To The Word – Day 187

“Akananyana na uSirayeli?

Akanandlalifa na?

Kutheni uMilikom elithimbile ilifa likaGadi?

Kutheni iidolophu zakwaGadi zimiwe ngabantu bakaMilikom?”

₂Kambe ke, nguwo lo umlomo kaNdikhoyo:

“Niyabona, iyeza imihla

endiya kuyihlabela umkhosi iRabha yama-Amon.

Iya kuba yimfumba yamabhodlo,

iilali zayo zitshiswe ngomlilo.

Ewe, uSirayeli uya kubagxotha abo babemgxothile.”

Utsho uNdikhoyo.

₃“Yenza isijwili, wena Heshbhon,

kuba iAyi ibhuqiwe.

Khalani, zilali zaseRabha;

bhinqani ezirhwexayo nizile.

Zula-zulani nididekile,

kuba uMilikom uya kuthinjwa,

nditsho yena kunye nababingeleli neziphathamandla zakhe.

₄Kutheni niqhayisela ngeentili zenu,

iintili zenu ezichumileyo?

Hayi bo, bantundini abakreqayo,

abakholosa ngobutyebi babo!

Nithi: ‘Ngubani onokusihlasela?’

₅Niyabona, ndiza kunihlisela unkwantyo

luvela kubantu abaningqongileyo.”

Lowo ngumlomo weNkosi uNdikhoyo onamandla onke.

“Niya kuchitha-chithwa,

elowo asabe ngeyakhe indlela,

kungabikho bani uzihlanganisayo iimbacu.

₆Kambe ke, emva koko, ndiya kumbuyisela kundalashe uAmon,

adle ngendebe endala.”

Lowo ngumlomo kaNdikhoyo.

“Akusekho bulumko na kwaTeman?

Sezaphelelwa ngamacebo na iingqondi?

Sebutshitshile na ubulumko bazo?

₈Jikani nisabe, nizimele kwimiqolomba emnyama, nina bemi bakwaDedan.

Ndiza kumhlisela ishwangusha uEsawu,

kuba lifikile ixesha lokuba ndimohlwaye.

₉Andithi xa kuvunwa iidiliya ubakho umbhikico oshiyekayo?

Andithi xa kufika amasela ebusuku ayeba ade anele?

₁₀Kodwa mna ndiya kumhluba konke anako uEsawu,

ndimkhuphulule kwezo ndawo azimele kuzo,

angabi nako tu ukufihlakala.

Uya kucinywa igama yena nenzala yakhe,

angabi saba nabo abazalwana nabamelwane.

₁₁Zishiyeni iinkedama zenu – ndiya kuzondla;

kwanabahlolokazi benu mabakholose ngam.”

₁₄Ndive udaba, luvela kuNdikhoyo,

kuthunywe isigidimi ezintlangeni ukuthi:

“Hlanganani, nilungele imfazwe;

qulani, nizimisele ukuyihlasela.”

₁₅“Edom, ndiza kukwenza ube mncinane ezintlangeni,

udeleke ebantwini.

₁₆Ulahlekisiwe kukoyikeka kwakho nalikratshi lakho,

wena omi ezimfanteni zeengxondorha,

wena ohleli kwiincopho zeentaba.

Nokuba uyakhe phezulu indlu yakho,

yaxela eyokhozi,

ndokuthula apho.”

Lowo ngumlomo kaNdikhoyo.

₁₇“Uya kuba sisothuso uEdom.

Bonke abadlulayo baya kuthi makatha,

baphoxise ngenxa yokubhukuqwa kwakhe.

₁₈Nqwa nokubhukuqwa kweSodom neGomora needolophu ezingqongileyo

kuya kuba njalo ukubhukuqwa kwelamaEdom –

akuyi kuba sabakho bani uhlala khona,

kungabikho kwamphambukeli apho.”

Utsho uNdikhoyo.

₁₉“Njengengonyama ephuma kwiintshinyela zamatyholo aseJordan,

isiya emadlelweni ahlala eyokozela,

kuya kuba njalo ukumgxotha kwam ngephanyazo kwelakowabo uEdom.

Ngubani na onyuliweyo nendiya kumalatha ukuze andenzele oku?

Kakade ngubani na onjengam onokumelana nam,

ingubani umalusi onokuxaba endleleni yam?

₂₀Ke ngoko liveni icebo likaNdikhoyo alicebileyo nge-Edom,

izigqibo zakhe agqibe ngazo ngokubhekiselele kubemi bakwaTeman.

Inene, namatakane aya kuqwengwa,

umhlambi uthi khumnqa ngenxa yawo.

₂₁Ihlabathi liya kunyikima sisithonga sokuwa kwabo.

Isandi sokukhala kwabo siya kuvakala de kuye kutsho kuLwandle oluBomvu.

₂₂Khangela, ukhozi luyantinga lundande;

lutweza amaphiko phezu kweBhozera.

Ngaloo mini intliziyo yamagorha akwaEdom

iya kuba njengentliziyo yomfazi ophethwe yinimba.”

“Ihlazekile iHamati neApadi,

kuba kuviwe iindaba ezimbi.

Bancamile, bakhathazekile;

bafana nolwandle olungenakuzola.

₂₄IDamasko ityhafile;

ijikile, yasuka yabaleka.

Ifikelwe kukunkwantya;

ihlelwe yimbandezelo nenimba njengozalayo.

₂₅Hayi ukulahlwa kwesi sixeko ebesisakuba sesidumileyo,

isixeko ebesisakuba yindawo yemihlali!

₂₆Inene, amadodana aso aya kuwa ezitalatweni;

onke amajoni aso aya kuthi cwaka ngaloo mini.”

Ewe, nguwo lowo umlomo kaNdikhoyo onamandla onke; uthi:

₂₇“Ndiya kusintumeka umlilo isixeko saseDamasko,

atshiswe nguwo amabhotwe kaBhenadadi.”

“Phakamani niwahlasele amaKedare,

nibatshabalalise abantu basempumalanga.

₂₉Ziya kuthinjwa iintente zabo nemfuyo yabo,

kumkiwe nemikhusane yabo nempahla esezintenteni zabo,

nditsho kwaneenkamela zabo.

Kuya kumemezwa kubo kuthiwe:

‘Lunxunguphalo macala onke!’

₃₀“Sabani! Balekani ngamandla!

Zimelani kwimiqolomba emnyama, nina bemi baseHazore.”

Lowo ngumlomo kaNdikhoyo.

“Kaloku uNebhukadenezare, ukumkani waseBhabheli,

ucebe icebo malunga nani,

wagqiba izigqibo ngani.

₃₁“Phakamani niye kuhlasela uhlanga oluzonwabeleyo,

uhlanga oluhleli lungenaxhala.”

Lowo ngumlomo kaNdikhoyo.

“Nditsho olungenazingcango namivalo,

uhlanga oluzihlalele lodwa bucala.

₃₂Iinkamela zabo ziya kuphangwa,

imihlambi yabo ngobuninzi bayo ibe lixhoba.

Ndobachitha-chitha baphetshethwe ngumoya abo banwele zichetyiweyo ezintlafunweni.

Ndobahlisela ishwangusha macala onke.”

Lowo ngumlomo kaNdikhoyo.

₃₃“IHazore iya kuba sisikhundla soodyakalashe,

kube senkangala kude kube nini-nini.

Akuyi kuhlala bani khona,

kungabikho mntu uphambukela apho.”

“Niyabona, ndiza kusaphula isaphetha sakwaElam;

eso kanye sisisiseko sobugorha babo.

₃₆ElakwaElam ndiza kulizisela imimoya yomine

ephuma macala onke.

Ndobachitha-chitha kuloo mimoya yonke,

kungabikho luhlanga bangafikiyo kulo abachithiweyo bakwaElam.

₃₇Ndowenza amaElam ankwantye akuqubisana neentshaba ezizungula ubomi bawo,

ndowahlisela intlekele ukuvutha komsindo wam.”

Lowo ngumlomo kaNdikhoyo.

“Ndowaleqa ngekrele, ndide ndiwagqibe.

₃₈Ndiya kumtshabalalisa ukumkani wakhona kunye neziphathamandla zakhe,

ibe ndim olawula apho.”

Lowo ngumlomo kaNdikhoyo.

₃₉“Kambe ke, kwimihla ezayo,

ndombuyisela kundalashe uElam,

adle ngendebe endala.”

Lowo ngumlomo kaNdikhoyo.

₂“Xelani nivakalise ezintlangeni,

niphakamise ibhanile niqononondise.

Musani ukufihlisa, koko yithini:

‘Ithinjiwe iBhabheli;

uhlazekile uBhele;

uMarduki uyankwantya luloyiko.

Zihlazekile izithixo zabo;

ziyankwantya izinto ezingamasikizi abazinqulayo.’

₃Kaloku ihlaselwe luhlanga lwasentla

oluya kwenza ilizwe libe senkangala.

Aliyi kumiwa bani –

bobaleka bemke abantu kwanezilwanyane.

₄“Ngaloo mihla nangelo xesha,”

lowo ngumlomo kaNdikhoyo,

“abantu bakwaSirayeli nabantu bakwaJuda

baya kuhamba kunye belila,

befuna uNdikhoyo uThixo wabo.

₅Baya kubuza indlela esinga eZiyon,

babheke kuyo, bathi:

‘Yizani, sizimanye noNdikhoyo

ngomnqophiso ongenasiphelo nongasayi kulityalwa.’

₆“Abantu bam bâba ziigusha ezilahlekileyo;

balahlekisiwe ngabelusi babo,

babhadula ezintabeni,

bajikeleza iintaba neenduli,

bayilibala indawo yabo yokuphumla.

₇Babedliwa ngabo bonke ababafumanayo;

iintshaba zabo zazisithi: ‘Asinatyala.

Kaloku bamonile uNdikhoyo,

yena olidlelo lenene,

yena Ndikhoyo ithemba looyise.’

₈“Balekani niphume eBhabheli;

lishiyeni izwe lamaKaledi,

nixelise iinkunzi zeebhokwe ezikhokela umhlambi weegusha.

₉Kuba kaloku kwelasentla ndiya kuvelisa igqiza leentlanga ezinkulu;

ndizifunzela eBhabheli.

Ziya kuwacwangcisa amajoni, abe zizintlu zokulwa,

ziyihlasele zivela ngasentla, ziyithimbe.

Iintolo zabo ziya kuba njengamagorha anobuchule angabuyi elambatha.

₁₀Loba lixhoba elamaKaledi,

abathimbi balo bathimbe bade banele.”

Lowo ngumlomo kaNdikhoyo.

₁₁“Nakuba nivuya nidlamkile,

nina baphangi belifa lam,

nakuba nidloba njengethokazi elibhulayo,

nakuba nikhala okweenkunzi zamahashe,

₁₂uya kuba neentloni gqitha unyoko iBhabheli;

uya kuhlazeka onizeleyo.

Niyabona, uya kuba ngowokugqibela ezintlangeni –

intlango, umqwebedu, inkqantosi.

₁₃Ngenxa yengqumbo kaNdikhoyo uya kuba sisixeko esingamiwa bani,

indawo eyinkangala mpela.

Bonke abadlulayo eBhabeli baya kothuka,

bathi khumnqa ngenxa yokubhukuqwa kwayo.

₁₄“Yakhani uhlelo, niyingqinge iBhabheli,

nina nonke batyedi besaphetha.

Tolani nitsho kuyo, ningashiyi lutolo,

kuba imonile uNdikhoyo.

₁₅Hlabani umkhosi macala onke!

Iyanikezela –

iinqaba zayo ziwile;

iindonga zayo zidiliziwe.

Yimpindezelo kaNdikhoyo le;

phindezelani ke kuyo,

nenze kuyo njengoko nayo yenze kwabanye.

₁₆Mnqumleni eBhabheli umhlwayeli

nalowo uphethe irhengqa ngexesha lokuvuna.

Ngenxa yokudlavula kwekrele

elowo ubheka ebantwini bakowabo,

elowo ubalekela ezweni lakowabo.

₁₇“USirayeli uyigusha ebhacileyo;

usukelwe ziingonyama.

Eyokuqala eyamdlayo ngukumkani waseAsiriya;

eyokugqibela ukugramza amathambo akhe nguNebhukadenezare ukumkani waseBhabheli.”

“Niyabona, ndiza kumohlwaya ukumkani waseBhabheli nelizwe lakhe

njengoko ndamohlwayayo ukumkani waseAsiriya.

₁₉Ke yena uSirayeli ndiya kumbuyisela edlelweni lakhe,

adle eKarmele naseBhashan,

ahluthe ezintabeni zakwaEfrayim nezaseGiliyadi.

₂₀Ngaloo mihla nangelo xesha,”

lowo ngumlomo kaNdikhoyo,

“buya kufunwa ubugwenxa bukaSirayeli,

kodwa bungabikho;

ziya kufunwa nezono zikaJuda,

kodwa zingafumaneki.

Kaloku ndiya kuwaxolela loo masalela ndiwasindisayo.

₂₁“Lihlasele ilizwe laseMeratayim nabemi basePekode;

babulale ubatshabalalise ngokupheleleyo.”

Lowo ngumlomo kaNdikhoyo.

“Kwenze konke endikuyalele kona.

₂₂Isithonga semfazwe sivakala elizweni,

isandi sobhukuqo olukhulu.

₂₃Nantso intlekekile ihamile eyayikhanda ihlabathi!

Hayi ukuba ngamanyumnyezi kweBhabheli phakathi kweentlanga!

₂₄Ndikuthiyele, Bhabheli,

wabanjiswa ungaqondi.

Ufunyenwe, wabhajiswa,

kuba uchasene noNdikhoyo.

₂₅UNdikhoyo ubavulile oovimba bakhe,

wazikhupha izikhali zengqumbo yakhe,

kuba iNkosi uNdikhoyo enamandla onke

inomsebenzi ezweni lamaKaledi.

₂₆Yihlaseleni iBhabheli, nivela macala onke.

Zivuleni izisele zayo,

nizifumbe izidumbu zibe ngathi ziimfumba zombona.

Ewe, tshabalalisani ngokupheleleyo,

kungabikho masalela.

₂₇Zigwazeni zonke iinkokheli zayo;

mazibe ngathi ziinkunzi ezixhelwayo.

Yeha ke, bona! Imini yabo ifikile;

ixesha labo lokohlwaywa ligalelekile.

₂₈Phulaphulani!

Ababalekileyo basinda ezweni laseBhabheli bayathetha eZiyon;

babhengeza impindezelo kaNdikhoyo uThixo wethu,

nditsho ukuziphindezela kwakhe ngenxa yendlu yakhe.

₂₉“Bahlabeleni umkhosi abatoli, beze eBhabheli,

bona bonke abatyeda isaphetha.

Yingqingeni macala onke,

kungabikho bani uphuncukayo.

Yibuyekezeni ngokwezenzo zayo;

yenza kuyo njengoko yona yenze kwabanye.

Kaloku imdelile uNdikhoyo uYedwa kaSirayeli.

₃₀Ke ngoko amadodana ayo aya kuwa ezitalatweni,

amajoni ayo aphele loo mini.”

Lowo ngumlomo kaNdikhoyo.

₃₁“Uyabona, ndikuchasile, ntondini izidlayo.”

Lowo ngumlomo kaNdikhoyo iNkosi enamandla onke.

“Ifikile imini yakho;

ligalelekile ixesha lakho lokohlwaywa.

₃₂Lo uzidlayo uza kukhubeka awe,

kungabikho bani umvusayo.

Ndiza kuphemba umlilo ezidolophini zakhe,

utshise bonke abamngqongileyo.”

“Aphantsi kwengcinezelo amaSirayeli,

kwanamaJuda ngokunjalo.

Avalelwe ngabo bantu athinjwe ngabo;

abavumi ukuwandulula.

₃₄Kambe uMkhululi wawo womelele;

nditsho lo ugama linguNdikhoyo onamandla onke.

Uya kuwalamlela kwabo bawachasayo,

alinike inzolo ilizwe lawo,

abagungqise abemi baseBhabheli.

₃₅“Ikrele maliwafikele amaKaledi nabemi baseBhabheli,

bekunye neziphathamandla nezilumko zayo.”

Lowo ngumlomo kaNdikhoyo.

₃₆“Ikrele malibafikele oosiyazi bayo,

basuke babe ziziyatha.

Ikrele maliwafikele amagorha,

asuke abe ngamagwala.

₃₇Ikrele maliwafikele amahashe neenqwelo,

kwanawo onke amajoni engqesho ayo,

asuke abe njengabafazi.

Ikrele malibufikele ubuncwane bayo,

busuke buphangwe.

₃₈Ukubalela makuwafikele amanzi ayo,

asuke atshe.

Kuba kaloku ililizwe lemifanekiso yezithixo,

izithixo eziya kutsho zigeziswe kukothuka.

₃₉“Ke ngoko iBhabheli iya kuba sisikhundla seengcuka noodyakalashe,

ibe yindawo ehlala iinciniba.

Ayisoze iphinde imiwe bantu,

ingahlalwa bani izizukulwana ngezizukulwana.

₄₀Njengoko uThixo wazibhukuqayo iSodom neGomora

kwakunye needolophu ezingqongileyo,

kwangokunjalo akuyi kuhlala bani,

kungayi kuphambukela mntu khona.”

Lowo ngumlomo kaNdikhoyo.

₄₁“Niyabona, kuza abantu, bevela entla;

uhlanga olukhulu nookumkani abaninzi bayaxhokonkxwa,

bevela eziphelweni zehlabathi.

₄₂Baxhobe izaphetha nemikhonto;

bazizikhohlakali ezingenamfesane.

Isingqi sokufika kwabo bekhwele amahashe

kunga kukugquma kolwandle.

Baxhobe baf' amacala,

khon' ukuze bahlasele wena, ntombindini Bhabheli.

₄₃Ukumkani waseBhabheli uve iindaba ngabo,

zangenwa ngumkhinkqi iingalo,

lwangongoza uvalo oku komfazi olunywayo.

₄₄Niyabona, njengengonyama ephuma kwiintshinyela zamatyholo eJordan,

iye emadlelweni ahlala eyokozela,

kuya kuba njalo ukuyigxotha kwam ngephanyazo kwelakowayo iBhabheli.

Ngubani na onyuliweyo nendiya kumalatha ukuze andenzele oku?

Kakade ngubani onjengam onokumelana nam,

ingubani umalusi onokuxaba endleleni yam?”

₄₅Ke ngoko liveni icebo likaNdikhoyo alicebileyo ngeBhabheli,

izigqibo zakhe agqibe ngazo ngokubhekisele kwilizwe lamaKaledi.

Inene, namatakane aya kuqwengwa,

umhlambi uthi khumnqa ngenxa yawo.

₄₆Ihlabathi liya kunyikima sisithonga sokuthinjwa kweBhabheli,

isikhalo sayo sivakale ezintlangeni.

“Niyabona, iBhabheli nabemi beLebhe-kamayi

ndibazisela umoya otshabalalisayo.

₂Ndiya kuthumela eBhabheli abantu bokwela

abaya kuyivuthulula baliphanzise ilizwe layo.

Baya kuyifikela macala onke ngomhla wentlekele.

₃Umtyedi wesaphetha akayi kuba nako ukudubula ngetolo,

angabi naxesha lakuqhayisa ngezambatho zokuzikhusela.

Musani ukuwayeka asinde amadodana ayo;

wutshabalalise ngokupheleleyo umkhosi wayo.

₄Baya kuwa, bebulewe ezweni lamaKaledi,

begwazwe ezitalatweni.

₅Kuba kaloku uSirayeli noJuda abazange bafane nabahlolokazi –

abazange bangabi naye uThixo wabo, uNdikhoyo onamandla onke,

naxa balizalisayo ilizwe labo lityala lokona onguYedwa kaSirayeli.

₆“Balekani niphume eBhabheli,

elowo asindise ubomi bakhe!

Musan' ukwenzakaliswa ngenxa yobugwenxa bayo.

Eli lixesha lempindezelo kaNdikhoyo;

uza kuyibuyekeza ngokwezenzo zayo.

₇IBhabheli ibiyindebe yegolide esandleni sikaNdikhoyo;

indebe enxilise lonke ihlabathi.

Iintlanga zasela ewayinini yayo,

zasuka zageziswa yiyo.

₈IBhabheli iza kuwa ngequbuliso yaphuke;

bhombolozani ngenxa yayo.

Wafuneleni amafutha aqholiweyo amanxeba ayo;

mhlawumbi anganyangeka.

₉“Kothiwa: ‘Siba ngayinyanga iBhabheli, ayiphili.

Masiyishiye, elowo ahambe aye ezweni lakowabo,

kuba ityala layo logwetywa emazulwini,

liphakame laya kutsho phezulu.

₁₀UNdikhoyo usigwebele, wabubhengeza ubulungisa bethu.

Yizani siyibalise eZiyon imisebenzi kaNdikhoyo uThixo wethu.’

₁₁“Ziloleni iintolo;

qulani amakhaka!

UNdikhoyo uxhokonkxe ookumkani bamaMedi,

kuba unenjongo yokuba iBhabheli itshatyalaliswe.

Yimpindezelo kaNdikhoyo leyo,

impindezelo ngenxa yendlu yakhe.

₁₂Ziphakamiseleni ibhanile iindonga zeBhabheli,

nongeze abalindi.

Bathumeni balinde,

nilungise nabalaleli.

UNdikhoyo uza kuyiphumelelisa injongo yakhe,

akwenze oko akuthethileyo ngabemi baseBhabheli.

₁₃Wena ohleli ngasemanzini amaninzi,

wena obuncwane bungako,

sifikile isiphelo sakho,

ligalelekile ixesha lokuba usikwe.

₁₄UNdikhoyo onamandla onke ufungile, ezifunga ngokwakhe,

wathi: ‘Ndokutsho uzale ngabantu ngathi ziinkumbi.

Iya kuba yimihelele bevuya ngenxa yokoyiswa kwakho.’

₁₅“Ngulowenza ihlabathi ngamandla akhe;

ngulozinzisa elimiweyo ngobulumko bakhe,

waza walitwabulula izulu ngokwengqiqo yakhe.

₁₆Akuvakalisa ilizwi lakhe amanzi ayazongoma ezulwini,

kufunquke amafu emaphethelweni omhlaba.

Uthumela umbane kunye nemvula,

athulule umoya koovimba bakhe.

₁₇“Bonke ziziyatha ezingenalwazi;

ingcibi yegolide iyahlazeka ngenxa yemifanekiso eyiqingqileyo.

Imifanekiso yayo eyityhidileyo bubuxoki –

kaloku ayinawo umphefumlo.

₁₈Ingamampunge – izizinto zokugxekwa;

ngemini yomgwebo iya kutshabalala.

₁₉Akanjengabo yena uSahlulelo sikaYakobi –

kaloku yena nguMbumbi weento zonke,

kwanowesizwe ke esililifa lakhe.

NguNdikhoyo uSomandla-onke igama lakhe.

₂₀“Nguwe, Bhabheli, ibhunguza lam;

usisikrweqe sam sokulwa.

Ndiya kuzihlekeza ngawe iintlanga,

ndizonakalise ngawe izikumkani.

₂₁Ngawe ndihlekeza ihashe noqabele kulo;

ndihlekeze inqwelo yokulwa nokhwele kuyo.

₂₂Ngawe ndihlekeza indoda nomfazi,

ndihlekeze ixhego nomfana,

nditsho kwaumlisela nomthinjana.

₂₃Ngawe ndihlekeza umalusi nomhlambi wakhe,

ndihlekeze umlimi nesipani sakhe,

nditsho iirhuluneli namagosa azo.

₂₄Niya kukubona ukubuyekeza kwam,

xa ndibuyekeza iBhabheli nabemi bonke belamaKaledi

ngenxa yobubi bonke ababenze kwiZiyon.”

Lowo ngumlomo kaNdikhoyo.

₂₅“Uyabona, ndikuchasile, ntabandini yokonakalisa,

wena olonakalisileyo lonke ihlabathi.”

Lowo ngumlomo kaNdikhoyo.

“Ndiya kolula isandla sam phezu kwakho,

ndikuqengqe uhle emaweni,

ndikwenze intaba etshisiweyo.

₂₆Akukho litye lokwakha ikona eliya kuthathwa kuwe,

kungekho litye lasiseko liya kucholwa kuwe,

kuba uya kuba yinkangala ngonaphakade.”

Lowo ngumlomo kaNdikhoyo.

₂₇“Phakamisani ibhanile elizweni!

Vuthelani ixilongo ezintlangeni,

nizigonyele ukulwa neBhabheli.

Zihlabeleni umkhosi, zize izikumkani zeArarati, neMini, neAshkenazi.

Yalathani injengele yokuhlasela,

nithume amahashe ngathi ziinkumbi ezinyakazelayo.

₂₈Zigonyeleni ukulwa neBhabheli iintlanga,

nditsho ookumkani bamaMedi,

neerhuluneli zabo, kunye nawo onke amaphakathi azo,

kwakunye nezizwe zonke ezilawulwa zizo.

₂₉Ihlabathi liyanyikima, liyazibhija-bhija,

kuba uNdikhoyo uyaziphumelelisa izigqibo zakhe azigqibe ngeBhabheli.

Ilizwe laseBhabheli ulenza libe yinkangala,

lingabi samiwa bani.

₃₀Amagorha aseBhabheli ayekile ukulwa;

akasaphumi ezinqabeni.

Ubugorha bawo buphelile;

basuke baba njengabafazi.

Izindlu zazeBhabheli zintunyekwe umlilo;

yaphukile imivalo yamasango ayo.

₃₁Isigidimi sandulela isigidimi,

umbiki alandele umbiki,

bonke bebikela ukumkani waseBhabheli ukuba isixeko sakhe sonke sithinjiwe,

₃₂besithi amazibuko avingciwe,

iingcongolo ezingasesizibeni somlambo zantunyekwa umlilo,

asuka amajoni ankwantya luloyiko.”

“Intombi eyiBhabheli injengebala lokubhulela

ngexesha lokugangathwa kwalo;

ngexesha elingephi wofika umhla wokuba kuvunelwe kulo.”

₃₄“Usidlile uNebhukadenezare ukumkani waseBhabheli;

usimfimfithe wasishiya sisisitya esize.

Usiginye njengengwenya,

izimuncu-muncu zethu wazenza ukutya kwakhe,

waza wasenza into yokuxukuxa.

₃₅Ugonyamelo esiluve emizimbeni yethu

malubuyekezwe kwiBhabheli,”

batsho abemi beZiyon.

“Igazi lethu malibizwe kubemi belamaKaledi,”

itsho iJerusalem.

“Uyabona, ndiya kukugwebela, ndikuphindezele.

Ndiya kulwenza lutshe ulwandle lweBhabheli,

utsho wome umthombo wayo.

₃₇IBhabheli iya kuba linxuwa,

ibe sisikhundla soodyakalashe,

nento esisothuso nesigculelo,

indawo engamiwa bani.

₃₈Abantu bayo xa bebonke bagquma njengeengonyama,

babharhula njengamathole eengonyamakazi.

₃₉Xa bavuka umnyele ndobenzela umgidi,

ndibanxilise, badlamke,

balale ubuthongo,

bangavuki ngonaphakade.”

Lowo ngumlomo kaNdikhoyo.

₄₀“Ndiya kubasa ekuxhelweni njengamatakane,

njengeenkunzi zeegusha nezeebhokhwe.

₄₁“Hayi ukuthinjwa kweSheshaki!

Ibhongo lehlabathi lonke libanjiwe.

Hayi ukwenziwa isothuso kweBhabheli phakathi kweentlanga!

₄₂Ulwandle luya kuyigqumelela iBhabheli,

igutyungelwe ngamaza agqumayo.

₄₃Iidolophu zayo ziya kukhal' ibhungane,

ilizwe libe ngumqwebedu nenkqantosi,

ilizwe elingamiwa mntu,

ilizwe elingacandwa nangumhambi.

₄₄Ndiya kumohlwaya uBhele uthixo weBhabheli,

ndimenze akuhlanze oko akuginyileyo.

Iintlanga aziyi kuba saxhontelana kuye,

nodonga lweBhabheli luya kuwa.

₄₅“Phumani kuyo, nina bantu bam,

elowo nalowo asindise ubomi bakhe.

Kubalekeni ukuvutha komsindo kaNdikhoyo.

₄₆Musani ukutyhafa okanye noyike xa nithe neva amarhe elizweni.

Amarhe aya kulandelana minyaka le,

amarhe ogonyamelo elizweni,

amarhe okuvukelana

kwabaphetheyo.

₄₇Inene, iyeza imini yokuba ndizohlwaye izithixo zaseBhabheli.

Ilizwe layo lonke liya kuhlaziswa,

izidumbu zababuleweyo ziya kuqungquluza phakathi kuyo.

₄₈Ngenxa yeBhabheli kuya kumemelela izulu nomhlaba

nento yonke ekhoyo phezulu naphantsi.

Kaloku iza kuhlaselwa ngababhuqi bevela ngasentla.”

Lowo ngumlomo kaNdikhoyo.

₄₉“IBhabheli iza kuwa ngenxa yababuleweyo bakwaSirayeli,

kanye njengokuba ababuleweyo behlabathi lonke

bawayo ngenxa yeBhabheli.

₅₀Nina nisindileyo ekreleni, yimkani ningaphozisi maseko!

Mkhumbuleni uNdikhoyo ezweni elikude,

ihlale isezingcingeni zenu iJerusalem.”

₅₁“Sihlazekile, kuba sive ingcikivo;

ihlazo ligubungele ubuso bethu.

Kaloku iintlanga zingene ezindaweni ezingcwele zendlu kaNdikhoyo.”

₅₂“Kambe iyeza imihla endiya kuyohlwaya imifanekiso eqingqiweyo,

bancwine ezweni lonke laseBhabheli abangxwelerhekileyo.”

Lowo ngumlomo kaNdikhoyo.

₅₃“Nokuba iBhabheli ithe yaphakama yaya kufikelela ezulwini,

nokuba iyinqaba ephakamileyo neyomeleleyo kangangoko,

ndiya kuyithumela umbhukuqi.”

Lowo ngumlomo kaNdikhoyo.

₅₄“Phulaphulani!

Kuvakala isikhalo eBhabheli,

isandi sobhukuqo olukhulu ezweni lamaKaledi,

₅₅kuba uNdikhoyo uyayibhukuqa iBhabheli,

uyayiphelisa ingxokozelo yayo enkulu.

Iintshaba ziya kugaleleka ngathi ngamaza amakhulu elwandle;

kuya kuvakala isandi sengxolo yazo.

₅₆IBhabheli iya kufikelwa ngumbhukuqi,

abanjwe amagorha ayo,

ziqhawulwe izaphetha zawo.

Kaloku nguThixo wempindezelo uNdikhoyo;

yena ubuyekeza

ngokupheleleyo.

₅₇Ndiya kuzinxilisa iziphathamandla nezilumko zayo,

kwakunye neerhuluneli namagosa namagorha ayo.

Baya kulala ubuthongo, bangavuki ngonaphakade.”

Lowo ngumlomo weKumkani egama linguNdikhoyo uSomandla-onke.

“Luya kudilizwa ngokupheleleyo udonga lweBhabheli

nangona lubanzi lunjalo.

Amasango ayo aphakamileyo aya kutshiswa ngomlilo.

Izizwe zifumane zabulaleka;

imigudu yeentlanga ziinkuni zomlilo.”

₂Isihomo sikaThixo siphuhliswa zizinto eziyimfihlakalo;

kambe ke sona isidima sokumkani kukuphengulula imicimbi.

₃Njengokuphakama kwesibhakabhaka nobunzulu bomhlaba,

zikwanjalo ukungabi nakugocagocwa iingcamango zookumkani.

₄Wakuyicwenga isiliva,

nengcibi itsho ikwazi ukuyisebenzisa;

₅akukhiqwa amaphakathi aphuthileyo,

ulawulo lokumkani lutsho ludume ngokuzinza.

₆Xa ukomkhulu musa ukuzigqatsa;

sukuhlala endaweni yezikhulu.

₇Kaloku kubhetele ukuba yena athi: “Nyukela apha,”

kunokuba akususe kwindawo yezikhulu amatshawe ebukele.

₈Sukungxamela enkundleni ngento oyibonileyo,

hleze kuvele omnye umntu nabungqina bumbi,

utsho uhlazeke ke wena.

₉Xa usematyaleni nommelwane wakho

musa ukudiz' imfihlelo oyixelelweyo,

₁₀hleze uvelwe utsho uphoxeke,

kuze ke ukuba negama elibi kwakho kuthane mbende nawe.

₁₁Amazwi afanelekileyo

nqwa neeapile zegolide ezithiwe nca kwisiliva.

₁₂Isilumkiso esiwa kwindlebe evayo

sifana necici legolide nesidanga segolide ecikizekileyo.

₁₃Umthunywa onyanisekileyo kwabo bamthumayo

uhlaziya inkosi yakhe oku kwekhephu ngexa lokuvuna.

₁₄Umntu ozigwagwisa ngokupha omnye isipho angenaso

ufana namafu anomoya angenamvula.

₁₅Umlawuli uyacengeka ngumntu onomonde,

namazwi athambileyo amenza anikezele.

₁₆Wakufumana ubusi butye uzilinganisela,

hleze bubuye wakubutya gqitha.

₁₇Malungaquqi gqitha unyawo lwakho kwammelwana,

hleze akruquke nguwe, akucaphukele.

₁₈Umntu otshonisa ummelwana wakhe ngobungqina obubuxoki

uyingozi nqwa negqudu, umkhonto, okanye utolo.

₁₉Ukuthembela ngomntu ongathembekanga xa usenkathazweni

kufana nezinyo elonakeleyo nonyawo oluqhwalelayo.

₂₀Ukuculela umntu oneenzingo kufana nokumhambisa ze mhla kubandayo,

okanye kunjengokonakalisa isoda ngokuyixuba neviniga.

₂₁Xa ufumana utshaba lwakho lulambile, luphe ukutya;

lwakunxanwa, luphe amanzi.

₂₂Ngokwenjenjalo ke woba uluqhubela enguqukweni,

*noNdikhoyo wokuvuza.

₂₃Umoya wasentla uzisa imvula,

kodwa ke yona intlebendwane iza nengxabano.

₂₄Akunani kwaukuhlala wedwa noba kuphezu kwendlu,

ndaweni yokuhlala ndlwini-nye nomfazi ongunogqwashu.

₂₅Iindaba ezimnandi ezivela kwelikude

zihlaziya oku kwamanzi abandayo emntwini odiniweyo.

₂₆Akoyiswa sisikhohlakali umntu olungileyo

loo nto ifana nequla eligxobhekileyo okanye nomthombo ongcolisekileyo.

₂₇Ukubutya kakhulu ubusi akulunganga;

kukwanjalo ukuhlala uzifunela imbeko.

₂₈Umntu owoyiswayo kukuzilawula usesichengeni

oku kwesixeko esindonga

ziwileyo.