To The Word – Day 4

₁UThixo wayengabalibalanga ooNowa nezilwanyana nezilo ezazisenqanaweni kunye nabo. Wavelisa umoya, aza andula ukuthotha amanzi. ₂Yavalwa imithombo yamanzi engaphantsi komhlaba nesesibhakabhakeni, yapheza imvula. ₃Aya ethotha amanzi kwada kwaziintsuku ezilikhulu linamashumi mahlanu. ₄Ngomhla weshumi elinesixhenxe wenyanga yesixhenxe inqanawa yaya kuma phezu kweentaba zeArarati. ₅Aya ephela amanzi, kwathi ngomhla wokuqala wenyanga yeshumi zathi thu iincopho zeentaba.

₆Emva kwamashumi amane eentsuku uNowa wavula ifestile yenqanawa, ₇wakhupha ihlungulu. Lona lamana ukuphaphazela libheka ngapha nangapha, ada atshona amanzi emhlabeni. ₈UNowa wandulula ihobe ukuya kuhlola ukuba atshile na amanzi. ₉Kodwa alizanga lifumane ndawo yakuhlala ihobe, laza labuyela kuye enqanaweni, kuba umhlaba wawusagqunywe ngamanzi. Wolula isandla uNowa, walibamba, walingenisa enqanaweni. ₁₀Walinda iintsuku zasixhenxe, waphinda walikhupha ihobe. ₁₁Labuya ngokuhlwa seliphethe igqabi lomnquma ngomlomo, elalisandul' ukulikha. Waqonda ke uNowa ukuba amanzi athothile. ₁₂Walinda ezinye iintsuku ezisixhenxe, waza walikhupha kwakhona ihobe. Alizanga liphinde libuye ngesi sihlandlo.

₁₃Kuthe ke xa uNowa wayemakhulu mathandathu ananye ubudala, ngomhla wokuqala kwinyanga yokuqala, aba seletshonile amanzi emhlabeni. Wawuvula umnyango wenqanawa uNowa, wakhangela ngaphandle macal' onke, wawubona umhlaba womile. ₁₄Ngomhla wamashumi mabini anesixhenxe, ngenyanga yesibini, laliselome khonkqo ilizwe. ₁₅UThixo wathi kuNowa: ₁₆“Phuma enqanaweni kunye nomkakho, noonyana bakho, kunye nabafazi babo. ₁₇Zikhuphe zonke izidalwa ezisenqanaweni, iintaka neenyamakazi, nezinto ezirhubuluzayo, ukuze ziqhame, zande, zizalise ihlabathi.”

₁₈Waphuma ke uNowa enqanaweni kunye nomkakhe, noonyana bakhe, kunye nabafazi babo. ₁₉Zonke izidalwa ezishukumayo, iintaka nezilwanyana nezinto ezirhubuluzayo, zaphuma enqanaweni ngokweendidi zazo.

₂₀Wenza iqonga lamadini *kaNdikhoyo uNowa. Wathatha isilwanyana ngasinye nentaka nganye, kwezo zodidi olutyiwayo, wazinikela zangumbingelelo phezu kwelo qonga. ₂₁Lamkeleka ivumba lazo kuNdikhoyo, waza wathi: “Andisobe ndiliqalekise ilizwe ngenxa yezenzo zabantu. Kaloku ndiyazi ukuba umntu uneengcinga ezigwenxa kwaeselula. Andisobe ndizitshabalalise izinto eziphilayo njengoko sendenjenjalo. ₂₂Kuya kusoloko kukho amaxesha okulima namaxesha okuvuna wonke lo gama lisemiyo ilizwe; kuya kubakho ingqele nobushushu, ihlobo nobusika, ubusuku nemini.”

₁UThixo wamthamsanqelisa uNowa kunye noonyana bakhe, esithi: “Qhamani nande, nizalise ihlabathi ngenzala yenu. ₂Izilo zonke, kwaneentaka neentlanzi, mazinoyike. Zonke ziphantsi kwegunya lenu. ₃Yonke into ephilayo yoba kukutya kwenu. Njengoko ndaninikayo uhlaza, ndininika into yonke ngoku. ₄Into eningayi kuyitya yinyama yento engophanga. Andiyivumeli loo nto, kuba igazi libubomi. ₅Umntu obulala omnye umntu unetyala. Nasiphi na isilwanyana esibulala umntu ndiya kusibulala. ₆Umntu wenziwa wangumfuziselo kaThixo, nabani na ke obulala omnye umntu naye uya kubulawa kwangomnye umntu.

₇“Ze nichume nande, ukuze inzala yenu ilizalise ilizwe.”

₈Uqokele wathi uThixo kuNowa nakoonyana bakhe: ₉“Ngoku ndiza kwenza umnqophiso nani kwakunye nenzala yenu, ₁₀nazo zonke izinto eziphilayo: izilo zonke, kunye nempahla efuyiweyo, neentaka zonke; nditsho yonke into ebisenqanaweni kunye nani. ₁₁Ndithi andisobe ndizitshabalalise ngemvula kwakhona izinto eziphilayo. Ilizwe alisobe liphinde lipheliswe ngemvula. Ngumnqophiso wam lowo. _12-13Umqondiso walo mnqophiso endikwenzela wona kunye nazo zonke izinto eziphilayo, ngumnyama oya kubakho esibhakabhakeni. Nguwo lowo umqondiso womnqophiso ongasoze ujike endiwenzela abantu nalo lonke elimiweyo. _14-15Nanini na xa lisibekele, amafu eziingqimba, ndowukhumbula lo mnqophiso wam kwakuvela umnyama. Nditsho lo mnqophiso ndiwenzele wena nazo zonke izinto eziphilayo, ndisithi andisobe ndilitshabalalise ilizwe kwakhona ngemvula. ₁₆Wakuvela umnyama emafini, ndiwubone, ndokhumbula umnqophiso ongasoze ujike endiwuthembise zonke izinto eziphilayo elizweni. ₁₇Nguwo ke lowo umqondiso womnqophiso endiwenzela yonke into ephilayo.”

₁₈UNowa waphuma enqanaweni noShem noHam noYafete oonyana bakhe. (UHam nguyise kaKanana.) ₁₉Oonyana bakaNowa bobathathu ngookhokho babo bonke abantu elizweni.

₂₀UNowa owayengumlimi waqala ngokulima umdiliya. ₂₁Akuba esele iwayini uNowa wanxila, wakhulula, walala ze egumbini lakhe. ₂₂UHam, uyise kaKanana, uthe akumbona eze uyise, waphuma waya kuxelela abantakwabo phandle. ₂₃Ke bona ooShem noYafete bathatha ingubo, baya ngomva kuyise egumbini lakhe, bamambathisa bengamjonganga, ukuze bangamboni ehamba ze. ₂₄Akuqabuka uNowa, wayiva into eyenziwe ngunyana wakhe oligqibelo, ₂₅wathi:

₂₈UNowa wahlala amakhulu amathathu namashumi amahlanu emva kwemvula kanogumbe, ₂₉wabhubha emakhulu alithoba namashumi mahlanu ubudala.

₁Nanga amagqabantshintshi ngoonyana bakaNowa, uShem noHam noYafete. Kaloku nabo bazala oonyana emva kwemvulakazi kanogumbe.

₂Oonyana bakaYafete naba: nguGomere, uMagogi, uMadayi, uJavan, noTubhali, uMesheki, noTisari. ₃Inzala kaGomere ngama-Ashkenezi, amaRifati, namaTogarma. ₄Inzala kaJavan yona ngamaElisha, amaTashishe, amaKiti, namaDodan. ₅Ngabo abangookhokho babantu ababegudle unxweme nabo babeseziqithini. Yinzala kaYafete ke leyo, eyayimi izizwe ngezizwe kwiindawo ngeendawo, isizwe ngasinye sithetha olwaso ulwimi.

₆Oonyana bakaHam nguKushe, uMizerayim, uPuti, noKanana. ₇Inzala kaKushe yaba ngamaSebha, amaHavila, amaSabheta, amaRama, namaSabheteka. Inzala kaRama ngamaShebha namaDedan. ₈UKushe wayenonyana ogama linguNimrodi, owaba lelona kroti libalaseleyo elizweni. ₉Ngoncedo *lukaNdikhoyo waba lichebesha lezingela. Yiyo ke loo nto kuthiwa xa kuthethwayo: “Wanga uNdikhoyo angakupha amandla, ube lizingela, ufuze uNimrodi.” ₁₀Lwaqala eBhabheli, e-Ereki, naseAkadi ulawulo lwakhe. Zontathu ezo ndawo zikwelaseBhabheli. ₁₁Ukusuka apho waya eAsiriya apho wakha isixeko saseNiniva, esaseRehobhoti-ire, nesaseKala, ₁₂kunye neRezen emi phakathi kweNiniva nesixekokazi iKala.

₁₃Inzala kaMizerayim yaba ngamaLudi, ama-Anam, amaLehabhi, amaNafetuyi, ₁₄amaPatrusi, namaKaseluyi, apho kwakuvela khona amaFilistiya namaKafto.

₁₅Oonyana bakaKanana nguSidon owamazibulo, kunye noHeti, ₁₆noJebhusi, noAmori, noGirgashi, ₁₇noHivi, noAreki, noSini, ₁₈noArvadi, noZemari, noHamati. Izizwe ngezizwe zakwaKanan zathi saa, ₁₉yada imida yazo yaya kuthi xhaxhe ngeSidon, yada yaya kutsho eGerari ngaseGaza, yenjenjeya ukuya eSodom naseGomora, eAdama naseZebhoyim kufuphi neLasha. ₂₀Yinzala kaHam ke le eyayimi izizwe ngezizwe kwiindawo ngeendawo, sizwe ngasinye sithetha olwaso ulwimi.

₂₁UShem, umkhuluwa kaYafete, waba ngukhokho wamaHebhere. ₂₂Oonyana bakhe nguElam, uAsuri, uArpakishadi, uLudi, noAram. ₂₃Inzala ka-Aram yaba ngamaUzi, amaHuli, amaGetere, namaMahi. ₂₄UArpakishadi wazala uShela, owazala uHebhere. ₂₅UHebhere wazala oonyana ababini. Omnye nguPelege, kuba ngexesha lakhe abantu babahlulelene elizweni, omnye yayinguJoketan. ₂₆Inzala kaJoketan yaba ngama-Alemodadi, amaShelefe, amaHazare-mavete, amaJera, ₂₇amaHadoram, amaUzali, amaDikela, ₂₈amaObhali, ama-Abhimayeli, amaShebha, ₂₉amaOfire, amaHavila, namaJobhabhi. Zonke ezi zizwe yinzala kaJoketan. ₃₀Umhlaba ababemi kuwo wawusuka eMesa uye kuthi xhaxhe ngeZefara kweleentaba empumalanga. ₃₁Yinzala kaShem ke leyo, eyayimi izizwe ngezizwe kwiindawo ngeendawo, isizwe ngasinye sithetha olwaso ulwimi.

₃₂Yinzala kaNowa yonke ke le, izizizwe ngezizwe ngokwemilibo yazo. Emva kwemvula kanogumbe zonke izizwe elizweni zavela koonyana bakaNowa.

₁Ngelo xesha abantu elizweni babethetha ulwimi olunye, besebenzisa namagama afanayo ezinto. ₂Ke ekubhaduleni kwabo kwelasempumalanga bada baya kutsho kumathafa aseBhabheli, bema apho. ₃Bathethana bathi: “Masenze izitena, sizitshise ziqine.” Baza ke basebenzisa ezo zitena endaweni yamatye, netha endaweni yodaka. ₄Bathi ke: “Masakhe isixeko, senze nenqaba enencopho eya kutsho esibhakabhakeni, ukuze sibe negama nathi, singathi saa elizweni.”

₅*UNdikhoyo wehla weza kusibona eso sixeko babesakhile nenqaba leyo, ₆waza wathi: “Xa aba bantu beluhlanga olunye, bekwantetho-nye, sebeqala ngokwenjenje, abanakuxakwa nayintoni na abafuna ukuyenza. ₇Yizani sihle, ulwimi lwabo silwenze lube yingxuba-kaxaka, khon' ukuze bangevani ngentetho.” ₈Wabathi saa elizweni uNdikhoyo, àbasakha neso sixeko. ₉Kwathiwa eso sixeko yiBhabheli, kuba kaloku uThixo wasuka wayenza ingxuba-kaxaka intetho yabantu. Ukusuka apho abantu bathi saa elizweni.

₁₀Nanga amagqabantshintshi ngoShem. Kudlule iminyaka yamibini emva konogumbe, uShem wazala unyana uArpakishadi selenekhulu leminyaka ubudala. ₁₁Uhleli amanye amakhulu amahlanu emva koko, wazala abanye abantwana.

₁₂Akuba namashumi mathathu anantlanu uArpakishadi, wazala unyana uShela. ₁₃Emva koko uhleli amakhulu mane anantathu, wazala nabanye abantwana.

₁₄Akuba namashumi mathathu uShela, wazala unyana uHebhere. ₁₅Wahlala amakhulu mane anantathu emva koko, wazala nabanye abantwana.

₁₆Wayenamashumi mathathu anane uHebhere ukuzala kwakhe unyana uPelegi. ₁₇Uhleli amakhulu mane anamashumi mathathu emva koko, wazala abanye abantwana.

₁₈UPelege uzele unyana, uRewu, emashumi mathathu ubudala. ₁₉Uhleli amakhulu mabini anethoba emva koko, wazala nabanye abantwana.

₂₀URewu uzele unyana, uSerugi, emashumi mathathu anambini ubudala. ₂₁Uhleli amakhulu mabini anesixhenxe emva koko, wazala nabanye abantwana.

₂₂Akuba mashumi mathathu ubudala uSerugi, wazala uNahore. ₂₃Uhleli amakhulu mabini eminyaka emva koko, wazala nabanye abantwana.

₂₄Wayenamashumi mabini anethoba uNahore ukuzala kwakhe unyana wakhe uTera. ₂₅Emva koko uhleli ikhulu lineshumi elinethoba leminyaka, waza wazala nabanye abantwana.

₂₆UTera wayeselenamashumi asixhenxe ukuzala kwakhe uAbram noNahore noHaran.

₂₇Nanga amagqabantshintshi ngoTera uyise ka-Abram noNahore noHaran. UHaran wazala uLothe, ₂₈waza kwayena uHaran watshabela kwakweso sixeko sakubo, iUre kwelamaKaledi. Uyise wayesadla amazimba. ₂₉UAbram wathatha uSarayi, waza uNahore yena wathatha uMilika, intombi kaHaran uyise kaIska. ₃₀Ke kaloku uSarayi wayengenabantwana, kuba wayengazali.

₃₁UTera wafuduka eUre, ehamba noAbram unyana wakhe, kunye nomzukulwana wakhe uLothe, unyana kaHaram, kwakunye noSarayi umolokazana wakhe, umka-Abram. Wemka kwelamaKaledi, wafudukela welaseKanana. Bahamba bada baya kutsho eHaran, bafika bema apho. ₃₂Wabhubhela apho eHaran uTera emakhulu mabini anantlanu ubudala.

₁Kwathi emva koko uYesu waya ngaphesheya koLwandle lwaseGalili, olo lukwabizwa ngokuba luLwandle lwaseTibheriya. ₂Wayelandelwe sisihlwele esikhulu, kuba abantu babeyibonile imiqondiso awayenzayo ngokuphilisa abagulayo. ₃UYesu wenyuka endulini, waza wahlala phantsi nabafundi bakhe. ₄Lalisondela itheko lamaJuda ekuthiwa yiPasika. ₅Kwathi uYesu akukhangela, wabona isihlwele esikhulu sisiza kuye, waza wathi kuFilipu: “Ngaba sinokusithenga phi na isonka esaneleyo sokutyisa le ndimbane?” ₆Esitsho nje, wayevavanya uFilipu, kuba yena wayekwazi oko aza kukwenza.

₇Waphendula uFilipu, wathi: “Ngathi nesonka samakhulu amabini eerandi asingekhe sanele okokuba wonke okhoyo afumane iqhekezana.”

₈Omnye wabafundi bakaYesu, uAndreya, umntakwabo-Simon Petros, wathi kuye: ₉“Kukho inkwenkwana apha enezonka ezihlanu zerhasi, neentlanzi ezimbini; kodwa kuyintoni na oko kule nginginya yabantu?”

₁₀Waza uYesu wathi: “Bahlaliseni phantsi abantu.” Kwakukho ibala elikhulu elinengca apho, baza bahlala phantsi. Inani lamadoda lalikumawaka amahlanu. ₁₁Wazithatha ke uYesu ezo zonka, wabulela kuThixo, wababela abantu ababehleli phantsi. Wenjenjalo nakwiintlanzi, baza batya banela. ₁₂Bakuhlutha abantu, uYesu wathi kubafundi bakhe: “Qokelelani okuseleyo. Makungabikho nentwana emoshakalayo.” ₁₃Bawaqokelela ke amaqhekeza aseleyo ezo zonka zihlanu zerhasi, kwazala iingobozi ezilishumi elinambini.

₁₄Bakuwubona abantu lo mqondiso uYesu awenzileyo, bathi: “Ngenene, kuthe kanti nguye lo *umshumayeli obekade elindelwe!” ₁₅Waqonda uYesu okokuba bazimisele ukuza kumthatha bamenze ukumkani, waza wemka, waya entabeni eyedwa.

₁₆Kwathi kwakuhlwa abafundi bakaYesu behla baya elwandle, ₁₇bakhwela isikhitshana, baluwela ulwandle, besiya eKapernahum. Nangona kwakusebusuku uYesu wayengekho kubo. ₁₈Amanzi olwandle ayesilwa, kuba kwakuvuthuza umoya. ₁₉Kwathi, bakuba begqibe iikhilomitha ezintlanu okanye ezintandathu bebheqa isikhitshana, babona nanko uYesu ehamba phezu kwamanzi olwandle, esondela. Boyika ke, ₂₀kodwa uYesu wathi kubo: “Ndim; sanukoyika.” ₂₁Bamamkela ke esikhitshaneni, kwathi kwangoko isikhitshana safika kuloo ndawo babesiya kuyo.

₂₂Ngengomso indimbane yabantu yayisekho ngaphesheya koLwandle lwaseGalili. Abantu aba babebone isikhitshana sasinye kuphela, baye babesazi okokuba uYesu wayengakhwelanga nabafundi bakhe, kuba bona babehambe bebodwa. ₂₃Kodwa ezinye izikhitshana, ezazivela eTibheriya, zafika ngakuloo ndawo isihlwele sasityela kuyo isonka emva kokuba iNkosi yayibulele. ₂₄Yakubona ke indimbane okokuba uYesu akakho apho, bengekho nabafundi bakhe, yakhwela kwezo zikhitshana, yaya kumfuna eKapernahum.

₂₅Abo bantu bamfumana uYesu ngaphesheya kolwandle, bathi kuye: “Mfundisi, ngaba ufike nini na apha?”

₂₆Waphendula uYesu wathi: “Ndithi kuni, inene, anizanga kundifuna kuba nibone imiqondiso endiyenzayo; nindifuna kuba nitye esaa sonka nahlutha. ₂₇Sanukusebenzela ukutya okuphelayo; sebenzelani ukutya okungapheliyo, okusisondlo sobona bomi bungenasiphelo. Oko kutya niya kukunikwa nguye uNyana woLuntu, kuba uYise, uThixo, wamgunyazisela oko.”

₂₈Ke ngoko bathi kuye: “Misebenzi mini uThixo afuna siyenze?”

₂₉Waphendula uYesu, wathi kubo: “Umsebenzi uThixo afuna niwenze ngulo wokuba nizinikele nikholwe kulowo uThixo amthumileyo.”

₃₀Ke bona bathi kuye: “Wena ngaba wenza mqondiso mni na, ukuze sibone sikholwe kuwe? Yintoni oyenzayo? ₃₁Oobawo bâtya *imana entlango, njengoko zitshoyo *iziBhalo ukuthi: ‘Wabanika batya isonka esivela ezulwini.’”

₃₂Wathi ke uYesu kubo: “Ndithi kuni, inene, asinguye uMosis owaninika isonka esivela ezulwini; nguBawo oninika esona sonka sisiso esivela ezulwini. ₃₃Isonka esivela kuThixo ngulowo wehlayo evela ezulwini, eze kulinika ubomi ihlabathi.”

₃₄Baza bathi kuye: “Nkosi, uzungadinwa nanini na ukusipha eso sonka.”

₃₅Wathi kubo uYesu: “Ndim isonka sobomi. Ozayo kum akasoze alambe, nokholwayo kum akasoze anxanwe.

₃₆“Ke nina, njengoko senditshilo, nindibonile nokundibona, naza noko anakholwa. ₃₇Bonke endibanikwe nguBawo, baya kuza kum. Ke lowo uzayo kum andingekhe ndingamamkeli, ₃₈kuba ndehla ezulwini ndingezanga kwenza eyam intando, koko ndize kwenza intando yalowo wandithumayo. ₃₉Intando yalowo wandithumayo kukuthi kungalahleki namnye kwabo andinika bona, koko ndibavuse ekufeni bonke ngomhla wokugqibela. ₄₀Okufunwa nguBawo kukuba wonke ombonayo uNyana akholwe kuye, abe nobomi obungapheliyo; ndaye ndiya kumvusa ekufeni ngomhla wokugqibela.”

₄₁Aza amaJuda ambombozela, kuba uYesu ethe nguye isonka esehla sivela ezulwini, ₄₂athi: “Lo mfo akanguye na uYesu, unyana kaJosefu? Sibazi nje ke abazali bakhe, angathini ngoku ukuthi wehla ezulwini?”

₄₃Waphendula uYesu wathi: “Sanukundikrokrela. ₄₄Akukho namnye unokuza kum engathanga uBawo owandithumayo amtsalele kum; kwaye lowo ndiya kumvusa ekufeni ngomhla wokugqibela. ₄₅*Abashumayeli bâbhala bathi: ‘Bonke baya kuba ngabafundisiweyo nguThixo.’ Bonke ke abathe bamphulaphula uBawo, baza bafunda kuye, bayeza kum. ₄₆Xa nditshoyo ke andithethi ukuthi kukho bani wakha wambona uBawo. Akukho namnye wakha wambona uBawo, ngaphandle kwalowo uvela kuThixo.

₄₇“Ndithi kuni, inene, lowo ukholwayo unabo ubomi obungapheliyo. ₄₈Ndim isonka sobomi. ₄₉Ooyihlo batya *imana entlango, kodwa bafa. ₅₀Ke sona isonka esihla ezulwini, seso athi ubani akusitya, angafi. ₅₁Ndim isonka esinobomi, esihlileyo sivela ezulwini. Ukuba ubani uthe wasitya esi sonka, wophila ngonaphakade. Isonka endiya kumnika sona ngumzimba wam, endiwunikelayo ukuze ihlabathi liphile.”

₅₂AmaJuda ke aphikisana ngamandla, esithi: “Angathini lo mfo ukusityisa umzimba wakhe?”

₅₃Waza uYesu wathi kuwo: “Ndithi kuni, inene, ukuba anithanga niwutye umzimba wakhe *uNyana woLuntu, nilisele negazi lakhe, aninabo ubomi. ₅₄Lowo uwutyayo umzimba wam, alisele negazi lam, unobomi obungonaphakade, ndaye ndiya kumvusa ekufeni ngomhla wokugqibela. ₅₅Umzimba wam kokona kutya, negazi lam sesona siselo. ₅₆Lowo uwutyayo umzimba wam, alisele negazi lam, yena uhlala kum, nam ndihlala kuye. ₅₇UBawo uSobomi wandithuma, ndaza ndangonobomi ngaye. Ngokukwanjalo othe wawutya umzimba wam uya kuba nobomi ngam. ₅₈Siso ke eso isonka esehla sivela ezulwini; sibe singafani nesiya ooyihlo bâsityayo, baza bafa noko. Osityayo esi sonka wodla ubomi ngonaphakade.”

₅₉Ezi zinto uYesu wazithetha xa wayefundisa eKapernahum *endlwini yesikhungo. ₆₀Bathi bakuziva, abaninzi kubafundi bakhe bathi: “Iyaxakanisa le ntetho. Ngubani onokuyinyamezela le nto?”

₆₁UYesu wayesazi ukuba abafundi bakhe bayakrokra, waza wathi kubo: “Iyanikhubekisa le ndawo? ₆₂Ngaba nothini na nakumbona *uNyana woLuntu enyukela apho wayevela khona? ₆₃NguMoya onika ubomi; ke wona amandla omntu akancedi lutho ekunikeni ubomi. Amazwi endiwathethileyo kuni ngakaMoya, anika ubomi. ₆₄Kanti ke noko basekho kuni abangakholwayo.” Kaloku uYesu wayebazi kwangaphambili abo bangakholwayo, emazi kwanalowo wayeza kumngcatsha. ₆₅Waza ke wathi: “Kungoko nditshilo kuni ukuthi akukho namnye unokuza kum engakunikwanga nguBawo ukwenjenjalo.”

₆₆Ukususela ngoko into eninzi yabafundi bakaYesu yarhoxa, ayaba sahamba naye. ₆₇Wathi ke uYesu kwabo bafundi bakhe balishumi elinambini: “Nithini na nina? Ngaba nani nifuna ukumka?”

₆₈Waza waphendula uSimon Petros wathi: “Nkosi, singaya kubani, inguwe nje onamazwi angawobomi obungapheliyo? ₆₉Thina siyakholwa sisazi okokuba nguwe onguYedwa kaThixo.”

₇₀Wabaphendula uYesu wathi: “Beninganyulwanga ndim na, nina balishumi elinambini? Kanti omnye kuni aba ungumtyholi.” ₇₁Wayethetha uJudas, unyana kaSimon Sikariyoti, kuba nangona wayengomnye wabafundi abalishumi elinambini, wayeza kungcatsha uYesu.

₁Emva koko uYesu wehla enyuka neGalili. Wayengathandi ukuya kwelakwaJuda, kuba amaJuda ayefuna ukumbulala. ₂Lalisondele itheko lamaJuda ekuthiwa litheko lamaphempe, ₃baza bathi kuye abantakwabo: “Khawumke apha, uye kwelakwaJuda, ukuze nabo abafundi bakho abalapho bazibone izinto ozenzayo. ₄Kaloku umntu ofuna okokuba into ayenzayo yaziwe, akayenzi ngasese. Ukuba uyazenza ezi zinto, zenze zibonwe lihlabathi lonke.” ₅Babesitsho abantakwabo-Yesu kuba nkqu bona babengakholwa kuye.

₆Wathi kubo uYesu: “Nina ningaya nanini na, kodwa elam ithuba lokuya alikafiki. ₇Abantu beli hlabathi bandithiyile mna, kuba ndisoloko ndiyihlaba imikhwa yabo emibi, kodwa nina bayanithanda. ₈Ningaya nina ethekweni apho, kodwa mna andiyi, kuba ayikabi lothuba lifanelekileyo eli kum.” ₉Akuba etshilo wasala eGalili.

₁₀Bakuba bemkile abantakwabo-Yesu ukuya ethekweni apho, naye waya khona, phofu wahamba ngokuzimela. ₁₁AmaJuda ayemfuna apho ethekweni, emana ebuzisa ngaye. ₁₂Kwakugqugulwa ngaye, kukho abathi: “Yindoda leya;” kukho nabathi: “Hayi bo, uyabalahlekisa abantu.” ₁₃Noko akuzange kubekho bani uthetha ngaye ekuhleni, kuba babesoyika amaJuda.

₁₄Kwathi itheko selishushu, uYesu waya *endlwini kaThixo, wafundisa. ₁₅Amangaliswa amaJuda, athi: “Ngaba lo mntu uluthathe phi lonke olu lwazi, engafundanga nje?”

₁₆Waza uYesu wawaphendula wathi: “Le mfundiso ndiyifundisayo asiyoyam, koko ivela kulowo undithumileyo. ₁₇Lowo uyenzayo intando kaThixo, uya kuqonda ukuba andithethi okukokwam, koko ndifundisa okuphuma kuThixo. ₁₈Othetha okukokwakhe uzifunela olwakhe udumo; ke yena ofuna udumo lwalowo umthumileyo unyanisekile, akukho nkohliso kuye. ₁₉Akaniwiselanga umthetho na uMosis? Kanti akukho namnye kuni uwuthobeleyo. Kungani na ukuba nifune ukundibulala?”

₂₀Abantu baphendula bathi: “Uphambene! Ngubani ofuna ukukubulala?”

₂₁Waphendula uYesu, wathi kubo: “Ndenze into yanye *ngoMhla woPhumlo, naza namangaliswa nonke. ₂₂Khaniphawule le ndawo ngolwaluko lwesiJuda: Ulwaluko lwaqalwa ngamanyange, waza noMosis wawisa umthetho wokuba lubekho. Ngoko niyalùsa nangoMhla wokuPhumla. ₂₃Ukuba ke umntwana oyinkwenkwe niyamalùsa ngoMhla woPhumlo, ngenxa yokuba nifuna ukugcina umthetho kaMosis, kutheni ke ukuba nikhathazeke kuba ndithe ndaphilisa umntu? ₂₄Sanukugweba ngokwembonakalo; gwebani ngobulungisa.”

₂₅Abanye abantu baseJerusalem babesithi: “Ngaba asinguye na lo bafuna ukumbulala? ₂₆Kanti nanko ethetha ekuhleni, kungekho bani ubhekisa nento le kuye! Ngaba iinkokheli ziqondile okokuba ngokwenyani lo *nguKrestu? ₂₇Angathini na lo ukuba nguKrestu simazi nje apho avela khona? UKrestu akufika akuyi kubakho bani waziyo apho avela khona.”

₂₈Watsho ngelivakalayo uYesu, efundisa *endlwini kaThixo, wathi: “Niba niyandazi, nisazi nalapho ndivela khona! Mna andizizelanga ngokwam. Ndithunywe ngulowo uyinyaniso. Ke nina animazi, ₂₉kodwa mna ndiyamazi, kuba ndivela kuye, ndithunywe nguye.”

₃₀Babefuna ukumbamba, kodwa akubangakho bani umchukumisayo, kuba lalingekafiki ixesha. ₃₁Kodwa abantu abaninzi bâkholwa kuye, besithi: “Xa athe wafika uKrestu, ngaba ebenokwenza imiqondiso engaphezulu na kunale yenziwe ngulo?”

₃₂*AbaFarasi babeva abantu bethetha ngasese ngoYesu, baza bona nababingeleli abaziintloko bathuma abagadi bendlu kaThixo ukuba bambambe. ₃₃Waza uYesu wathi: “Ndisaza kuba nani ithutyana, ndize ndimke, ndiye kulowo undithumileyo. ₃₄Niya kundifuna ke, ningandifumani, kuba nina aninako ukuya apho ndiya khona.” ₃₅Aza amaJuda abuzana esithi: “Ngaba bethu uza kuya phi, ze ke singabi nako ukumfumana? Ngaba uzimisele ukuya kumaJuda athe saa kwelamaGrike, aze afundise amaGrike? ₃₆Ngaba uthetha ukuthini xa athi: ‘Niya kundifuna ningandifumani, kuba nina aninako ukuya apho ndiya khona’?”

₃₇Ngosuku lokugqibela, olo ke lulolona lubalulekileyo lwetheko, wema uYesu, wathetha ngelivakalayo esithi: “Onxaniweyo makeze kum asele. ₃₈*IziBhalo zithi kuya kugqabhuka imisinga yamanzi aphilisayo embilinini walowo ukholwayo kum.”

₃₉UYesu wayithetha le nto esingisele kuMoya ababeya kumamkela abo babekholwa kuye. Kaloku uMoya wayengekafiki, kuba ubungangamsha bukaYesu babungekabonakali.

₄₀Bakumva uYesu esitsho, abantu abathile esihlweleni bathi: “Ngenene lo mntu nguye lowa *Mshumayeli.”

₄₁Abanye bathi: “Lo mntu *nguKrestu.”

Kodwa bambi bathi: “Angathini uKrestu ukuvela eGalili? ₄₂*IziBhalo zithi uKrestu woba ngowendlu kaDavide, azalelwe eBhetelehem, idolophu awayehlala kuyo uDavide.” ₄₃Kwabakho impikiswano ke esihlweleni ngenxa yakhe. ₄₄Abanye babefuna ukumbamba, kodwa akubangakho bani umchukumisayo.

₄₅Abagadi *bendlu kaThixo babuyela kubabingeleli abaziintloko *nabaFarasi, baza bona bathi kubo: “Kutheni ningezanga naye nje?”

₄₆Baphendula abagadi abo bathi: “Akukho namnye umntu owakha wathetha njengalo.”

₄₇Baza bathi abaFarasi: “Ngaba unilahlekisile na nani? ₄₈Kwiinkokheli zethu nakubaFarasi ngaba kukho mntu wakha wakholwa kuye? ₄₉Baqalekisiwe abantu abangawaziyo *umthetho kaMosis.”

₅₀KubaFarasi abo kwakukho noNikodimo lowo wayekhe wadlana iindlebe noYesu, waza ke yena wathi kubo: ₅₁“Umthetho wethu awuvumi okokuba umntu agwetywe lingathanga laxoxwa ityala lakhe, kwacaca oko akwenzileyo.”

₅₂Baza bathi kuye: “Ngaba nawe lo ungowaseGalili na? Khawuphengulule *iziBhalo ubone, kuba akukho *mshumayeli uvela eGalili.”

[ ₅₃Baza bagoduka ke bonke.]