To The Word – Day 72

₂Akwaba ubungakhe undiphuze,

undincamise ngaloo mlomo!

Aluyole ngako uthando lwakho;

luhlasimlisa ngaphezu kwayo newayini!

₃Isiqholo sakho sithi ndirhogole,

negama lakho lifuz' eso siqholo.

Yiyo le nto iintombi zithe phithi nguwe!

₄Khawulezisa, ndithathe simke!

Masiye entangeni yakho, kumkani!

Siya kugcoba sivuye ngawe!

Uthando lwakho luyancomeka ngaphezu kwewayini;

iintombi zifanele ukuthi phithi nguwe.

₅Ewe, zintombi zaseJerusalem,

ndingunomdakazana, kodwa ndinomkhitha

oku kweentente zaseKedare nemikhusane kaSolomon.

₆Ndingade ndibe ngunomdakazana kodwa noko ke sukundidela;

ndifiphele nje kungenxa yelanga.

Oonyana bakama basuka bandiqumbela,

baza bandenza umgcini wesidiliya,

ndaza mna siqu ndaziyekelela.

₇Khawutsho ke, sithandwa sam,

ngaba walusela phi kakade?

Ziphumla phi iigusha zakho emini?

Ngani ukuba ndibe ngogqubutheleyo

ndikufune phakathi kwemihlambi yezihlobo zakho?

₈Awazi na kakade, nzwakazindini egqwesileyo?

Hayi ke, landela umzila weegusha,

uye kwalusa amatakane eebhokhwe kufutshane neentente zabelusi.

₉Hayi ke wena, sithandwa sam, usuke wafana nethokazi lehashe

elitsala inqwelo yokumkani waseJiputa.

₁₀Azizihle ngako ezo zidlele ziphahlwe ngaloo macicikazi,

naloo ntamo yakho ivathiswe ngamaso.

₁₁Ndokwenzela amacici egolide aqhoqhonywe ngesiliva.

₁₂Ukumkani uthe esangqengqile ngasetafileni yakhe,

isiqholo sam satsho ngevumba elimyoli.

₁₃Isithandwa sam ngathi yingxowana yesiqholo semore

esithe nca phakathi kwamabele am.

₁₄Isithandwa sam ngathi sisipha seentyatyambo zehena,

ezo zezidiliya zase-Engedi.

₁₅Waza wamhle, sithandwa sam!

Ewe, uyinzwakazi ke khona!

Amehlo – hotyazana lakwabani!

₁₆Ewe, uyinzwana ke khona, sithandwa!

Hayi, umtsalane wakho!

Umandlalo wethu uluhlaza yaka!

₁₇Indlu yethu itsho ngemiqadi yemisedare,

ngaphakathi yambathiswe ngemipayini.

₁Ndiyintyatyambo yaseSharon,

inyibiba yasentilini.

₂Njengenyibiba phakathi kwameva

sinjalo isithandwa sam phakathi kweentombi.

₃Njengomthi weeapile ehlathini

sinjalo isithandwa sam phakathi kwabafana.

Akwaba bendingahlala emthunzini wawo;

azimnandi ngako iziqhamo zawo!

₄Wandingenisa endlwini yombhiyozo,

wandiphakamisela intshinga yothando.

₅Ndomeleze ngesixa seerasentyisi,

kananjalo undihlaziye ngeeapile.

Kaloku ndiyafa luthando.

₆Isandla sakhe sasekhohlo sixhasa intloko yam,

esokunene sona siyandiwola.

₇Zintombi zaseJerusalem, ndiyanifungisa

ngamabhadikazi namanxalakazi asendle:

Sanukuluxhokonxa ningaluphembeleli uthando;

luyekeni lude luzivukele ngokwalo.

₈Khanive, sisithandwa sam eso!

Awu, naso ke sisiza:

siza siqakatha ezintabeni;

siyatsiba-tsiba ezindulini phaya.

₉Isithandwa sam ngathi linxala,

sona sinjengetakane lebhadi.

Naso simi emva kodonga lwakowethu,

silolonga efestileni,

sinyondla, sikroba emkhusaneni.

₁₀Isithandwa sam sibhekisa kum, sisithi:

“Vuka kaloku, sithandwa sam.

Awu, uyinzwakazi ke khona!

Yiza kaloku, masihambe.

₁₁Kaloku bona ubusika budlule,

kananjalo neemvula zigqithile.

₁₂Iintyatyambo ziqhakazile elizweni;

ligalelekile ixesha lokuntyiloza.

Nâlo ihobe lidumzela;

ewe, liyavakala kweli lakowethu.

₁₃Ngoku namakhiwane okuqala ayavuthwa;

ukudubula kwesidiliya kutsho ngesiqholo.

Phakama uze, sithandwa.

Ewe, nzwakazi yam,

yiza kaloku, masihambe!”

₁₄Uyintw' engathi lihotyazana

lithe nca ezimfanteni zamawa;

nditsho elizimela ezintabeni.

Vela kaloku ndikubone,

ukuze ndive nelo lizwi;

nditsho elo liyole kunene.

Ubuso bakho buthi ndijonge!

₁₅Khawusibambele ezo mpungutye;

ewe, iimpungutyana ezincinci,

kuba ziyazonakalisa izidiliya,

kanti izidiliya zethu zityatyambile.

₁₆Isithandwa sam sesam,

kanti nam ngokwam ndingowaso.

Sona salusa phakathi kweenyibiba.

₁₇Ide ke isangane imini,

ke wona amathunzi anabe,

jika ubuye, sithandwa sam.

Ewe, khawube njengenxala;

khawuxel' ithole lebhadi

kuloo mixawuka yeentaba.

₁Ubusuku bonke emandlalweni wam

ndahlala ndimlindele olangazelelwa yintliziyo yam;

ndaba ngamjonga kodwa andamfumana.

₂Ndosuka ndivuke ndihamba-hambe esixekweni,

ndijikeleze ezitalatweni nasemabaleni;

ndomzingela lowo ulangazelelwa yintliziyo yam.

Ewe, ndaba ngathalaza andamfumana.

₃Ke bona abalindi bandibhaqa;

bona babehamba-hamba bejikeleza isixeko:

“Ngaba khange nisibone isithandwa sam?”

₄Ukubanje ndahlukane nabo

suka ndagaxeleka kuye ndamfumana.

Hayi ke, ndambamba andamyeka,

ndaza ndaya naye endlwini kamama,

kwigumbi lalowo ndakhawulwa nguye.

₅Zintombi zaseJerusalem, ndinifungisa

amanxala namabhadi asemathambekeni:

Sanukuluxhokonxa ningaluphembeleli uthando;

luyekeni lude luzivukele ngokwalo.

₆Ngubani na lo uthi gqi entlango,

lo ngathi ngumqulu womsi?

Nditsho lo uqholwe ngesiqhumiso nentlaka

esiphuma kwiziqholo zabarhwebi.

₇Tyhini, yinqwelo kaSolomon!

Ukhatshwa ngamashumi amathandathu amajoni,

ezona ngcungela zamagorha akwaSirayeli.

₈Onke agaxel' amakrele;

onke ngoompondo zihlanjiwe emfazweni.

Ngalinye lixakath' ikrele;

selilungel' izigigaba zobusuku.

₉Ukumkani uSolomon uzenzele inqwelo,

eyenza ngamaplanga omthi waseLebhanon.

₁₀Iintsika zayo zityatyekwe ngesiliva,

amazantsi ayo atyatyekwa ngegolide.

Isihlalo sona sênziwa ngelaphu elimsobo;

umphakathi ke wona uthungwe ngobunono

zezo ntombi zaseJerusalem.

₁₁Phumani, zintombi zaseZiyon;

khanikhangele nimbone ukumkani uSolomon.

Nanko ethwele isithsaba sobukhosi,

eso wasithweswa ngunina

mhla zawelan' iindonga,

mhla intliziyo yakhe yaphuphuma luvuyo!

₁Awu ke wena, sithandwa sam, awusemhle ngako –

uyinzwakazi enomkhitha!

Loo mehlo angaphaya kwesigqubuthelo

nqwa namahotyazana;

iinwele ngathi ngumhlambi weebhokhwe

xa zisihla kwiintaba zaseGiliyadi.

₂Loo mazinyo amhlophe qhwa,

ngathi ziigusha ezisand' ukuchetywa,

kanye xa zigqityw' ukuhlanjwa.

Onke asenamaqabane awo,

akukho lingumth' uzimele.

₃Imilebe ngathi ngumty' obomvu;

hay' ukuthandeka kwaloo mlomo!

Izidlele ngathi ngamaqhekez' erharnati,

ngaphaya kweso sigqubuthelo.

₄Ntamo ngathi yinqaba kaDavide,

yona yakhiwe ngezintlu zamatye;

ithiwe gaxa ezo ntsimbi,

ngathi liwaka lamakhaka amagorha.

₅Loo mabele ngathi ngamatakane amabini;

nditsho amawele ebhadi,

ethuku-thukuza phakathi kweenyibiba.

₆Ide ke isangane imini,

ke wona amathunzi anabe,

ndohamba-hamba kwiintaba zesiqholo semore,

ndijikeleze kwiinduli zentlaka yesiqhumiso.

₇Awumhle ngako, sithandwa sam!

Umhle ngenene, awunasiphako!

₈Masihle eLebhanon, mtshakazi wam;

ewe, masihle eLebhanon.

Masihle kwincopho yeAmana,

nditsho kumalenga-lenga eSenire,

incopho yentaba iHermon,

apho zinezikhundla zazo iingonyama,

apho zihlala khona izingwe.

₉Ewe, uyithimbile intliziyo yam;

nditsho wena, mtshakazi wam, dad' ethu.

Ngenene intliziyo yam uyibile

ngokundithi krwaqu kanye ngaloo mehlo akho,

nangomxokelelwane nje omnye entanyeni yakho.

₁₀Awu, ndithe swii nguwe, mtshakazi wam, dad' ethu!

Uthando lwakho lundanelisa ngaphezu kwewayini;

nevumba lamafutha akho lingaphezulu kwazo zonke iziqholo.

₁₁Imilebe yakho, mtshakazi wam, ithontsiza incindi;

phantsi kolwimi lwakho lubisi nobusi.

Ivumba lezambatho zakho

ngathi livumba laseLebhanon.

₁₂Mtshakazi wam, dad' ethu,

wena ungumyezo ofihlakeleyo,

ngathi ungumjelo obiyelweyo,

umthombo ovingcelweyo.

₁₃Izityalo zakho ngathi ngumyezo weerharnati;

umyezo oziqhamo zizezodidi:

ihena nenadusi ngokwayo.

₁₄Ewe, ikho inadusi nesafroni,

okuziikalamo noozisinamoni,

iintlobo-ntlobo zemithi yentlaka yesiqhumiso.

Asisathethi ke ngemore nekhala

nezona-zona ndidi zeziqholo.

₁₅Ngumyezo onkcenkceshwa yimithombo;

nditsho imithombo empompozayo,

imithombo enkcenkceza kwiintaba zeLebhanon.

₁₆Vumbuluka, moya wasentla;

vuthuza, moya wasezantsi!

Phepheza emyezweni wam,

ivumba lawo litsho lithi saa!

Masingene emyezweni waso isithandwa sam,

singcamle ezona ziqhamo.

₁Ndingenile emyezweni wam, mtshakazi wam, dad' ethu.

Ndiyifumene imore nezinye iziqholo,

ndiyityile incindi nobusi,

ndilusele ubisi newayini.

Yityani nisele, nina zihlobo!

Ewe, selani nide nincitheke, nina bathandanayo.

₂Bendilele, kodwa ingqondo yam iphaphile.

Nâso isithandwa sam sinkqonkqoza sisithi:

“Ndingenise kaloku, sithandwa sam, dad' ethu,

hobe lam, cikizwa wam.

Intloko yam imanzi ngumbethe,

neenwele zam ngamathontsi asebusuku.”

₃Awu, sendikhulule nje!

Uthi mandinxibe kwakhona?

Sendizihlambile neenyawo.

Uthi mandizingcolise kwakhona?

₄Isithandwa sam solula isandla kwikroba lokuvula,

yatsho yabetha intliziyo yam ngenxa yaso.

₅Ndavuka ndisiya kuvulela isithandwa sam,

izandla zam zivuza isiqholo semore,

neminwe imanzi kwasiso.

Ndasichukumisa ndinjalo isitshixo,

₆ndasivulela isithandwa sam.

Kodwa phi kwaphi, sasimkile nje!

Benditsho ndasilangazelela sakuthetha,

ndaba ngathalaza andasibona,

ndaba ngamemeza, tu impendulo!

₇Ndade ndabhaqwa ngabalindi

kwimijikelo yabo esixekweni.

Hayi ke, bandibetha bandenzakalisa.

Nâbo besimka nengubo yam

abo bagada iindonga zesixeko.

₈Zintombi zaseJerusalem, ndiyanifungisa:

Apho nisibone khona isithandwa sam

ze nisixelele ukuba ndiyafa luthando!

₉Nzwakazi yeenzwakazi,

sibhetele ngani esakho isithandwa?

Ngaba siyabedlula na abanye,

le nto ude usifungise ngolu hlobo?

₁₀Isithandwa sam yinzwana ekomelela;

songama nakwishumi lamawaka.

₁₁Intloko yaso yeyona golide,

iinwele sisihlwitha esimfaneleko,

zimnyama ngathi lihlungulu.

₁₂Yintw' emehlo ngathi lihobe

xa lisemithonjeni yamanzi.

Ngathi ahlanjwe ngobisi,

ahonjiswa okwamatye exabiso.

₁₃Izidlele ngathi ngumhlatyana wezityalo

ovelisa iziqholo ezivumba limyoli.

Imilebe ngathi yinyibiba,

yona ivuza isiqholo semore.

₁₄Yintw' engalo ngathi ziintonga zegolide

eziqhoqhonywe ngamatye exabiso.

Umzimba ugude njengebamba lendlovu,

uqhoqhonywe ngamatye esafire.

₁₅Yintw' emilenze ngathi ziintsika zemabhule

ezimiliselwe kwizikhondo zeyona golide.

Yingwanyalala ngathi ziintaba zeLebhanon

naloo misedare ingayiwayo.

₁₆Hay' ukuyola komlomo wakhe;

ngenene isithandwa sam sinomtsalane.

Sinjalo ke esam isithandwa,

zintombi zaseJerusalem!

₁Nzwakazindini etshatsheleyo,

siye ngaphi isithandwa sakho?

Ngaba sibhekise ngaphi,

khon' ukuze nathi sikufunise?

₂Simke saya emyezweni waso,

apho kutyalwe iziqholo khona.

Sizalusele khona emyezweni,

kananjalo siqokelela iinyibiba.

₃Isithandwa sam sesam, nam ndingowaso;

salusela phakathi kweenyibiba.

₄Awu, waza wamhle, sithandwa sam!

Uyinzwakazi okwesixeko iTiza;

umhle nqwa neJerusalem;

unesihomo ngathi ngumkhosi onendwe.

₅Hayi, musa ukundijonga;

amehlo akho ayandongamela.

Iinwele ngathi ngumhlambi weebhokhwe

zisihla kuloo mixawuka yaseGiliyadi.

₆Amazinyo amhlophe qhwa,

ngathi ziigusha zivela kuhlanjwa.

Onke asenamaqabane awo;

akukho lingumth' uzimele.

₇Izidlele ngaphaya kwesigqubuthelo

ngathi ngamacala erharnati.

₈Amakhosikazi ngamashumi amathandathu,

amaqadi ngamashumi asibhozo,

ngokunjalo nentaphane yeentombi,

₉ke mna andiziva ngehobe lam,

yena cikizwa wam onguye qwaba!

Nguyedwazana kanina,

yena ngumathandwa walowo umzeleyo.

Zonk' iintombi ziyamdumisa zakumbona;

unconywa ngamakhosikazi namaqadi.

₁₀Ngubani lo uthi gqi ngathi ngumso,

omkhitha ngathi yinyanga,

oqaqambe ngathi lilanga,

ondili ngathi ziinkwenkwezi zingumngcelele?

₁₁Ndihle nday' emyezweni wemithi yeenati,

ndaya kubuka izityalo entilini.

Ndiye kukhangela ukuba imidiliya iyadubula na,

nokuba ngaba imirharnati iyatyayamba na.

₁₂Ndithe ndingaqondi ndazibhaqa

sengathi ndilitshawe lamatshawe,

ndiphethe iinqwelo zokulwa zabantu bakowethu.

₁₃Buya, buya, mShulemikazi!

Buya, buya, ukuze sikubone!

Nobona ntoni na kakade kumShulemikazi

lo gama angqungqayo phakathi kwemikhosi?

₁Azintle ngako ezo nyawo zisezimbadadeni,

nditsho wena ke, nkosazanandini.

Naloo milenze ngathi ziintsimbi zokuhombisa,

ngathi yenziwe zizandla zengcibi.

₂Inkab' engqukuva ngathi yingqayi

ehlal' inewayini exutyiweyo.

Isisu ngathi yingqumba yengqolowa,

yona ijikelezwe ziinyibiba.

₃Amabele ngathi ngamawele,

nditsho amatakane enxala.

₄Intamo injengenqaba yamabamb' endlovu.

Amehlo anjengamachibi aseHeshbhon,

lawo angasesangweni leso sixekokazi.

Impumlo ngathi yinqaba yaseLebhanon,

leyo ikhangelene neDamasko.

₅Intloko ithe cwa, ngathi yintaba iKarmele.

Iinwele ngathi lilaphu elimfusa –

buhle bazo buthimba nokumkani.

₆Yeka loo mfaneleko, awumhle ngako!

Uthando lwakho luyahlasimlisa.

₇Yintw' eluthi ngathi lisundu,

emabele ngathi zizihloko zeediliya.

₈Ndosuka nditsiwule kwelo sundu,

ndiqhawule kwezo ziqhamo.

Amabele ngathi zizihloko zediliya;

umphefumlo wakho livumba leeapile;

₉umlomo ngathi yeyona wayini.

Loo wayini mayiginywe sisithandwa sam,

igqithe kuloo milebe naloo mazinyo.

₁₀Mna ndingowesithandwa sam;

naso ke siyandilangazelela.

₁₁Yiza, sithandwa, siye emaphandleni,

siye kulala ezilalini,

₁₂sivuke kwanini, siye ezidiliyeni,

ukuze sihlole ukudubula kwazo,

sibone ukuba azikatyatyambi na,

siqonde nokudubula kwemirharnati.

Khona ndokuvava ngothando.

₁₃Wofumana ivumba lemithuma

nezimuncu-muncu zeziqhamo zisemnyango,

nditsho ezidala nezitsha,

ndizigcinele wena, sithandwa sam!

₁Akwaba ubungumnakwethu,

nditsho owancanca kumama.

Bendiya kukuncamisa naphandle phaya,

ndize ndingagxekeki noko.

₂Bendiya kukukhokela

ndikuse endlwini kamama,

yena wandifundisayo,

ndikuseze iwayini edidiyelwe ngezinongo

nencindi yeerharnati zam.

₃Isandla sakho sasekhohlo besiya kuxhasa intloko yam,

esokunene sona sindiwole.

₄Zintombi zaseJerusalem, ndiyanifungisa:

sanukuluxhokonxa ningaluphembeleli uthando;

luyekeni lude luzivukele ngokwalo.

₅Ngubani lo uvela ngasentlango,

uqhogene nesithandwa sakhe?

Ndakuvusa phantsi kom-apile,

apho wakhawulwa khona ngunozala wakho,

apho waba nenimba khona owakuzalayo.

₆Mayibe ndim kuphela osentliziywemi yakho oku komsesane wokutywina;

ewe, mandibe ngumsesane wokutywina engalweni yakho.

Lent' uthando lunamandla nqwa nokufa;

ikhwele lalo aliqheliseli oku kwengcwaba.

Ludangazela ngathi lidangatye,

luvuthe ngathi ngumlilokazi.

₇Alungecinywa nangamanzi;

alukhukuliseki naziimpuphuma.

Xa unokulithenga ngobutyebi bonke bendlu yakho

ungasuka ube sisigculelo.

₈Thina sinodade wethu;

akakantshuli namabele.

Kambe, singamenzela ntoni mhla acelwayo?

₉Ukuba ke ebeludonga

ngesimakha abe yinqaba yesiliva.

Nokuba ngaba ebelisango

ngesimkhusela ngemivalo yomsedare.

₁₀Ewe, mna ndiludonga;

la mabele ziinqaba.

Yiloo nto emehlweni akhe

ndingulowo umphathela ukwaneliseka.

₁₁USolomon unesidiliya eBhali-hamon;

uqeshise ngaso kubalimi.

Ngeziqhamo zaso bayarhuma:

liwaka leengqekembe zesiliva.

₁₂Esam isidiliya sesam ke!

Iwaka lesiliva lelakho, Solomon.

Amakhulu amabini ngawabaqeshi.

₁₃Wena ohlala emiyezweni,

osoloko engqongwe zizihlobo,

mandilive ilizwi lakho.

₁₄Xhabasha, sithandwa sam!

Yiba ngathi ulinxala,

ube ngathi ulitakane lebhadi

kwezo ntaba zeziqholo.