To The Word – Day 189

₁Awu! Kusisizungu kwisixeko

ebesifudula sinenyambalala yabantu,

nqwa nomhlolokazi obesakuba nodumo ezizweni.

Lowo wayeyikumkanikazi yamazwana suka waba likhobokazana ngoku.

₂Uyangqukruleka elila ebusuku,

izidlele zakhe zisihla iinyembezi.

Kuzo zonke izithandwa zakhe akukho simthuthuzelayo;

bonke abahlobo bakhe bamngcatshile, suka baziintshaba zakhe.

₃UJuda uye ekuthinjweni, weva iinkxwaleko nokusebenza nzima.

Uhleli phakathi kweentlanga; akakufumani ukuphumla.

Bamfumene bonke abamsukelayo, bamxina macala onke.

₄Zizilile iindlela ezibheka eZiyon,

kuba akukho mntu uzayo kwimisitho yakhe.

Asebugxwayibeni amasango akhe;

ababingeleli bakhe babandezelekile;

lusizi lodwa kumthinjana,

ke yena usentlungwini ekrakra.

₅Ababandezeli bakhe basuke baba ziinkosi zakhe;

iintshaba zakhe azinaxhala.

Ubekwe elusizini *nguNdikhoyo ngenxa yezikreqo zakhe ezininzi.

Abantwana bemkile ezweni labo, bangabathinjwa beentshaba.

₆Buphele tu ubungangamsha bentombi enguZiyon.

Iziphathamandla zayo zinjengeenyamakazi ezingenadlelo;

zibuthathaka zinjalo ziyasaba, zibaleka abasukeli.

₇Ngemihla yayo yenkxwaleko nokubhadula

iJerusalem iyabukhumbula bonke ubuncwane bayo bamandulo.

Akubangakho mntu wakuyinceda xa abantu bayo babesoyiswa lutshaba.

Iintshaba zayo zayiwa ngeentsini zakubona isiphelo sayo.

₈IJerusalem yone kakhulu,

yaza ke ngoko yaba nomlaza.

Bonke ababefudula beyihlonele basuke bayidela,

kuba bebubonile ubuze bayo.

Nayo itsho ngencwina,

ide izifihle ubuso.

₉Ukungcola kwayo kunamathele kwizivatho zayo;

ayilikhumbulelanga ikamva layo,

kwaza kwakhwankqisa ukuwa kwayo.

Akubangakho namnye uyithuthuzelayo.

Ithi: “Awu, Ndikhoyo, bona iimbandezelo zam;

kuba kaloku utshaba luyazigwagwisa.”

₁₀Iintshaba zayo zibuphangile boke ubuncwane bayo;

zangena ijongile iintlanga kweyona ndawo ingcwele –

abantu ongabavumelanga, Ndikhoyo, ukuba bangene ebandleni lakho.

₁₁Abantu bayo bonke batsho ngencwina

xeshikweni behamba befuna ukutya;

bancama nempahla yabo yexabiso,

befuna ukudla khon' ukuze bahlaziyeke.

Ithi: “Awu, Ndikhoyo, khangela ubone,

kuba ndingodeliweyo.”

₁₂Asilutho na kuni, nonke nina nidlula ngendlela?

Khangelani nibone:

ikho na intlungu enjengeyam andihlabanisele ngayo uNdikhoyo,

intlungu andihlisele yona ngemini yokuvutha komsindo wakhe?

₁₃Wathoba umlilo ophuma phezulu,

watsho waya kufikelela ezantsi emathanjeni.

Uzithiyele ngomgibe iinyawo zam,

ndatsho ndabuya umva.

Wandenza ndanesizungu,

ndatyhafa imini yonke.

₁₄Izikreqo zam zibhijelene;

ziyidyokhwe isandla sikaNdikhoyo esindibophe ngayo,

zihleli zinzi entanyeni yam.

INkosi iwaqobile amandla am;

indinikezele esandleni sâbo ndingenakumelana nabo.

₁₅INkosi izibukule zonke izithwala-ndwe zam;

ihlanganise umkhosi ukuze ucumze umlisela wakowethu.

INkosi iyinyhashe esixovululweni intombi enguJuda.

₁₆Kungoko ndisenza isimbonono,

amehlo am ephalala iinyembezi.

Akukho bani ukufuphi kum ukundithuthuzela;

akukho mntu uhlaziya umoya wam.

Abantwana bam baphalele

kuba utshaba loyisile.

₁₇IZiyon iyazolula izandla zayo,

kodwa ayinamthuthuzeli.

UNdikhoyo wawenza umyalelo ngoYakobi wokuba abamelwane bakhe babe ziintshaba zakhe;

kubo iJerusalem yinto enezothe.

₁₈Ulilungisa uNdikhoyo,

kodwa ndiphikisene nomlomo wakhe.

Phulaphulani, nonke nina zizwe,

niyibone intlupheko endikuyo.

Umlisela nomthinjana wakowethu usekuthinjweni.

₁₉Ndakhala kwizithandwa zam,

kodwa zandikhohlisa.

Ababingeleli bam, namadoda amakhulu, âtshabalala esixekweni

efuna ukudla ukuze ahlaziyeke.

₂₀Khangela, Ndikhoyo, ndibandezeleke kakhulu;

amathumbu am ayaxuxuzela.

Intliziyo yam ikhathazekile,

kuba ndisuke ndangenwa luvukelo.

Phandle phaya ikrele liyabhubhisa,

ngaphakathi kukufa kodwa.

₂₁Ivakele incwina yam,

kodwa akakho ondithuthuzelayo.

Zonke iintshaba zam zivile ngobubi obundihleleyo;

ziyagcoloda yinto ondenze yona.

Ibinga ingade ifike imini owawuyixelile,

ukuze nazo zifane nam.

₂₂Khawuyibone yonke inkohlakalo yazo,

nazo uziphathe ngale ndlela undiphethe ngayo

ngenxa yazo zonke izikreqo zam.

Ndincwina ndincwinile;

umxhelo wam uwile.

₁Awu! Lisibekele kwintombi

enguZiyon ngenxa yomsindo weNkosi.

Isiphose phantsi isihombo sikaSirayeli,

sasuka ezulwini, sakhahleleka emhlabeni;

ayasikhumbula isihlalo seenyawo zayo

ngomhla womsindo wayo.

₂INkosi iziginye zonke izindlu zikaYakobi ingenanceba;

emsindweni wayo izidilizile iinqaba zentombi enguJuda.

Ubukumkani neziphathamandla ubukhahlele emhlabeni wabuhlazisa.

₃Ekuvutheni komsindo wayo imnqumle iimpondo uSirayeli.

Isirhoxisile isandla sayo sokunene kwakuvela utshaba.

Injengomlilo ovuthayo phakathi kwaYakobi,

otshisa konke phambi kwawo.

₄Isityede okotshaba isaphetha sayo;

isandla sayo sokunene sesilungele ukutola oku kombandezeli.

Izibulele zonke iinzwana neenzwakazi;

umsindo wayo iwuthulule okomlilo phezu kwentente yentombi enguZiyon.

₅INkosi isuke yafana notshaba;

imginyile uSirayeli.

Iwabimbilizile onke amabhotwe akhe,

yazidiliza iinqaba zakhe.

Ikuphinda-phindile ukuzila nokulila kwintombi enguJuda.

₆Iyichitha-chithile indlu yayo ngokungathi liphempe esitiyeni,

yaza yayitshabalalisa indawo yayo yokuhlangana.

*UNdikhoyo wenza ukuba iZiyon iyilibale imisitho

ngokunjalo *neMihla yokuPhumla;

ngenxa yokuvutha komsindo wakhe umbukule ukumkani kwanombingeleli.

₇*UNdikhoyo ulilahlile iqonga lakhe lamadini,

wasicekisa isibingelelo sakhe esisodwa.

Iindonga ezikhusela amabhotwe akhe uzinikezele esandleni seentshaba;

ziyaxokozela endlwini kaNdikhoyo njengangomhla womsitho.

₈UNdikhoyo wagqiba ekudilizeni iindonga ezirhangqe intombi enguZiyon;

wawolula umtya wokulinganisa,

waza akasibamba isandla sakhe ekutshabalaliseni.

Kwaba sisijwili kwiinqaba neendonga;

zadilika zasuka zanyamalala.

₉Amasango ayo asuke azika emhlabeni;

uyaphule wayikroboza imivalo yawo.

Ukumkani neziphathamandla zayo bakwelasemzini phakathi kweentlanga;

umthetho awusafundiswa;

*abashumayeli bayo abasafumani mibono ivela kuNdikhoyo.

₁₀Amadoda amakhulu entombi enguZiyon athe bhaxa emhlabeni ethe cwaka.

Azigalele ngomhlaba entloko, abhinqa ezirhwexayo ezila;

umthinjana waseJerusalem uqubude wawa ngobuso emhlabeni.

₁₁Amehlo am akaboni ziinyembezi;

amathumbu am ayaxuxuzela;

ndiphelelwe sisibindi,

ngenxa yokubhuqwa kwabantu bakowethu,

kuba abantwana neentsana baphelelwe ngamandla ezitalatweni zesixeko.

₁₂Babuza koonina bathi:

“Siphi na isonka nesiselo?”

xa besiwa isiduli ezitalatweni zesixeko, njengamadoda awoselweyo,

xa beyoba besezandleni zoonina.

₁₃Ndingathetha ndithini na kuwe?

Ndingakuthelekisa nantoni, ntombindini Jerusalem?

Ndingakufanisa nantoni, khon' ukuze ndikuthuthuzele, ntombindini Ziyon?

Inxeba lakho linzulu okolwandle.

Ngubani ongakunyangayo?

₁₄Imibono yabashumayeli bakho yayingamampunge nenkohliso;

abalutyhilanga ukreqo lwakho ukuze kunqandwe ukuthinjwa kwakho.

Izihlabo abazibhekise kuwe zazibubuxoki obulahlekisayo.

₁₅Bonke abadlula kuwe bakuqhwabela izandla;

bayaphoxisa, banikina iintloko,

bekhangele kwintombi enguJerusalem,

besithi: “Ngaba esi sesiya sixeko bekufudula kusithiwa yinzwakazi egqibeleleyo, yimihlali yehlabathi liphela?”

₁₆Uza kuba ngundaba-mlonyeni kwiintshaba zakho zonke,

ziphoxise, zikunyevulele,

zisithi: “Simginyile khona!

Kunini silulindile olu suku!

Salufumana, sada salubona.”

₁₇UNdikhoyo wenze ngokwezicwangciso zakhe;

lizalisekile ilizwi lakhe awalixela kwakudala.

Ukubhukuqe engenanceba,

wenza ukuba iintshaba zakho zibe nemihlali;

ewe, uluphakamisile uphondo lwababandezeli bakho.

₁₈Abantu bakhala eNkosini, besithi:

“Nina zindonga zeZiyon, iinyembezi maziqukuqele okomfula imini nobusuku;

musani ukuphumla, namehlo enu ningawaphumzi.

₁₉Vukani nihlahlambe ebusuku ekungeneni komlindo wobusuku;

intliziyo yenu mayiphuphume okwamanzi phambi kweNkosi.

Ziphakamiseleni kuyo izandla zenu, ngenxa yobomi babantwana benu

abayobayo ngenxa yephango ekungeneni kwazo zonke izitalato.”

₂₀Khangela, Ndikhoyo, ubone;

ngoobani owakha wabenjenje?

Ingaba abafazi mabadle inzala yabo na,

abantwana ababampelesayo?

Ingaba umbingeleli nomshumayeli uthi mababulawe bafele esibingelelweni seNkosi na?

₂₁Eluthulini lwezitalato kulele umfana nexhego;

umlisela nomthinjana wakowethu ufe ngekrele.

Babulewe nguwe ngomhla wengqumbo yakho,

ubaxabela ungenalusini tu!

₂₂Kwanjengaxa umemela emsithweni wenjenjalo ukufunza kum esikhumbeni;

lunxunguphalo macala onke.

Akukho namnye owabhungcayo wasinda ngomhla wengqumbo kaNdikhoyo;

utshaba lwam lwabatshabalalisa abo bendibampelesa ndibondla.

₁Mna ndiyindoda eyivileyo imbandezelo

ngenxa yentonga yomsindo wakhe.

₂Undibhexeshile wandenza ndahamba ebumnyameni endaweni yokukhanya.

₃Ewe, isandla sakhe sindijikele saphindelela imini yonke.

₄Unditsho ndashwabana ulusu nenyama;

uwaphule amathambo am.

₅Undingqingile wandirhangqa ngeenzingo nentlupheko.

₆Undenze ndahlala ebumnyameni, ndangathi ngabo bafa mandulo.

₇Undibiyele macala onke ukuze ndingabi nakuphuma;

undikhonxe ngamakhamandela obhedu andisindayo.

₈Naxa ndikhala ndicela uncedo,

uyawuthintela umthandazo wam.

₉Umgaqo wam uwuvale ngamatye aqingqiweyo;

iindlela zam uzenze zaba goso-goso.

₁₀Njengebhere elaleleyo, nanjengengonyama ezifihlileyo,

₁₁undikhuphe emendweni wandiqwenga,

wandishiya apho ndingxwelerhekile.

₁₂Wasityeda isaphetha sakhe,

wandimisa ndayitekeni yeentolo zakhe.

₁₃Undosele ngaphakathi ngeentolo zomphongolo wakhe.

₁₄Ndaba yintlekisa yabantu bonke bakowethu,

bephoxisa ngam imini yonke ngeengoma ezingam.

₁₅Wandikakaza ndanela imithana ekrakra,

wandiseza ndahlutha umhlonyane.

₁₆Amazinyo am uwaphule ngegrabile,

wandinyhasha eluthulini.

₁₇Ndiluhluthiwe lwemka kum uxolo,

ndawalibala amathuba enkqubela.

₁₈Ngoko ndithi: “Liphelile iwonga lam

nako konke ebendithembele kuko *kuNdikhoyo.”

₁₉Zikhumbule iimbandezelo zam nokubhadula kwam –

umhlonyane nenyongo.

₂₀Ndahlala ndizikhumbula ezo zinto,

waye umphefumlo udakumbile ngaphakathi kum.

₂₁Konke oku ndiya kukugcina entliziyweni yam;

ngoko ke ndohlala ndinethemba.

₂₂Kungenxa yezibele zikaNdikhoyo singatshabalalanga nje,

kuba inceba yakhe ayinasiphelo.

₂₃Zihlala zintsha imihla ngemihla;

kukhulu ukuthembeka kwakhe.

₂₄Umoya wam uthi: “Isabelo sam nguNdikhoyo;

ngako oko ndiya kukholosa ngaye.”

₂₅UNdikhoyo ulungile kwabo bathembele ngaye,

kwabo bamfunayo.

₂₆Kulungile ukuthi cwaka,

uthembe usindiso oluvela kuNdikhoyo.

₂₇Kulungile ukuba umntu ayithwale kwasebutsheni bakhe idyokhwe.

₂₈Makahlale yedwa athi cwaka,

kuba uyithwaliswe nguNdikhoyo.

₂₉Makaguqe, ubuso buthi nqo eluthulini –

lisenokubakho ithemba.

₃₀Makanikele isidlele sakhe kulowo unga angambetha,

akwamkele ukuhlaziswa, anele kuko.

₃₁Kaloku iNkosi ayimlahli ngonaphakade umntu wayo.

₃₂Nakuba eyizisa intlungu ubuya abe nemfesane.

Kaloku lungako uthando lwakhe olungazange lwaphela.

₃₃Asingomnqweno wakhe ukuthumela imbandezelo okanye inkxwaleko koonyana babantu.

₃₄Ukuwacumza ngonyawo onke amabanjwa emhlabeni,

₃₅nokugqwetha ityala lomntu emehlweni kaPhezukonke,

₃₆nokungayilamli ngobulungisa imbambano yomntu –

ingaba iNkosi ayiziboni ezi zinto?

₃₇Ngubani onokuthetha kwenzeke xa iNkosi ingamyalelanga?

₃₈Azizi ngokutsho kukaPhezukonke na izinto ezimbi nezilungileyo?

₃₉Kungani na ukuba umntu abe nezikhalazo lo gama esaphila,

xa esohlwaywa ngenxa yezono zakhe?

₄₀Masikhe siziphengulule sizigocagoce iindlela zethu,

size sibuyele kuNdikhoyo.

₄₁Iintliziyo zethu kunye nezandla zethu

masiziphakamisele kuThixo ezulwini, sithi:

₄₂“Sikreqile, sakuvukela,

waza wena akwasixolela.”

₄₃Wena wambethe umsindo wasisukela,

wasibulala ungenanceba.

₄₄Uzigqubuthele ngelifu

ukuze kungabikho mthandazo ufikelelayo kuwe.

₄₅Usenze inkunkuma nomququ phakathi kwezizwe.

₄₆Zonke iintshaba zethu ziphoxisa ngathi.

₄₇Siyangcungcutheka phakathi kwemihadi imbhubho nentshabalalo.

₄₈Amehlo am agxiza iinyembezi

kuba abantu bakowethu bayatshabalala.

₄₉Iinyembezi ziyaqukuqela ukuphuma emehlweni am,

zaye aziyi kuyeka, zingayi kunqamka,

₅₀de uNdikhoyo akhangele esezulwini abone.

₅₁Endikubonayo kuwenza buhlungu umphefumlo wam

ngenxa yeentombi zonke zesixeko sakowethu.

₅₂Abo baziintshaba zam ngaphandle kwesizathu

bandizingela njalo oku kwentaka.

₅₃Bazama ukundibulala ngokundeyelisela emhadini,

baza bandigibisela ngamatye.

₅₄Andigubungela amanzi,

ndada ndathi: “Kuphelile okwam!”

₅₅Ewe, Ndikhoyo, ndilibizile igama lakho ndisezantsi emhadini.

₅₆Undivile ndikubongoza ndisithi:

“Musa ukuyivingca indlebe yakho xa ndibhenela kuwe ndicela uncedo.”

₅₇Usondele ndakukubiza,

wathi: “Musa ukoyika.”

₅₈Ewe, Nkosi, undilamlele,

wabuhlangula ubomi bam.

₅₉Ndikhoyo, uyibonile ingcinezelo ebendikuyo;

nceda undilamlele kwityala lam.

₆₀Uyibonile indlela abaziphindezela ngayo kum,

nawo onke amayelenqe abo ngam.

₆₁Kwowu, Ndikhoyo, uzivile izinyeliso zabo

nawo onke amayelenqe abo ngam.

₆₂Iintetho neengcamango zabo zichasene nam imihla yonke.

₆₃Bakhangele: behleli, behamba, benza amagwijo ngam.

₆₄Ndikhoyo, babuyekeze ngokufanelekileyo ngokwezenzo zezandla zabo.

₆₅Ziqaqadekise iintliziyo zabo, size sibe phezu kwabo isiqalekiso sakho.

₆₆Basukele usemsindweni,

ubatshabalalise baphele phantsi kwezulu likaNdikhoyo.

₁Awu! Igolide ilahlekene nobukhazikhazi;

suka eyona-yona yagqola!

Amatye exabiso angcwele athe saa ekungeneni kwesitalato ngasinye.

₂Umlisela oliqhayiya laseZiyon,

obufudula ixabiso lawo nqwa negolide,

kodwa ngoku nqwa neembiza zomdongwe

ezingumsebenzi wezandla zombumbi.

₃Neempungutye ziyancancisa, ziwondle amathole azo,

kodwa abantu bam bangqwabalala njengenciniba yasentlango.

₄Iintsana zinxanwe lwada ulwimi lwee nca enkalakahleni.

Abantwana bakhalela isonka, kodwa akukho mntu ubaphayo.

₅Ababefudula besitya izimuncu-muncu ngoku bazula-zula ezitalatweni behlwempuzekile.

Ababekhula benxiba ezimbeje-mbeje namhla bagqusha eluthuthwini.

₆Isikreqo sabantu bakowethu singaphaya kwesono saseSodom,

yona yadilizwa ngequbuliso kungekho bani ufake isandla.

₇Iinkosana zayo zazikhanya ngaphezu kwekhephu,

zimhlophe kunobisi,

imizimba yazo ibukeka ngaphezu kweerubhi,

zinomkhitha okwesafire.

₈Kodwa ngoku zimnyama kunomsizi;

azaziwa xa zihamba esitalatweni.

Ulusu lwazo lushwabene lwathi nca emathanjeni;

lome okweenkuni.

₉Banethamsanqa abafe ngekrele kunabo babulewe yindlala;

bayaphela ngenxa yephango, kuba akukho kudla emasimini.

₁₀Abafazi ababesakuba nemfesane babapheke ngezabo izandla abantwana babo,

baba kukudla kwabo ngexesha lokutshatyalaliswa kwabantu bakowethu.

₁₁*UNdikhoyo uyikhuphe yaphelela ingqumbo yakhe;

uwuthulule umsindo wakhe ovuthayo.

Uwuphembile umlilo eZiyon, wazitshisa iziseko zayo.

₁₂Iikumkani zehlabathi zazingakholwa,

nditsho nkqu abemi bonke belimiweyo,

ukuba iintshaba nababandezeli bangaze bangene emasangweni eJerusalem.

₁₃Kodwa ke kwenzekile oko ngenxa yezono zabashumayeli bayo,

nezikreqo zababingeleli bayo,

abaliphalaze kuyo igazi lamalungisa.

₁₄Ngoku baphampatha ezitalatweni okwabantu abaziimfama.

Igazi libadyobhe kangangokuba akukho mntu unga angazichukumisa izambatho zabo.

₁₅“Mkani; *nigqwalisekile!” batsho abantu kubo.

“Sukani; sukani; ningakhe nilinge ukusondela kuthi!”

Bakuba bebhacele ezintlangeni

zona ziya kuthi ngabo: “Abanakuhlala apha.”

₁₆Ubachitha-chithe ngokwakhe uNdikhoyo;

uyekile ukubalondoloza.

Abasahlonelwa ababingeleli;

akasajongelwe nto amadoda amakhulu.

₁₇Amehlo ethu ade amfiliba kukujonga uncedo olungekhoyo;

simi bhuxe kwiimboniselo zethu,

sijonge uhlanga olungenako ukuhlangula.

₁₈Sichwechwelwa ngamadoda asizingelayo

ngokokude singabi nakuhamba ezitalatweni zethu.

Sisondele isiphelo sethu;

ifinciwe imihla yethu;

ewe, sifikile isiphelo sethu.

₁₉Ababesisukele babenesantya ngaphezu kwesokhozi;

basileqa ezintabeni, basilalela entlango.

₂₀Umthanjiswa kaNdikhoyo, obubomi nomphefumlo wethu, wabanjiswa emigibeni yabo.

Thina besiba xa siphantsi kwesithunzi sakhe

soba ngabantu phakathi kwezizwe.

₂₁Yiba nemihlali uvuye, ntombi enguEdom,

wena ohlala elizweni laseUze.

Phofu nawe uza kuyirhabula le ndebe;

uya kunxila uzihlube uhambe ze.

₂₂Wena ntombindini enguZiyon,

siza kufikelela esiphelweni isohlwayo sakho;

akuyi kolulwa ukuthinjwa kwakho.

Kodwa, ntombindini enguEdom, úya kukohlwaya ngesikreqo sakho,

ayityhile inkohlakalo yakho.

₁*Ndikhoyo, yikhumbule into eyenzekileyo kuthi;

jonga ukubone ukuhlaziswa kwethu.

₂Ilifa lethu linikwe abasemzini,

izindlu zethu zanikwa abangeneleli.

₃Saba ziinkedama ezingenayise,

basuka oomama bafana nabahlolokazi.

₄Siwathenga ngemali amanzi okusela,

ngokunjalo neenkuni siyazihlawulela.

₅Abasitshutshisayo basibambe ngobhongwana;

sidiniwe kodwa asikuzuzi ukuphumla.

₆Solulela izandla kwiJiputa kwaneAsiriya,

khon' ukuze sihluthe sisonka.

₇Kone oobawo, kodwa abasekho;

ngoku thina sithwele iziphumo zezikreqo zabo.

₈Silawulwa zizicaka;

akukho namnye onokusihlangula ezandleni zazo.

₉Ukutya sikuzuza ngokubeka ubomi bethu esichengeni

ngenxa yekrele elisentlango.

₁₀Ulusu lwethu lutshisa okweziko

ngenxa yefiva ebangwa yindlala.

₁₁Abafazi badlwengulwe eZiyon,

ngokunjalo iintombi ezidolophini zakwaJuda.

₁₂Iziphathamandla zixhonywe ngezandla zazo;

akahlonelwa amadoda amakhulu.

₁₃Amadodana abila esoma ngamatye okusila;

abafana basindeka phantsi kweenyanda zeenkuni.

₁₄Amadoda amakhulu akasekho emasangweni esixeko;

abafana bayiyekile ingoma.

₁₅Iintliziyo zethu azinamihlali;

sizilile endaweni yokuxhentsa.

₁₆Isithsaba siwile ezintlokweni zethu.

Athi ke thina, sonile!

₁₇Ngenxa yoko zitsho zatyhafa iintliziyo zethu;

ngenxa yezo zinto abona mfiliba amehlo ethu.

₁₈Kaloku intaba yeZiyon yinkangala;

seyisisikhundla seempungutye.

₁₉Wena, Ndikhoyo, uhleli ngonaphakade;

ulawulo lwakho luhlala luhleli izizukulwana ngezizukulwana.

₂₀Kungani ukuba usoloko usilibala?

Kungani ukuba usilahle ithuba elingaka?

₂₁Sibuyisele kuwe, Ndikhoyo, ukuze nathi siguquke;

sihlaziye njengakwimihla yamandulo.

₂₂Ngaba usilahle kwaphela na,

wasiqumbela ngokukhulukazi?

₁*UNdikhoyo, uThixo uSomandla, uyathetha;

ubhekisa kwihlabathi jikelele,

ukususela empumalanga kuye entshonalanga.

₂UThixo ubengezela eZiyon,

isixeko esibalaseleyo ngobuhle.

₃Uyeza uThixo wethu;

yena akayi kuthi tu.

Phambi kwakhe kudangazela umlilo;

uphahlwe sisitshu sesivungu-vungu.

₄Umema amazulu kwanehlabathi,

xa aza kugweba abantu bakhe.

₅Uthi: “Bahlanganiseleni kum abam abathembekileyo,

abanqophisene nam ngombingelelo.”

₆Amazulu ngokwawo abalisa ngobulungisa bukaThixo;

kaloku umgwebi ikwanguye ngokwakhe.

₇“Khaniphulaphule, bantu bam, ndithethe;

ndiyakumangalela, Sirayeli.

Mna Thixo ndinguThixo wakho.

₈Andiyigxeki imibingelelo yakho;

amadini akho atshiswayo asoloko ephambi kwam.

₉Kambe azisamkeleki iinkunzi zakho zeenkomo;

ngokunjalo neebhokhwe zemihlambi yakho.

₁₀Kaloku zezam zonke izilwanyana

neenyamakazi ezikumawaka-waka eenduli.

₁₁Xa zizonke iintaka ndiyazazi;

nezinambuzane zamathafa zezam.

₁₂“Xa bendingalambayo, bendingayi kukubikela.

Kaloku lelam ihlabathi nezinto zalo.

₁₃Ngaba ndiyayitya inyama yeenkunzi?

Khona, ndiyalisela igazi leebhokhwe?

₁₄Umbingelelo wakho kuThixo mayibe kukubulela,

uzifezekise izithembise zakho kuPhezukonke.

₁₅Zibike kum xa usengxakini;

mna ndiya kukuhlangula, ke wena undidumise.”

₁₆Kambe ke kwabo bakhohlakeleyo uThixo uthi:

“Ngani ukuba niyicengceleze imithetho yam,

nincokole ngomnqophiso wam?

₁₇Kaloku niyayenyanya ingqeqesho;

aniyithobeli nemiyalelo yam.

₁₈Nakudibana nesela, nihlobana nalo;

abakrexezi niyevana nabo.

₁₉“Usoloko uthetha kakubi;

uqhelene nentlebendwane.

₂₀Uncokola kakubi ngamawethu;

uhleba nomntakanyoko lo.

₂₁Ndinibukele nizenza ezi zinto,

andathetha nada nacinga ukuba nam ndifana nani.

Kodwa ke ngoku ndiyakhalima;

ndilaneka phambi kwenu ityala.

₂₂“Phulaphulani, nina bangandikhathalelanga,

hleze ndiniqwenge, angabikho nonqandayo.

₂₃Obingelela ngokubulela uyandidumisa;

uzilungiselela ukusindiswa nguThixo.”