqulukubhode,

abemi balo bona babe ziintsali.

₂Akayi kukhetha bani;

kubo bonke ukufa kobe kunkongolo.

Kofana kumbingeleli nakwibandla,

ibe yiloo nto kumnumzana nesicaka sakhe;

kube kwanjalo kwinkosikazi nesicakazana,

kumthengi nakulowo uthengisayo;

kube yiloo nto kumboleki nakumbolekisi,

kwizityebi nakwabo balambileyo.

₃Ihlabathi liya kuba yinkangala exushekileyo;

liya kuba ngumqwebedu oxhwithekileyo.

Etshilo nje ke uNdikhoyo utshilo.

₄Nâlo ihlabathi lirhawuka, litshaza.

Ewe, ihlabathi liyangcungcutheka, liyabuna;

isibhakabhaka nomhlaba ziyatshitsha.

₅Uluntu luligqwalisile eli hlabathi;

ngokwaphula imiyalelo kaThixo bonakalisile.

Ewe, imimiselo yakhe bayikrobozile,

baza bawuxusha ngeenyawo umnqophiso waphakade.

₆Ngoko ke liqalekisiwe ihlabathi,

nabemi balo ke libambethe ityala.

Ewe, uluntu nalo ke lutsho larhawuka;

ngoku liqaqobana kuphela eliseleyo.

₇Izidiliya nazo ke zitshazile,

newayini ke itsho yanqaba;

ababefudula bonwabile bathe rhubaxa.

₈Ingoma ekhatshwa yingqongqo inqamkile,

imikhwazo yolonwabo nayo iphelile,

ukuhlasimlisa kwesigingci kukombela.

₉Intselo-tywala ayisakhatshwa yimihlali;

ngoku utywala buyakrakra nakwiindla-manzi.

₁₀Isixeko nâso sitsho sangumbhodamo;

iminyango yezindlu ke yona ivalwe mba.

₁₁Ezitalatweni phaya balilela utywala;

imivuyo yabo ijike yakukudakumba;

imihlali nolonwabo zimkile ehlabathini.

₁₂Isixeko ngoku sisele singamabobosi,

nesango likroboke lavuthuluka.

₁₃Kuya kuba njalo ke ehlabathini jikelele;

nantso ke into eya kwenzeka ezizweni zonke:

koba ngathi lixesha lokubethwa komnquma,

ngathi sisidiliya esivunwe sakhwahlazwa.

₁₄Abo basindileyo baya kutsholoza bantyiloze;

entshona baya kuduma bakhahlele

ngenxa yobungangamsha bukaNdikhoyo;

bothi: “Bayethe!”

₁₅Nina basempuma, yitshoni ngendumasi;

nani baselunxwemeni, dombozani nibonge uNdikhoyo;

ewe, mdumiseni uThixo kaSirayeli.

₁₆Ingoma yezibongo ivakala eziphelweni zehlabathi:

“Hayi, ubungangamsha baLowo ulilungisa!”

Athi ke mna – kuxa bendiyintoni na kakade!

Ewe, kunyembelekile, akukho yam kwaphela!

Abangcothozi bona benza ngokungcothoza;

ngokungcatsha kwabo abangcatshi bayangcotsha.

₁₇Yeha ke nina, bemi bahlabathi,

anikho kukunkwantya imigibe nenzonzobila!

₁₈Nobenevuso wasaba kuba esoyika;

woth' esabaleka eyele enzonzobileni.

Omnye wogwencel' aphum' emhadini,

suka ke arhintyelwe zizabatha.

Kaloku amazul' ayivulele imvula,

zatsho zangcangcazela iziseko zehlabathi.

₁₉Ngenene ke ihlabathi lona livikivekile;

ewe, nangoku ke liqhaqhambile,

linyikime lachachamba laboko-boko.

₂₀Ihlabathi ke logxadazela njengenxila;

lophephuka okwephempe mhla ngomoyakazi.

Ihlabathi liyasindeka zizono zalo;

losuka lithi folokohlo kube sisiphelo eso.

₂₁Ngaloo mhlandini ke uNdikhoyo uya kohlwaya,

athi ekwiinginginya zasemazulwini ezulwini phezulu,

abe ekwizikumkani zezizwe ehlabathini phantsi.

₂₂Zoba lugxudululu kunye ndawonye

njengamabhantinti kwamnyama-ndawo esiseleni,

wona anyathelana phakath' entolongweni,

de kube ziintsuku zamkele isohlwayo.

₂₃Nyangandini ke yona yombatsha igqubuthele,

nelanga life ziintloni litsho lizile,

kuba uNdikhoyo uSomandla-onke elawula,

ethe zava kwintaba iZiyon eJerusalem,

ubuqaqawuli bakhe buthe tha kumadod' amakhulu.

₁*Ndikhoyo, wena unguThixo wam;

ndosuka ndikuthuthe ndikudumise.

Kuthi mandikutyibele ndibongisele

ngenxa yemisebenzi yakho ekhamnqisayo;

kaloku ngokuthembeka okukhulu

wena zonke uzifezekisile –

nditsho izicwangciso zakho zamandulo.

₂Isixeko wena usitsho sangamabhodlo,

neso sinqatyisiweyo sitsho sayimiwewe;

amabhotwe aziinqaba kwiintlanga atsho angamanxuwa,

engasoze abuye avuswe.

₃Isizwe esomeleleyo sokubabaza sikuncome,

nesixeko sezikhohlakali siya kukubusa.

₄Kaloku wena uyawakhusela amahlwempu;

akubalekela kuwe ayasinda enkathazweni.

Wena ungumqolomba kumaqhwa nenkqwithelo,

kanti ukwangumthunzi kwingqatsini yelanga.

Kaloku izithonga zezikhohlakali zinjengesiphango,

₅ngathi yinzwinini yelanga kwelibharhileyo.

Wena ukucimile ukugragrama kotshaba,

ukuthe pam ngathi ngumthunzi elangeni,

ingoma yeendlavini itsho yanqamka.

₆Izizwe zonke zehlabathi *uNdikhoyo uSomandla-onke wozenzela isidlo eZiyon;

sidlo eso soba zezona zimuncu-muncu,

nditsho eyona inencasa inyama nesiqhoqhololo sewayini.

₇Kule ntaba wolisusa ilifu elimnyama elasoloko ligubungele izizwe.

₈Ewe, uMhlekazi uNdikhoyo uya kukuphelisa tu ukufa,

neenyembezi azisule kubo bonke abalilayo.

Nengcikivo nokuhlazeka kwabantu bakhe wokuphelisa jikelele ehlabathini.

Kaloku uthethile uNdikhoyo!

₉Ngelo thuba bonke baya kuthi:

“Ngenene nguThixo wethu lo!

Sakholosa ngaye wasihlangula.

NguNdikhoyo lo!

Ngenene sikholose ngaye,

ngoko ke ngoku masonwabe,

ngoku ke masibe nemihlali,

kuba yena usihlangule.”

₁₀Amandla kaNdikhoyo obonakala kule ntaba.

AmaMowabhi aya kuxovulwa ngeenyawo

oku komgquba ebuhlanti.

₁₁Okhweba ngezandla ngathi ayadada;

kambe konke kungancedi nto –

uThixo wosuka awathobe,

lihle elo kratshi lawo.

₁₂Loo mapomakazi eenqaba,

loo mihalambela yeendonga,

uya kuwadiliza awe bhaxa!

₁Wuphulaphule umthandazo wam, *Ndikhoyo;

sive isikhungo sam.

Wena uthembekile, ulilungisa; nceda undiphendule.

₂Musa ukusixoxisa isicaka sakho;

kaloku akukho bani umsulwa phambi kwakho.

₃Kaloku utshaba luthene mbende nam;

lundixushe lwada lwandishikixa.

Lundivalele kwamnyama-ndawo,

ndanga ndingowafa kudala.

₄Xa kungokunje ndiyayoba;

intliziyo yam iyangcungcutheka.

₅Ndikhumbula imihla yamfamlibe,

ndicamanga ngezinto ozenzileyo,

ndiphicotha imisebenzi yezandla zakho.

₆Ndizolulela kuwe izandla zam;

ndikunxanele njengomhlaba owomileyo.

₇Nceda usabele, Ndikhoyo;

umoya wam ufadalele.

Hayi, musa ukundifulathela,

hleze ndifane nâbo baya enzonzobileni.

₈Ububele bakho mandibuve kwakusasa;

kaloku mna ndikholosa ngawe.

Ndifundise indlela endifaneleyo;

kaloku mna ndizibika kuwe.

₉Ndikhoyo, ndihlangule ezintshabeni zam;

kaloku mna ndizimela ngawe.

₁₀Wena unguThixo wam,

ngoko ke ndifundise ukuthanda kwakho.

UMoya wakho wobubele

makandikhokelele endleleni esisithabazi!

₁₁Ndikhoyo, ngenxa yesidima sakho ndihlaziye,

ngenxa yobulungisa bakho ndihlangule ekuxinanisweni.

₁₂Ngenxa yezibele zakho nceda uzinqamle iintshaba zam.

Batshabalalise abanditshutshisayo;

kaloku mna ndisisicaka sakho.