To The Word – Day 220

₁*UNdikhoyo ngukumkani, uyalawula;

mazimnike imbeko izizwe!

Ungqendeve esihlalweni engqongwe *zizithunywa ezimaphiko;

malingcangcazele ihlabathi!

₂UNdikhoyo yingangalala eZiyon;

ngumlawuli wazo zonk' iintlanga.

₃Malidunyiswe ngumntu wonk' igama lakhe elindilekileyo!

Kaloku yena nguyedwa okhethekileyo.

₄Wena kumkani, ngangalala, mthandi wokulungileyo;

nguwe owezisa ubulungisa kwaYakobi,

wawis' izigwebo kakuhle ungenamkhethe.

₅Mbongeni uNdikhoyo uThixo wethu;

zikhahleleni ngasezinyaweni zakhe.

Kaloku yena unobungangamsha.

₆UMosis noAron yayingababingeleli bakhe;

uSamweli yayingomnye wababemnqula;

bonke bazibika kuNdikhoyo, wabeva.

₇Wayethetha nabo ekwintshinyela yelifu,

kuba babeyithobela imiyalelo nemithetho yakhe.

₈Ewe, Ndikhoyo, Thixo, wabeva abantu bakho;

wababonisa ukuba unguThixo oxolelayo,

kodwa ukwangoyohlwayayo intw' embi.

₉Mbongeni uNdikhoyo uThixo wethu.

Mnquleleni entabeni yakhe eyodwa!

Kaloku ungcwele uNdikhoyo uThixo wethu.

₁Mombeleleni *uNdikhoyo, nonke hlabathi!

₂Mnquleni uNdikhoyo nivuya,

nize kuye nisombela iingom' ezimyoli!

₃Yazin' ukuba uNdikhoyo nguThixo;

nguye owasidalayo, yaye singabakhe,

singabantu bakhe, singumhlambi wakhe.

₄Ngenani nibulela emasangweni akhe;

ngenani ngeendumiso endlwini yakhe;

mbuleleni, nidumise igama lakhe!

₅Kaloku lilunga uNdikhoyo;

izibele zakhe ziya kuhlala zihleli,

ahlale ethembekile kude kube nini-nini.

₁Igwijo lam lingentembeko nokulunga;

ndiya kukombelela lona, *Ndikhoyo.

₂Ndisoloko ndikuhlonela;

woda ufike nini na, Mhlekazi?

Ndohlala ndimsulwa emzini wam;

₃andisayi kumelana nobutshijolo.

Ndizithiyil' izimilo zabangahloneli Thixo;

andihambisani nazo mpela.

₄Andiyi kungathembeki;

andiyi kusondela ebubini.

₅Ndomlumkela umnt' onentlebendwane,

ndingalinyamezeli ikratsha negumasholo.

₆Ndobamkela abahlonela uThixo kwibhotwe lam,

amagosa am abe ngabantw' abathembekileyo.

₇Akukho mkhohlisi uya kuba semzini wam,

naxoki liya kuhlala apho ndikhoyo.

₈Ndowatshabalalisa rhoqo onke amatshijolo elizweni,

ndibagxoth' abantw' abagwenxa emzini kaNdikhoyo.

₁Ndikhoyo, wuve umthandazo wam,

nesikhalo sam masifike kuwe!

₂Sukundizimela xa ndisebunzimeni;

ndiphulaphule undive kamsinya ndakukhala.

₃Imihla yam ithe shwaka okomsi;

ndiyathuthunjelwa ziingqaqambo.

₄Ndixusheke ndada ndalityéba;

senditsho ndaphelelwa nangumdla wokutya.

₅Ndiyagcuma kukugula;

andibhitye nditsho ndangamathambo.

₆Ndifana nesikhova enkangala;

ndinjengesihulu-hulu senxiwa.

₇Ndilal' obentaka kukumana ndiphuthelwa;

ndifana nentak' ehleli yodwa exhantini.

₈Ziyandigxibha yonk' imini iintshaba zam;

ziphoxisa ngam, ziqalekisana ngegama lam.

₉Ndinesingqala, ukutya akuvumi kuhla;

intw' endiyiselayo seliziinyembezi zam.

₁₀Loo ntw' ibangwa yingqumbo nomsindo wakho;

kaloku wena undifunqule wandilahla kwesinomhlwa.

₁₁Seligqithe njengamathunz' okuhlwa imihla yam;

selide yabuna okwengca elahliweyo.

₁₂Kodwa wena, Ndikhoyo,

uya kulawula kude kube ngunaphakade;

ziya kubalisa ngawe zonk' izizukulwana.

₁₃Uya kuhlabeka, uyisizele iZiyon;

ewe, ixesha lokuyenzel' inceba selifikile,

seligalelekile.

₁₄Ziyayithand' izicaka zakho, naxa seliziindonga nje;

ziyahlabeka xa ziyibona selingamabhodlo iZiyon.

₁₅Zolihlonel' igama likaNdikhoyo zonk' iintlanga,

neekumkani zonke zisibeke isihomo sakhe.

₁₆Kuba kaloku uNdikhoyo woyivusa iZiyon,

sicace ke isidima nesithozela sakhe.

₁₇Uyawuva umthandazo weendwayi,

azisabele nezicelo zazo.

₁₈Le mbali mayibhalelwe isizukulwana esizayo

ze bamdumise uNdikhoyo nâbo bangekazalwa.

₁₉Kaloku wakhangela phantsi yena ephezulu uNdikhoyo,

nditsho uNdikhoyo *esesibingelelweni sakhe;

wajong' emhlabeni esezulwini yena,

₂₀ukuze akuve ukuncwina kwababanjiweyo,

nokuze abakhulule abo bagwetyelwe ukufa.

₂₁Yiyo ke loo nto baya kuyivakalisa eZiyon indumiso yakhe,

bambonge naseJerusalem uNdikhoyo,

₂₂apho sukuba zihlangen' iintlanga nezizwe,

zize kudumisa zinqule uNdikhoyo.

₂₃Mna uNdikhoyo wandaphul' iimpondo ndiselula,

wayifinyeza imihla yobomi bam.

₂₄Kodwa ndazibika ndathi: “Thixo wam,

sukundithatha kwangoku ndingekaluphali.

“Wena uzityhutyha zonke izizukulwana;

₂₅ladalwa nguwe kwantlandlolo ihlabathi;

enziwa nguwe nawo amazulu.

₂₆Xa zizonke ziya kudlula, ube wena usahleli;

ziya kuguga njengeempahla,

uzisonge njengeengubo.

Zona ziya kutshintshwa njengesambatho,

₂₇ube wena ungaguquki, ube wena ungagugi.

₂₈Iintsapho zethu zohlala zikhuselekile,

nenzala yabo yohlala phantsi kwekhusi lakho.”

₁Mbonge *uNdikhoyo, moya wam!

Mandimbonge uNdikhoyo ngomxhelo wam wonke!

₂Moya wam, mbonge uNdikhoyo,

ungaze uyilibale imisebenzi yakhe emihle nanini-nanini:

₃uloxolela zonk' izono zam;

ulophilisa zonk' izifo endinazo;

₄ulohlangula ubomi bam enzonzobileni,

andambese ngezibele nangenceba;

₅ulondenzel' izintw' ezintle ebomini,

ndihlale ndingumqaba-qaba njengokhozi.

₆NguNdikhoyo obonelela abacinezelweyo ubulungisa;

ewe, nguye obagwebelayo bonke ngokungenaxanasi.

₇Wamazisa icebo lakhe uMosis;

wawabonisa amaSirayeli amandla akhe.

₈UNdikhoyo unenceba nesisa;

uqumba kade, yimvuze-mvuze enobubele.

₉Kaloku akasolok' engxolisa, yaye akananqala.

₁₀Akasohlwayi njengoko sifanelwe kukohlwaywa,

engaziphindezeli ngokwezigqitho zethu.

₁₁Kungangokuba kude kwesibhakabhaka emhlabeni

ukubalasela kwezibele zakhe kwabamhlonelayo;

₁₂ulogxoth' izono zithi qelele kuthi

njengempumalanga nentshonalanga.

₁₃Bufana nomzali kubantwana

ububele bukaNdikhoyo kwabamnik' imbeko.

₁₄Kaloku uyasazi into esiyiyo;

uyaqonda ukuba siluthuli.

₁₅Yen' okokwakhe umntu uyafana nje nengca:

uyakhula, achume okwentyatyambo.

₁₆Suka uvuthuze won' umoya,

iphephethek' intyatyambo,

ingab' ibekho kuloo ndaw' ibikad' ikuyo.

₁₇Ke zon' izibele zikaNdikhoyo zivelela abamhloneleyo;

uhlala enobubele kwizizukulwana ngezizukulwana,

₁₈kwabanyanisekileyo kumnqophiso wakhe

nabathobela imithetho yakhe.

₁₉UNdikhoyo ungqendev' esihlalweni sakhe ebhotw' ezulwini;

ulawulo lwakhe luqhakamshela ihlabathi liphela.

₂₀Mbongeni uNdikhoyo, nina zithunywa zakhe ezinamandla;

mbongeni, nina nibalasele ngokumthobela;

liphulaphuleni ilizwi lakhe.

₂₁Mbongeni, uNdikhoyo, nina mikhosi yezulu;

mbongeni, nina zicaka zakhe.

₂₂Nani zidalwa, khanimbonge nonke,

kuzo zonk' iindaw' alawula kuzo.

Nawe, moya wam, mbonge uNdikhoyo!

₁Mbonge *uNdikhoyo, moya wam!

Ubungangalala bakho, Ndikhoyo, Thixo wam, buyamangalisa!

Uzithe wambu ngesihomo nesithozela;

₂ulowambath' ukukhanya, kwanga yingubo;

ulotwabulul' isibhakabhaka, wanga wanek' intente;

₃ulomis' iintsika zendlu yakhe emanzini,

enze iinqwelo ngamafu,

achankcathe phezu kwamaphik' omoya;

₄ulowenz' imimoya izithunywa zakhe,

nemiban' elenyay' ibe zizicaka zakhe.

₅Zabekwa nguw' iziseko zomhlaba

ze zingashuku-shukunyiswa bani.

₆Wawugquma ngenzonzobil' olwandle,

wang' uwambes' ingubo,

atshw' amanzi azithi gqume iintaba.

₇Uthe wakuwakhalimel' abaleka;

zakuvakal' iindudumo zezwi lakho,

aphaphathek' elatyuza.

₈Ehl' iintaba neenduli, abhek' ezantsi,

apho wawuthe maze aye khona.

₉Kaloku wamis' imid' amanz' angegqithi kuyo,

hlez' aphind' awugubungel' umhlaba.

₁₀Ulogqabhuz' imithombo ezintlanjeni,

ibaleke phakathi kweenduli,

₁₁apho kusel' izilwanyana,

nalaph' amaqwarh' athob' unxano.

₁₂Kulapho zakhela khon' iintaka,

zintyiloz' emasebeni emithi.

₁₃Ulonkcenkceshel' iintaba ngeemvula zaphezulu;

uchumil' umhlaba ziintsikelelo zakho.

₁₄Ulontshulisel' iinkomo ingca,

akhulisel' abantu izityalo,

kuvel' isivuno sokutya,

₁₅newayin' echwayitisayo,

amafuth' okuthambisa,

kunye nesonka sokubondla.

₁₆Iyifumana kanobom imvula imithi kaNdikhoyo,

loo mithi yemisedare awayityala eLebhanon.

₁₇Iintaka zizakhela kuyw' iindlwana zazo,

neengwamza zakhel' emikhobeni.

₁₈Won' amatshabanqa ahlal' ezingxondorheni,

ziz' iimbila zibalekele emaweni.

₁₉Iinyanga zibalwa ngokufa kwenyanga,

nelanga liyalazi ixesha lokutshona kwalo.

₂₀Ubusuku benziwa nguwe,

ukuz' izilwanyana zihamba-hambe.

₂₁Amathol' eengonyam' ayagragram' ezingela,

efuna ukuty' okuvela kuThixo.

₂₂Ukuphuma kwelanga ziyemka zonk' izilo,

ziye kulal' ezikhundleni zazo.

₂₃Bandul' ukuphum' abantu baphangele,

basebenze kude kutshon' ilanga.

₂₄Hay' ubuninzi bezintw' ozenzileyo, Ndikhoyo!

Uzenze ngobulumko xa zizonke;

uzel' umhlaba zizintw' ezidalwe nguwe.

₂₅Phaya esithabazini solwandle kukho inyambalala yezilo;

kukho ezikhulu, kukho nezincinane.

₂₆Kuhamba iinqanawa apho,

kanti nomnenga udlwabiza udloba kulo,

eso silw' esadalelwa loo nto nguwe.

₂₇Zonke ezo zinto zijonge kuwe,

ukuz' uzondle ngexesh' ekufuneka zitye ngalo.

₂₈Wakuzipha ziyatya,

ze wakuzondla zihluthe.

₂₉Uthi wakuzifulathela, zoyike, zixhale;

wakuwuthatha umphefumlo zife, zibuyele eluthulini.

₃₀Wakuthumela umoya wakho ziyadalwa,

butsho buvuseleleke ubuso bomhlaba.

₃₁Masime ngonaphakade isihomo nesithozela sakho, Ndikhoyo;

wanga ungakonwabisa umsebenzi owenzileyo.

₃₂Wena uthi ungawujonga nje ube selungcangcazela umhlaba,

uzichukumis' iintaba zitsho ziphum' umsi.

₃₃Ndomombelel' uNdikhoyo lo gama ndisaphilayo,

ndimbong' uThixo wam lo gama ndisadl' ubomi.

₃₄Wanga angavuyiswa ngumbongo wam uNdikhoyo,

kuba yena uyandivuyisa.

₃₅Mababhangisw' aboni ehlabathini;

makangabikho konk' amatshijolo.

Wena moya wam, mbonge uNdikhoyo;

ewe, mbonge uNdikhoyo!