To The Word – Day 172

₁Igama elihle lilungile

ngaphezu kwamafutha aqholiweyo.

Umhla wokufa ulungile kunomhla wokuzalwa.

₂Kungcono uye emzini onesililo kunokuya emzini onetheko,

kuba kaloku ukufa sisiphelo sabantu bonke.

Ngoko ke abantu ngebeyithathela ingqalelo le nto.

₃Kubhetele kwaiinzingo kunokuhleka,

kuba ubuso obuthe rhubaxa buyayomeleza intliziyo.

₄Intliziyo yesilumko isendlwini yesijwili,

ke intliziyo yesiyatha isendlwini yeziyolo.

₅Kulungile ukuva ukukhalinyelwa sisilumko

kunokuphulaphula ukombelelwa sisityhakala.

₆Ukuhleka kwesityhakala kufana nqwa nokunqanqaza komlilo wameva phantsi kwembiza.

Nale ke into ngamampunge!

₇Isilumko esiphantsi kwezoyikiso silahlekelwa ziingqondo;

umntu onyotywayo wonakala ingqiqo.

₈Isiphelo somcimbi sibhetele kunesiqalo sawo.

Umonde ungcono kunekratshi.

₉Musa ukukhawuleza ucaphuke ngaphakathi kwakho;

kaloku umsindo yinto yezityhakala.

₁₀Musa ukuthi: “Bekungani ukuba imihla yamandulo ibe ngcono kunale yangoku?”

Kaloku ayibubo ubulumko ukubuza umbuzo onjalo.

₁₁Ubulumko nqwa nelifa ngokulunga;

bululutho kubo bonke abaphilayo;

₁₂umntu bumenza akhuseleke njengokuba nemali isenjenjalo.

Ewe, naku ukubalasela kolwazi: ubulumko buyabukhusela ubomi balowo unabo.

Ngubani ongayolulayo into ayenze goso?

₁₄Ngamathuba obumnandi yonwaba;

ngemihla yobubi qonda kakuhle ukuba kwale njengaleya yenziwe nguThixo.

Ngoko ke akukho mntu uyaziyo into eza kwenzeka kamva.

Ndibone umntu olungileyo efela ebulungiseni bakhe,

ngokunjalo ndabona nomntu okhohlakeleyo ephila ubomi obude benkohlakalo.

₁₆Ngani ukuba uzenzakalise ngokusuka uzenze uchwenene welungisa,

okanye ingcaphephe yesilumko?

₁₇Ngani ukuba ufe phambi kwexesha lakho ngokusuka ubalasele ngenkohlakalo,

okanye ugqwese ngobutyhakala?

₁₈Bambelela kwezi zinto zombini, kungabikho oyiyekelelayo.

Umntu omoyikayo uThixo uya kuwaphepha omabini la macala.

₁₉Ubulumko bumenza onabo abe namandla

ngaphezu kwabalawuli besixeko abalishumi.

₂₀Emhlabeni akukho mntu ulilungisa

owenza okuhle kuphela angoni.

₂₁Musa ukuphulaphula yonke into ethethwa ngabantu,

hleze ude uve isicaka sakho sikunyemba.

₂₂Kaloku nawe ngokwakho uyazi

ukuba kukaninzi ubanyelisa abanye abantu.

“Ndizimisele ukuba sisilumko,”

kodwa ke andafikelela kubo.

₂₄Oko kukude kakhulu –

ndithi oko kunzulu gqitha –

ngubani ongaze akubhaqe?

₂₅Ndazinikezela ke ukuba ndiphande ndifune ulwazi,

ukuze ndibuzuze ubulumko bokubhaqa isizekabani sezinto,

ndibuqonde nobutyhakala benkohlakalo nokuphutha kobudenge.

₂₆Ndifumanise ukuba eyona nto ikrakra nangaphezu kokufa ngumfazi oliqili,

ontliziyo inezabatha, ongalo zifana namakhamandela.

Ke yona indoda ekholisa uThixo iyasinda kuye,

kodwa ke yona engumoni uyayibambisa.

₂₇“Khangel' apha,” itsho iNgqondi,

“nantsi into endiyibhaqileyo:

Ndakudibanisa enye nenye ukuze ndicacelwe zizinto –

₂₈lo gama umoya wam wawusaphengulula ndingekafumani nto –

ndibhaqe indoda yanye kwiwaka ethe ngqo,

kodwa yena umfazi onjalo andimfumananga phakathi kwabo bonke.

₂₉Kuphela kwendikufumeneyo kukuba uThixo uluntu waludala luthe ngqo,

kodwa ke abantu basuke bayila ubuqili phezu kobuqili.”

₁Yaz'ba ngubani eso silumko singaziqondayo ezi zinto?

Ngubani ongayichazayo intsingiselo yezi zinto?

Kaloku ubulumko buyabuswabulula ubuso bomntu,

atsho ayeke ukumatsheka.

₅Lowo ugcina umthetho akayi kuhlelwa bububi;

onobulumko uyakwazi amakakwenze ngexesha elifanelekileyo.

₆Kaloku yonke into inexesha layo nendlela emayenziwe ngayo;

kambe buninzi ububi obunokumhlela umntu –

₇akazi ukuba kuya kwenzeka ntoni.

Kakade ngubani onokuxela okuya kubakho?

₈Umntu akanalo igunya phezu komoya ukuba awuthintele;

akukho bani uyilawulayo imini yokufa kwakhe.

Njengokuba kungekho ukuphuncula emfazweni,

kananjalo inkohlakalo ayibayeki abo bayenzayo.

₁₇Kungcono ukuphulaphula amazwi esilumko esithetha sizolile

kunokuzikhathaza ngokukhwaza komlawuli wezityhakala.

₁₈Ubulumko bubaluleke ngaphezu kwezixhobo zemfazwe,

kambe ke nomoni omnye nje angonakalisa lukhulu kwizinto ebezilungile.

₁Iimpukane ezifileyo zingasonakalisa isiqholo sitsho sibile sinuke,

ngokunjalo nentwana nje yobutyhakala ingabutshabhisa ubulumko ndawonye nesidima.

₂Intliziyo yesilumko isitsho sibe namandla;

kanti ke eyesityhakala isitsho sibe buthathaka.

₃Noba isityhakala sesihamba ngendlela, sibonakala kubo bonke ukuba simuncu.

Umntu onjalo uzicacisa nakubani na ukuba usisiyatha.

₄Xa ekhathazekile umlawuli wakho musa ukurhoxa esikhundleni sakho –

kaloku kukuzola into ewulungisayo umonakalo.

₅Apha phantsi kwelanga kukho ububi endibubonileyo,

impazamo eyenziwa ngophetheyo.

₆Izikhundla ezininzi eziphezulu zinikwa izityhakala,

zize ke zona izityebi zinikwe ezisezantsi.

₇Ndiwabonile amakhoboka ekhwele amahashe,

kodwa zona izikhulu zibhadaza ngeenyawo ngathi ngamakhoboka.

₈Umntu owomba umngxuma usenokweyela kuwo;

otyhoboza eludongeni usenokulunywa yinyoka.

₉Umntu owomba amatye usenokwenzakaliswa ngawo,

nocanda iinkuni usenokuba sengozini.

₁₀Xa izembe libuthuntu, lingalolwanga,

kufuneka ubethe ngamandla ngalo.

Kodwa ke bubuchule into enika impumelelo.

₁₁Inyoka kufuneka ilalaniswe ngaphambi kokuba imlume umntu,

kuba xa seyimlumile akusancedi lutho kumlalanisi wayo.

₁₂Anendili amazwi aphuma emlonyeni wesilumko,

ukanti ke sona isityhakala sizitshabalalisa ngemilebe yaso.

₁₃Siqala ngokulavuza,

size sigqibele sesiwanqa impambano.

₁₄Ewe, isityhakala sithetha singayeki.

Akukho mntu uyaziyo into eza kwehla,

kungekho namntu unokuyixela into eya kwenzeka kamva.

₁₅Umntu ongenangqondo uzidinisa ngomsebenzi,

aze ke akhohlwe nayindlela egodukayo isiya esixekweni.

₁₆Mawoo kwilizwe elikumkani ebesakuba likhoboka,

elimatshawe enza amatheko kusekusasa.

₁₇Kambe ke linoyolo ilizwe elikumkani uzalwa zizikhulu,

elimatshawe atya ngexesha elililo, efuna amandla, ingekuko ukunxila.

₁₈Ngobuvila iyawa imiqadi;

kozandla ziqhokriweyo indlu iyanetha.

₁₉Isidlo simenza onwabe umntu,

ke yona iwayini iyabudlamkisa ubomi;

kambe ke kuyo yonke into yimali ethethayo.

₂₀Ungaze umnyembe ukumkani, nditsho nangeengcinga;

nesityebi sukusinyelisa, noba sewusesililini sakho,

hleze kubekho ntakazana iphuma namazwi akho,

into enamaphiko iyixele loo ntetho.

₁Kusebenzise oko unako;

ngokuhamba kwexesha uya kufumana inzuzo.

₂Indyebo yakho yigcinise kwiindawo ezisixhenxe –

ewe, noba zide zasibhozo –

kuba kaloku akuyazi intlekele enokulihlela ihlabathi.

₃Amafu xa anemvula ayithulula emhlabeni;

noba umthi uwela ngasezantsi okanye ngasentla,

kodwa uhlala uthi ncwaba kuloo ndawo uwe kuyo.

₄Ukuba ujonge imo ethile yezulu soze ulime;

kanti ke ukuba uqwalasela amafu soze uvune.

₅Njengoko ungayazi indlela yomoya,

ungamazi nokuba wenziwa njani na umntu esizalweni sonina,

kananjalo soze ukuqonde nokusebenza kukaThixo onguMdali weento zonke.

₆Imbewu yihlwayele kusasa,

nangokuhlwa ungasiphumzi isandla sakho.

Kaloku akuyazi eya kuphumelela:

isenokuba yile okanye leya,

ukanti zisenokuphumelela zombini.

₇Kuyanambitheka ukukhanya;

kulungile emehlweni ukulibona ilanga.

₈Yixhamle ngokobungakanani bayo iminyaka yokudla kwakho ubomi,

ukhumbule ukuba imihla yobumnyama xa ungasekhoyo iya kuba mininzi.

Ewe, yonke into ezayo ingamampunge.

₉Wena mntu osemtsha, yonwaba ngethuba lobutsha bakho,

intliziyo yakho ichwayite lo gama uselula.

Yenze loo nto isentliziyweni yakho,

nditsho leyo ibonwa ngamehlo akho,

kambe ke ukhumbule ukuba uza kuziphendulela enkundleni kaThixo ngayo yonke into oyenzileyo.

₁₀Ngoko ke ligxothe ixhala entliziyweni yakho,

ukuphephe okunokwenzakalisa umzimba wakho.

Kaloku ubutsha namandla awo ngamampunge.

₁Mkhumbule uMdali wakho ngemihla yobutsha bakho,

ngoku ingekafiki imihla yeenkathazo,

ingekasondeli neminyaka apho uya kuthi: “Akukho nto imnandi ekudleni ubomi.”

₂Ngelo thuba ke ukukhanya kwelanga, inyanga, neenkwenkwezi, kosuka kufiphale kuwe,

nezulu lihlale lisibekele ngathi kungemva kwemvula.

₃Iingalo zakho ebezikukhusela ziya kuba nomkhinkqi;

ngokunjalo nale milenze yakho yomeleleyo okwangoku iya kuba nengevane.

Uya kuba ungasenako ukuhlafuna, kuba amazinyo embalwa,

namehlo selemfiliba, ungasaboni kakuhle.

₄Iindlebe ziya kuba sezixinene, ungabi sayiva nengxolo esesitalatweni,

nditsho nesandi selitye lokusila.

Uya kuvuka kusasa zisantyiloza iintaka,

noxa kungasekho nayiphi na ingoma onokuyiva.

₅Ngelo xesha uya kuzoyika iindawo eziphakamileyo,

ngokunjalo uziphephe iingozi ezitalatweni.

Iinwele zakho zosuka zibe mhlophe oku kom-amangile otyatyambileyo,

nasekuhambeni ungabi nako nokuzirhuqa oku,

ke yona iminqweno ingabi nako ukuvuseleleka.

Kaloku umntu uhlalelwe kukuhamba

aye ekhayeni lakhe laphakade,

abazili behle benyuka ezitalatweni.

₆Ewe kaloku, umxokelelwana wesiliva uya kushunquka,

nesibane segolide siwe saphuke;

ukanti ke nentambo phaya equleni iya kuqhawuka,

nomphanda utsho ukroboke.

₇Ke lona uthuli lwethu luya kubuyela emhlabeni, apho lwaluvele khona kakade,

umoya ubuyele kuThixo njengoko wawuvela kuye.

₈Ewe, itsho iNgqondi ukuthi: “Ngamampunge akwampunge! Yonke into ngamampunge!”