To The Word – Day 91

₂Hoyi-i-i-na! Hoyina, mazulu!

Bek' iindlebe, nawe hlabathi!

Kaloku *uNdikhoyo uthethe wathi:

“Ndakhulis' abantwana ndabondla,

kodwa ke ngoku bajike bandivukela.

₃Kambe ke yona inkomo iyamaz' umniniyo,

ngokunjalo nedonki iyasazi isibaya sayo.

Ukanti ke yena uSirayeli uvalekile;

ewe, abantu bam abazi nto tu!”

₄Yeha ke, sizwe samanyundululu,

abantu abasuntsubala bubugwenxa,

nzalandini yamatshijolo,

sizukulwanandini sonakalisayo!

Kaloku nikreqile nina kuNdikhoyo,

nisuke namdelela uYedwa kaSirayeli;

ewe ngenene, nihlehlile namfulathela.

₅Anikaneli kwesingaka sona isohlwayo?

Niya kurhoxa nini kolu vukelo?

Mhawoo! Intloko seyide yaboko-boko;

xa uwonke nomzimba uvikivekile.

₆Phantsi elunyaweni kuye entloko phezulu,

hayi konke, kulityufu-tyufu nje!

Kuziingongoma, kuziinduma;

azicudiswanga, zingakhanyelwanga nangachiza;

ewe, khange zikhathalelwe zibotshwe!

₇Nâlo ilizwe lakowenu liyinkangala;

okwakuzizixeko kutshe kwaluthuthu.

Yonke ke loo nto nikho nibukele.

Iintlanga ziwuphangile umhlaba wooyihlo;

ewe, ziwubhukuqe zawuvuthulula.

₈Ke yona iJerusalem isele yodwa jwi!

Seyifana nephempe esidiliyeni;

seyingathi linqugwala emasimini,

nqwa nesixeko esingqingiweyo.

₉Kambe ke uNdikhoyo uSomandla-onke,

ukuba ebengasishiyelanga qaqobana,

besiya kusuka sifane neSodom;

ewe, ngesitshabalele njengeGomora.

₁₀Nalu udaba lukaNdikhoyo!

Luveni, ziphathamandla zaseSodom;

yiphulaphuleni imfundiso kaThixo,

nani zima-mhlaba zaseGomora.

₁₁Kaloku uNdikhoyo uyakhala ngawe, Sirayeli; uthi:

“Ngawani ke ngoko la madini angakanana?

Mna ndidikiwe ziinkunzi zeegusha ezitshiswayo.

Ndanele nangamanqatha enyama etyebileyo.

Andisalifuni igazi leenkunzi zeenkomo,

nditsho nelamaxhwane eegusha neebhokhwe.

₁₂Nide nize kum nje, nibizwe ngubani?

Nisafuna ntoni apha kum?

Hayi bo! Phezani ukuyixovula le nkundla!

₁₃Andizifuni izipho namadini aphuthileyo,

kwankqu nesiqhumiso senu siyanditsarha!

Andinamdla kwiimbizo neentlanganiso zenu

zokuthwasa kwenyanga *noMhla wokuPhumla;

amatheko anobugwenxa andikruqule.

₁₄“Ndiyawenyanya onke amatheko enu;

nditsho nala okuthwasa kwenyanga.

Kaloku ngoku asuke aluxanduva,

ndaye ke ndidiniwe kukuluthwala.

₁₅“Nakukhongozela ngezandla nizibika,

mna ndosuka ndiwavale amehlo am.

Noba ningade nibhomboloze,

andiyi kunikhathalela mpela;

kaloku izandla zenu zinkone ligazi.

₁₆Khanizicoce nibe nyulu!

Yahlukanani nale mikhwa ingcolileyo;

yekani ukwenza izinto ezinje;

mandingaze ndiphinde ndizibone.

₁₇Khanifunde ukwenza okusesikweni;

zonke izinto zenzeni ngokomthetho.

Khaninyenyise ngakubantu abacinezelekileyo;

kanti neenkedama zilungiseleleni;

ngokunjalo nimbonelele nomhlolokazi.”

₁₈Ewe, uNdikhoyo uthi:

“Yizani, khe sithetha-thethane.

Noba sewudyobheke wankone sisono,

mna ndokuhlambulula utsho ube msulwa;

kanti nokuba sewuyinyhuku-nyhuku,

mna ndiya kukwenza ube mhlophe qhwa.

₁₉Ukuba niyavuma ukundithobela,

ningabuxhamla ubuncwane beli lizwe.

₂₀Kambe ke xa ningafuni, nindivukela,

niza kusuka nibe lixhoba lekrele.

Nditshilo nje ke mna Ndikhoyo, nditshilo!”

₂₁Ewe, kambe, sixekondini!

Kade uyinzwakazi ngesimo,

kodwa xa kunamhlanje-nje, ungumadod' onke.

Wawufudul' uphuphuma lucwangco;

ngenene wawulikhaya lamalungisa;

ke namhlanje ulikhaya lezikrelemnqa.

₂₂Kaloku wawukade ucwenge njengesiliva,

kodwa ngoku sewuphuthile.

Wawufana newayini eyondeleleneyo,

kambe namhlanje sewungumngxengwa.

₂₃Iziphathamandla zakho zizibhoja,

abafo abalala ngangubo-nye namatutu.

Bathwangekile kukufun' izipho nezicengo;

abaziinkedama abanaxesha labo,

kanti nabahlolokazi abazidubi ngabo.

₂₄Ngoko ke nanku umlomo *kaNdikhoyo –

nditsho uNdikhoyo uSomandla-onke,

iNgangalala kaSirayeli – uthi:

“Ngoku ndiza kukhe ndiphuncule kwiintshaba zam;

ewe kaloku, ndiza kuziphindezela.

₂₅Ngoku ndiza kuthatha amanyathelo aqatha:

ndiza kunikhama ndinicwenge oku kwesinyithi;

ndiza kubukhupha buphele tu ububi kuni.

₂₆Kaloku ndiya kunibuyisela abalawuli njengantlandlolo,

ndinimisele izithwala-ndwe njengamandulo.

Kuya kwandula ke kuthiwe ungunobulungisa,

ngenene ube ngunontembeko.”

₂₇IJerusalem iya kuhlangulwa bubulungisa bukaThixo.

Baya kusinda ke bonke abaguqukayo.

₂₈Kambe ke baya kutshabalala

bonke abavukeli-mbuso nabanxaxhayo;

ewe, uNdikhoyo uya kubabhubhisa bonke abakreqi.

₂₉Ngoko ke nosuka nibe manyonywana

ngenxa yale mithi yemioki niyinqulayo,

ngokunjalo nayiloo miyezo yamanyundululu.

₃₀Kaloku niya kufana nemioki etshazileyo;

niya kuba matwa negadi engankcenkceshelwayo.

₃₁Njengoko nengca itshiswa nayintlantsi le,

nawo ke amagorha aya kutshabalala.

Ewe, aya kubhujiswa yimisebenzi yawo,

ibe ke akukho uya kulamla.

₂Ke kaloku ngemihla yokugqibela

intaba emi kuyo indlu *kaNdikhoyo

iya kuba yeyona ibalaseleyo,

izikrobele zonke iinduli;

nezizwe zonke ziya kugxalathelana ukuya kuyo.

₃Ewe, abantu abaninzi baya kuza, bathi:

“Yizani siye entabeni kaNdikhoyo,

endlwini kaThixo kaYakobi.

Yena wosifundisa iindlela zakhe,

ukuze thina sihambe ngazo.”

Kaloku umthetho wophuma eZiyon,

liphume eJerusalem ilizwi likaNdikhoyo.

₄Nguye oya kugweba phakathi kwezizwe,

abe ngumlamli phakathi kweentlanga ngeentlanga,

wona amakrele azo ziwenze amakhuba,

yona imikhonto ibe zizitshetshe zokuthena imithi.

Kaloku izizwe soze ziphinde ziqulelane ngamakrele,

zingasayi kuze ziphinde ziyiqeqeshelwe imfazwe.

₅Ngoko ke, nzala kaYakobi,

yizani sihambe ngokukhanya okuvela kuNdikhoyo!

₆Kambe ke wena, Thixo wethu,

ubalahlile abantu bakho,

nditsho indlu kaSirayeli!

Kaloku bathene nca nezangoma –

ezasempuma nezo zaseFilistiya –

bayavumisa batsho ngehlombe bekunye neentlanga.

₇Nelizwe labo liphuphum' isiliva negolide;

ubutyebi babo abunambaliso.

Nomhlaba wabo uzele ngamahashe;

yinyambalala iinqwelo zabo zemfazwe.

₈Awu! Asiyomifanekiso kwilizwe labo!

Kaloku bakhahlela kwaizinto ezenziwe kwangabo;

banqula umsebenzi wezandla zabo.

₉Ewe, uluntu luphuthile,

ngenene abantu bahlazekile.

Ngoko ke ungaze ubaxolele!

₁₀Ke bona baya kuzifaka emaweni,

bazimele baziqhusheke nasemhlabeni,

kuba besoyika ingqumbo *kaNdikhoyo,

bebaleka ukukhazimla kobungangamsha bakhe.

₁₁Ikratshi lomntu lihlalele ukuphuthiswa,

nokukhukhumala kwakhe kuthotywe.

Ngaloo mini ke nguNdikhoyo yedwa oya kubalasela.

₁₂Kaloku uNdikhoyo onamandla onke uwumisile umhla wembubho;

baya kuthi shuu abanekratshi nabaziphakamisayo,

nditsho abaqwanyileyo nabaqhoshayo.

₁₃Uya kuyincothula naloo misedare mide yaseLebhanon,

ayitoncule naloo mioki yaseBhashan.

₁₄Uya kuzibhukuqa neenkaba-nkaba zeentaba,

azilebele neencochoyi zeenduli.

₁₅Andisathethi ke ngeemboniselo eziziinkelekethe.

Koba njalo ke nakuzo zonke iinqaba.

₁₆Iinqanawa zokurhweba wozitshonisa,

ade antywilisele nezakhiwe ngobugcisa.

₁₇Ewe, ikratshi lomntu liya kuphuthiswa,

nokukhukhumala kwakhe kuthotywe,

ngaloo mini ibe nguNdikhoyo yedwa obalaseleyo.

₁₈Ngenene ke yona imifanekiso iya kubhujiswa!

₁₉Ke bona abantu baya kungena emiqolombeni,

baziqhusheke nditsho nasemingxunyeni,

bezimela ubuqaqawuli bobungangamsha bakhe

ekufikeni kwakhe eze kuwurhwaqelisa umhlaba.

₂₀Ngaloo mini abantu baya kuyilahla imifanekiso yabo yesiliva neyegolide,

nditsho leyo bayenzele ukuyinqula.

Ewe, yoba lixhoba leempuku namalulwane.

₂₁Ke bona baya kungena emiqolombeni,

bazifake ezimfanteni ezawaneni,

bebaleka ingqumbo kaNdikhoyo,

bezimela ubuqaqawuli bakhe

ekufikeni kwakhe eze kuwurhwaqelisa umhlaba.

₂₂Ngoko ke musa ukukholosa ngomntu;

kuxa engubani ekrobo-krobo nje!

₁Nanko ke *uNdikhoyo onamandla onke!

EJerusalem nakwaJuda ubhubhisa yonke into

okwakuyinkxaso nesixhaso.

Uza kutshayela kuthi tu

ukutya ngokunjalo namanzi.

₂Asisathethi ke ngamagorha namajoni,

abagwebi kwakunye *nabashumayeli,

oosangoma ngokunjalo neenkunkqela,

₃iingqwayi-ngqwayi zomkhosi noosomaqhuzu,

amaphakathi nawo onke amachule,

abakhafuli kanti nabemilingo.

₄UNdikhoyo uya kubayekela abantu balawulwe ngamakhwenkwe,

amagosa abo abe ngabantu abangenankathalo.

₅Kaloku abantu baya kuxhaphazana,

ibe nguwashiywa nowashiywa,

nakubamelwane kube kwanjalo,

nabantwana bangabahloneli abadala,

nabaphantsi bangazikhathaleli izihandiba.

₆Ewe, liyeza ixesha apho abendlu enye baya kunyanzelana bathi:

“Ngokuba wena unawo nomnweba

ngoko ke sikhokele kuwo lo mbodamo.”

₇Kambe ke lowo uya kuphendula athi:

“Hayi, ndiyekeni, andinako mpela mna.

Ndiyimpula kalujaca; andinakutya nazambatho;

ngoko ke andinako ukunikhokela.”

₈Kaloku iJerusalem iyafadalala

nelakwaJuda livuthulukile.

Kaloku ukuthetha nokwenza kwabo kusoloko kuchasene noNdikhoyo.

UThixo bamdelile; abamazele nto mpela.

₉Ubutyala babo abufihlakali;

kaloku banjengeSodom, badlisela ngokona.

Futhi ke abanazazela ngaloo nto;

ewe, kunyembelekile kubo!

Isikhuni sibuye nomkhwezeli.

₁₀Kambe ke, hayi inyhweba yâbo balungisayo!

Bona baya kuxhamla iziqhamo zemisebenzi yabo.

₁₁Kodwa ke kunyembelekile ngakwizikhohlakali,

kuba zojikelwa kwazizenzo zazo.

₁₂Abantu bam baxhatshazwa naziimveku,

bade balawulwe nangabafazi.

Ewe, lusapho lwam, iinkokheli zenu ziyanintlokothisa;

senide nadideka, anayazi nemaniyenze.

₁₃Ngoku *uNdikhoyo uzimisele ukuxoxa;

seleza kugweba iintlanga.

₁₄Ewe, uza kuwisa isigwebo kumadod' amakhulu nakumatshawe.

Nasi isityholo asimisayo:

“Nini abanqwamze isidiliya,

nemizi yenu iyaphuphuma zizinto eniziphange kubantu abahlelelekileyo.

₁₅Ngani ukuba nibaxushe abantu bam?

Ngani ukuba niwaxhaphaze amahlwempu?

Lumkani ke, kuba ndithethile mna Ndikhoyo onamandla onke.”

₁₆*UNdikhoyo uyathetha, uthi:

“Asikratshi kubafazi baseJerusalem!

Bafathula nje, beqhiwul' iintamo.

Ungafika belaqaza, becel' injezu.

Ewe, nâbo bechul' ukunyathela,

bekrocozisa loo miliza yabo.

₁₇Ewe, ndiza kubagugula iinwele,

ndibarhawule ngesikhakh' entloko,

batsho ngaloo mabunzi achengezelayo.”

₂₄Mh-mh-mh, kuthi khaphu!

Kaloku abasaziqholi!

Ngoku abasenabhanti; babhinqa ngeentsontela.

Neenwele zigugulwe; asiyonkqayi; yehaa!

Abasenalokhwe ngoku, bayadlakazela.

Ubunzwakazi babo sebukukuhlazeka.

₂₅Okwakungamadoda esixekweni apho,

nditsho namagorha la embala,

akayi kubuya emfazweni.

₂₆Ewe, namasango esixeko ngokwawo osuka ahlahlambe agixe,

nesixeko ngokwaso sofana nomfazi othe bhaxa phantsi ngengub' esele.

₁Makhe ndintyiloze ndivum' ingoma,

ingoma ngogxa wam nesidiliya sakhe.

Ugxa wam wayenesidiliya

kwinduli echuma kunene.

₂Wawuphethula umhlaba, wawageqa amatye,

waza watyala idiliya yodidi.

Kwalapho wakha nemboniselo;

ngokunjalo wenza nesixovulelo.

Waza ke wanqumama ekholosile;

suka ke zona iidiliya zavela zingezizo.

₃“Athi ke, nina bemi baseJerusalem,

ngokunjalo nani, bantu bakwaJuda!

Ndiyanibongoza, khanahlule phakathi kwam nesidiliya sam.

₄Ngaba yintoni endingasenzelanga yona?

Yiyiphi enye into engendisenzele yona?

Ngaba uphi undonakele?

Kaloku mna ndithe ndijonge iidiliya,

suka sona savelisa ezingezizo.

₅Phulaphulani ke, mna ndinixelele,

nantsi into endiya kusenza yona:

ndoyisusa loo nto ndisibiyele ngayo,

sitsho sibe sisisulu sokubhuqwa;

ndiya kuzidiliza iindonga ezisibiyeleyo,

imidiliya ibe sisisulu sokunyathelwa.

₆Ndosiyeka nje, side sibe lifusi;

isidiliya singàthenwa, singàhlakulwa,

sikhule utshungu nenkunzane.

Namafu ngokwawo ndowagunyazisa

ukuze angasiphatheli namvula.”

₇Isidiliya *sikaNdikhoyo onamandla onke yindlu kaSirayeli;

ewe, esi sidiliya ngamaJuda, wona angumyezo oligugu lakhe.

Yena walindela okusemthethweni kuwo,

suka wona ee dyubhu ngobutyadidi begazi!

Wayelindele ubulungisa kuwo,

suka yasisijwili sokuzibika!

₈Kunyembelekile ke kuni,

kuba nithatha imizi ninemizi.

Nongeza amasimi, ninawo amasimi,

nifunzel' ukugqiba konke tu,

ibe nini nodwa abemi kweli lizwe.

₉Ndimvile *uNdikhoyo onamandla onke;

ewe, ufunge wathi:

“Ngenene la mapomakazi ezindlu ndowatsho akhal' ibhungane,

neenzwakazi zemizi zoba ngamanxuwa.

₁₀Kwisidiliya esiziindima ezilishumi

kuya kuphuma umphanda wewayini kuphela,

ize yona imbewu ezele ingobozi

ivelise isitya sengqolowa kuphela.”

₁₁Yeha! Kunyembelekile kuni,

nina bavuka ekuseni,

nisukelana notywala kube njeya;

nina bajikeleza kude kube sebusuku,

nide nibe zizinxada-nxada kukunxila!

₁₂Kwezo ziyunguma sisigingci nehapu,

umrhubhe nefluthi, ndawonye notywala;

uNdikhoyo yena animkhathalele,

nemisebenzi ayenzayo aniyihoyanga.

₁₃Ngenxa yokuba bengaqiqi

abantu bam baza kuthinjwa.

Oomaqhuzu babo bofa yindlala,

ngokunjalo nomndilili ufe lunxano.

₁₄Ngoko ke elabafileyo libalambele;

ewe, ingcwaba likhamise ng'aa,

liza kuziqongqoloza izihandiba zaseJerusalem.

Ngokunjalo nezihlwele ziya kutshona kulo,

ingabi yongxolo ke, ibe yingxuba kaxaka!

₁₅Abantu baya kuthotywa bawe bhaxa;

abakhukhumeleyo baya kuhlazeka.

₁₆Kodwa ke uNdikhoyo onamandla onke

uphakanyiswa bubulungisa bakhe;

ewe, yena uThixo onguYedwa

wozicacisa ngobulungisa bakhe.

₁₇Amatakane aya kutya kuloo mabhodlo,

nawebhokhwe atsho afumane idlelo.

₁₈Lusizi lodwa kwabarhuqa ukona ngomnxeba wokuxoka,

abo balandelwa sisono ngathi basirhuqa ngentsontela,

₁₉abo bathi: “UThixo makakhawulezise;

makangxame enze sibone kaloku.

Masifike isicwangciso sikaYedwa kaSirayeli,

ukuze nathi sibe nokusiqonda.”

₂₀Kulusizi kwabathi ububi kokuhle,

nakwabo bathi okuhle bububi;

nditsho abathi ubumnyama kukukhanya,

bajike bathi ukukhanya bubumnyama.

Bona ekrakrayo bathi imnandi,

ukanti emnandi bathi iyakrakra.

₂₁Kunyembelekile kwabo bazicingela ukuba bazizilumko;

nditsho abo bazicingela ukuba bandwebile.

₂₂Yeha ke nina, makroti asetywaleni,

nina bangamachule okuxuba utywala;

₂₃nditsho nina bamkhululayo onetyala,

ngenxa yokuba nifumene isicengo,

nina babugqwethayo ubulungisa komsulwa!

₂₄Ngoko ke niya kufana nomququ,

wona ulencwayo lidangatye;

nani niya kuba njengengca,

yona ishwatyaniswayo ngumlilo.

Niya kusuka nibole iingcambu;

intyatyambo yenu iya kuvuthuluka.

Kaloku niyimangele ingqeqesho kaNdikhoyo onamandla onke,

nalitshica ilizwi likaYedwa kaSirayeli.

₂₅Ewe, uNdikhoyo uyalwa nabantu bakhe;

wosuka abathi mpaka ngesandla sakhe!

Ke zona iintaba zonyikima,

izidumbu zibe yinkunkuma ezitalatweni.

Naxa kunjalo nje usavutha ngumsindo;

ewe, akajiki, uyalekuza.

₂₆UNdikhoyo uza kuxhokonxa isizwe esikude;

uza kuntyontyela esiseziphelweni zehlabathi.

Nâso ke sisiza sigxalathelana!

₂₇Amajoni aso akakhubeki, engadinwa;

wona akozeli, akalali nokulala.

Ezawo iibhanti azikhululeki,

nemitya yeembadada zawo ayiqhawuki.

₂₈Iintolo zawo azibukhali, ziingcangula;

ewe, ziinto ezihlala zityedile.

Iimpuphu zamahashe – nyengane yakwabani!

Ke wona amavili eenqwelo sisitshu.

₂₉Ziinto ezivungama okwengonyama;

ewe, umgqumo wazo ngathi yingonyama entsha.

Zigragrama zilithi xhwii ixhoba lazo,

zilithi xhakamfu kungabikho unokulamla.

₃₀Ngaloo mini ke zibhavumla phezu kwalo,

zitsho ngomgqumo ngathi lulwandle.

Wothi wakukrwaqula ke kulo mhlaba

ufike uyinkxwaleko nembonde-mbonde,

ukukhanya kuginywe bubumnyama bamafu.

₁Aa! Bayethe, Mhlekazi!

Bongan' *uNdikhoyo, nimdumise emazulwini;

mdumiseni kweliphezulu!

₂Mbongeni, nonke nina zithunywa zakhe;

mdumiseni, nani mikhosi yakhe!

₃Mbongeni, wena langa nawe nyanga;

mdumiseni, nonke zinkwenkwezi eziqaqambileyo!

₄Mbongeni, nani mazulu asemajuku-jukwini;

ewe, makube njalo nakuni, manzi angaphaya kwesibhakabhaka!

₅Ewe, mazilidumise igama likaNdikhoyo;

kaloku yena wathetha ngelizwi, zabakho ke zona.

₆Wazimisela ukuze zihlale zihleli nanini-nanini;

ewe, wazimisela umda ongasoze washukunyiswa.

₇Dumani kuNdikhoyo nalapha emhlabeni!

Nditsho kuni, bominenga, nani nonke, manzi anzongonzongo,

₈wena mlilo, nawe sichotho, khephundini, nani mafu,

nawe saqhwithi sofezekisa ilizwi lakhe.

₉Dumani, zintaba, nani zinduli,

mithi yeziqhamo, nani nonke misedare!

₁₀Mbongeni, nina marhamncwa, nani nonke zinkomo,

nina zinto zirhubuluzayo, nani zintaka ziphaphayo!

₁₁Khahlelani, zikumkani zehlabathi, nani nonke zizwe,

matshawe, nani nonke zinxiba-mxhaka zehlabathi!

₁₂Dumisani xa ninonke, mlisela kwanani mthinjana;

yenzani njalo, maxhego kwanani bantwana!

₁₃Ewe, mabalibonge igama likaNdikhoyo;

kaloku yena ngugama-khulu.

Ke bona ubungangamsha bakhe

bulivelele ihlabathi ndawonye namazulu.

₁₄Ewe, abantu bakhe ubathe jize ngodumo nobungangamela,

ke yona imilowo yakhe ithwel' intshinga yendumiso –

nditsho amaSirayeli, isizwe esisenyongweni kuye.

Masitsho sonke sithi: “Bayethe, Mhlekazi!”

“Wafana negusha eya kuxhelwa,

wafana netakane elithe cwaka lichetywa,

naye wathula wathi tu.

₃₃Ekuthotyweni kwakhe akabanga namhlanguli;

akukho bani uya kuchaza ngesizukulwana sakhe,

kuba ubomi bakhe emhlabeni bunqanyulwe.”

“Mna ndililizwi lodandulukayo entlango, lisithi:

‘Yilungiseleleni indlela iNkosi.’ ”