To The Word – Day 53

₁Khanibek' iindlebe, mazulu, ndithethe;

khawuthi cwaka, mhlab', uphulaphule.

₂Imfundiso yam iza kuchaphaza njengemvula,

itshone njengombeth' emhlabeni,

amazwi am awe njengomkhumezelo phezu kohlaza,

abe njengomvimbi phezu kotyani.

₃Kaloku ndiza kulibhengez' igama *likaNdikhoyo;

ke nina bubabazeni ubukhulu bukaThixo wethu.

₄YiNgxondorha emsebenz' ufezekileyo;

iindlela zakhe bubulungisa bodwa;

uThixo othembekileyo enyanisekile,

yena lilungisa elingenakumbi.

₅Kambe ke nina nigwenxa,

ngoko ke ngenxa yokubhatyaza kwenu

aniselulo usapho lwakhe,

sizukulwanandini sigoso sinxaxhileyo!

₆Ngani ukuba nimphathe kanj' uNdikhoyo,

zidengendini zabantu ezingaqiqiyo?

Kaloku yena nguYihlo noMdali wenu;

nguye owanenzayo waza wanibonelela.

₇Khanibuzise niqonde ngezamandulo;

khaniphande nive ngezizukulwana ezadlulayo.

Amanyange wona aya kunibalisela;

amadod' amakhulu aya kunichubela.

₈Xenikweni uPhezukonke wazabela ilifa izizwe;

yena wabahlula-hlula oonyana babantu,

waza izizwe wazimisela imida yazo

ngokobungakanani boonyana bakaSirayeli.

₉Ke yona inxaxheba kaNdikhoyo luhlanga lwakhe.

Ewe, uYakobi sisabelo sakhe.

₁₀Wambhaqa kwimpengempenge yentlango,

kwinkangala egxwala amarhamncwa,

waza wamchola, wampelesa,

wamkhusel' okokhozo lweliso lakhe,

₁₁njengokhozi lukhusela amantshontsho alo,

lundanda luwathwale ngaloo maphiko alo,

xa luwakhupha endlwini yalo.

₁₂Ewe, uNdikhoyo wamkhokela yedwa

kungekho *thixo ungomnye umncedisayo.

₁₃Wamqabelisa imimango enyukayo,

wayixhamla imveliso yelizwe;

watya ubusi emaweni,

waza umnquma wavelisa elulwalweni.

₁₄Iimazi zeenkomo nezeebhokhwe yayiziintsengwanekazi;

oozinkomo, zibhokhwe, neegusha yayingamateke-teke,

nditsho oku kweenkomo zaseBhashan.

Ingqolowa ingachum' iliphupha;

asisathethi ke ngediliya naloo wayini ingayiwayo.

₁₅Kambe ke uYeshurun suka wahlutha wada wakhabalaza;

ewe, wakhula wakhukhumala wada waxhathisa.

Waza ke wamfulathela uThixo adalwe nguye,

wayibukula eyona Ngxondorha imsindisayo.

₁₆Wamkhweletisa ngokunqula izithixo;

wamxhokonxa ngemikhwa emanyumnyezi.

₁₇Suka waxhelel' iindimoni ezingengoThixo;

izithixo awayengazazi ngaphambili,

izinto ezingazange zinqulwe nangamanyange.

₁₈Akayikhathalelanga eyona Ngxondorha aphuma kuyo;

suka wamlibala uThixo azelwe nguye.

₁₉Waza ke yena uNdikhoyo wakruquka,

exhokonkxwa ngoonyana neentombi zakhe nje.

₂₀Wathi: “Ubuso bam ndiza kubufihla,

ndibone ukuba loba yintoni ikamva labo;

kuba basisizukulwana esigwenxa,

abantwana abangathembekanga.

₂₁Ngezi zithixo bayandikhweletisa;

ngale mifanekiso bayandixhokonxa.

Nam ke ndobakhweletisa ngohlanga olungebantu bam;

ndobaxhokonxa ngohlanga olungenangqondo.

₂₂Kaloku umsindo wam uvutha njengomlilo,

udangazela kuye kuthi gaa kwelabafileyo;

utshisa umhlaba nemveliso yawo,

ude ulenye neziseko zeentaba.

₂₃“Ndobahlisela ngemfumba yezibetho,

iintolo zam ndizifohlele phezu kwabo.

₂₄Baya kuthi shuu yindlala nephango,

bacikidwe ngubhubhani nezifo-yifo,

amarhamncwa abaqwenge

ngezo ngxavula zawo,

bathi nca bubuhlungu bezirhubuluzayo.

₂₅Ezindleleni ikrele lishiy' izigede,

nasemagumbini bankwantye barhwaqele.

Abafana neentombi itshoba lilal' umbethe;

iintsana neengwevu nazo zithi dwe.

₂₆Ngendibatshabalalise kwathi tu,

ababi sakhunjulwa naluluntu,

₂₇nto nje kuthi qath' iintshaba zabo,

hleze zigcolode zide zizincome,

zithi namhla zibuye noloyiso,

ukanti ikwandim obathe vithe-vithe.”

₂₈Kwezo ntshaba umqondo tu;

kwabo bantu ingqondo ti!

₂₉Ukuba nje bebelumkile ngebeyazi le nto,

beliqonda nekamva labo.

₃₀Iwaka lingaze loyiswe ngumntu omnye;

ishumi lamawaka libalek' ababini,

ukanti abaphoxwanga yiNgxondorha yabo,

mhlawumbi bayekelwe nguNdikhoyo?

₃₁Ingxondorha yezinye izizwe ayifani neyethu,

nkqu neentshaba zethu ziyayiqonda loo nto.

₃₂Kuba isidiliya sazo sesaseSodom;

ngumdiliya wamasimi aseGomora.

Idiliya yazo inetyhefu,

izikhinkci zayo ziyakrakra.

₃₃Eyazo iwayini bubuhlungu benyoka;

ngengcwangu nqwa nobuhlungu bephimpi.

₃₄“Kambe ke isiphelo sazo ndisasibambile;

ndisasivalele koovimba bam.

₃₅Ke yona impindezelo nokubuyekeza kokwam;

ngokuhamba kwexesha zode zityibilike.

Imini yazo isemnyango;

izingqi zentshabalalo ziza zikhawulezile.”

₃₆Kaloku uNdikhoyo wobavelela abantu bakhe,

avelane nazo izicaka zakhe,

akuba eqonda ukuba baphelelwe,

kungasekho mahluko phakathi kwenkosi nesicaka.

₃₇Wosuka ke athi: “Baphi ke abo thixo benu?

Iye ngaphi kaloku ingxondorha yenu?

₃₈Abo batye amanqatha amadini enu,

baza basela neminikelo yewayini,

mabeze kuninceda kaloku;

mabavele kaloku, banikhusele.

₃₉“Niyabona ke, ndim, ewe ndim ndedwa uThixo;

akukho thixo wumbi ngaphandle kwam.

Ndiyabulala, ndidlisa ubomi;

ndiyenzakalisa, ndiyanyanga futhi;

tu ohlangulayo esandleni sam.

₄₀NdinguThixo ophilayo nje

inene ndiyafunga, ndithi:

₄₁‘Ndiza kulilol’ ikrele lam elidangazelayo;

ndihlasele kutsho kuvele ubulungisa.

Ke zona iintshaba zam ndozohlwaya,

abandithiyileyo ndibaphindezele.

₄₂Iintolo zam ziza kuxhaph' igazi;

ikrele lam liza kudl' enyameni;

nditsho igazi labaxatyelweyo nabathinjwa,

nkqu negazi leentloko ezinesihlwitha zeentshaba.”

₄₃Hoyina, zizwe, dumisani ngenxa yabantu bakaNdikhoyo!

Kalok' uyalibuyekeza igazi lezicaka zakhe.

Zidliwe yimpindezelo iintshaba zakhe;

kambe ke uyazicamagushela izono zabantu bakhe nelizwe lakhe.

₂“Kwintaba iSinayi gqi qhaphu *uNdikhoyo;

njengelanga wathi gqi kwaEdom.

Wabengezela evela kwiintaba zeParan;

wavela enamawaka-waka ezithunywa zakhe,

kudangazela okomlilo ngasekunene kwakhe.

₃Hayi ukubathanda kwakho abantu bakho!

Ewe, uyabafumbatha bonke abalibango lakho.

Kungoko basuka bathi guqaqa ezinyaweni zakho,

bethobela umnwe wakho,

₄mhla uMosis wabanika umthetho,

olibango lebandla likaSirayeli.

₅Wena Ndikhoyo waba ngukumkani kaYeshurun,

zakuba zihlanganisene iinkokheli zabantu,

zakuba ziqukene izizwe zakwaSirayeli.”

“URubhen makahlal' ehleli angaze atshitshe,

nakuba engengakanani ngamanani.”

“Kambe ke, wena Ndikhoyo,

bek' iindlebe umphulaphule uJuda,

ubuye ummanye namawabo.

Yena wazilwela ngezo zandla zakhe, Ndikhoyo,

ke ngoko msize ezintshabeni zakhe.”

“Ndikhoyo, *iiurim neethumim otyhila intando yakho ngazo,

zezentandane yakho uLevi,

yena lowo wamvavanyayo eMasa,

owabambana naye emanzin' aseMeribha.

₉Ngoyise nonina wathi: ‘Andiseva ngani.’

Ngabantakwabo wathi: ‘Andinazi.’

Ngabantwana bakhe wathi: ‘Andisenanto nani.’

Ewe, yena wanonophela ilizwi lakho,

wanyaniseka kumnqophiso wakho.

₁₀Uya kufundisa uSirayeli imimiselo yakho,

ayale abantu ngomyalelo wakho.

Uya kwenza isiqhumiso phambi kwakho,

anikele namadini atshiswayo eqongeni lakho.

₁₁Ndikhoyo, nceda umthi jize ngokomelela,

waneliseke ngumsebenzi awenzayo.

Ke bona abamvukelayo bavikive;

abamthiyayo mabangaze babuye bavele.”

“UNdikhoyo uyamthanda uBhenjamin;

yena usoloko emalusile.

Uhlala ekhuselekile imini yonke;

yena umi phantsi kwephiko lakhe.”

“Ke lona ithamsanqa likaNdikhoyo likwaJosefu;

umhlaba wakhe mawunyakamiswe yimvula

nangamanzi emithombo ampompoza phantsi komhlaba.

₁₄Ilanga nenyanga mazimchumise,

ziwulize ngeyona-yona mveliso.

₁₅Iintaba zamandulo mazivathe iziqhamo;

iinduli zamhlamnene maziphuphume imveliso.

₁₆Umhlaba wakhe mawuvelise eyona-yona;

uthamsanqelwe kukulunga kukaNdikhoyo

owayekho etyholweni elivuthayo.

La mathamsanqa makavele kwaJosefu,

yena olitshawe phakathi kwabantakwabo.

₁₇UJosefu nkunzi yakwabani ukomelela,

emise okwenyathi –

mpondo ezo zizezamawaka akwaManase

namashumi amawaka akwaEfrayim.

Ngazo uhlabanisela izizwe;

ewe, nezo ziseziphelweni zehlabathi.”

₁₈NgoZebhulon noIsakare wathi:

“KwaZebhulon makube yimihlali ukucanda elwandle;

kwaIsakare makube yimivuyo ukuhlala ekhaya.

₁₉Izizwe bozimemela entabeni yabo,

bawenzele apho amadini afanelekileyo.

Bona bamfimfitha indyebo yaselwandle,

ubutyebi babo babubhaqe elunxwemeni.”

“Makabongwe owandisa uGadi.

UGadi ubuthuma njengengonyama

ukuze aqwenge ingalo noba lukhakhayi.

₂₁Yena uzikhethela ezona-zona elizweni,

kuba wabelwa inxaxheba yengqwayi-ngqwayi.

Umela ubulungisa nemimiselo kaNdikhoyo,

zakuba zihlanganisene iinkokheli zakwaSirayeli.”

“Ke yena uDan ligatyana lengonyama

elithi tsi liphuma eBhashan.”

“Yena uNafetali wamkelekile;

uphuphuma intsikelelo kaNdikhoyo.

Ilifa lakhe lisuka elwandle lihle.”

“UAshere yena unoyolo kunabo bonke;

makabe yintandane kubantakwabo,

umhlaba wakhe uchume ngumnquma.

₂₅Imivalo yakhe mayibe yintsimbi nobhedu;

angaze aswele mandla esaphila.”

₂₆“Yeshurun, akakho onjengoThixo wakho,

ophalisa isibhakabhaka eze kukusiza,

ngobungangamsha bakhe aphalise amafu.

₂₇Kwamandulo uThixo yena waba likhaya;

waba soloko ekuxhasa ngezo ngalo zakhe.

Iintshaba zakho waziswantsulisa,

wathi: ‘Mazitshatyalaliswe!’

₂₈Ngoko ke uSirayeli uhleli ngenzolo,

umthombo kaYakobi uthe geqe,

uthe gcobho kwelengqolowa newayini,

apho izulu lifefeza umbethe.

₂₉Hay' uyolo onalo wena, Sirayeli!

Nguban' ongad' afike kuwe, sizwendini sasindiswa nguNdikhoyo,

okwalikhakha nekrele lakho,

okuhlanganiselayo akuthi jize ngoloyiso?

Neentshaba zakho zitsho zikubongoze,

wena uthimbe iindawo zazo eziphakamileyo.”

“Nakuliva ilizwi lakhe namhlanje,

₈sanukuba neenkani njengakwimihla yesidube-dube entlango apho namlingayo uThixo.

₉‘Apho bandivavanyayo bandilinga ooyihlo,’ utsho uThixo,

‘nakuba yaba ngamashumi amane eminyaka beyibona imisebenzi yam.

₁₀Nantso into eyandicaphukisayo kweso sizukulwana, ndaza ndathi:

Basoloko besona;

abaziqondi iindlela zam.

₁₁Futhi ndada ndafunga ndinomsindo, ndathi:

Abasoze bangene ekuphumleni kwam.’ ”

“Nakuliva ilizwi lakhe namhlanje,

sanukuba neenkani njengakwimihla yesidube-dube,”

₁Hayi inyhweba yomntu ongahambiyo ngecebo labantw' abagwenxa,

ongahambiyo ekhondweni lamatshijolo,

umnt' ongadlelaniyo nabaphoxisayo.

₂Lowo wonwatyiswa yimiyalelo *kaNdikhoyo,

ayetyise emini nasebusuku.

₃Unjengomth' otyalwe ngasemijelweni yamanzi,

umth' ovelisa iziqhamo ngexesha leziqhamo,

umth' omagqabi angasoz' abune.

Ewe, konk' akwenzayo umnt' onjalo kuyaphumelela.

₄Àbanjalo kambe bona abantw' abagwenxa;

bona banjengomquq' ophetshethwa ngumoya.

₅Ngenxa yoko aboni abanako ukujongana nenkundla,

koko bona baya kugxothwa embizweni yamalungisa.

₆Kaloku uNdikhoyo uyalusile indlela yamalungisa;

ke indlela yabakhohlakeleyo iya kudaka.