To The Word – Day 94

₁Nango amaMowabhi entlango kwisixeko iSela;

ngoku athumela umrhumo:

amatakane eegusha kwiziphathamandla eJerusalem.

₂AmaMowabhikazi ayazula-zula;

axel' intaka egxothwe endlwaneni yayo.

Nango ephithizela kumazibuko eAnon.

₃“Izwe lifile, yizani kusophula!

Sicela uncedo, khanisikhusele!

Yibani njengomthunzi mhla ligqatsileyo.

Besingoobani kakade siziimbacu nje!

Hayi bo, sincedeni ningasingcothozi!

₄Iimbacu zaseMowabhi maziphambukele kuni;

sikhuseleni kulo mtshabalalisi.”

Le ngcinezelo iza kubuya yethe,

nale ntshabalalo iza kuphela,

nomphembi-dushe aphel' emehlweni.

₅Ngelo thuba ke kosekwa ubukumkani,

bumiselwe ngothando olunezibele.

Esihlalweni kongqendeva onyanisekileyo.

Lowo ke woba ngowendlu kaDavide.

Yena ke uya kulawula ngobulungisa,

alangazelele ulungelelwano nocwangco.

₆Sivile ngokuzikhukumalisa kwamaMowabhi,

elingako lona ikratshi nendelelo;

ewe, angade abe ucikekile likratshi,

kodwa ke, akulele nto apho.

₇Myeke ke uMowabhi abhomboloze.

Mabamthelele uMowabhi nabo balile;

mabenze isililo nesijwili xa bekhumbula amaqebengwane aseKir-hareshete.

₈Amasimi aseHeshbhon ayadodobala,

nezidiliya zaseSibhema zitshabalele.

Amakhosi ezizwe azixangxathile izidiliya zodidi,

zona fudula zifikelela eYazere,

zenjenjeya zithi xhaxhe ngentlango,

amasebe azo ethe gaa ngolwandle.

₉Ngoko ke ndilila kunye neYazere;

ndiyakhala ngezidiliya zaseSibhema;

ndiyinyhididi, Heshbhon nawe Eliyali.

Ewe kaloku, isivuno asibonwa,

imivuyo nemincili iyalambatha.

₁₀Amasimi akezi namihlali nalonwabo;

ezidiliyeni ayisekho ingoma nemiyeyezelo.

Ezixovulelweni akusekho baxovuli;

imiyiyizelo yabavuni iphelile.

₁₁Ngoko ke ndinesimbonono ngenxa yeMowabhi;

ngenene ndihlahlamba njengesigingci,

ngenxa yeKir-hareshete ndibindekile.

“Ke yona iDamasko ayisayi kuba sisixeko,

yosuka ibe ziingqumba zamabhodlo.

₂Izixeko zaseArohere zosala zize;

kuphela zosala zilidlelo lempahla,

futhi kungekho namntu uyiphazamisayo.

₃KwaSirayeli zophela izixeko ezinqatyisiweyo,

ke bona ubukumkani baseDamasko

ngokunjalo namasalela aseSiriya

oba yinto yezolo, ngathi ludumo lwamaSirayeli,”

utsho *uNdikhoyo uSomandla-onke.

₄“Ngaloo mihla ubungangamsha bukaYakobi buya kuphutha,

ukutyeba kwakhe kutsho kutsame.

₅USirayeli woba ngathi yintsimi engqolowa isikwayo;

kwaSirayeli kuya kubharha kube sedizeni –

wofana namasimi entili yaseRefayim.

₆Kambe aya kuba khona amasalela.

Kuya kuba ngathi ngumnquma obhululweyo

kwasala mabini mathathu phezulu,

mhlawumbi isine nesihlanu kwahlanzayo,”

utsho uNdikhoyo uThixo kaSirayeli.

₇Ngaloo mihla ke abantu baya kubhenela kuMdali wabo,

bakhangele kulowo unguYedwa kaSirayeli.

₈Abayi kuba saqamela ngamaqonga lawo bawakhe ngezandla zabo,

bengayi kuba sathembela kowabo umsebenzi –

imiqondiso yesithixokazi uAshera

kunye namaqonga okuqhumisa.

₁₀Kaloku, wena Sirayeli, umfulathele uThixo,

yena odla ngokukuhlangula;

umlibele uThixo ongumqolomba wakho;

usuke watyala imiyezo eyodwa,

khon' ukuze unqule thixo bambi.

₁₁Kanti noba ingantshula idubule

kwangaloo ntsasa ubuyityala ngayo,

liya kubhek' umoya ngasesivunweni –

kuphela yoba yinkxwaleko nezifo ezingaphele ndawo.

₁₂Ke zona izizwe ziyabhabhama,

zitsho ngogqumo ngathi kukuyaluzela kolwandle;

ewe, uluntu luyaxokozela okwamanz' olwandle.

₁₃Izizwe zingade zibe ziyabhonga,

zityhuluba okwamanz' olwandle,

yena ukhalima kanye, zitsho zisabe;

ziphephetheka ngathi luthuli endulini,

ngathi yinkunkum' ibalek' isaqhwithi.

₁₄Ngorhatya bahlasela kutsho kunyembeleke,

kanti kusasa abaziwa nomkhondo.

Banjalo ke abo basixhaphazayo;

eso sisabelo sâbo bazithathelayo.

₁Kunyembelekile ke kwilizwe lesandi samaphiko

emazants' emilambo eKushe.

₂Likhuph' izigidimi ngezikhitshana ezakhiwe ngeengcongolo, zidad' emlanjeni.

Tsheluzani, zigidim' ezikhawulezayo;

luthathen' udaba nigoduke nalo,

luye kwilizwe eliphanjwe yimilambo,

kwisizwe esingwanzilili esinamandla,

amafaf' alusu lumpuluswa,

izintw' ezoyikwa lilizwe jikelele.

₃Bekan' iindlebe, bemi behlabathi!

Jongani, nikhangel' imbasa

ilenga-lenga phezu kweencopho zeentaba;

phulaphulan' isandi sesigodlo.

₄Kalok' *uNdikhoy' undixelele wathi:

“Ndiya kuthi zole cwaka, ndijonge;

ndoqwalasela ndisekhayeni lam ezulwini,

ndizole ngathi kukuwa kombethe ebusuku,

cwaka ngathi lilanga ligqats' ubhobhoyi.”

₅Iidiliya ziya kudubula zifeze,

kodwa zithi ke zona zingekavunwa –

ewe, kanye xa ziya ekuvuthweni –

lusuke luthi vumbululu utshaba,

luwahlabanisele luwageqe amaKushe,

lula nje, ngathi kunqunyulw' amaseb' omdiliya.

₆Izidumbu ke zosala zithe gangalala,

zibe zizisulu zeentaka namaxhalanga.

Ewe, ziya kuba lixhoba lamarhamncwa,

iintaka zizenzele ehlotyeni –

asisathethi ke ngamarhamncwa ebusika.

₇Ixesha liyeza apho uNdikhoyo uSomandla-onke

aya kunikwa aphiwe imirhumo

ngabo balizwe liphanjwe yimilambo,

iingwanyalala zesizwe esimandla,

amafaf' alusu lumpuluswa,

izintw' ezoyikwa lilizwe jikelele.

Ewe, baya kuza kwintaba iZiyon,

apho anqulwa khona uNdikhoyo uSomandla-onke.

Nank' *uNdikhoyo esiza eJiputa;

uza etshebeleza ngelifukazi.

*Oothixo abanqulwa apho batsho bankwantya,

namaJiputa ngokwawo atsho anengevane.

₂UNdikhoyo ke uthethe wathi:

“Ndiza kuxhokonxa umJiputa avukele umJiputa;

elowo nalowo uza kuvukelana nomntakwabo,

ummelwane avukelane nommelwane.

Ngokunjalo isixeko sovukelana nesixeko;

ewe, uburhulumente bovukelana noburhulumente.

₃AmaJiputa aza kudideka atyhafe;

amacebo awo osuka aphunze.

Aya kunkinkq' uncedo koothixo abaqingqiweyo;

osuka abhenele kwabo bafileyo;

obhenela kwabaneshologu nabambululayo.

₄AmaJiputa ndowanikela aphathwe gadalala:

oba sezandleni zorhulumente okhohlakeleyo;

aya kulawulwa ngukumkani osisikhohlakali.”

Utsho ke uNdikhoyo uSomandla-onke.

₅Umlambo iNayile uya kutsha khonkqo,

amanzi awo aphele kuthi tu!

₆Asivumba eliya kubakho kwimijelo yawo!

Iintlambo zeNayile zowutha zitshe;

iingcongolo nemikhanzi ziya kutshaza.

₇Ngasemlanjeni apho utyani bosuka buyobe;

namasimi apho kuloo ntilindini osuka atshaze, avuthuluke aphele.

₈Sovakala isikhalo nencwina yabalobi.

Baya kukhala abaphosa umnatha emanzini;

amaqhogi abalobi aya kubuya ze.

₉Abasebenzisa umqhaphu baya kutyhafa,

nabo basontayo bophelelwa ngamandla.

₁₀Ewe, kuya kuba nzima kubenzi belaphu,

ibe lusizi lodwa kubaqeshwa.

₁₁Amaphakathi aseZowan wona zizityhakala;

loo matshawe alumkileyo ayalahlekisa!

Ngani ukuba ade athi kukumkani:

“Thina siziingcaphephe zeengqondi,

amahlakani ezikumkani zamandulo”?

₁₂Phendula, kumkanindini waseJiputa:

Aphi loo maphakathi akho aziingqondi?

Ngani ke ukuba angakucebisi

akuxelele oko kuza kuhlela iJiputa?

Nditsho isicwangciso sikaNdikhoyo uSomandla-onke.

₁₃Hayi bo! Amaphakathi aseZowan ziziyatha,

iinkokheli zaseMemfisi zididekile;

amathenjwa aseJiputa ngabalahlekisi.

₁₄UNdikhoyo ubayekele ngomoya wolahlekiso.

Kungokunje iJiputa iyaphithizela,

ityibilika emhlanzweni njengenxila.

₁₅Kulo lonke ke elaseJiputa,

kwizityebi ngokunjalo nakumahlwempu,

abo baziwayo nabangazelwe nto,

akukho namnye ungalivezayo icebo.

“Nithamsanqelekile, bantu bam maJiputa!

Nani msebenzi wezandla zam, ma-Asiriya, ndiyanithamsanqela!

Nditsho nakuni, lifa lam elingamaSirayeli,

ndithi nisikelelekile!”

₁Makabongwe *uNdikhoyo ondikhuselayo,

yena ondiqeqeshela idabi,

andenze ndiyiqulele imfazwe.

₂Yena ulixhadi nenqaba yam,

umqolomba nomhlanguli wam,

umkhuseli endincathama ngaye.

Izizwe uzifaka phantsi kwam.

₃Awu, Ndikhoyo, yaz'ba kuxa eyintoni na umntu

le nto ude uzidube ngaye?

Ngani ukuba ude uzikhathaze ngaye?

₄Umntu ufana nqwa nomphunga,

imihla yakhe injengesithunzi sisiya kusithela.

₅Wakuwashukumisa amazulu, Ndikhoyo,

suka akhahleleke phantsi.

Wakuzichukumisa iintaba zithuquza umsi.

₆Lekuza ngemibane, ubasarhaze;

binza ngeentolo batsho baduba-dubeke.

₇Yolula isandla sakho kweliphezulu,

undonyule ndiphume kulo mgxobhozo.

Ndihlangule esandleni seentlanga

₈ezimilomo impompoza ubuxoki,

ezifunga ubuqhophololo.

₉Thixo wam, ndiya kukudumisa ngengoma entsha;

ndiya kukuculela ngekatala.

₁₀Ngumavathis' ookumkani ngoloyiso,

umhlanguli kaDavide isicaka sakhe.

Ndisindise kwikrele lezikhohlakali;

₁₁ndihlangule esandleni seentlanga

ezimilomo impompoza ubuxoki,

ezifunga ubuqhophololo.

₁₂Oonyana bethu ebutsheni babo

banga banganjengezityalo eziyokozelayo;

iintombi zethu zibe njengamatye akroliweyo

alungiselelwe ukuvathisa ibhotwe.

₁₃Akwaba bangaphuphuma oovimba bethu,

bazale ziintlobo ngeentlobo zesivuno.

Akwaba zingazala amawaka iigusha zethu,

zande ngamawaka aphindwe kalishumi emaphandleni.

₁₄Ngamana zathatha iimazi zethu zeenkomo;

zingemi ngenxa yokuphunza.

Ngamana akungebikho zimbonono ezitalatweni zethu;

ewe, singaphithizeliswa kukuthinjwa.

₁₅Hayi uyolo lwabantu abayixhamlayo le ntsikelelo!

Sinenyhweba kambe isizwe esiThixo waso unguNdikhoyo!