To The Word – Day 89

₁UYesu wangena eJeriko, egqitha khona. ₂Ke kaloku kwakukho ndoda ibizwa ngokuba nguZakeyi, eyayiyintloko yabaqokeleli-rhafu, isisityebi. ₃Yayifuna ukubona uYesu, kodwa ngenxa yokusithwa yindimbane ayaba nako, kuba yayimfutshane ngesithomo. ₄Yabaleka ke, yaya ngaphambili, yakhwela emthini womthombe ukuze imbone, kuba wayeza kudlula apho. ₅Akufika kuloo ndawo, wakhangela phezulu uYesu, wathi kuyo: “Zakeyi, khawuleza uhle, kuba namhlanje ndimelwe kukuba lundwendwe lwakho.”

₆Wakhawuleza ke wehla uZakeyi, waza wamkela uYesu ngovuyo. ₇Bakuyibona loo nto, bakhalaza bonke, besithi: “Uye kungena endlwini yomntu *ongumoni.”

₈Waphakama uZakeyi, wathi kuyo iNkosi: “Khangela, isiqingatha sempahla yam, Nkosi, ndisinika amahlwempu. Kanti nokuba ndidle nto kabani na ngobuqhetseba, ndimbuyisela kane.”

₉Ke uYesu wathi kuye: “Namhlanje lufikile usindiso kule ndlu, kuba noZakeyi lo ungunyana ka-Abraham. ₁₀Kaloku yena *uNyana woLuntu wezela ukufuna kwanokusindisa abantu abalahlekileyo.”

₁₁UYesu wabenzela umzekeliso abo babemva ethetha ezi zinto. Wayeselekufuphi neJerusalem; baye bona besiba ulawulo lukaThixo loba seluzinzile ngelo xesha. ₁₂Ke wathi: “Inkosana ethile yahambela kwilizwe elikude, isiya kuthatha amagunya okulawula, iza kubuya ibuye. ₁₃Izibizile ke izicaka zayo ezilishumi, yazinika imali engangekhulu leerandi sisinye, yathi kuzo: ‘Rhwebani, ndide ndibuye.’ ₁₄Ke bona abemi belizwe laloo nkosana babeyithiyile, baza bathuma izigidimi emva kwayo, besithi: ‘Asifuni ukuba lo abe ngukumkani wethu.’

₁₅“Yakuba ke ibekiwe yangukumkani inkosana le, ibuyile, yaza yathi mazibizelwe kuyo ezo zicaka yayizinike imali leyo, ukuze ive kuzo ngazinye ukuba zingenise ntoni na ngokurhweba. ₁₆Seza ke esokuqala, sathi: ‘Nkosi, ikhulu lakho lizele ishumi lamakhulu.’ ₁₇Yathi kuso: ‘Hee ke, sicakandini esilungileyo! Ngenxa yokuba ubuthembekile kokuncinane, ndikunika igunya kwiidolophu ezilishumi.’ ₁₈Seza nesesibini, sathi: ‘Nkosi, ikhulu lakho lenze isihlanu samakhulu.’ ₁₉Yathi nakweso: ‘Wena ndikunika igunya kwiidolophu ezintlanu.’

₂₀“Seza nesinye, sathi: ‘Nkosi, nali ikhulu lakho. Bendilithandele ngelaphu, ₂₁kuba bendikoyika, ngokuba ungumntu ongqabalala; uthatha ongakubekanga, uvune ongakuhlwayelanga.’ ₂₂Yathi kuso: ‘Ndiza kukugweba ngokuphuma emlonyeni wakho, sicakandini esikhohlakeleyo. Ubusazi nje ukuba ndingumntu ongqabalala, othatha angakubekanga, avune angakuhlwayelanga; ₂₃kutheni ke imali le yam ungayigcinisanga ebhankini, ze ke mna ekufikeni kwam ndiyifumane inenzala?’

₂₄“Yathi kwababemi ngakhona: ‘Mhlutheni ikhulu elo, nilinike lowo uneshumi lamakhulu.’ ₂₅Ke bathi kuyo: ‘Nkosi, uneshumi lamakhulu!’ ₂₆Yathi: ‘Inene, wonke umntu onolutho uya kunikwa; ongenanto ke, uya kuhluthwa kwanaloo nto anayo. ₂₇Ke zona ezo ntshaba zam zingafunanga ukuba ndibe ngukumkani wazo, ziziseni apha, nizibulale apha phambi kwam.’ ”

₂₈Akuba ezithethile ezi zinto, uYesu wabandulela, wenyuka esiya eJerusalem. ₂₉Kwathi, akusondela eBhetefage naseBhetani, engasentabeni ekuthiwa yeyemiNquma, wathuma ababini kubafundi bakhe, ₃₀esithi kubo: “Hambani niye kule dolophana ikhangelene nathi. Nothi ningena nje kuyo, nifumane inkonyana yedonki ibotshelelwe, ekungazange kukhwele mntu kuyo. Yikhululeni, niyizise apha. ₃₁Ukuba ubani uthe kuni: ‘Niyikhululela ntoni loo donki?’ ze nithi: ‘Iyafunwa yiNkosi.’ ”

₃₂Basuka ke baya abo babethunyiwe, bafika kunjengoko wayetshilo uYesu. ₃₃Bakuyikhulula inkonyana, abaniniyo bathi kubo: “Niyikhululela ntoni loo nkonyana?”

₃₄Bathi ke bona: “Iyafunwa yiNkosi.” ₃₅Bayisa ke kuYesu, bandlala iingubo zabo phezu kwayo inkonyana yedonki leyo, bamkhwelisa kuyo uYesu. ₃₆Ehamba njalo, bamana bezandlala iingubo zabo endleleni.

₃₇Ke kaloku akusondela ethambekeni leNtaba yemiNquma, yathi yonke inkitha yabafundi yavuya, yadumisa uThixo imemelela, imdumisa ngayo yonke imimangaliso eyayibonayo, ₃₈isithi: “Makabongwe lo Kumkani uzayo egameni leNkosi! Uxolo ezulwini; udumo kweliphezulu!”

₃₉Abathile *kubaFarasi esihlweleni apho bathi kuYesu: “Mfundisi, bakhalimele abafundi bakho.”

₄₀Waphendula wathi kubo: “Inene, kungáthi nje kukhe kwathi cwaka aba, kunkqangaze namatye la.”

₄₁Akusondela uYesu, esibona isixeko, wasililela ₄₂esithi: “Akwaba nawe, Jerusalem, ubuzazi namhlanje izinto ezikuzisela uxolo! Kodwa ngoku zifihlakele kuwe! ₄₃Kuya kufika imihla eziya kuthi iintshaba zakho zakhe udonga lokuzikhusela ekukuhlaseleni kwazo, zikungqinge, zikuxine macala onke. ₄₄Ziya kukudiliza, zibatshabalalise abakuwe, zingashiyi nalinye ilitye phezu kwelitye, ngenxa yokuba ungalazanga ixesha lokuvelelwa kwakho nguThixo.”

₄₅UYesu wangena *endlwini kaThixo, waza wabakhupha abo babethengisa khona, ₄₆esithi kubo: “*EziBhalweni uThixo uthi: ‘Indlu yam yindlu yokuthandaza.’ Ke nina niyenzé umqolomba wezihange.”

₄₇Imihla ngemihla wayefundisa endlwini kaThixo apho. Ke ababingeleli abaziintloko, nabachazi-mthetho, kwaneenkokheli zabantu, babefuna ukumbulala; ₄₈kodwa ababanga nakufumana nto banokuyenza, kuba bonke abantu babenamathele kuye, bemphulaphula.

₁Kwathi ngenye imini, uYesu efundisa abantu *endlwini kaThixo, eshumayela iindaba ezimnandi, kwafika kuye ababingeleli abaziintloko, nabachazi-mthetho, namadoda amakhulu. ₂Bona bathetha naye besithi: “Khawutsho: ezi zinto uzenza ngagunya lini? Ingubani kakade okunike elo gunya?”

₃Waphendula ke wathi kubo: “Nam ndiza kunibuza umbuzo ube mnye; ze nindiphendule ke. ₄Ngaba ubhaptizo lukaYohane lwaluvela ezulwini, okanye lwaluvela ebantwini?”

₅Baxoxa bodwa besithi: “Ukuba sithe: ‘Lwaluvela ezulwini,’ wothi: ‘Kwakutheni ke phofu ukuze ningakholwa?’ ₆Ukuba sithe: ‘Lwavela ebantwini,’ bonke abantu bosixuluba ngamatye, kuba babemvuma uYohane ukuba *ungumshumayeli.” ₇Baphendula ke ngokuthi àbazi ukuba lwaluvela phi na.

₈Waza wathi kubo: “Nam ke andinixeleli ukuba ndizenza ngagunya lini na ezi zinto.”

₉Ke uYesu wabenzela umzekeliso abantu, wathi: “Umntu othile watyala isidiliya, waqeshisa ngaso kubalimi, wahambela kwelinye ilizwe ixesha elide. ₁₀Ngexesha lokuvuthwa kweziqhamo wathuma isicaka kwabo balimi, ukuze bamnike eziqhameni zesidiliya eso. Basuka bona abalimi basibetha eso sicaka, semka singaphathanga nto. ₁₁Wabuya wathuma esinye isicaka kubo. Basibetha ke naso, badlala ngaso, naso semka singaphathanga nto. ₁₂Wabuya wathuma nesesithathu. Bathi naso basingxwelerha, basigxotha. ₁₃Wathi umnini-sidiliya: ‘Ndiya kuyithini na le nto? Mandithume unyana wam endimthandayo. Mhlawumbi bomhlonela yena.’ ₁₄Kodwa bakumbona abalimi, bathi omnye komnye: ‘Yindlalifa le. Masiyibulale, ilifa libe lelethu.’ ₁₅Bamkhuphela ngaphandle kwesidiliya ke unyana lowo, bambulala.

“Uya kuthini ke ngoko umnini-sidiliya? ₁₆Wofika ababulale abo balimi, asinikele kubambi eso sidiliya.”

Bakukuva oko, bathi: “Makungabi njalo!”

₁₇Waza wabakhangela wathi: “Ithetha ntoni ke phofu le ndawo *eziBhalweni ithi:

₁₉Baza ke abachazi-mthetho nababingeleli abaziintloko bafuna ukumbamba kwangelo lixa, kodwa babesoyika abantu, kuba babesazi ukuba uwuthethe esingise kubo lo mzekeliso. ₂₀Bamcupha ke, bathumela iintlola ezizenza amalungisa, ukuze bambambise ngamazwi, ze ke bamnikele kwirhuluneli, yona iphetheyo inawo onke amagunya. ₂₁Iintlola ezi zambuza uYesu zisithi: “Mfundisi, siyazi ukuba wena uthetha ufundise okuyinyaniso, kuba akunamkhethe, koko uyifundisa ngenyaniso indlela kaThixo. ₂₂Ngaba ke kuvumelekile na ukurhafa *kuKhesare?”

₂₃Eliqondile iyelenqe lazo, wathi kuzo: ₂₄“Ndiboniseni imali. Ke, ngokabani na lo mfanekiso neli gama?”

Zaphendula zathi: “NgokaKhesare.”

₂₅Wathi yena kuzo: “Ke, nikani uKhesare okufanele uKhesare, ninike uThixo okufanele uThixo.”

₂₆Zakhohlwa ukumbambisa ngamazwi phambi kwabantu, zaza zathi cwaka, zimangalisiwe yimpendulo yakhe.

₂₇Kweza abathile *bakubaSadusi kuYesu (bona abo bathi akukho luvuko lwabafileyo), bambuza ke ₂₈besithi: “Mfundisi, uMosis wasibhalela umthetho esithi: ‘Ukuba ubani uthe wafa, eshiya umfazi engekabi nabantwana, makathi umntakwabo amngene umfazi lowo, baze bamzalele abantwana umfi.’ ₂₉Ke kaloku kwakukho oonyana bomntu omnye abasixhenxe, yaza inkulu yazeka umfazi, yasweleka ingekabi nabantwana. ₃₀Wathi ke owesibini wamngena, naye wasweleka engekabi nabantwana. ₃₁Wenjenjalo nowesithathu. Bada baba naye bosixhenxe, kodwa abashiya mntwana. ₃₂Emva kwabo bonke wasweleka naye umfazi. ₃₃Ke ngoko eluvukweni lwabafileyo uya kuba ngumfazi wawuphi na kubo? Kuba kaloku bosixhenxe babemthathile.”

₃₄Waphendula uYesu, wathi kubo: “Abantu beli phakade bayazeka, besendiswa; ₃₅kodwa bona abo bafanelwe kukuvuka ekufeni, baphile kwiphakade elizayo, àbazeki, àbendiswa. ₃₆Bona abasenakufa, kuba bafana nezithunywa zezulu. Bona bangoonyana bakaThixo, kuba kaloku bavukile kwabafileyo. ₃₇Ke yona into yokuba abafileyo bayavuka, noMosis uyayikhankanya kwisiqendu esithetha ngetyholo elivuthayo encwadini yakhe, apho abiza iNkosi ngokuthi inguThixo ka-Abraham, uThixo kaIsake, uThixo kaYakobi. ₃₈AkaThixo wabafileyo ke; unguThixo wabaphilayo, kuba kuye bonke bayaphila.”

₃₉Baphendula ke abathile bakubachazi-mthetho, bathi: “Ngxatsho ke, Mfundisi; uthethe kakuhle!” ₄₀Babengasenabuganga ke bakumbuza nento le.

₄₁Ke uYesu wathi kubo: “Batsho ngani ke ukuthi: ‘*UKrestu ngunyana kaDavide’? ₄₂Kanti noDavide ngokwakhe kwiNcwadi yeeNdumiso uthi:

₄₅Ke kaloku, besiva bonke abantu, uYesu wathi kubafundi bakhe: ₄₆“Balumkeleni abachazi-mthetho, abathanda ukuhamba ngezambatho ezide, bethanda ukuba kukhahlelwe kubo emabaleni embutho, befuna izihlalo eziphambili *ezindlwini zesikhungo, neendawo zamawonga ezidlweni. ₄₇Abo bayiphangayo imizi yabahlolokazi, baze bazenzise batsho ngemilembelele yemithandazo, ngabo abaya kufumana esona sohlwayo sikhulu.”

₁Ewaphakamisile amehlo akhe, uYesu ubone izityebi zigalela iminikelo yazo kwisikhongozeli-mali. ₂Ke wabona mhlolokazi uthile ulihlwempu efaka iimalana ezimbini; ₃waza wathi: “Ndithi kuni, inene, lo mhlolokazi ulihlwempu unikele ngaphezu kwabo bonke, ₄kuba bonke aba banikele kuThixo bethatha ebutyebini babo, kanti yena, eswele nje, unikele ngako konke abenokuphila ngako.”

₅Ke kaloku, xa abathile babethetha *ngendlu kaThixo, bencoma ukuhonjiswa kwayo ngamatye amahle nangezinto ezinexabiso, uYesu wathi: ₆“Niyazibona zonke ezi zinto? Kuya kufika imihla ekungayi kusala litye phezu kwelitye lingàdilizwa.”

₇Bambuza ke uYesu besithi: “Mfundisi, ziya kubakho nini na ezi zinto? Uya kuba yintoni na umqondiso wokuzalisekiswa kwazo?”

₈Wathi ke yena: “Lumkani ningalahlekiswa, kuba baninzi abaya kuza egameni lam; besithi banguye uKrestu, besithi ixesha lisondele. Ke nina ze ningabalandeli. ₉Xa nithe neva ngeemfazwe neziphithi-phithi, ze ningoyiki, kuba ezo zinto zimelwe kukubakho kuqala. Sona ke isiphelo asiyi kubakho kwangoko.”

₁₀Waqhuba wathi kubo: “Uhlanga luya kuvukelana nohlanga, nokumkani avukelane nokumkani. ₁₁Kuya kubakho iinyikima zomhlaba ezinkulu, kwiindawo ngeendawo kubekho indlala nendyikityha yokufa. Kuya kubakho izinto ezoyikekayo, kwanemiqondiso emikhulu evela ezulwini.

₁₂“Ngaphambi kokuba zonke ezi zinto zenzeke, baya kunibamba, banitshutshise beninikela *ezindlwini zesikhungo nasezintolongweni, nisiwe phambi kookumkani neerhuluneli ngenxa yegama lam. ₁₃Oko ke kuya kuba lithuba lenu lokungqina. ₁₄Zimiseleni ukungayicingi kwangaphambili indlela eniya kuziphendulela ngayo, ₁₅kuba mna ndiya kuninika amazwi obulumko abangayi kuba nako ukubuphikisa nokumelana nabo bonke abachasene nani. ₁₆Ke kaloku niya kunikelwa nangabazali, nangabantakwenu, nazizizalwane, nazizihlobo, kubekho nababulawayo kuni. ₁₇Niya kuthiywa ngabantu bonke ngenxa yegama lam. ₁₈Ke akuyi kutshabalala nonwele olu lwentloko yenu. ₁₉Nothi ke ngokunyamezela kwenu nibuzuze ubomi benu.”

₂₀“Xa nithe nayibona iJerusalem irhawulwe yimikhosi, yazini ukuba kusondele ukutshabalala kwayo. ₂₁Ngelo xesha mabathi abakwelakwaJuda babalekele ezintabeni, bathi abo bangaphakathi kwayo iJerusalem baphume bemke. Ke abo basemaphandleni mabangangeni eJerusalem. ₂₂Yoba yimihla yempindezelo leyo, ukuze kuzaliseke konke okubhalwe *eziBhalweni. ₂₃Hayi ke abanzima nabanyisayo ngaloo mihla! Kuya kubakho imbandezelo enkulu elizweni, ingqumbo kaThixo ibe phezu kwaba bantu. ₂₄Baya kubulawa ngekrele, bathinjwe, basiwe kuzo zonke iintlanga. IJerusalem iya kutshatyalaliswa ziintlanga de liphele ixesha lazo.”

₂₅“Kuya kubakho imiqondiso elangeni nasenyangeni nasezinkwenkwezini; emhlabeni kubekho iintlanga ezicinezelekileyo, zididekile kukugquma kolwandle namaza. ₂₆Abantu boba besifa luloyiko, bexhalabele izinto ezilifikelayo ihlabathi, kuba konke okunamandla esibhakabhakeni kodunga-dungeka. ₂₇Baya kumbona ke *uNyana woLuntu esiza ngelifu, enamandla nobuqaqawuli obukhulu. ₂₈Ke kaloku zakuqala ukubakho ezi zinto, yimani nkqo, niphakamise iintloko zenu, kuba isondele inkululeko yenu.”

₂₉Wabenzela umzekeliso uYesu, esithi: “Khangelani umkhiwane nayo yonke imithi. ₃₀Xa seyivelisa amagqabi, nithi nakukubona oko, nazi ukuba ihlobo lithwasile. ₃₁Kwangokunjalo nani, xa nithe nazibona ezi zinto zisenzeka, yazini ukuba ulawulo lukaThixo lusemnyango.

₃₂“Ndithi kuni, inene, asiyi kudlula esi sizukulwana zingadanga zenzeke zonke ezi zinto. ₃₃Liya kudlula izulu nehlabathi; ke wona amazwi am akasayi kuze adlule.”

₃₄“Zilumkeleni ke, hleze iintliziyo zenu zenziwe buthuntu buburhovu, nakukunxila, nangamaxhala obu bomi, ize loo mini inifikele ngebhaqo; ₃₅kuba iya kubafikela ngokomgibe bonke abahleliyo phezu kwehlabathi lonke. ₃₆Ke ngoko phaphamani maxa onke, nikhunga, ukuze nibe namandla okuziphepha zonke ezi zinto ziza kwenzeka, nize nibe nokuma phambi *koNyana woLuntu.”

₃₇Ke kaloku emini uYesu ebefundisa *endlwini kaThixo, athi ngokuhlwa aye kulala eNtabeni yemiNquma. ₃₈Kwakusasa bonke abantu babesiza kumphulaphula endlwini kaThixo.

₁Ke kaloku lalisondele itheko lezonka ezingenagwele, ekuthiwa *yiPasika. ₂Ke ababingeleli abaziintloko nabachazi-mthetho babefuna indlela efihlakeleyo yokumbulala uYesu, kuba babesoyika abantu.

₃Wangena ke uSathana kuJudas ekuthiwa nguSikariyoti, owayengomnye wabafundi abalishumi elinambini. ₄Wesuka waya kubhunga nababingeleli abaziintloko nabagcini *bendlu kaThixo, wacebisana nabo ngeyona nto anokuyenza ukuze babe nokumbamba uYesu. ₅Bavuya ke bona, bagqiba kwelokuba bamnike imali, ₆waza wavuma, waba soloko ezungula ukufumana ithuba lokumbambisa kungekho sihlwele.

₇Wafika ke loo mhla wesidlo sezonka ezingenagwele ekwakumele ukuxhelwa ngawo ixhwane *lePasika. ₈UYesu ke wathuma uPetros noYohane, esithi: “Hambani niye kusilungiselela iPasika.”

₉Baza bathi kuye: “Ufuna ukuba siyilungiselele phi na?”

₁₀Wathi kubo: “Khangelani, nakungena esixekweni, nodibana nomfo ophethe ingqayi yamanzi. Ze nimlandele, niye kuloo ndlu angena kuyo; ₁₁nize nithi kumnini-mzi: ‘Úthi uMfundisi: Liphi na igumbi leendwendwe apho ndingayidlela khona iPasika nabafundi bam?’ ₁₂Yena wonibonisa igumbi elikhulu eliphezulu, elinempahla yalo. Lungisani apho ke.”

₁₃Bemka, bafika kunjengoko ebetshilo kubo, baza bayilungiselela iPasika.

₁₄Lakufika ixesha, uYesu uye kuhlala etafileni enabathunywa bakhe; ₁₅waza wathi kubo: “Bendilangazelela kakhulu ukuyitya kunye nani le Pasika, ndingekabuva ubunzima. ₁₆Inene, andiyi kuba sayidla konke, de ibe izalisekile kulawulo olutsha lukaThixo.”

₁₇UYesu ke wathatha indebe, wabulela, waza wathi: “Yithatheni, nabelane ngayo. ₁₈Inene, andisayi kusela kwincindi yomdiliya lude luthwase ulawulo olutsha lukaThixo.” ₁₉Wathatha isonka ke, wabulela, wasiqhekeza, wabanika esithi: “Ngumzimba wam lo [onikelwa ngenxa yenu. Oku kwenzeleni ukundikhumbula.” ₂₀Bakugqiba ukutya wayithatha kwangokunjalo nendebe, wathi: “Le ndebe ingumnqophiso omtsha osungulwa kukuphalala kwegazi lam.]

₂₁“Kodwa, niyabona, lowo undingcatshayo ukunye nam apha etafileni. ₂₂Okunene yena uNyana woLuntu uyemka njengoko amiselweyo nguThixo; kodwa hayi ilishwa laloo mntu uNyana woLuntu angcatshwa nguye!”

₂₃Baza ke bona babuzana bodwa ukuba ngaba ngubani na kubo oza kuyenza le nto.

₂₄Ke kaloku kwabakho ukubangisana phakathi kwabafundi ngokuba nguwuphi na kubo ekunokuthiwa ngoyena mkhulu. ₂₅UYesu wathi kubo: “Ookumkani beentlanga balawula ngegqudu, kanti ke kwabona kuthiwa ngoothandabantu. ₂₆Ke nina ze ningabi njalo; omkhulu kuni makabe njengomncinci, nokhokelayo afane nokhonzayo. ₂₇Nguwuphi na kakade omkhulu: ngulowo uhleli etafileni, nokuba ngulowo uzisa ukutya etafileni? Asingulowo uhleli etafileni na? Ke mna phakathi kwenu ndinjengesicaka.

₂₈“Nina nahlala nihleli nam ekulingweni kwam. ₂₉Kwanjengokuba uBawo endinike igunya lokulawula, nam ndininika elo gunya, ₃₀ukuze nitye, nisele, etafileni yam kwikomkhulu lam, nihlale ezikhundleni zokulawula, nigweba izindlu ezilishumi elinambini zakwaSirayeli.”

₃₁UYesu wathi: “Uyabona, wena Simon, uSathana ebenibanga efuna ukunihlungula okwengqolowa, ₃₂kodwa mna ndikuthandazele ukuba ukholo lwakho lungapheli. Nawe ke, xa uthe waguquka, uze uwomeleze amakholwa.”

₃₃UPetros ke wathi kuye: “Nkosi, ndixolèlè nokuya kunye nawe entolongweni nokuba kusekufeni.”

₃₄UYesu wathi: “Inene, Petros, kothi namhlanje ingekakhali inkuku, ube wena sewukhanyele kathathu ukuba uyandazi.”

₃₅Ke uYesu wathi kubo: “Ngôkúyâ ndandinithume ningenasipaji, nangxowa yamphako, nazihlangu, nakha naswela nto na?”

Bathi ke bona: “Nento le.”

₃₆Waza wathi kubo: “Ke ngoku lowo unesipaji makasithathe, enjenjalo nonengxowa yomphako, aze nalowo ungenakrele athengise ingubo yakhe alithenge. ₃₇Inene, kuya kwenzeka kum oko kubhaliweyo *eziBhalweni kwathiwa: ‘Wabalelwa kwizaphula-mthetho,’ kuba oko kubhaliweyo ngam akunakungenzeki.”

₃₈Ke bona bathi: “Nkosi, nanga amakrele amabini.”

Waza wathi kubo: “Kwanele.”

₃₉UYesu waphuma waza ngokwesiqhelo sakhe waya eNtabeni yemiNquma. Bamlandela ke abafundi bakhe. ₄₀Akufika apho, uYesu wathi kubo: “Thandazani ukuze ningangeni ekulingweni.”

₄₁Wasuka kubo, wathi qelele, waguqa ngamadolo, wathandaza ₄₂esithi: “Bawo, ukuba uyavuma, yisuse kum le ntlungu. Noko ke, makungabi kokuthandwa ndim, makube kokuthandwa nguwe okwenzekayo.” [ ₄₃Ke kwabonakala isithunywa kuye, sivela ezulwini, simomeleza. ₄₄Edandathekile kakhulu uYesu, kwaba kukhona athandaza ngenyameko, kwada ukubila kwakhe kwangathi ngamathontsi egazi esiwa emhlabeni.]

₄₅UYesu ke waphakama ekuthandazeni, waya kubafundi bakhe, wafika belele, bedakumbile; ₄₆waza wathi kubo: “Yini na ukuba nilale? Vukani, nithandaze, ukuze ningangeni ekulingweni.”

₄₇UYesu esathandaza, kwathi gqi indimbane, ikhokelwa nguJudas, ongomnye wabafundi abalishumi elinambini. Yena wasondela kuYesu ukuba amange. ₄₈Waza uYesu wathi kuye: “Judas, umngcatsha ngokumanga na *uNyana woLuntu?”

₄₉Abo babemngqongile uYesu, bakukubona okuza kwenzeka, bathi kuye: “Nkosi, sibaxabele na ngekrele?” ₅₀Omnye kubo waxabela isicaka sombingeleli omkhulu, wasinqumla indlebe yokunene.

₅₁Waza ke uYesu wathi: “Yekani; kwanele!” Wayichukumisa indlebe yesicaka eso, yaphila.

₅₂Ke uYesu wathi kumadoda amakhulu nababingeleli abaziintloko, nabagcini *bendlu kaThixo, ababeze kumbamba: “Nindiphathele amakrele neentonga, ngathi nize esihangeni? ₅₃Bendinani imihla ngemihla endlwini kaThixo, anandibamba. Eli lithuba lenu, kuba kulawula igunya lobumnyama ngoku.”

₅₄Bembambile uYesu, bamqhuba bamsa endlwini yombingeleli omkhulu. UPetros wayelandela ekude. ₅₅Kwakubaswe umlilo eyadini, kusothiwa, noPetros ke waya kotha kunye nabo. ₅₆Isicakazana esithile simbonile uPetros ehleli ngasemlilweni, samqwalasela, sathi: “Naló ebekunye naye!”

₅₇Wakhanyela ke yena esithi: “Ntokazindini, andimazi loo mntu!”

₅₈Kwakuba mzuzwana, wabonwa ngomnye owathi: “Nawe ungowabo.”

Waza wathi uPetros: “He mfondini, andinguye!”

₅₉Malunga neyure emva koko omnye watsho eqinisekile wathi: “Inene, nalo ikwanguwabo, kuba ukwangowaseGalili.”

₆₀Wathi uPetros: “Mfondini, andazani tu nale nto uyithethayo!”

Kwathi kwangoko, esathetha, yakhala inkuku. ₆₁Yajika iNkosi, yakhangela kuPetros. Walikhumbula ke uPetros ilizwi leNkosi elithi: “Namhlanje ingekakhali inkuku, wondikhanyela kathathu.” ₆₂Waphuma phandle uPetros, watsho esikrakra.

₆₃Amadoda awayembambile uYesu, ayemenza intlekisa, emntlitha, ₆₄emgquma amehlo ambuze esithi: “Xela okubethileyo!” ₆₅Babethetha nezinye izinto ezininzi bemnyelisa.

₆₆Kwakusa yahlanganisana intlanganiso yamadoda amakhulu, nababingeleli abaziintloko, nabachazi-mthetho, uYesu bamsa entlanganisweni *yeBhunga labo, ₆₇bathi: “Ukuba wena unguye *uKrestu sixelele.”

Wathi yena kubo: “Ukuba ndithe ndanixelela aniyi kukholwa. ₆₈Nokuba ke ndithe ndanibuza aniyi kundiphendula. ₆₉Ukususela ngoku *uNyana woLuntu uya kuhlala ewongeni kwaThixo uSomandla.”

₇₀Bathi bona: “Ùnguye na uNyana kaThixo?”

Wathi kubo: “Kutsho nina ngokwenu.”

₇₁Bathi ke bona: “Sisabufunelani na obunye ubungqina? Kaloku sizivele ngokwethu amazwi akhe.”

₁Loo mpi yonke yamsa kuPilato uYesu; ₂yammangalela isithi: “Lo simfumene elahlekisa uhlanga, engavumi ukuba sirhafe *kuKhesare, esithi yena unguye *uKrestu uKumkani.”

₃UPilato ke wambuza esithi: “Unguye na uKumkani wamaJuda?”

Waphendula yena wathi: “Nawe utsho.”

₄UPilato wathi kubabingeleli abaziintloko nakwisihlwele: “Andifumani tyala kulo mntu.”

₅Kwaba kukhona bazingisayo besithi: “Údungadunga abantu, efundisa kulo lonke elakwaJuda, ukususela kwelaseGalili, kude kube lapha.”

₆Akuva kukhankanywa elaseGalili, uPilato wabuza ukuba uYesu ngowalapho na; ₇waza wathi, akuqonda ukuba ungowommandla ophethwe nguHerode, wamthumela kuHerode, owayeseJerusalem naye ngelo xesha. ₈UHerode akumbona uYesu, wavuya kunene; kwakukade efuna ukumbona, kuba wayeve kuthethwa lukhulu ngaye. Wayenqwenela nokubona umqondiso usenziwa nguYesu. ₉UHerode ke wabuza imibuzo emininzi, kodwa uYesu wathi tu. ₁₀Baphakama ababingeleli abaziintloko nabachazi-mthetho, bamtyhola ngolunya uYesu. ₁₁UHerode nempi yakhe bamenza into engento uYesu, behlekisa ngaye, bemthe wambu ngengubo eqaqambileyo, waza uHerode wambuyisela kuPilato. ₁₂Ngaloo mini baba zizihlobo uPilato noHerode, kuba babefudula bejongene ngezikhondo zamehlo.

₁₃Ke kaloku uPilato wababizela ndawonye ababingeleli abaziintloko nabaphathi bamaJuda, nabantu, ₁₄wathi kubo: “Nizise lo mntu kum nisithi udungadunga abantu. Ke ndimncinile phambi kwenu, ndaza andafumana tyala kuye kwezo zinto nimmangalela ngazo. ₁₅NoHerode akafumananga tyala kuye, kuba naku embuyisela kum. Niyabona, akukho nto ayenzileyo ingabangela ukuba afe. ₁₆Ndothi ke ngoko ndimbethe, ndimkhulule.”

[ ₁₇Ke kaloku ngetheko *lePasika wayedla ngokubakhululela umbanjwa abe mnye.] ₁₈Bankqangaza ke bonke besithi: “Mbulale lo, usikhululele uBharabha!” ₁₉UBharabha lo wayephoswe entolongweni ngenxa yesiphithi-phithi esithile esabakho esixekweni apho, kwanangokubulala.

₂₀Waphinda ngoko uPilato wathetha nabo, efuna ukumkhulula uYesu. ₂₁Kodwa bona bankqangaza besithi: “Mbethelele! Mbethelele emnqamlezweni!”

₂₂UPilato wathi kubo okwesithathu: “Ngoba enze bubi buni na? Andifumani tyala lingabangela ukuba afe. Ndothi ngoko ndimbethe, ndimkhulule.” ₂₃Bamxina ke uPilato, bekhwaza ngamandla, becela ukuba uYesu abethelelwe emnqamlezweni. Kwema ngabo ke. ₂₄Wasuka uPilato wagweba ngelithi masenziwe isicelo sabo. ₂₅Wabakhululela lowo babemcela, owayethe ngenxa yesiphithi-phithi nokubulala waphoswa entolongweni. Ke yena uYesu wanikelwa ukuba kwenziwe kuye ngokwesicelo sabo.

₂₆Kwemkiwa ke noYesu, aza amajoni athi xhakamfu Simon uthile waseKirene, owayevela emaphandleni, awubeka phezu kwakhe umnqamlezo, ukuba awuthwale emva koYesu.

₂₇Wayelandelwa yinto eninzi yabantu, kukho nabafazi ababesenza isijwili, bemlilela. ₂₈Ejikile ke uYesu, wabakhangela, wathi: “Zintombi zaseJerusalem, sanukundililela mna; koko zilileleni nina nabantwana benu; ₂₉kuba, niyabona, iyeza imihla ekuya kuthiwa ngayo: ‘Banoyolo abangazalanga, abangancancisanga mntwana.’ ₃₀Ngelo xesha baya kuthi ezintabeni: ‘Siweleni, nisifihle!’ ezindulini bathi: ‘Sigqumeleleni!’ ₃₁Xa utsha kangaka umthi oluhlaza, kobeka phi ke kowomileyo?”

₃₂Amadoda amabini, awayezizihange, ayeqhutywa esiya kubulawa kunye noYesu. ₃₃Bakufika kuloo ndawo kuthiwa luKhakhayi, bambethelela emnqamlezweni khona apho uYesu, bezibethelela kwanezihange ezo, esinye ngasekunene, nesinye ngasekhohlo. ₃₄UYesu wathi: “Bawo, baxolele, kuba abayazi into abayenzayo.”

Baza benza *amaqashiso, besabelana ngeengubo zakhe. ₃₅Abantu babebonela, abaphathi bamaJuda bemgculela, besithi: “Wabasindisa abanye; makazisindise ke naye, ukuba unguye *uKrestu, umnyulwa kaThixo.” ₃₆Ayemphoxa ke namajoni, esiza asondeze iwayini emuncu kuye, ₃₇esithi: “Ukuba wena unguye uKumkani wamaJuda, zisindise.”

₃₈Kwakubhalwe nombhalo wetyala lakhe phezulu emnqamlezweni, kwathiwa: “Lo nguKumkani wamaJuda.”

₃₉Esinye isihange kwezo zazixhonywe kunye noYesu, sasimnyelisa, sisithi: “Akunguye na uKrestu? Zisindise ke, nathi usisindise.”

₄₀Sasikhalimela esinye, sisithi: “Akumoyiki na wena uThixo, ukwawiselwe esi sigwebo nje? ₄₁Esi sigwebo okunene sisifanele thina, kuba sivuzwa ngezenzo zethu; kodwa yena lo akenzanga nto imbi.” ₄₂Saza sathi kuYesu: “Uzundikhumbule, Yesu, xa uthe weza kulawula.”

₄₃UYesu wathi kuso: “Ndithi kuwe, inene, kwanamhlanje uya kuba nam emyezweni wakwaThixo.”

₄₄Ke kaloku kwakumalunga nentsimbi yeshumi elinambini emini, laza lasuka latshona emini ilanga, kwaba mnyama phezu kwawo wonke umhlaba, kwada kwayintsimbi yesithathu emva kwemini. ₄₅Ikhuselo legumbi eliyingcwele *yendlu kaThixo lakrazuka kubini. ₄₆Wadanduluka ke uYesu ngezwi elikhulu, wathi: “Bawo, ndiyawunikela ezandleni zakho umoya wam!” Akuba etshilo, waphuma umphefumlo.

₄₇Ke umphathi-butho wamajoni, akukubona okuhlileyo, wamncoma uThixo, esithi: “Inene, lo mntu ebelilungisa.”

₄₈Sakuba isihlwele esasihlangene kuloo mbono sikubonile okwenzekileyo, sagoduka sibambelele ezidleleni. ₄₉Ke bonke abazana noYesu, kwanabafazi ababemlandela bevela kwelaseGalili, babemele kude, bezikhangele ezi zinto.

₅₀Ke kwakukho indoda egama linguJosefu, eyayililungu leBhunga, iyindoda elungileyo elilungisa. ₅₁Yona yayingavumelananga necebo labo kwanesenzo sabo. Le ndoda yaseArimati, idolophu yamaJuda, yayilulindele ulawulo lukaThixo. ₅₂Yona ke yaya kuPilato, yawucela umzimba kaYesu; ₅₃yaza yawuthula, yawusongela ngengubo yelinen, yawubeka engcwabeni elixholwe eliweni, ebekungekangcwatywa bani kulo. ₅₄KwakungoLwesihlanu, *uMhla wokuPhumla sewusondela.

₅₅Abo bafazi bàbelandela uYesu, bephuma eGalili, bâlandela uJosefu, balibona ingcwaba nomzimba kaYesu ubekwa kulo; ₅₆baza babuya, balungisa iziqholo nezithambiso.

Baphumla ke ngoMhla wokuPhumla ngokomthetho.

₁Kwakusekusasa ngeCawe ukunduluka kwâbo bafazi besiya engcwabeni, bephethe iziqholo ababezilungisile. ₂Balifumana ilitye liqengqiwe, lisusiwe engcwabeni. ₃Bakuba bengenile, abawufumananga umzimba weNkosi uYesu. ₄Kwathi, besakhohliwe yile nto, kwathi gqi amadoda amabini ngakubo, enezambatho ezibengezelayo. ₅Basuka boyika abafazi, baqondela phantsi, aza athi loo madoda: “Yini na ukuba ophilayo nimfune kwabafileyo? [ ₆Akakho apha, uvukile.] Khumbulani awakuthetha kuni esekwelaseGalili, ₇esithi: ‘*UNyana woLuntu umelwe kukunikelwa ezandleni zaboni, abethelelwe emnqamlezweni, athi ngomhla wesithathu abuye avuke.’ ”

₈Bawakhumbula ke amazwi akhe. ₉Bebuyile engcwabeni abafazi abo bazixela zonke ezo zinto kubafundi abalishumi elinanye nakubo bonke abanye. ₁₀YayinguMariya waseMagadala, noYohana, noMariya unina kaYakobi, nabanye abafazi ababenabo, abazixeláyo ezi zinto *kubathunywa. ₁₁Kubafundi oku kuthethwa ngaba bafazi kwaba ngathi kukulavuza, baza abakholwa. [ ₁₂Kodwa yena uPetros usuke wabaleka, waya engcwabeni, wathi akukhangela, wabona ingubo yelinen iyodwa, waza wagoduka emangalisiwe koko kwenzekileyo.]

₁₃Kwangaloo mini kwasuka abafundi ababini baya e-Emawusi, idolophana emalunga neekhilomitha ezilishumi elinambini ukusuka eJerusalem. ₁₄Babethetha ngako konke okwakuthe kwenzeka. ₁₅Kwathi besathetha bebuzana, uYesu ngenkqu wasondela wahamba nabo, ₁₆kodwa bembona nje, kwasitheliswa kubo ukuba bamnakane. ₁₇UYesu ke wathi kubo: “Zizinto zini na ezi nihamba nincokola ngazo?”

Bema ke bematshekile; ₁₈waza waphendula omnye, lo ugama linguKleyopa, wathi kuye: “Nguwe kuphela na kwababekho eJerusalem ongazaziyo izinto ezenzeke khona kwezi ntsuku?”

₁₉Wathi kubo: “Zinto zini na?”

Bathi bona kuye: “Ezo zingoYesu waseNazarete, *owayengumshumayeli onamandla amakhulu ekwenzeni imiqondiso nasekuthetheni, engqinelwa nguThixo nangabo bonke abantu. ₂₀Ababingeleli abaziintloko nabaphathi bethu bamnikela ukuba agwetyelwe ukufa, waza wabethelelwa emnqamlezweni. ₂₁Ke thina besithembe ukuba nguye owokhulula uSirayeli. Kunjalo nje namhlanje lusuku lwesithathu zenzekile ezo zinto. ₂₂Kanti abafazi abathile beqela lethu, abathe baya engcwabeni kwakusasa, basothusile, ₂₃kuba bengawufumani umzimba wakhe, babuye besithi babone umbono wezithunywa ezithi uyaphila. ₂₄Basuka nabanye bethu, baya engcwabeni, bafika kunjengoko babetshilo abafazi. Ke yena abambonanga.”

₂₅Waza uYesu wathi kubo: “Ninje na kanti ukungaqondi! Nithatha kade kangaka na ukukholwa kuko konke abâkuthetháyo *abashumayeli! ₂₆*UKrestu ebengamelwe na kukuthi abuve obu bunzima, aze anyuselwe ewongeni?” ₂₇Wabachazela kuzo zonke *iziBhalo iindawo ezithetha ngaye, eqalela kwiincwadi zikaMosis, waya kutsho kuzo zonke ezabashumayeli bamandulo.

₂₈Basondela ke kuloo dolophana babesiya kuyo, wanga uYesu uyagqitha; ₂₉baza bona bamcela besithi: “Hlala nathi, kuba kuyahlwa, nemini seyimkile.” Wangena ke ukuba ahlale nabo. ₃₀Wathi, esetafileni kunye nabo, wathatha isonka, wabulela, wasiqhekeza, wabanika. ₃₁Aqabuka amehlo abo, bamazi. Wathi shwaka yena kubo. ₃₂Baza bathi omnye komnye: “Iintliziyo zethu bezingavuthi na luvuyo xa ebethetha nathi endleleni esityhilela iziBhalo?”

₃₃Besuka kwangelo lixa, babuyela eJerusalem, babafumana abafundi abalishumi elinanye behlanganisene ndawonye kunye nâbo babenabo, ₃₄besithi: “Inene, iNkosi ivukile! Ibonakele kuSimon.” ₃₅Bakubalisa ke okwenzeke endleleni, nokutyhileka kweNkosi kubo xa yayiqhekeza isonka.

₃₆Ke kaloku, besazithetha ezi zinto, uYesu ngenkqu wema phakathi kwabo, [wathi kubo: “Uxolo malube nani.”]

₃₇Basuka bankwantya, baba babona into engengomntu ncam. ₃₈Wathi kubo: “Yini na ukuba nothuke? Kutheni na ukuba nibe nentandabuzo? ₃₉Khangelani izandla zam, niqonde ukuba ndim kanye. Ndiphatheni niqondisise ukuba ndingumntu, ndinenyama namathambo, njengoko nindibona ndinjalo.” [ ₄₀Etshilo wababonisa izandla neenyawo zakhe.]

₄₁Ke kaloku, bâthi bengekakholwa, bemangalisiwe bevuya, wathi kubo: “Ninanto ityiwayo na apha?” ₄₂Bamnika intwana yentlanzi eyojiweyo, ₄₃wayithatha, wayitya bejongile.

₄₄UYesu ke wathi kubo: “Zizo ezi izinto endazithethayo kuni ndisenani, ndisithi zimelwe kukuzaliseka zonke izinto ezibhaliweyo ngam *emthethweni kaMosis, nasezincwadini *zabashumayeli, nasezindumisweni.”

₄₅Waza ke wazikhanyisela iingqondo zabo, ukuze baziqonde *iziBhalo; ₄₆wathi kubo: “Kubhalwe kwathiwa *uKrestu umelwe kukuthi eve ubunzima, abuye avuke kwabafileyo ngomhla wesithathu. ₄₇Kukwabhalwe kusithiwa zothi egameni lakhe zivakaliswe kuzo zonke iintlanga iindaba zenguquko noxolelo lwezono, kuqalelwa eJerusalem. ₄₈Nina ke ningamangqina ezi zinto. ₄₉Niyabona, mna ndilinika nina idinga likaBawo. Ze nihlale ke eJerusalem nide nixhotyiswe ngamandla avela phezulu.”

₅₀UYesu ke waphuma nabafundi bakhe, wabasa ngaseBhetani; waza waphakamisa izandla zakhe, wabasikelela. ₅₁Kwathi esabasikelela, wahlukana nabo, [wanyuswa wasiwa ezulwini]. ₅₂Ke bona [bakuba bequbudile,] babuyela eJerusalem benovuyo olukhulu; ₅₃baza basoloko bekho *endlwini kaThixo, bembonga uThixo.