To The Word – Day 178

₅“Ndakwazi ndingekakubumbi esizalweni sonyoko;

ndazahlulela wena ungekazalwa,

ndakwalatha ukuba ube ngumshumayeli kwiintlanga.”

“ ‘Ndikhumbula ukuzimisela kwakho ebutsheni bakho,

ukundithanda kwakho usengumtshakazi,

ukundilandela kwakho entlango, kumhlaba ongumqwebedu.

₃Ewe, uSirayeli wayengokaNdikhoyo ncakasana,

efana nolibo lwesivuno –

abaludlayo badla ityala,

intlekele ibafikele.’ ”

Lowo ngumlomo kaNdikhoyo.

₄Libekeleni iindlebe ilizwi *likaNdikhoyo,

mzi kaYakobi, nani nonke zizwe zakwaSirayeli.

₅Utsho uNdikhoyo ukuthi:

“Bubi buni abâbubonáyo kum ooyihlo

bade bandityeshele nje belandela *oothixo abangento,

bade nabo babe zizinto ezingento?

₆Abazange babuze bathi:

‘Uphi na lo Ndikhoyo owasikhupha kumhlaba waseJiputa,

wasihambisa entlango kwilizwe elingumqwebedu lemiwewe;

kwilizwe lembalela nesithokothoko sobumnyama,

ilizwe ekungahambi bani kulo, kungekho namntu umiyo kulo?’

₇Ndanisa kumhlaba wendyebo,

ukuze nixhamle iziqhamo nentlutha yawo.

Koko nina nithe nakufika nawuxabhela umhlaba wam,

nalitsho lanezothe ilifa endininike lona.

₈Ababingeleli ababuzanga bathi: ‘Uphi na uNdikhoyo?’

Abaphathiswa-mthetho abandazanga,

abelusi bandivukela,

nabashumayeli bashumayela benefuthe likaBhali,

balandela *oothixo abangancedi lutho.”

₉“Ngoko ke ndisanimangalela,”

utsho umlomo *kaNdikhoyo.

“Ndiya kumangalela kwanezizukulwana zenu.

₁₀Khanikhe niwele niye kwiziqithi zamaKiti,

okanye nithumele iintlola eKedare,

ziye kuqinisekisa ukuba yakha yakho na into enjengale.

₁₁Lwakha lwakho phi na uhlanga olwananisa ngoothixo balo,

noba bengengoothixo ngenene?

Kodwa bona abantu bam balananisile iqhayiya labo

ngenxa yezinto ezingenaluncedo!

₁₂Yothukani, mazulu, yile nto,

nigubhe luloyiko, nithi khumnqa!”

Lowo ngumlomo kaNdikhoyo.

₁₃“Kaloku lintlantlu mbini ityala labantu bam:

bandishiyile mna, mthombo wamanzi ampompozayo,

bazimbela awabo amaqula –

amaqula avuzayo ziintanda.”

₁₄“Ngaba uSirayeli likhoboka?

Ngaba wazalelwa ebukhobokeni na?

Ngani ukuba abe lixhoba?

₁₅Iingonyama ziyagquma, ziyamgragramela.

Seziwuqwenga-qwengile umhlaba wakhe,

zazitsho zaba ngamabhodlo angahlali bani izixeko zakwaSirayeli.

₁₆Ewe, abantu baseMemfisi naseTapanese

sebekugugule ukhakhayi.

₁₇Nguwe ngokwakho ozenzileyo,

kuba umfulathele *uNdikhoyo uThixo wakho

akuba ebekukhokela endleleni.

₁₈Khawutsho ke,

kungani ukuba uye kusela amanzi aseNayile eJiputa?

Kungani uye kusela amanzi aseYifrate eAsiriya?

₁₉Uza kuqeqeshwa bubugwenxa bakho;

uza kululekwa kukukreqa kwakho;

uza kubuqonda ubukrakra nobubi bokundifulathela

nokungankwantyi phambi kwam, mna Ndikhoyo, Thixo wakho.”

Lowo ngumlomo wengangalala uNdikhoyo onamandla onke.

₂₀“Kudala, Sirayeli, wayaphulayo idyokhwe,

waziqhawula izitrophu zakho,

usithi: ‘Andiyi kukukhonza.’

Ewe, ubuhamba ulala ezinkalweni zonke

nangaphantsi kwemithi yonke,

uziqhekeza uxela ihenyukazi.

₂₁Kanti ke mna ndakutyala;

ungumdiliya omhle othenjiweyo.

Kutheni ngoku sewajika waba ngumdiliya wasendle nje?

₂₂Nditsho nokuba ungade uzihlambe ngesoda,

uziguxe ngeyodwa isepha,

awusayi kusuka wona umdintsi wesono sakho.”

Lowo ngumlomo weNkosi *uNdikhoyo.

₂₃“Ungathini ukuthi: ‘Andizenyelisanga;

andikhange ndimlandele uBhali’?

Khangela umkhondo wakho entilini,

uzigqale izenzo zakho.

Ubufana nqwa nethokazi lenkamela lirhaqaza entlango,

₂₄nqwa nemazi yeqwarha lasentlango edumbileyo

ehamba isezela umoya, ifuna inkunzi.

Ngubani ongayithintelayo xa injalo?

Akukho nkunzi izixhamla ngayo kuloo meko –

isuka iyifumane lula ngelo xesha.

₂₅Sirayeli, musa ukuzityabula iinyawo

ude nomqala wakho utshe kukusukelana nezithixo.

Kambe ke uthi: ‘Akusancedi nto;

sendithandana noothixo basemzini;

andinakungabalandeli.’ ”

₂₆*UNdikhoyo uthi:

“Kanye njengoko lidana linyoshoze xa libhaqiwe isela,

koba njalo ukuhlazeka kukaSirayeli nookumkani bakhe,

neziphathamandla, ababingeleli, kunye nabashumayeli.

₂₇Bona bathi emthini: ‘Ungubawo wena.’

Elityeni bathi: ‘Nguwe ondizeleyo.’

Kaloku aba bantu beze ngenqentsu kum;

abezanga ngabuso.

Kodwa ngexesha leenkxwaleko ikwangabo abathi: ‘Phakama, usincede!’

₂₈Baphi kakade abo thixo bakho uzenzeleyo?

Mabavuke kaloku, bakuhlangule ngexesha lengxakeko.

Baninzi kangangeedolophu zakho oothixo bakho, Juda!

₂₉Nina ke, ningandibeka tyala lini,

inini nje xa ninonke abakreqileyo kum?”

Lowo ngumlomo kaNdikhoyo.

₃₀“Naxa ndabohlwayayo abantwana benu,

abazanga baqeqesheke.

Suka nababulala ngekrele *abashumayeli,

banga baqwengwe ziingonyama.

₃₁Phulaphulani izwi likaNdikhoyo, nina besi sizukulwana!

Ndiyintlango na kuni, maSirayeli,

umhlaba osithokothoko sobumnyama?

Ke kutheni ukuba abantu bam bathi:

‘Siza kuhamba ngesiyibonayo.

Siyabhadula; soze siphinde size kuwe!’

₃₂Ikhe izilibale iintsimbi zayo intombi?

Yena umtshakazi ukhe awulibale umbhinqo wakhe?

Kodwa bona abantu bam sele kukade bandilibalayo.

₃₃Hayi ke indlela orhaqaza ngayo

uleqeka emva kwezithandwa zakho!

Sele unako ukufundisa nabafazi abangoongantweni.

₃₄Izambatho zakho zilijaja ligazi leendwayi nabantu abamsulwa,

ingelilo kambe elezikrelemnqa ozibhaqe ziqhekeza.

₃₅Naxa kunjalo usathi: ‘Ndimsulwa;

uNdikhoyo akasenawo umsindo ngakum.’

Kodwa ke mna Ndikhoyo ndiza kukohlwaya

naxa usithi akwenzanga sono.

₃₆Yini na ukuba urhaqaze kangaka, uzijika-jike iindlela zakho?

IJiputa iza kukuphoxa kanye ngalaa ndlela yaniphoxa ngayo neAsiriya.

₃₇Uya kuyishiya iJiputa unyoshoza ludano.

Mna Ndikhoyo ndibalahlile abo uthembele kubo;

akukho nto baya kukuphumelelisa kuyo.”

₁“Xa indoda imalile umkayo,

aze yena emke aye kwendela kwenye indoda,

ngaba ingaphinda ibuyele kuye?

Ngaba ilizwe lobe lingaxajelwanga ngokupheleleyo?

Hayi bo! Ubhatyaze nezithandwa zakho ezininzi, Sirayeli,

ukanti noko usafuna ukubuyela kum?”

Lowo ngumlomo *kaNdikhoyo.

₂“Phakamisela amehlo akho ezincotsheni zeenduli;

kuphi apho ungazanga wambathwe khona?

Ubufudula uhlala ecaleni lendlela,

ulindele izithandwa zakho,

oku komArabhu ohleli entlango.

Hayi bo, eli lizwe ulixabhele ngobubi bokuhenyuza kwakho.

₃Yiyo loo nto neemvula zanqanyulwayo nje;

yiyo loo nto neyasentlakohlaza ingasaniyo nje.

Akusenasazela oku kwehenyukazi;

sewaphelelwa naziintloni.

₄“Ukanti kwawena usathi kum:

‘Kaloku, tata, uyintandane yam kwasebutsheni bam.

₅Akunako ukuhlala unomsindo;

akuyi kundiqumbela kude kuye esiphelweni.’

Yintetho yakho ke leyo,

kodwa wenza amanyundululu kangangoko!”

“ ‘Guquka, mkreqikazindini Sirayeli!’

Lowo ngumlomo kaNdikhoyo.

‘Andizi kuba sakukhangela ngobuso obusangeneyo,

kuba ndinenceba.’

Lowo ngumlomo kaNdikhoyo.

Úthi: ‘Andiyi kuhlala ndiniqumbele.

₁₃Buvume nje kuphela wena ubugwenxa bakho,

ngokuba umvukele uNdikhoyo uThixo wakho,

wasuka wazandlalela abasemzini ngaphantsi kwemithi eyokozelayo,

awalithobela ilizwi lam.’

Lowo ngumlomo kaNdikhoyo.

₁₉“Ndandiba ndiza kukwenza unyana wam, Sirayeli,

ndikwabele umhlaba onqwenelekayo,

ilifa eliyokozelayo ukudlula eleentlanga zonke.

Ewe, ndandiba ùza kuthi kum: ‘Tata;’

ungaze ukutyeshele ukulandela ekhondweni lam.

₂₀Wena, Sirayeli, akukhange uthembeke kum

oku komfazi ongathembekanga kumyeni wakhe.”

Lowo ngumlomo *kaNdikhoyo.

₂₁Ewe, kuvakala ilizwi lihlokoma ezincotsheni zeenduli;

sisililo nezitarhuziso zoonyana bakaSirayeli,

kuba bâzenza gwenxa iindlela zabo,

bamlibala uNdikhoyo uThixo wabo.

₂₂“Buyelani kum, bantwanandini abakreqayo,

ndininyange luphele ukreqo lwenu.”

“Sesilapha; size kuwe.

Kaloku nguwe, Ndikhoyo, uThixo wethu.

₂₃Ngenene iingxokozelo ezindulini nasezintabeni bubuqhetseba;

ngenene kuphela nguNdikhoyo uThixo wethu omhlangulayo uSirayeli.

₂₄Ukususela ebutsheni bethu isithixo esilisikizi sizigqibile iziqhamo zokubulaleka koobawo,

nditsho iinkomo zabo neegusha zabo,

oonyana neentombi ngokunjalo.

₂₅Masizikhahlele phantsi ngenxa yeentloni,

lisigubungele ihlazo lethu,

kuba sinesono phambi koNdikhoyo uThixo wethu,

thina noobawo bethu.

Ukususela kwasebuntwaneni bethu, kude kube ngoku,

asizange siliphulaphule ilizwi likaNdikhoyo uThixo wethu.”

₅“Bhengezani kwelakwaJuda,

nihlokomise eJerusalem, nithi:

‘Vuthelani isigodlo elizweni lonke.’

Dandulukani ngamandla nisithi:

‘Hlanganani,

nisabele kwizixeko ezinqatyisiweyo!’

₆Yenzani umqondiso okhomba eZiyon,

nicele kwabasicatyana, ningabambezeli,

kuba mna ndiza nentlekele ngasentla –

ndinizisela intshabalalo enkulu.”

₇Yintw' ekunyalasa inge yingonyama ishiy' isikhundla

lo mtshabalalisi weentlanga uzayo.

Selephumile kowabo ukuza kubharhisa umhlaba wakho ube yinkangala,

azitsho izixeko zakho zibe ngamabhodlo,

kungasali nempunde le.

₈Ngoko ke zila, wambathe amarhonya,

ugixe, ulile,

kuba ingqumbo *kaNdikhoyo ayishenxanga kuthi.

₉Nguwo lo umlomo kaNdikhoyo:

“Ngaloo mini ukumkani neziphathamandla baya kungenwa yingevane.

Ababingeleli bothi khumnqa,

abashumayeli bona bathi makatha.”

₁₃Nalo lusiza utshaba, luziingqimba okwamafu,

iinqwelo kuqhum' uthuli ngathi yinkanyamba.

Asingomendu, amahashe adlul' ukhozi!

Kunyembelekile; izwe lifile!

₁₄Jerusalem, zihlambulule ububi obusentliziyweni,

khon' ukuze usinde!

Uya kuhlala ugaya ububi kude kube nini?

₁₅Kunkenteza ilizwi kwaDan nakwiintaba zakwaEfrayim,

lixela intlekele.

₁₆Nguwo lo umlomo *kaNdikhoyo:

“Zixeleleni iintlanga,

nibike naseJerusalem, nithi:

‘Utshaba lugalelekile;

lutsho ngentlaba-mkhosi yalo kwizixeko zakwaJuda.

₁₇Lungqinge iJerusalem okwabalindi belinde amasimi.’

Ewe, kuthetheni oku, kuba kaloku

iJerusalem indivukele.

₁₈Yimisebenzi yakho neendlela zakho ezi zikuzisele le ntlekele.

Sisohlwayo sakho eso.

Sikrakra kambe,

siye kuthi xhokro emxhelweni.”

₁₉Hayi bo! Ndithe qhiphu umbilini;

intliziyo yam iyabetha;

ndingenwe luvalo!

Andikwazi kuthi cwaka;

ndiva isandi sokuvuthelwa kwesigodlo

nokuhlokoma kwentlaba-mkhosi!

₂₀Kuvakala le ntlekele, kuvakale le;

ilizwe lonke lifile.

Ngequbuliso iintente zakowethu zibhuqiwe,

ngephanyazo imikhusane yethu ayisekho.

₂₁Koda kube nini ndibukelana namadabi?

Koda kube nini ndisiva isandi sesigodlo?

₂₂Ke yena *uNdikhoyo uthi:

“Baziziyatha kambe abantu bam; abade bandazi.

Bazizityhakala zabantwana abangenangqiqo.

Ngamachebesha okwenza okubi,

kodwa ngamaqhitala kokulungileyo.”

₂₃Ndathi ndakuwukhangela umhlaba,

ndafika ubharhile, kusempengezini;

ndakukhangela amazulu akwabikho kukhanya.

₂₄Ndakhangela iintaba, ndafika zigungqa, neenduli zinyikima.

₂₅Ndakhangela andabona mntu konke;

kwakubhace nkqu neentaka ezi.

₂₆Ndakhangela umhlaba otyebileyo, ndafika uyintlango,

izixeko zonke zingamabhodlo.

Oku kwenzeka emehlweni kaNdikhoyo

ngenxa yomsindo wakhe ovuthayo.

₂₇Kaloku utsho *uNdikhoyo ukuthi:

“Kuya kuba senkangala kumhlaba wonke,

kodwa ke ndingawubhangisi kuphele.

₂₈Ngenxa yoko umhlaba uya kwenza isijwili,

isibhakabhaka sisibekele kube mnyama,

kuba kutsho mna.

Ndigqibile, yaye andiyi kukuyekelela endikuthethileyo;

andiyi kujika.”

₂₉Kuya kuthi ukuvakala kwesandi sabakhwele amahashe nesandi sabatoli

kusabe zonke izixeko.

Abanye bobalekela ematyholweni,

abanye banyukele emaweni.

Zosala zilambatha iidolophu,

kungabi sahlala bani kuzo.

₃₀Wenza ntoni, Jerusalem, uselushwatyulelwe nje?

Kutheni watsho ngezivatho ezibomvu?

Yini, watsho ngamajikolo, waqaba amehlo?

Ufane wahombela ilize!

Zikulahlile izithandwa zakho;

sezifuna ukukubulala.

₃₁Kaloku ndive isikhalo ngathi sesomfazi esikwa yinimba,

ngathi sisingqala sozibulayo.

Sisikhalo seJerusalem iminxekile,

iphelelwa ngumoya,

ithe na izandla,

ikhala isithi: “Ndafa! Bayandigwinta!”

“Zityhutyheni izitalato zeJerusalem,

nikhangele nigqale,

nizigocagoce iindawo zembutho,

nibone ukuba ngaba kukho mntu na olilungisa nonyanisekileyo.

Ukuba ngaba ukho nokuba mnye ndoyixolela.

₂Nokuba bangade bafunge bathi: ‘Ndifung' uNdikhoyo,’

bafunga ubuxoki.”

₃Ngaba, Ndikhoyo, emntwini akukhangeli ntembeko na?

Wabohlwaya, abeva noko.

Wababetha kabuhlungu bayimangala ingqeqesho.

Bayinyengane ngeenkani; abavumi kuguquka.

₄Suka ndathi:

“Ngamahlwempu adengekileyo la.

Abayazi indlela kaNdikhoyo;

abakuqondi okufunwa nguThixo wabo.

₅Ndiza kuthetha nabakhulu.

Ngabo abayaziyo indlela kaNdikhoyo;

ngabo abakwaziyo okufunwa nguThixo wabo.”

Kodwa nabo xa bebonke bayaphule idyokhwe,

baziqhawula izitrophu.

₆Ngoko ke bohlaselwa yingonyama,

ingcuka ibatsho babe ngamaswili,

kuzula-zule ihlosi libalalele ngasezidolophini zabo.

Ukuba nje bakhe baphumela ngaphandle

lobathi qwenge-qwenge.

Kaloku benze uvukelo,

baphikela ukumfulathela uThixo.

₇“Ndingakuxolela njani kodwa,

abantwana bakho bendibukule nje?

Andithi bafunga bekhahlela oothixo abangento?

Ndabondla, suka bona bakrexeza, baquqela emzini wehenyukazi.

₈Bafana neenkunzi zamahashe ezondlekileyo –

banqwenela abafazi boogxa babo.

₉Mandingabohlwayi ke ngenxa yento enje;

ndingaziphindezeli kwisizwe esinjengesi?”

Lowo ngumlomo kaNdikhoyo.

₁₀“Ngena usivuthulule isidiliya sakhe,

kodwa ungasibhuqi sonke.

Wasuse amasebe aso,

kuba aba bantu abangabo abakaNdikhoyo.

₁₁Kaloku indlu kaSirayeli nekaJuda azikhange zithembeke kum mpela.”

Lowo ngumlomo kaNdikhoyo.

₁₇“Hayi sona isivuno nokutya kwenu: baza kukugqiba!

Koonyana neentombi zenu: ginyi qobo!

Iinkomo neegusha zenu: ginyi qobo!

Imidiliya namakhiwane: bimbilili!

Izixeko zenu ezinqatyisiweyo, bozitshayela ngekrele;

nditsho ezi kanye zilithemba lenu!

₁“Balekani nisabe,

bantu bakwaBhenjamin,

niyishiy' iJerusalem!

Vuthelani isigodlo eTekowa,

nenz' umqondiso phezu kweBhete-hakerem ngomlilo.

Kub' intlekele evela ngasentla igalelekile,

ngokunjalo nentshabalalo engathethekiyo.

₂Intombi eyiZiyon ndiyifanisa nedlelo elikhethekileyo.

₃Yokhatshelwa kulo imihlambi ngabelusi,

bafike bee thande, bagxumeke iintente,

elowo adlise kweyakhe indawo.

₄“Zigonyeni, niqulele imfazwe,

sihlasele esi sixeko ilanga lisahlab' umhlaba.

Hayi bo! Amathunz' awile, imini selisangene!

₅Phakamani, sihlasele ngobusuku,

sizidilize ezo nqaba.”

₆Utsho uNdikhoyo onamandla onke ukuthi:

“Gawulani imithi,

nifumbe iingqumba zomhlaba kwiindonga zeJerusalem.

Sisixeko esifanelwe kukohlwaywa,

intw' ezele yingcinezelo yodwa.

₇Njengoko ahlala empompoza amanz' omthombo,

buhlala bunjalo ukumpompoza ububi baseJerusalem.

Kuhlala kuvakala ugonyamelo nembuqe kuyo;

iimbandezelo neentlungu zihlala ziphambi kwam njalo.

₈Lumka, Jerusalem, hleze ndikulahle,

naloo mhlaba wakho ndiwutsho ufane nenkangala engahlalwa bani.”

₉Utsho uNdikhoyo onamandla onke ukuthi:

“Khwahlaza loo masalela akwaSirayeli,

uxele umntu okhwahlaza emdiliyeni,

ebhikica loo minqandandana isele emasebeni.”

₁₀Ndibhekise kubani?

Ngubani owondiphulaphula,

abamkele ubungqina bam?

NingamaSirayeli alukileyo,

ukanti iindlebe zenu zivalekile,

aniva tu!

Kubo ilizwi likaNdikhoyo lisisinyeliso;

abalikhathalele nganto.

₁₁Ndiyaphuphuma yingqumbo kaNdikhoyo ngenxa yabo.

Kudala ndizibambile, ngoku ndidiniwe.

“Yibhodlele kubantwana ezitalatweni,

nakubafana ezimbuthweni.

Kochatshazelwa bonke: amadoda nabafazi.

Ewe, kochatshazelwa nabagugileyo, nditsho iinkothovu zamaxhego.

₁₂Imizi yabo yothathwa bantu bambi,

ngokunjalo amasimi nabafazi babo,

xa ndibohlwaya abantu beli lizwe.”

Lowo ngumlomo kaNdikhoyo.

₁₃“Kususela koyena uphantsi umntu,

kuse kwabona baphakamileyo,

xa bebonke basemva kwenzuzo.

Kwanabashumayeli, nababingeleli ngabakhohlisi xa bebonke.

₁₄Amanxeba abantu bam banga bayawanyanga

ngokuthi: ‘Ngxe, ngxe, akukho ngozi!’

Ukanti alixolanga.

₁₅Zizinto ezingenazintloni naxa zenze amanyundululu;

azibi nalo nonyungu olu!

Ngoko ke baza kuwa nabawileyo;

bokhubeka mhla ndabavelela.”

Utsho uNdikhoyo.

₁₆Utsho *uNdikhoyo ukuthi:

“Yimani eziphambukeni nikhangele,

nibuzise ngomendo wamandulo,

niqonde ukuba yiyiphi na indlela eyiyona-yona,

nihambe ngayo ke,

ukuze nifumane inzolo emphefumlweni.

Ke nina nathi: ‘Asiyi kuhamba ngayo!’

₁₇Ndanimisela abalindi, ndathi: ‘Phulaphulani izwi lesigodlo!’

Kodwa nina nathi: ‘Asiyi kuphulaphula.’

₁₈“Bekani iindlebe ke ngoko, nina zintlanga,

niyiqonde, mabandlandini, into endiza kubenza yona.

₁₉Phulaphula, mhlaba,

ubone ishwangusha endiza kulithumela aba bantu.

Sisiphumo samayelenqe abo,

kuba kaloku abalinanzanga ilizwi lam –

andisathethi ke ngomyalelo wam abawubukuleyo.

₂₀Andiyihoyanga intlaka yesiqhumiso yaseSheba,

ndingawakhathalele namakha avela kwelasemzini.

Andinamdla kumadini enu;

andikholiswa nangala atshiswayo.”

₂₁Ngoko ke utsho uNdikhoyo ukuthi:

“Aba bantu ndiza kubabekela imiqobo abaya kukhubeka kuyo,

kuwe uyise nonyana kunye nabamelwana nezihlobo,

batshabalale xa bebonke.”

“Nâlo uhlanga oluvela ngasentla,

isizwe esinamandla esixhokonxwe lee emalandalahla.

₂₃Baxhobe ngeentolo nemikhonto;

izinto ezinolunya ezingenalusini.

Batsho ngesandi esinga kugquma ulwandle,

beza bekhwele amahashe

bengamabutho okuhlasela wena, Ziyon.”

₂₄Ewe, zifikile kuthi ezo ndaba,

zangenwa ngumkhinkqi iingalo,

lwangongoza uvalo oku komfazi olunywayo.

₂₅Musa ukuphumela ngaphandle,

ungakhe ubonwe ezindleleni,

kuba utshaba luxhobile;

lunxunguphalo macal' onke.

₂₆Zithini wambu ngerhonya, bantu bam,

nizibhuqa-bhuqe eluthuthwini,

nibe ngathi nizilele unyana okuphela kwakhe

ngesikrakra sona isililo,

kuba uza kusifikela ngequbuliso yena umtshabalalisi.

₂₇“Ndikwenze umgocagoci wabantu bam,

ukuze uziqonde uzivavanye kakuhle iindlela zabo.

₂₈Bangabakreqi abanenkani;

balukhuni okwesinyithi nentsimbi.

Zizinto ezihamba zisasaza ulwimi;

bonakele xa bebonke.

₂₉Imfutho ivuthela umlilo wokunyibilikisa ilothe.

Uyawenza umsebenzi wakhe umkhandi,

kodwa yonke loo nto lilize,

kuba zona izikhohlakali azipheli.

₃₀Kuthiwa abantu bayintlenge yesiliva,

kuba uNdikhoyo ubabukule.”