To The Word – Day 93

₁Kwisiphunzi sikaJese kuya kuntshula ihlumelo;

kumnombo wakhe kosuka kuthi thaphu isebe.

Elo sebe ke lothwala iziqhamo.

₂UMoya *kaNdikhoyo uya kubutha kuye,

amambathise ngobulumko nokuqonda,

atsho abe ligorha elimacebo,

abe nokumazi amhlonele uNdikhoyo.

₃Uya kukulangazelela ukuthobela uNdikhoyo;

umfo ongagwebi ngembonakalo,

umfo ongenguye uthoba-sikutyele.

₄Uya kuyilungelelanisa imicimbi yabahlelelekileyo;

abazelelele abaxakekileyo kulo mhlaba.

Uya kuthetha ngezwi, lohlwaywe eli lizwe,

afuthe batsho bagileke abakhohlakeleyo.

₅Yena uya kubhinqa ngobulungisa,

aze azithandele ngokunyaniseka.

₆Itakane legusha lobutha ndawonye nengcuka,

itakane lebhokhwe liphumle kunye nehlosi.

Amathole eenkomo naweengonyama aya kuvana;

ewe, wona aya kwaluswa nangumntwana.

₇Edlelweni kodibana imaz' enkomo neyebhere,

aze amathole azo ahlalisane ngoxolo,

njengenkomo ingonyama nayo itye ingca.

₈Nosana lodlala emngxunyeni wephimpi,

umntwana ufike exhokonxa irhamba.

₉EZiyon, intaba ekhethekileyo, akusayi kubakho owonayo notshabalalisayo;

njengolwandle lwambathiswe ngamanzi, ehlabathini uNdikhoyo uya kwaziwa jikelele.

₁₂Ewe, izizwe iya kuzihlabela umkhosi,

ize iziqokelele iimbacu zikaSirayeli,

ibahlanganise abo baziintsali bakwaJuda,

ibakhulule kumagumb' omane ehlabathi.

₁₃Losuka liphele tu ikhwele likaSirayeli,

abo balwa noJuda banqanyulwe.

USirayeli akasayi kuba sammonela uJuda,

noJuda akasayi kuba samdlakathisa uSirayeli,

₁₄koko bosuka bahlanganisane barhawule

entshonalanga kwezo nduli zamaFilistiya,

empumalanga baxhaphaze amaxhoba bekunye.

Baya kuhlasela amaEdom namaMowabhi;

ke wona ama-Amon oba sesandleni sabo.

₁₅*UNdikhoyo uya kubetha kome khonkqo phaya kwinyoba yoLwandle oluBomvu;

ngaloo moyakazi unolophu kunene uya kuwuphekuza utshe umEfrati,

utsho usale uziintlanjana ezisixhenxe,

wonke ubani abe nokuqakatha awele.

₁₆Nanko uhola wendlela ephuma kwelaseAsiriya

khon' ukuze amasalela abuye ngaye;

ewe, kaloku, koba njengamhla-mnene,

mhla uSirayeli waphum' eJiputa.

“Ewe, ndiyakubulela, *Ndikhoyo,

kuba nakuba ubundiqumbele

suka wetha umsindo wakho,

wajika wena wandithuthuzela.

₂Ngenene uThixo ngumsindisi wam;

ndokholosa ngaye ndingenadyudyu.

NgoNdikhoyo ndomelele ndide ndimemelele,

kuba kaloku nguye ondihlangulayo.

₃Njengalowo ukha amanzi emthonjeni

lukwanjalo ke novuyo wakuba uluxhamla usindiso lwakhe.”

₄Ewe, ngaloo mini niya kusuka nithi:

“Masidomboze sibulele uNdikhoyo;

ewe, masiqambe sinqule igama lakhe.

Imisebenzi yakhe masiyibhengeze ezizweni;

masishumayele sibuxele ubukhulu bakhe.

₅Masintyiloze sidumise uNdikhoyo,

kuba wenze imisebenzi emikhulukazi;

olu daba malufikelele ehlabathini jikelele.

₆Nditsho kuni, bemi baseZiyon,

ndithi memezani nimemelele ngemihlali,

kuba yena umi phakathi kwenu;

ewe, yingangalala uYedwa kaSirayeli.”

₂Misani intshinga kwinduli ebharhileyo,

nidanduluke nihlab' umkhosi,

niwubize niwukhwebe umkhosi,

nize kungena emasangweni ezikhulu.

₃Mna *Ndikhoyo ndiwagunyazisile onke amafa-nankosi;

ndithe makeze amagorha am,

abo bavuyisana noloyiso lwam,

khon' ukuze bathulule umsindo wam.

₄Yaz'ba ngawani na loo mayeyeye avakalayo?

Ezintabeni phaya ngathi lugxudululu oluxokozelayo.

Ewe, izirhulumente ziyaphithizela;

nâzo izizwe zona ziqokelelana.

Ke yena uNdikhoyo uSomandla-onke selehlab' umkhosi.

₅Nantso imikhosi ivela kwelikude,

iphuma eziphelweni zehlabathi.

UNdikhoy' uyaxhakazela zizixhobo;

uza kulivuthulula lonke ilizwe.

₆Hlahlamba ke, utsho ngesikrakra.

Kaloku imini kaNdikhoyo isemnyango!

Yogaleleka ipheth' intshabalalo evela kuSomandla.

₇Ke zona izandla zitsho zanomkhinkqi.

wonk' umntu wangenwa yintaka.

₈Bonke ke bosuka bee nkamalala;

bosuka babhinyalaze bezibhija-bhija;

bopena-pena ngathi ngumfazi olunywayo.

Baya kukrwaqulana bethe khumnqa;

ewe, boba sebenyoshoza ziintloni.

₉Ngenene imini kaNdikhoyo ifikile;

yona yimin' enzima yengqumbo,

elo lizwe loxusheka litsho libe yinkangala;

bonke abakhohlakeleyo kulo batshatyalaliswe.

₁₀Esibhakabhakeni iinkwenkwezi namaqela azo

zosuka zifiphale zingabi nakukhanya.

Ke lona ilanga lophuma lizilile,

nenyanga ngokwayo iya kugungxa.

₁₁Ihlabathi ndilizisela isithwakumbe,

ndibohlwaye abantu ngenxa yezono zabo,

ndilinqamle ikratshi labazikhukhumalisayo,

ziwe bhaxa izibhoja eziqholosayo.

₁₂Amadoda oba njengegolide ukunqaba;

ewe, abantu bonqaba kunegolide yaseOfire.

₁₃Amazulu ndiya kuwangcangcazelisa,

umhlaba utsho unyikime endaweni yawo

ngomhla wengqumbo kaNdikhoyo uSomandla-onke,

ngemin' enzima yomsindo ovuthayo.

₁₄Baya kufana nenxala elizingelwayo

neegusha ezibhadula ziding' ozalusayo.

Elowo uya kubhenela kumawabo,

umntu ngamnye asabele kwelakowabo.

₁₅Lowo ufunyenweyo uya kuhlatyaniselwa;

bonke ababanjiweyo baya kubulawa.

₁₆Iintsana zabo ziya kuntlekezwa,

abazali bebukele ngawabo amehlo.

Imizi yabo iya kuphangwa,

nakubafazi ke kube yiloo nto.

₁₇Ndiza kubaxhokonxela amaMedi;

wona akakhathalele nasiliva,

engenaxesha layo negolide.

₁₈Okwakungabafana aya kubageqa ngeentolo;

wona akanalusini nasezintsaneni;

ewe, akavakalelwa nasebantwaneni.

₁₉IBhabheli yinzwakazi phakathi kwezikumkani,

iligugu neqhayiya lamaKaledi,

kodwa yobhukuqwa ifane neSodom neGomora

mhla wazihlasela uThixo.

₂₀Yona soze iphinde imiwe mntu.

Yoba zizizukulwana ingahlalwa mntu,

kungekho nam-Arabhu womisa ntente kuyo;

nabelusi soze babe salusela khona.

₂₁Iya kuba likhaya lamarhamncwa;

badakase khona noodyakalashe;

iya kusala ilikhaya lezihulu-hulu,

nemigewu yeebhokhwe iqakathe khona.

₂₂Ezingxandeni yoba sisijwili samaxhwili,

nodyakalashe atsho ngomkhulungwane kuloo mapomakazi.

Ewe, ngoku ixesha layo lisemnyango,

nemihla yayo isongekile.

Yaz'ba utshitshe njani na lo mcinezeli!

Ewe, akukho nkang' idubul' ingethi.

₅UNdikhoyo uyivikivile intonga yezikhohlakali;

yena uwaphule umsimbithi wezilawuli.

₆Nditsho lo ubuntlekez' abantu ngolunyakazi,

obusitsho ngezithong' ezingaphelele ndawo,

obutyakaty' izizwe ngengcwangu nengqumbo,

owatsho ngentshutshiso engenabuyambo.

₇Ngok' ihlabathi lixhaml' ikhefu ngenzolo,

suka ladanduluka ngeengoma nezibongo.

₈Kuvuya nditsho nemithi eLebhanon phaya;

ewe, imipayini nemisedare iyakugcolodela.

Ithi: “Tshotsh' uwe, kumkanindini,”

kuba kaloku nomgawuli utsho wasweleka.

₉Ewe, nelabafileyo litsho lazama-zama,

lilungiselela ukuhlangabeza wena.

Noomoya babangasekhoyo baza kukukhahlela,

nditsho abo babefudula beziikumkani zezizwe

kungokunje nabo bayavusw' ezililini.

₁₀Bonke bobhekisa kuwe, bathi:

“Ingaba nguwe na lo selelutywantsi?

Ingaba nguwe na lo ofana nathi?”

₁₁Ubunewu-newu bakho namhla bugqunyelelwe,

ngokunjalo nengoma yezigingci ingcwatyiwe.

Ngoku umandlalo wakho ziimpethu;

kukalokunje ingubo yakho seyingamanundu.

₁₂Khawutsho! Ukhiqwe kanjani emazulwini?

Kutheni, khwezi lomso elinguBhabheli?

Wen' owawufudul' ugeq' izizwe

ngoku uthe khalakahla bhalakaxa!

₁₃Kaloku wawuzithuthuzel' usithi:

“Mna ndosuka ndintingel' ezulwini,

ndibe ngaphaya kweenkwenkwezi zikaThixo,

ndilimise khona ibhotwe lam,

ndingqendeve kuloo ntaba yembizo,

kwintlanganiso *yezithixo,

emalanda-lahla kweliphezulu.”

₁₄Wawusithi: “Ndonyukela emajuku-jukwini,

ndize ndizifanise noPhezukonke.”

₁₅Kambe ke usuke watshon' engcwabeni,

weyela enzonzobileni yomhadi.

₁₆Abo bakubonayo ke ngoku bathe nqa!

Ewe, babamb' ongezantsi, bathi:

“Lo asinguye na owayedidizelis' ihlabathi,

intw' ibiduma zirhwaqel' izikumkani;

₁₇intw' eyajij' ilizwe latsho labharha,

eyabhukuq' izixeko zatsho zangamabobosi,

emabanjw' angazang' akhululeka?”

₁₈Zonk' iikumkani zezizwe ziphumle ngesihomo;

iyileyo ilele kwelayo ingcwaba.

₁₉Kambe ke wena uyindingan' engenangcwaba;

wena uyinto esidumbu sibukulwayo.

Ngoku sewambethe ababuleweyo abagwazwe ngekrele,

abaphoswe emhadini ongxondorha.

Ngoku sewuyinto yokuxovulwa ngeenyawo;

₂₀owakh' umngcwabo soz' ufane nowabo.

Kaloku wena wabatshabalalisa wababhuqa;

wababopha ngentamb' enye nabakho abantu.

Intw' ekhohlakele nesizukulwana sayo

negama layo soze libe nto!

₂₁Iwu-u-u!

Lungiselela kugqityezelwe nenzala yakhe!

Ngenxa yenkohlakalo yooyise mabangasindi,

hleze bahlume, uze umvundl' uzek' indlela,

hlez' eli lizwe lizale zizixeko zabo!

₂₂UNdikhoyo uSomandla-onke uthi:

“Ndoyihlasela ndiyibhukuqe iBhabheli,

ndiyicim' igama tu,

kungabikho hlumelo nanzala.

Nditshilo nje ke mna Ndikhoyo, nditshilo.

₂₃Ndakuyibetha itsho ibe yimigxobhozo, ibe likhaya lookhwalimanzi.

Inene, ndiya kuyitshayela ngentshabalalo engathethekiyo!”

“Konke endikucwangcisileyo kuza kwenzeka;

ziza kufezeka zonke iinjongo zam.

₂₅Ndiza kuwavikiva ama-Asiriya kweli lizwe,

ndiwanyhashe tu entabeni yam,

idyokhwe yawo yahlukane nabantu bam,

usuke umthwalo emagxeni abo.

₂₆Ezi ke ziinjongo zam mayela nehlabathi jikelele;

ingalo yam ijinga phezu kwezizwe zonke.”

₂₇UNdikhoyo uSomandla-onke ezimisele nje ke,

ngubani ongema ngaphambili?

Xa eyolule ingalo yakhe,

ngubani ongabuya amjike?

₂₉Ke wena, Filistiya, yithi rhubaxa!

Ewe, musa ukuzikhohlisa uthi:

“Intonga ebendibethwa ngayo yaphukile,”

kuba kwakuloo mnombo kosuka kuthi gqi irhamba;

inzala yalo ke inobuhlungu kangako.

₃₀Aya kuhlutha amahlwempu abantu bam,

abahlelelekileyo bahlale bekhuselekile,

ke wena ndikugengqe ngendlala,

kungasali nditsho nempunde le!

₃₁Hlahlambani, masango;

bhombolozani, nina zixeko!

Ewe, tatazela urhwaqele, wena Filistiya!

Kuba nanko umsi uthuquza kweliphezulu;

loo mkhosi ke awunalo ityutyusi!

₃₂Kodwa kodwa singaphendula sithini ukuthetha namakhankatha eso sizwe?

Ewe, sowaphendula sithi:

“UNdikhoyo uyimise wayimilisela iZiyon,

ngoko ke zozimela kuyo iintsizana zakhe!”

KwelaseMowabhi yimbubho yodwa;

kaloku iAri ivuthululwe ngabusuku bunye.

Kunyembelekile eMowabhi phaya;

kaloku iKiri itshatyalaliswe ngabusuku bunye.

₂Nango amaDibhon enyukela endaweni yawo yokunqula,

esiya kuphalaza iinyembezi elila.

AmaMowabhi alilela iNebho neMedibha;

selede agugul' iinwele neendevu.

₃Ezitalatweni ahamba enxibe ezokuzila;

phakathi kwabantu nasemakhaya sisijwili.

₄AmaHeshbhon namaElale ayabhomboloza;

isikhalo sawo sivakala naseYahaza.

Kubi, namajoni ngokwawo ayakhalaza;

kaloku nawo ngoku angenwa yingevane.

₅Ke mna ke ndikhalela iMowabhi,

kuba abantu bayo babhacel' eZoware,

basabele e-Egelati-sheleshiya.

Nâbo bekhwina benyuka iLuti;

benz' isimbonon' ukusing' eHoronayim,

benesingqala ngenxa yentshabalalo.

₆Intlanjana yeNimrim yona yome khonkqo,

notyani ecaleni kwayo apho butshazile;

ewe, akusekho hlaza, kome khwahla.

₇Ubuntwana-ntwana ababuqwebileyo nâbo bexhakazela bebuphethe,

besiya kuwela loo ngxingwa yemipampiri.

₈Yintlokoma yesikhalo eMowabhi jikelele.

Eso sililo sivakala nase-Eglayim;

eso sijwili sifikelela naseBhere-elim.

₉Emlanjeni kwisixeko saseDibhon namanzi ngokwawo abomvu ligazi.

Kanti ke mna Thixo ndisaza kwenza izinto zamehlo:

kuza kujub' ugodo kwaseleyo amaMowabhi!

₁Ndiya kukuncoma, Thixo ongukumkani wam;

igama lakho ndolibonga nanini nanini.

₂Ndiya kukubulela mihla le;

igama lakho ndolidumisa kude kuse ephakadeni.

₃Ngenene *uNdikhoyo yingangalala, ufanele ukudunyiswa;

obakhe ubukhulu abuphengululeki.

₄Isizukulwana siya kubalisela esilandelayo ngemisebenzi yakho;

siya kuzibhengeza izigigaba zakho kwisizukulwana esilandelayo.

₅Ndiya kucamngca ngemisebenzi yakho emangalisayo,

nesidima sobuqaqawuli bobungangamsha bakho.

₆Abantu baya kububhengeza ubukhulu bezenzo zakho ezikhwankqisayo,

ndaye ndiya kububabaza ubukhulu bakho.

₇Baya kuluxela udumo lokulunga kwakho;

ewe, baya kutsholoza bencoma ubulungisa bakho.

₈UNdikhoyo unesisa, yaye enovelwano.

Yena unomonde; uyimvuze-mvuze bububele.

₉UNdikhoyo uyabalungiselela bonke abantu;

unemfobe ngazo zonke izinto azenzileyo.

₁₀Zonke izinto ozenzileyo ziya kudomboza zibulele, Ndikhoyo;

imilowo yakwakho iya kukudumisa.

₁₁Baya kuyibhengeza indili nesidima solawulo lwakho;

amandla akho aya kuba ngundaba-mlonyeni,

₁₂ukuze uluntu luzazi izigigaba ozenzileyo

kwanesidima nobuqaqawuli bolawulo lwakho.

₁₃Ulawulo lwakho alunamida yasiphelo;

ubukhosi bakho bozityhutyha zonke izizukulwana.

Ilizwi alithethileyo uNdikhoyo alidliwa nja,

yaye unesisa kuko konke akwenzileyo.

₁₄UNdikhoyo uyabaxhasa bonke abagqush' eluthulini,

abaphakamise bonke abathobekileyo.

₁₅Iinto zonke zikhangela kuye ngethemba,

ke yena uyazondla ngexesha elililo.

₁₆Ewe, yena zivulekile izandla zakhe,

izinto zonke uyazanelisa ngokweentswelo zazo.

₁₇UNdikhoyo ulilungisa ngeendlela zonke,

unobubele kuko konke akwenzayo.

₁₈UNdikhoyo ukufuphi kwabo babhenela kuye,

kwabo bamfuna benyanisekile.

₁₉Uyabahlangabeza abo bamhlonelayo;

uyasabela bakuzibika, abahlangule.

₂₀UNdikhoyo uyabalondoloza abo bamthandayo;

ke bona abakhohlakeleyo uya kubatshabalalisa.

₂₁UNdikhoyo ndiya kusoloko ndimdumisa.

Mazimdumise zonke izidalwa,

zilincome igama lakhe elihloniphekileyo;

ewe, kude kube ngunaphakade.