To The Word – Day 169

₂“Wena kuxa ungubani, ukuba ude ufune ukulenza mfiliba icebo lam?

Mazwi mani wona la, engenalwazi nje?

₃Khawuqule, ume njengendoda;

mna ndiza kukubuza, wena ke uphendule.

₄“Wawuphi xa ndiseka ihlabathi?

Yitsho kaloku, uyingqondi andithi?

₅Ngubani owamisa ubungakanani balo?

Awunakungayazi loo nto!

Ngubani owalijikelezayo etsala intambo?

₆Khona, zixhaswe yintoni iintsika zalo?

Ingubani owalimisela ilitye lesiseko?

₇Ngaloo ntsasa iinkwenkwezi zamemelela,

izidwangube zakwaThixo zona zanemincili.

₈Mhla lwagqabhuka ulwandle emhlabeni,

ngubani owalumisela imida?

₉Kaloku ndim owalwambathisa ngamafu,

ndaza ndalusonga ngobumnyama.

₁₀Ndim owalumisela imida,

ndalubiyela ndaluvalela endaweni yalo.

₁₁Ndaluyalela ndathi:

‘Hamba, ungagqithi apha;

amaza akho adlokovayo makaphele apha.’

₁₂“Ukhonje wakha wayiyalela intsasa yabakho?

Wakha wasikhombisa indawo yaso na isifingo?

₁₃Nditsho umsobomvu okhanyisela iziphelo zehlabathi,

khon' ukuze izikhohlakali zingabi nakuzimela ebumnyameni.

₁₄Kaloku ukusa kuzitsho ziphuhle iinduli neentili,

zibe ngathi yingubo ebikade isongene;

ewe, zitsho zicace oku kophawu olushicilelwe kumdongwe.

₁₅Abakhohlakeleyo bayoyiswa kukukhanya;

kaloku ingalo yabo yokugonyamela yaphulwe.

₁₆“Ngaba wakha wayibona imithombo yolwandle?

Sowukhe wathi cakatha ezintunjini zenzonzobila?

₁₇Uwatyhilelwe na amasango okufa?

Wakha wakubona kwamnyama-ndawo?

₁₈Khawutsho, lingakanani ihlabathi?

Phendula kaloku ukuba uyazazi ezi zinto!

₁₉“Ungalixela apho likhoyo ikhaya lokukhanya?

Khona, wona umthombo wobumnyama uphi?

₂₀Ezi zinto ungazibuyisela na endaweni yazo?

Khona, uyayazi na indlela esinga esikhundleni sazo?

₂₁Awunakungazazi; kaloku wawuseluzelwe,

neminyaka yobomi bakho mininzi, ngabula wena!

₂₂“Wakha wababona oovimba bam bekhephu?

Oovimba besichotho bona uyabazi?

₂₃Ezi zinto ndizigcinele mhla kwanyembeleka;

ndizigcinele mhla kwathiwa ilizwe lifile.

₂₄Uyayazi na indlela eya apho kuvela khona ukukhanya?

Uthini umoya wasempuma ukusasazeka phezu kwehlabathi?

₂₅Ngubani ovulela izandyondyo zemvula umjelo;

ingubani yena khona ovulela iindudumo indlela?

₂₆Ngubani onisa imvula endle phaya?

Inethiswa ngubani imvula enkqantosini,

₂₇ukuze ithobe unxano kumhlaba okhamisileyo,

kutsho kuthi rhwelele utyani?

₂₈Kakade, imvula le yinto kabani;

ingubani yena uyise wombethe?

₂₉Ke wona umkhenkce wakhawulwa ngubani;

ingubani yena umzali weqabaka?

₃₀Kaloku amanzi ayaqina abe ngathi lilitye;

inzongo-nzongo yamanzi itsho ikhenkcezele.

₃₁“Uthi ngaba unokuzidibanisa izilimela;

khona unako ukuwakhulula amakroza?

₃₂Ungazilawula iinkwenkwezi namathuba azo,

nditsho oozibhere ngokunjalo namatakane azo?

₃₃Uyayazi imithetho elawula ilanga nenyanga neenkwenkwezi?

Unganako ukumisela impembelelo yazo emhlabeni?

₃₄“Unganako ukuliphakamisela emafini ilizwi lakho,

khon' ukuze akugubungele ngezantyala-ntyala zemvula?

₃₅Ngaba unganako ukuyithuma imibane?

Ngaba ingavuma ithi: ‘Ndiyaya’?

₃₆Ngubani oyazisayo intsikizi ngemvula,

ingubani oxelela umqhagi ngemini entsha?

₃₇Sisiphi isilumko esinokubala amafu,

ingubani onokuqubuda iingqayi zamanzi zasemazulwini?

₃₈Nditsho imvula ejika uthuli lube ludaka,

ke wona amagade atsho ancamathelane.

₃₉“Unganako ukuzingelela imazi yengonyama?

Ungawahluthisa khona amathole engonyama,

₄₀xa ahleli esikhundleni sawo,

okanye xa ancathame ngetyholo?

₄₁Uthi ngubani owondla amahlungulu, xa amantshontsho awo akhala kuThixo,

ebhadula ngenxa yendlala?”

₁“Ngaba uyalazi ixesha lokuzala kwamagogo asemaweni?

Wakha walibona na inxala xa lifikelwa yinimba yokuzala?

₂Lithatha iinyanga ezingakanani lithwele,

lize lifike nini ke ixesha lokuzala kwalo?

₃Uyalazi ukuba lingqengqa nini na ukuze libeke itakane lalo,

ibe ke ngokunjalo idlule intlungu yenimba?

₄Amatakane alo akhulela ezindle ade omelele,

aze ke asuke emke angaze abe sabuya.

₅“Iqwarha eli layithatha phi inkululeko?

Ngubani owalikhulula intambo ukuba libhadule?

₆Ndim owalinikela ukuba lihlale entlango,

ikhaya lalo libe kuloo mathafa etyuwa.

₇Isiphithi-phithi sasezixekweni yintlekisa kulo;

ngokunjalo nemikhwazo yombhexeshi aliyiva.

₈Libhadula ezintabeni lifuna amadlelo,

lize limemethe naluphi na uhlaza elilufumanayo.

₉“Uthi ungaze uyisebenzise inyathi?

Unganako ukuyivalela ebuhlanti?

₁₀Uthi ungayirhintyela ulime ngayo;

mhlawumbi uyerhe entilini phaya?

₁₁Uthi ingaze ikuncede ngamandla ayo;

ungawunikela kuyo umsebenzi wakho?

₁₂Ngaba unganako ukuvuna ngayo?

Uthi ungabhula ngayo esandeni phaya?

₁₃“Hayi ukufaneleka kwamaphiko enciniba!

Kambe ke iyagqweswa yingwamza ngokuphapha.

₁₄Amaqanda ayo iwabeka emhlabeni iwashiye

ukuze ke afudunyezwe ngumhlaba lowo.

₁₅Ayinaloyiko lokuba osuka anyathelwe,

okanye kuthi gqi inyamakazi iwakroboze.

₁₆Ayinankathalo ngamantshontsho ayo, ngathi asingawayo;

ayivakalelwa kukubhanga kwemigudu yayo.

₁₇UThixo uyivimbe ubulumko inciniba,

akayinika nokuyinika ingqiqo.

₁₈Kambe ke yakuwathi naa amaphiko ayo ibaleka

iyalihleka ihashe nokhwele kulo.

₁₉“Ngaba nguwe na owenze ihashe lomelela kangaka?

Nguwe owalivathisa ngeso singci siyakayaka?

₂₀Nguwe olenze lanako ukuthi qakatha njengeenkumbi?

Nguwe olenze larhwaqelisa ngesandi somfutho walo?

₂₁Ligxanya ngamandla ngaloo manqina alo xa lijikela entilini phaya,

selifunzele phakathi kwayiwayo!

₂₂Kaloku lona alinadyudyu nantaka;

aliwazele nto umkhonto, alibuyi ngamva.

₂₃Kaloku lo uphezu kwalo uxhob' uf' amacala;

oomikhonto noozincula ziyabengezela.

₂₄Ngaloo manqina alo lisiphula umhlaba,

selingasakwazi ukuzibamba, lilindele ukuvakala kwexilongo.

₂₅Lakuva umtyangampo wexilongo lithi: ‘Ngxatsho ke!’

ze lithi lisekude lé, libe seliqonda ukuba izwe lifile!

Kaloku liyabeva oomaqhuzu xa bayalelayo.

₂₆“Ngaba bubulumko bakho na obunika ukhetshe ubuchule bokubhabha?

Nguwe omenza athi naa amaphiko abheke kwelasezantsi?

₂₇Ngaba nguwe oyalela ixhalanga ukuba lintinge,

lakhe nendlu yalo emalenga-lengeni phaya?

₂₈Kaloku lona lihlala kwiinkelekethe zamawa;

lizenzela inqaba kwiimfanta zamalenga-lenga.

₂₉Lithi cwaa apho lilonga-longe ixhoba,

lize lilipopole noba selisekudeni.

₃₀Amathole alo amfimfitha igazi;

nalapho zikhoyo izidumbu libutha khona ixhalanga.”

₂“Ngaba ufuna ukubambana noSomandla,

usalatha iimpazamo zakhe?

Wena omangalela uThixo, phendula.”

₄“Xa kungokunje ndiyaqonda ukuba andinto yanto.

Ndingaba saphendula ndithini?

Kungokunje ndidl' imu.

₅Ewe, ndithethe ndaphinda-phinda,

kambe ke ngoku ndosuka ndiwuthunge.”

₇“Khawuqule, ume njengendoda;

mna ndiza kukubuza, wena ke uphendule.

₈“Ngaba ufuna ukusisingela phantsi isigwebo sam?

Ugweba mna ukuze wena ugwetyelwe?

₉Ngaba nawe womelele njengoThixo?

Nelakho ilizwi lizongoma njengelakhe?

₁₀Xa kunjalo ke khawuvele uveth' isidima uzimasekile;

khawuthi jize isihomo nesithozela.

₁₁Khawuphokoze loo msindo wakho,

ubaphoxe abo bazigwagwisayo.

₁₂Ewe, badilize abo baqholosayo;

ke zona izikhohlakali zinyhashele apho zikhoyo.

₁₃Xa zizonke zibandakanye uzingcwabe;

zigqume zihlale kwelo labafileyo.

₁₄Xa kunjalo ke ndiya kuvuma,

ndisithi unako ukuzisindisa ngawakho amandla.

₁₅“Imvubu le uyayiqonda?

Njengawe nayo ndayidala;

phofu yona injengenkomo, itya ingca.

₁₆Kambe ke, yeka – asimandla esinqeni sayo!

Yinto emzimba unemisipha engwanyalala!

₁₇Yinto emsila ungqangqasholo okomsedare;

ke zona izihlunu zemilenze ziphindene.

₁₈Amathambo ayo omelele njengobhedu;

ewe, afana nemivalo yentsimbi.

₁₉Kuzo zonk' izidalwa ithe kratya ngokukhwankqisa;

nguMdali wayo yedwa onako ukuyoyisa.

₂₀Ukutya kwayo kufumaneka ezintabeni phaya,

apho zidloba-dloba khona izilwanyana.

₂₁Ungafika ingqengqe phantsi kwamatyholo akhula ngasemanzini,

okanye izimele ezingcongolweni, emgxobhozweni phaya.

₂₂Ewe, iphumla emthunzini wamatyholo entlanjeni phaya,

ufike ijikelezwe yimingcunube.

₂₃Yona ayiwoyiki umlambo ophuphumayo;

ithi zole nakwiJordan elatyuza amanzi de abethe emlonyeni wayo.

₂₄Kodwa kodwa ngubani ongayihlaselayo?

Ngaba uqale wayityhaphaza?

Ngubani ongayithiyela ayithi qhoo ngaloo mpumlo?”

₁“Uthi ungaze uyilobe ingwenya, okanye ubambe ulwimi lwayo ngentambo?

₂Uthi ungaze uyifake intambo impumlo yayo,

mhlawumbi uyithi qhoo imihlathi ngegwegwe?

₃Ucing' ukuba ingaze itarhuzise kuwe?

Uthi ingakukubongoza ngamazwi athambileyo?

₄Uthi ingenza isivumelwano kunye nawe,

ithembise ukuba likhoboka lakho ngonaphakade?

₅Ngaba ungayenza intaka ongadlalisa ngayo,

uyikhulekele amantombazana akho?

₆Abarhwebi uthi bangarhweba ngayo?

Ucing' ukuba bangahlulelana ngayo?

₇Isikhumba sayo ungasigqobhoza ngamagwegwe?

Mkhonto waphi ongangxwelerha intloko yayo?

₈Khawuyichukumise nje – soz' uphinde!

Engak' imfazwe soz' uyilibale!

₉Ngamampunge ukucinga ukuba ungayoyisa.

Umntu uthi nje akuyibona asuke avikiveke aphelelwe.

₁₀Kungekho bani nje unesibindi sokuyiphazamisa,

ngubani ke ngoko onako ukumelana nam?

₁₁Ukhona na onako ukubanga into kum ukuze ndimbuyisele?

Kaloku yonke into phantsi kwezulu yeyam.

₁₂“Andinakuthi cwaka ngemilenze yayo;

makhe ndikuphokozele ngokomelela kwayo

nokufaneleka kokwakhiwa kwayo.

₁₃Ngubani onokuyinyanzela ukuvula umlomo,

ingubani onokuyifaka umkhala?

₁₄Ewe, ngubani ongavula loo mihlathi yayo

ijikelezwe ziingxavula ezoyikekayo zamazinyo?

₁₅Umqolo wayo unoludwe lwamakhaka

aphotheneyo ngathi atywiniwe.

₁₆Ewe, asondelelene ayimbumba;

phakathi kwawo akungeni nomoya.

₁₇Hayi, anxibelelene angunonca,

abambene nkwa, akanakwahlukaniswa.

₁₈Yintw' ethi yakuthimla kumenyeze,

emehlo ngathi lilanga liphuma.

₁₉Yintw' emlomo ulatyuza amadangatye,

kutsho kutak' iintlantsi.

₂₀Yintw' emarhanana alephuz' umsi,

oku kwembiza ebaselwe ngeengcongolo.

₂₁Ngomphefumlo wayo ungáwuphemb' umlilo;

kaloku kuthaphuz' amadangatye kuloo mlomo.

₂₂Yintw' etsho ngengwanyalala yesixhanti;

bakuyibona abantu suka barhwaqele.

₂₃Izihlunu zayo zifumbene;

ziyingwanyalala engenakuhluthuzwa.

₂₄Yintw' entliziyo iqine oku kwenyengane!

Yomelele oku kwelitye lokusila.

₂₅Ithi ingaphakama kunkwantye neengangalala;

yakushukuma zisuka zithi phithi.

₂₆Yona yomelele, ayinakungxwelerhwa

naziintshuntshe, oomikhonto, noozincula.

₂₇Kuyo intsimbi ifana nomququ;

ke lona ubhedu nqwa nevithi.

₂₈Okukokwalo utolo ayilwazele nto;

kuyo ilitye *lenkwitshi linkumnka ngathi sisabhunge.

₂₉Ke lona ibhunguza lifana nodiza;

iincula ziyinto yentsini kuyo.

₃₀Isisu sayo nqwa namaceba embiza;

umhlaba siwukrazula oku kwesileyi sokubhula.

₃₁Amanzi enzonzobila iwatsho abile okwembiza,

ulwandle iluzama-zamise okweqhaga leziqholo.

₃₂Emva kwayo ngumzila omenyezelayo emanzini.

Inzonzobila isuka ifane neenwele zengwevu.

₃₃Ehlabathini akukho nto inokulinganiswa nayo,

nditsho isilo esingenabo ubugwala.

₃₄Kaloku noozindlula-mthi izikrobile;

ewe, ingukumkani kwizilo zonke ezinyalasayo.”

₂“Ewe, ngoku ndiyaqonda ukuba wena unako ukufeza konke;

konke okucebayo wena unako ukukwenza.

₃Bendingubani ukufuna ukulenza mfiliba icebo lakho, ndingenalwazi nje?

Ngenene ndigabadele, ndithethiswa kukungaqondi;

ndithethe ngemimangaliso nezinto ezinkulu kunam.

₄“Uthe kum: ‘Phulaphula,

mna ndiza kukubuza, wena ke uphendule.’

₅Ngoko bendikwazi nje ngokuva ngeendlebe,

kambe ke ngoku ndikubonile ngala wam amehlo.

₆Ngenxa yale nto ke ngoku ndiyazisola;

ewe, ndiyaguquka; ndiseluthulini naseluthuthwini.”