Bible Society of South Africa
Izicwangciso zokufunda
To The Word – Bible Reading Challenge
To The Word – Day 92

To The Word – Day 92

Isaiah 6–10, Psalm 149

Itekisi yeBhayibhile

UISAYA 6

Ukubizwa kukaIsaya

1Ngonyaka awasweleka ngawo ukumkani u-Uziya, ndayibona iNkosi ihleli kwibhotwe layo eliphakamileyo nelizimasekileyo. Yayizithe wambu ngomnweba owawulurhululu lomwundu-wundu owalitsho lazala qhu elo pomakazi liyindlu yayo. 2Yayiphahlwe *zizithunywa ezimaphiko ngamathandathu. Ngasinye-ngasinye kuzo, isibini samaphiko sasigqume ubuso, isibini sambathise iinyawo, ukanti ke ngala mabini aseleyo sasiphaphazela. 3Zazikhwazana zixelelana zisithi:

“Hay' isidima, ayisosidima, ayisosidima *kuNdikhoyo uSomandla-onke!

Ubungangamsha bakhe bulizalisile ihlabathi jikelele!”

4Ke kaloku eso sandi samazwi azo sazitsho zazama-zama iziseko zelo pomakazi; asisathethi ke ngomsi owawulapho, kuba wawubophe kulitsili nje!

5Suka ke mna ndadanduluka ndathi: “Athi ke mna, mntu uludwayi! Kuxa bendingubani kakade ndingumfi nje! Kaloku nokuthetha kwam kuvuza ukona, ibe ke ndimi phakathi kwabantu abathi bakuthetha kurhuq' ukona. Kambe ke naxa kunjalo, uKumkani onguNdikhoyo uSomandla-onke ndimbone ngala wam amehlo!”

6Sasuka ke esinye sezo zithunywa ezimaphiko saphaphazela seza kum, siphethe ilahle elivuthayo, esasilithathe ngesibambo phaya kwiqonga leziqhumiso. 7Safika sandirheca ngalo apha emlonyeni, saza ke sathi: “Uyabona ke, likurhecile nje ngoku eli lahle, buphelisiwe ubutyala kuwe, zaye ke nezono zakho zicanyagushelwe.”

8INkosi ke yadanduluka yathi: “Yaz'ba ndiya kuthuma bani na? Ngubani ongaba sisigidimi sethu?”

Ke mna ndiphendule ndathi: “Thuma mna; ndiyaya!”

9Ke yona yathi: “Yiya kwaba bantu, uthi kubo:

“ ‘Niya kuphulaphula niphulaphule, ningaqondi noko;

niya kujonga nijonge, kodwa ningaboni nto!’

10Iqhube yenjenje:

‘Yenze gqathu-gqathu ingqiqo yaba bantu;

iindlebe zabo uzivale zivingceke tu,

namehlo abo ke uwavale mba,

hleze babone ngamehlo abo,

okanye beve ngeendlebe zabo,

mhlawumbi baqiqe ngeengqondo zabo,

nto leyo ke iya kubenza basuke beze kum banyangeke.’ ”

11Ndibuzile ke mna ndathi:

“Koda kube nini na kunje, Mhlekazi?”

Ke yena undiphendule wenjenje:

“Izixeko zoda zibe ngamabhodlo;

ewe, koda kukhal' ibhungane,

imizi ingahlalwa bani mpela,

nomhlaba ubhuqeke ube yinkangala.

12Ewe, xa bebonke ndiya kubafudusa,

kulo mhlaba kusale kukwanti-zitshile.

13Noba kungakho mngqandanda usalayo,

nawo ngokwawo uya kutshitshiswa kuthi tu!

Kambe ke uya kufana nomterebhinte nom-oki,

mithi leyo ivelisa ihlumelo yakugawulwa.

Kananjalo ke isiphunzi sohlanga siya kuba nalo ihlumelo.”

UISAYA 6XHO96Vula kumfundi weBhayibhile

UISAYA 7

Udaba oluya kukumkani uAhazi

1Ke kaloku kwabakho imfazwe kwelakwaJuda ngethuba lokulawula kukakumkani uAhazi unyana kaYotam, umzukulwana kaUziya. URezin ukumkani wama-Aram, ekunye noPeka unyana kaRemaliya owayengukumkani wakwaSirayeli, bahlasela iJerusalem, kodwa babuya ze.

2Ukumkani wakwaJuda uthe akulufumana udaba lokuba imikhosi yama-Aram seyingxange kumhlaba wakwaSirayeli, akoyika wangcangcazela, yena nabantu bakhe, okwemithi ishukunyiswa ngumoya.

3*UNdikhoyo ke uthethe noIsaya wathi: “Hamba nonyana wakho uMasalela-obuya, uhlangabeze ukumkani uAhazi. Niya kudibana naye endleleni phaya kulaa ndawo basebenzela kuyo abasonti belaphu, ekupheleni kwalaa mjelo utsala amanzi kwelaa qula liphezulu. 4Yithi kuye: ‘Hlala uthe qwa uzole, ungabhuduzeli ube nevuso. Kaloku lo msindo kakumkani uRezin nama-Aram kunye nalo kakumkani uPeka unyana kaRemaliya ufana nje nokutsitsitheka komlilo weviti. 5Ama-Aram ekunye namaSirayeli phantsi konyana kaRemaliya baceba iyelenqe ngawe. 6Bathi: “Masilihlasele ilizwe lakwaJuda, silithathe sahlulelane ngalo, size simisele unyana kaTabhele abe ngukumkani.” 7Kambe ke iNkosi uNdikhoyo ithi:

“ ‘Unotshe; soz' ihle loo nto!

Hayi, into enjalo soze yenzeke tu!

8Kaloku intloko yama-Aram yiDamasko,

ibe ke yona intloko yeDamasko nguRezin.

Okokwakhe ke uSirayeli,

kwisithuba nje samashumi amathandathu anantlanu eminyaka,

uya kuvuthuluka kungasali nempunde le –

ewe, buya kubhanga ubuzwe bakhe.

9Kaloku intloko yamaSirayeli yiSamariya,

ibe ke yona intloko yeSamariya nguPeka unyana kaRemaliya.

Kambe ke ukuba ithemba lakho alimilanga, soze ume.’ ”

Umqondiso ngoNkosinathi

10*UNdikhoyo waqhuba wathi kuAhazi: 11“Yitsho kuNdikhoyo uThixo wakho akunike umqondiso, noba ngowasenzonzobileni kwelabafileyo okanye emajuku-jukwini phezulu.”

12Ke kaloku uAhazi uphendule wathi: “Hayi, andiyi kuwucela umqondiso; andithandi kumlinga uNdikhoyo.”

13UIsaya ke uphendule wathi: “Khawuphulaphule, ndlu kaDavide! Ngathi uyithatha kancinci into yokudinisa abantu! Ngoku sewufunzela ukukruqula noThixo wam lo? 14Ngoko ke yiNkosi ngokwayo eza kukunika umqondiso! Kaloku intombi ikhulelwe, ibe ke iza kuzala unyana, imthiye igama elinguImanuweli. 15Ke kaloku loo nkwenkwe iya kuthi xa seyikwazi ukukhetha phakathi kokubi nokuhle kube sekudliwa ngendeb' endala, ingamasi nobusi. 16Kambe ke lothi lingekafiki nelo thuba, ibe yona imihlaba yaba kumkani bakuphakuzelisayo seyikhal' ibhungane.

17“Wena nabantu bakho ndawonye nekomkhulu liphela uNdikhoyo uza kunizisela inkxwaleko engathethekiyo engazange yalanywe okokoko waqhekekayo umbuso kaSirayeli kowakwaJuda. Ewe, uza kunithumela ngokumkani wama-Asiriya.

18“Ngelo xesha ke uNdikhoyo uya kutsho ngomtyangampo wekhwelo, atsho amaJiputa ancothuke kwelikude kwiintlambo zomlambo iNayile, eze ngathi libubu leempukane. Kanti kananjalo nama-Asiriya aya kuphuma kwelakowawo ebhubhuzela exel' iinyosi. 19Elo bubu ke liya kuyambathisa nje imixawuka ndawonye nemiqolomba emaweni phaya; ewe, liya kunwena lithandele nenameva imithi, lingashiyi nalinye idlelo.

20“Ngelo thuba ke uNdikhoyo uya kuqesha umchebi waphesheya komlambo iEfrati ukumkani waseAsiriya! Yena ke uya kunigugula zonke iinwele neendevu noboya.

21“Lakugaleleka ke elo xesha nomlimi osalelwe yimazi yenkomo enye, neemazi zeegusha ezimbini, 22kangangokuba ziya kuba zisehlisa, kuya kuba yintlutha emzini wakhe. Ewe, kaloku loo masalela ashiyekileyo kweli lizwe aya kudla ngendeb' endala, ingamasi nobusi.

23“Ngelo xesha ke izidiliya ezinemithi eliwaka kuso ngasinye – mithi leyo ixabisa iwaka leesiliva – ziya kuba zitshone lè, zonganyelwe sisiphingo nobobo. 24Ke bona abantu baya kujikeleza neentolo zabo bezingela. Kaloku lonke eli lizwe loba liphanjwe ngamatyholo anameva ndawonye nobobo. 25Kwezo ntili apho kwakufudula kulinywa khona kuya kuba kwene ngangokuba kungabi nakusondela mntu khona. Ewe, amasimi abo selejike angamadlelo eenkomo kwaneegusha.”

UISAYA 7XHO96Vula kumfundi weBhayibhile

UISAYA 8

Unyana kaIsaya ngumqondiso

1*UNdikhoyo wathetha nam wathi: “Thatha ithwathwa elikhulu lokubhala, ubhale cacileyo uthi: ‘Phangamaxhoba.’ 2Ngokunjalo ke thatha amadoda amabini athembekileyo, umbingeleli u-Uriya noZakariya unyana kaYebherekiya, abe ngamangqina am.”

3Emva koko ke inkosikazi yam yakhawula, yaza yazala unyana. UNdikhoyo ke wathi igama lakhe malibe nguPhangamaxhoba. 4Waqhuba wathi: “Kothi loo nkwenkwe ingekakwazi nokuthi: ‘Mama,’ okanye: ‘Tata,’ bube bonke ubutyebi baseDamasko, ngokunjalo namaxhoba aseSamariya, selethathwe ngukumkani waseAsiriya.”

Ukuza kokumkani waseAsiriya

5Uphindile *uNdikhoyo wathetha nam, 6wathi: “Ngenxa yokuba aba bantu bewamangele amanzi ankcenkceza eShilowa, futhi bemvuyelela ukumkani uRezin nokumkani uPeka, 7mna ndiza kubazisela irhuluneli yaseAsiriya kunye nemikhosi yayo, imhlasele uJuda. Ukugaleleka kwayo iya kuba ngathi kukuzalisa nokutyekeza komlambo omkhulu iEfrati. 8Ukungena kwawo kwelakwaJuda lo mkhosi uya kukhukulisa okomlambo ozeleyo. Wosuka uyinabise imisinga yawo, ngayo ulintywilisele eli lizwe jikelele. Tarhu, Imanuweli!

9“Ke nina zintlanga, hlaban' umkhosi ninkwantye!

Nina zizwe, bekan' indlebe niphulaphule!

Qulani niligangathe – kodwa ke – rhorho!

Xhobani nif' amacala – niza kuthi shuu!

10Noba ningade nicebisane, yoba lilize elo;

ningathwesana nje kodwa soze niphumelele,

kuba kaloku uThixo unathi.”

UIsaya uyacetyiswa

11*UNdikhoyo wandibamba ngesandla, wandilumkisa ukuze ndingazilandeli iindlela zaba bantu, wathi: 12“Izinto abathi liyelenqe wena sukuvuma ukuba ziliyelenqe, ungazixhaleli nezinto abazoyikayo bona. 13Kaloku nguNdikhoyo uSomandla-onke ongcwele, ngoko ke nguye omawumhlonele umthobele. 14Yena uya kuba ngumqolomba wakho. Kambe ke kuzo zombini izindlu zikaSirayeli uya kuba lilitye elibakhubekisayo, ulwalwa olutyibilikisayo, nakwiJerusalem ngokwayo abe ngumgibe obambisayo. 15Baninzi ke abaya kukhubeka; ewe, baya kukhahleleka phantsi bacumke; ndithi baya kurhintyeleka emgibeni.”

Isilumkiso ngabafileyo

16Nina ke, mahlakani am, lwaluseni nilugcine udaba nomthetho kaThixo. 17Ke mna ndiya kukholosa *ngoNdikhoyo, lo uyifulatheleyo indlu kaYakobi; ewe, mna ndokholosa ndithembele ngaye ngokupheleleyo.

18Ndim lo kunye nabantwana andinike bona uNdikhoyo. UNdikhoyo uSomandla-onke, obhotwe lakhe likwintaba iZiyon, thina usenze sangumqondiso nomzekelo kumaSirayeli.

19Xa benicebisa besithi yiyani kwabavumisayo, abaneshologu, nabanoonomathotholo, kutheni ukuba ningababuzi nithi: “Ngani ukuba abantu bangabuzisi kuThixo wabo? Ngani ukuba abantu babuzise kwizinyanya, bathetha-thethane nabafileyo ngenxa yâbo baphilayo?” 20Into efunekayo kukuthobela umthetho nemfundiso kaNdikhoyo. Xa bengayenzi ke loo nto abanakamva.

Isithwakumbe

21Ke kaloku abantu baya kubhadula ezweni, bexhwalekile, belamba. Bekwelo phango ke bosuka babe lugcala-gcala, bakhangele esibhakabhakeni, bamshwabulele ukumkani wabo ngokunjalo noThixo wabo. 22Boba ngakhangela bangaboni nto yimbi ehlabathini ngaphandle kwenkxwaleko nomnyam' ombonde-mbonde ongaphephekiyo.

UISAYA 8XHO96Vula kumfundi weBhayibhile

UISAYA 9

Ukumkani ozayo

1Kambe ke akuyi kuhlala kumnyama kwabo bebesezinkxwalekweni. Kwilixa lamandulo elakwaZebhulon nelakwaNafetali lalidelekile, kambe ke kwilixa elizayo lo mmandla uya kuzuza udumo; nditsho ukusuka kulwandle lwasempuma ujikele uwele iJordan, uye kuthi gaa ngeGalili yeentlanga.

2Abantu ababemfamza ebumnyameni

ngoku bakufumene ukukhanya;

kwabo babehamba ebumnyameni

kubo uthe qheke umsobomvu.

3Wena usandisile isizwe sakho,

usuke waluthi chatha uvuyo lwaso.

Ngoko ke siyachulumacha ngenxa yakho,

de ngathi sinemihlali ngexa lokuvuna,

sengathi sigcotyiswe kukuxhaphaz' amaxhoba.

4Kaloku wena uyaphule idyokhwe yaso,

ulususile uxanduva nomqobo obusemagxeni.

Leyo ke yingcinezelo yomcinezeli.

Wena ubuthe kwanga kungomhla wamaMidiyan.

5Zonke izihlangu zomkhosi ogxashizayo,

nazo zonke iimpahla ezidyojwe ligazi,

ziya kutshatyalaliswa ngomlilo.

6Andithi na kaloku thina sizalelwe umntwana;

kaloku thina silizwe ngonyana.

Nguye ke oya kulawula.

Ke yena wothiywa igama kuthiwe

nguMcebisi omangalisayo,

uThixo oligorha,

uSonini-nanini,

iTshawe loxolo.

7Yena uya kuba yingangalala,

into embuso uluxolo olungaphele ndawo.

Yena uya kungena ezihlangwini zikaDavide,

umbuso wakhe awumilisele ume ngxishi,

uxhathise ngomthetho nangobulungisa,

ukusukela ngoku kude kube nini-nini.

*UNdikhoyo onekhwele,

nditsho uSomandla-onke,

nguye oya kuyenza loo nto!

UNdikhoyo uyalwa noSirayeli

8INkosi ithumele udaba kuSirayeli;

ewe, lona luya kuwa phezu koYakobi.

9Bonke ke abantu baya kuluqonda,

uEfrayim nabemi baseSamariya,

abo baqholosa ngendelelo, besithi:

10“Naxa nje zidilikile izindlu zezitena,

thina siya kwakha ngamatye aseleqingqiwe;

ngenene yona imithombe igawulwe,

kodwa thina sotyala imisedare.”

11*UNdikhoyo ubayekele ngeentshaba,

nditsho iintshaba zeentshaba zabo;

ewe, usuke wabaxhokonxela iintshaba.

12Ngama-Aram ngasempumalanga,

ibe ngamaFilistiya ngasentshonalanga;

xa zizonke zigragramela uSirayeli.

Naxa kunjalo uNdikhoyo usafuthekile;

nanko elekuza ngaloo ngalo yakhe!

13Kodwa suka abantu abazisola;

hayi, ababuyelanga kumohlwayi,

abazigobanga kuNdikhoyo uSomandla-onke.

14Ngoko ke uNdikhoyo wosuka amohlwaye uSirayeli:

uya kumnquml' intloko, amgumpul' umsila;

uya kuncothul' isundu, asiphul' ingcongolo.

15Intloko ke ngabadala nezihandiba;

wona umsila ngabashumayeli bobuxoki.

16Kaloku aba bantu bayalahlekiswa;

ewe, bona bayaphuphuthekiswa.

17UNdikhoyo ke akasabakhathalele nabafana,

akayi kuthi thiki nangabahlolokazi neenkedama,

kuba bonke zintw' ezingento, bakhohlakele,

imilomo yabo iphuphum' ububi.

Naxa kunjalo uNdikhoyo usafuthekile;

nanko elekuza ngaloo ngalo yakhe!

18Kaloku inkohlakalo yabantu ivutha njengomlilo;

ileny' inkunzane ngokunjalo nobobo,

idangazel' okomlilo wehlathi,

ithunquza okwentshinyela yomsi.

19Ngenxa yomsindo kaNdikhoyo onamandla onke

eli lizwe liza kuvutha,

umlilo udangazeliswe ngabantu,

kungabikho nonak' umntakwabo.

20Bonqwamza ngapha, bangahluthi noko;

banqunqude ngapho, banganeli noko;

ewe, boda batye noogxa babo.

21UManase noEfrayim bosuka bahlaselane,

kananjalo bosuka badibane ngoJuda.

Naxa kunjalo uNdikhoyo usafuthekile;

nanko elekuza ngaloo ngalo yakhe!

UISAYA 9XHO96Vula kumfundi weBhayibhile

UISAYA 10

1Yeha ke, nina niqulunqa imithetho yobutshijolo,

nina baqingqa imithetho yokucinezela abantu,

2ukuze amahlwempu angafumani malungelo,

nokuze abacinezelwa bona bangalungiselelwa.

Nisuka nibaxhaphaze abahlolokazi,

iinkedama zona zibe ngamaxhoba enu.

3Yaz'ba nothini na mhla yajika imeko,

mhla kwathi gqi isithwakumbe kwelikude!

Ngaba ke nobalekela kubani, bethu?

Ubutyebi bona ke nobufihla phi?

4Ewe, koba kungasekho ndlela-mbini

ngaphandle kokuzinyakathisa phakathi kwabathinjwa,

okanye nirhuqwe ndawonye nabaginwa.

Naxa kunjalo uNdikhoyo usafuthekile;

nanko elekuza ngaloo ngalo yakhe!

Ukusetyenziswa kweAsiriya

5*UNdikhoyo uthe:

“Hayi ke, yena uAsiriya!

Uyinduku endohlwaya ngayo.

6Ndibathumela ngaye abangakhathalele Thixo;

ndibabetha ngaye abandicaphukisayo,

ukuze abathimbe, axhaphaze amaxhoba,

abaxovule njengodaka endleleni.

7Kambe ke yena uAsiriya akakhw' apho;

kuthe kanti yena unanjongo yimbi.

Suka yena wazimisela ukutshabalalisa;

izizwe yena ufun' ukuzicim' igama.

8Kaloku uAsiriya uyaqhayisa, uthi:

‘Iingqwayi-ngqwayi zam zikwangookumkani!

9OoKaleno nooKarkemishe bona ndabageqa;

iiHamati neeArpadi ndazisukelisa;

kooSamariya nooDamasko ndathi ginyi-qobo!

10Izikumkani ezinqula imifanekiso ndazoyisa –

mifanekiso leyo yayiyinyambalala,

ingaphezu kweyeJerusalem neSamariya.

11Ndayitshabalalisa iSamariya,

ndenjenjalo nakwimifanekiso yayo.

Ndisaya kwenjenjalo ke naseJerusalem

kwakunye naloo mifanekiso yayo.’ ”

12Kambe ke yona iNkosi ithi: “Ndakuwufeza umsebenzi wam kwintaba iZiyon eJerusalem, ndiya kubuya ngayo ikumkani yaseAsiriya, ndiyohlwaye. Kaloku iyadelela, futhi xa iqhayisayo 13ithi:

“ ‘Lo ngumsebenzi wamandla am!

Obu bubunkunkqela nengqiqo yam!

Ndiyidedisile imida yezizwe,

ndaza ndazenzela kwindyebo yazo;

njengengangamsha ndizikhiqile izikumkani.

14Ubutyebi bazo suka bafana namaqand' entaka,

ndaza ke mna ndathatha ndathaphulula nje!

Njengomntu oxhaphaza amaqanda asisisulu,

ndenjenjalo ukuziqokelela izizwe.

Ndizenzela nje kungaqhwaqhwazi nephiko eli,

kungekho nantaka ekhe yakrotsha!’ ”

15Lingazenza bhetele na izembe kunomgawuli,

khona isarha kunomsarhi?

Asiyonduku ephakamisa umniniyo;

kaloku iba ngumntu oyiphakamisayo.

16Ngoko ke iNkosi uNdikhoyo uSomandla-onke

iya kuzifaka isibetho izigantshontsho,

ilitshise ngomlilo elo qhayiya lazo.

17UThixo olukhanyiso lukaSirayeli wosuka afike abe ngumlilo,

uYedwa kaSirayeli abe lidangaty' elilenyayo,

ngamini-nye abhubhise konke nje,

nditsho nameva kunye nobobo.

18Loo masimi achumayo naloo mahlathi ashinyeneyo

wosuka yena awabhuqe bhuqiyane,

oku komkhuhlane usutywa kukufa.

19Kuloo mahlathi kosala imingqandandana nje

engábalwa lula nayimveku le.

Kobuya iqaqobana kuphela

20Liyeza ixesha apho elo qaqobana lisindileyo lamaSirayeli lingayi kuba saqamela ngalowo ulenza ixhoba. Ngelo xesha amaSirayeli aya kukholosa ngokupheleleyo *ngoNdikhoyo uThixo onguYedwa kaSirayeli. 21Amasalela endlu kaSirayeli aya kubuyela kwigorha elinguThixo wawo. 22Nangona nje ngoku amaSirayeli ebonakala eyinyambalala enjengeenkozo zentlabathi eselunxwemeni lolwandle, kuphela yimbinana nje eya kusinda ibuye. Kaloku phezu kwawo kulenga-lenga intshabalalo – ibe ifanele ke phofu. 23UMhlekazi iNkosi uNdikhoyo onamandla onke uzimisele ukuwacim' igama ehlabathi ngokomlomo wakhe.

Ama-Asiriya aza kohlwaywa

24Ngoko ke itsho iNkosi *uNdikhoyo onamandla onke ukuthi: “Hayi nina, lusapho lwam lumi eZiyon, ze ningabi nadyudyu ngama-Asiriya la, noba angade aniphakele ingcinezelo enjengaleya nayifumana kumaJiputa. 25Kaloku kukancinane nje uphele umsindo wam ngakuni, ndandule ke ukuwavuthulula ndiwatshabalalise. 26Mna Ndikhoyo onamandla onke ndiya kuwathwaxa kwangalaa ndlela ndawabetha ngayo amaMidiyan kwiliwa laseOrebhe. Isohlwayo sam kuma-Asiriya yoba kwaseso ndawabetha ngaso namaJiputa. 27Ngaloo mini luya kuxibilika uxanduva olusemagxeni enu, le dyokhwe niyinikwe ngama-Asiriya itsho ivikiveke, kuba kaloku nikhule nada nomelela.”

Izwe lifile!

28Izwe lifile, ziyanqoza eAyi;

ewe, nâlo lugqitha ngeMigron,

kanti imiphako luyishiye eMikmas.

29Kubi, nantso iqabel' enkalweni,

ngobusuku yanqumama eGebha phaya.

Abemi baseRama batsho bankwantya,

iGibheya yakuloSawule ke yona nantso igil' izicithi isaba!

30Yitsho ngentsholo, wena Galim;

ke wena, Layisha, phulaphula;

uphendule ke nawe, Anatoti.

31Kaloku abemi baseMadema bayasaba;

bona abaseGebhim bayazisindisa.

32Namhlanje nâlo luphuml' eNobhi;

ewe, nalo lutyityimbis' umnwe,

lukhomba intaba iZiyon eJerusalem.

33UMhlekazi *uNdikhoyo onamandla onke

wosuka ke abathi fohlo-fohlo

ngathi ucwaba amasebe omthi.

Izikhulu ndawonye nezikhakhamela

nazo zovikivwa ziwe bhaxa.

34Uya kuzigeca ngezembe uSomandla,

abe ngathi utshitshisa ihlathi,

loo mihalambela yemithi yaseLebhanon.

UISAYA 10XHO96Vula kumfundi weBhayibhile

IINDUMISO 149

Umhobe wokudumisa

1Aa! Bayethe, Mhlekazi!

Memelelani niculele *uNdikhoyo ingoma entsha

abongwa ngayo ebandleni lakhe labanyanisekileyo!

2USirayeli makagcobe agcolode ngoMdali wakhe;

oonyana beZiyon mabachulumache ngoKumkani wabo.

3Mabadude bamdumise bememelela,

betsholoza bembonga ngegubu nekatala.

4Kaloku uNdikhoyo akaziva ngosapho lwakhe;

abazithobayo ubathi jize ngoloyiso!

5Imilowo yakhe mayitaka-take ngemincili;

mayimemelele ngemihlali naxa ilalayo;

6mayitsho ngentsholo idumisa uThixo,

amakrele abazwe macala esezandleni,

7ukuze iphakele iintlanga impindezelo,

ixhaphaze izizwe ngesohlwayo,

8ibasonge ibakhonkxe ookumkani ngamakhamandela,

zona izikhulu zabo izikhuleke ngemixokelelwana,

9khon' ukuze ifezekise isigwebo sikaThixo phezu kwabo.

Nântso ke intshinga yemilowo yakhe.

Masikhahlele sithi: “Bayethe, Mhlekazi!”

IINDUMISO 149XHO96Vula kumfundi weBhayibhile
Bible Society of South Africav.4.26.9
SIFUMANE KU-