To The Word – Day 167

₁“Ewe, ikho imigodi yesiliva; ngokunjalo zikho neendawo zokuhluza igolide.

₂Abantu bemba isinyithi emhlabeni,

baze banyibilikise ubhedu olusematyeni.

₃Nenzonzobila yobumnyama abantu bayayihlola-hlola;

baphicotha namathumbu omhlaba,

baze bembe bacubungule kwimiwewe enzongo-nzongo yenzonzobila.

₄Kude lé kwelimiweyo,

apho kungazange kwathi cakatha mntu,

abantu bayemba bavule imigodi,

bajinga-jinge kwalunkcwe,

bebotshelelwe ngeentambo.

₅Phezulu apha lo mhlaba uvelisa ukudla;

kanti ngaphantsi phaya ubhukuqwa ngathi ngumlilo.

₆Kumatye omhlaba kuphuma iisafire,

kanti ke lona uthuli lwawo luvelisa igolide.

₇Amaxhalanga ngokwawo akazazi iindlela zasemigodini phaya,

ngokunjalo zange zalanywa naliliso likakhetshe.

₈Amarhamncwa anyalasayo akazange athi cakatha unyawo apho,

nkqu nengonyama ayizange yadlula khona.

₉Kaloku abantu baqhekeza bagqale nditsho nenyengane le;

ewe, neentaba ngokwazo bayazibhukuqa, bazisiphule neengcambu.

₁₀Basuka bagqobhoze iitonela emaweni,

lize iliso labo liwabhaqe amatye axabisekileyo.

₁₁Imithombo yakhona bayayivingca ingampompozi,

baze bazidandalazise izinto ezifihlakeleyo.

₁₂“Kambe ke, bungaze bufumaneke phi ubulumko?

Khona lona ulwazi lungazuzwa phi?

₁₃Ewe, ubulumko abunakufumaneka ebantwini;

kaloku akukho namnye ulaziyo nexabiso labo.

₁₄Andithi na kaloku kwankqu neenzonzobila ezinzongo-nzongo,

nditsho neelwandle, ziyabulandula?

₁₅Kaloku bona abungekhe bufumaneke nangegolide ecikizekileyo,

kanti nentabalala yesiliva ayinako ukubuhlawula.

₁₆Neyona golide yaseOfire iyalaba-laba kwixabiso labo;

nditsho namatye exabiso, nokuba yionike okanye yisafire.

₁₇Ewe, abunakulinganiswa negolide,

ukanti abunakuthelekiswa nayo nemveliso yegolide,

nditsho nayo neglasi yodidi.

₁₈Asisathethi ke ngeekorale neekristale,

kuba kaloku bona ubulumko bubalasele ngexabiso,

ndithi bugqwesa kwaiiperile.

₁₉Ewe, netopazi yaseKushe ayinakulinganiswa nabo,

ngokunjalo abunakuthengwa nangeyona ihluziweyo igolide.

₂₀Ke, ngaba uphi owona mthombo wobulumko?

Umntu angalufumana phi ulwazi?

₂₁Abubonakali kuzo zonke izinto eziphilileyo,

nditsho nakweyona intingayo intaka.

₂₂Ewe, nokufa nentshabalalo, zombini ziyavuma,

zithi: ‘Luvakele nje umingi-mingi ngabo ezindlebeni zethu!’

₂₃NguThixo kuphela owaziyo ngobulumko;

nguye owaziyo umthombo wabo.

₂₄Kaloku yena ubona nditsho namaphethelo ehlabathi,

kuba kuye akukho nanye into efihlakeleyo phantsi kwamazulu.

₂₅Ngokuya uThixo wayemisela umoya amandla awo,

namanzi ewacandela umda wawo,

₂₆nemvula eyenzela ummiselo wayo,

nombane ewalathisa indlela,

₂₇kanye ngelo thuba ke uThixo wabubona wabuphicotha ubulumko,

waza ke wabumisela wabugoca-goca.

₂₈Ke uluntu waluyalela wathi:

‘Niyabona, ofuna ubulumko makathobele uThixo;

ofuna ukuzuza ulwazi makabucezele ububi.’ ”

₂“Awu, akwaba ibinokubuyiselwa kum imihla yamandulo,

ngokuya uThixo wayesandilondolozile,

₃xenikweni isibane sakhe besikhanya phezu kwentloko yam,

xa ndanditabhata nasebumnyameni endikhanyisela.

₄Ewe, ngaloo mihla yamfamlibe ndandimi kakuhle;

bendilala ngangubo-nye noThixo emzini wam.

₅USomandla wayengakum ngoko,

ndiphahlwe ngabantwana bam.

₆Ngaloo mihla amasi ayedlal' abantwana kwam;

ke yona iminquma ichuma nasematyeni, ithulula ioyile.

₇“Ndandisithi ndakufika enkundleni ngasesangweni,

ndakuthi zinzi phakathi kwamadoda amakhulu,

₈abafana bathi gu bucala,

ke zona iingwevu zime ngeenyawo.

₉Ewe, ayesuka aphel' emqaleni kumatshawe,

ufike selethe khebevu!

₁₀Izikhulu zazisithi cwaka

ngathi ulwimi lukhulekiwe enkalakahleni.

₁₁Abandiva ndithetha babendincoma,

kanti ababona izinto endizenzayo babendingqinela.

₁₂Kaloku ndandisabela ndiwahlangule amahlwempu esakukhala;

ukanti ndazibonelela neenkedama ezazingenamncedi.

₁₃Ababesindakala ndaza ndabanceda babendincoma,

ukanti nabahlolokazi ndandibanceda batsho baba neengoma ezintliziyweni zabo.

₁₄Ndandivatha ubulungisa njengesinxibo sam;

ukwenza okulungileyo kwakuyingubo yam neqhiya yam.

₁₅Ndandingamehlo kwiimfama,

ndiziinyawo koqhwalelayo.

₁₆Ndandingutata kumahlwempu,

neengxaki zabasemzini bendizithabathela kum.

₁₇Yayindim umaphul' iimpondo kwizibhoja,

amaxhoba azo ndiwathi hlasi emilonyeni yazo.

₁₈“Ndandisithi: ‘Ndiya kukhula ndide ndikhokhobe endlwini yam,

nemihla yam ibe mininzi njengentlabathi.’

₁₉Ndandifana nomthi ongcambu zinabele emanzini,

omasebe asoloko elalelwa ngumbethe.

₂₀Udumo lwam lwaluhlala luhlaziyeka,

amandla am engapheli nokuphela.

₂₁“Ndandisithi ndakuthetha kutsho kuthi cwaka,

abantu bewaphulaphula amacebiso am.

₂₂Ndandilebela xa ndithethayo, kungekho mntu unokongeza;

kaloku amazwi am ayezika njengemvula.

₂₃Ndandilangazelelwa oku kwemvula,

amazwi am bewaginya oku komhlaba uginy' imvula entlakohlaza.

₂₄Babekhuthazeka ndakuncuma;

ukukhululeka kobuso bam bekubomeleza.

₂₅Ndandingqendeva njengomnumzana, ndithethe kume ngam;

ndandibakhokela njengenjengele kwimikhosi yayo;

ndandibaxhasa njengothuthuzela abadakumbileyo.”

₁“Xa kunamhlanje-nje sendisisigculelo nakubafana abayise bendingabazele nto,

ebendingeze ndabashiya nezinja zam ezalusa iigusha.

₂Bebeligquba nje ekungekho yalo,

amabhetye-bhetye angenakwenza nto tu!

₃Bangamahlwempu alambayo, ahamba ngobusuku,

ufike enqunquda iingcambu emqwebedwini phaya.

₄Balamba kangangokuba ungafika besimba iinqoba emqwebedwini,

bade batye neengcambu zemithi.

₅Abantu babagxothile phakathi kwabo;

basuke babahewula bangathi bachil' isela!

₆Kuye kwanyanzeleka ukuba baye kuhlala emiqolombeni,

emingxunyeni, nasezimfanteni emaweni.

₇Bakhonya phakathi kwamatyholo,

ufike sebethe buthalala phantsi kwemithi.

₈Awu, ziinjubaqa;

sisizukulwana soongantweni eside sagxothwa nakwelakowazo!

₉“Ngoku ke sebendicabela nasezingomeni zabo;

ewe, sendisisimbo nesigculelo sabo.

₁₀Ewe, ngoku bandidelile, bayandenyanya;

bathi bangandibona banditshicele ebusweni!

₁₁Ngenxa yokuba uThixo undiyekele ndatsho ndangugqush' eluthulini,

nabo ke ngoku baziqhawule iintambo zokulawulwa ndim.

₁₂Ngasekunene bafunzela ukundihlasela belihlokondiba;

ewe, bayandijoka, futhi sebezimisele ukundihlabanisela.

₁₃Bayandiqhiwulela endleleni, befuna ukundigqiba,

besithi: ‘Akanabani ongamncedayo.’

₁₄Bandihlasela ngathi batyhoboza kwindawo ebanzi;

baphoseka kum becanda amabhodlo.

₁₅Ngoku ke sendirhawulwe kukunkwantya;

isidima sam sivuthuluke ngathi siyavuthelwa,

ukukhuseleka kwam kubhange oku komfankungu.

₁₆“Ngoku ndisebugxwayibeni,

kuba imihla yenkathazo indibambile.

₁₇Ebusuku ndiqaqanjelwa nangamathambo la;

iintlungu ezindidlayo azipheli.

₁₈Ndigxavulwa ngeempahla zokunxiba, ndidlakazeliswe;

ndiyakrwitshwa sisambatho, ndibanjwe ngobhongwana.

₁₉UThixo undiphose eludakeni;

andisento, sendifana nothuli nothuthu.

₂₀Ndiba ngakhala ndikubongoza, akundiphenduli;

ndiba ngazibika kuwe, akundihoyi.

₂₁Wena ngoku ujike wandikhohlakalela,

undihlasela ngengalo yakho enamandla.

₂₂Uyandiphakamisa undiyekele ngomoya undibhudle;

ndiyaqotha-qotheka ndiqwengwa sisaqhwithi.

₂₃Ndiyaqonda ke ukuba undinikezela ekufeni,

apho baya kuphelela khona bonke abaphilayo.

₂₄“Kambe akukho hlwempu elizibikayo endingalincedanga,

nditsho elaliphakamisela izandla kum licela uncedo.

₂₅Andithi na kaloku ndandilila kunye nabasezingxakini,

umphefumlo wam udandatheka ngenxa yamahlwempu?

₂₆Mna ndithe ndijonge okuhle kwathi gqi okubi;

bendilindele ukukhanya, suka kwathi nyalulu ubumnyama.

₂₇Ndithiwe fithi lunxunguphalo, alundiphe thuba;

imihla ngemihla ndihlangatyezwa yinkathazo.

₂₈Ukukhanya akukho, ndihamba ndigutyungelwe bubumnyama;

into endiyenzayo embizweni kukuzibika.

₂₉Ngoku sendingumlingane woodyakalashe;

ewe, ndiliqabane leenciniba.

₃₀Ulusu lwam selujike lwamnyama, futhi luyaxobuka,

ibe ke nomzimba wam lo uyagcadeka.

₃₁Ihapu yam ngoku seyijike yaba yeyesililo,

nefluthi yam ngoku seyisenza isijwili.”

₁“Ke mna ke sendazimisela ngomxhelo wam wonke

ukuba kungáze kubekho ntombi ndiyincwasayo.

₂Ke, siyintoni isabelo somntu kuThixo?

Liyintoni ilifa kuSomandla kweliphezulu?

₃Abangalunganga ubathwaxa ngezibetho,

aze abo bangamatshijolo abayekele ngentlekele.

₄Andithi na kaloku yena uyazazi iindlela zam,

ewabala onke amanyathelo am?

₅“Ndiqinisekile andizange ndenze buqhophololo,

ndingazanga ndakhohlisa mntu.

₆Makhe ndibekwe esikalini kungekho xanasi

ukuze uThixo aqonde ukuba ndimsulwa.

₇Ukuba ngaba nditenxile endleleni,

ndaza ke ndabhaduliswa yiminqweno,

okanye ukuba izandla zam zidyojwe bububi,

₈izilimo zam mazixhatshazwe mntu wumbi,

yonke into endiyilimileyo mayincothulwe neengcambu.

₉“Ukuba ngaba ndikhe ndancwasa omnye umfazi,

okanye ndaya kumxhwarhela ngasemasangweni ommelwane,

₁₀umfazi wam ngamana wagubela enye indoda;

ewe, ngamana wambathwa bantu bambi.

₁₁Kuba eso ingaba sisenzo esigwenxa,

ingaba lityala elifanelwe kukugwetywa.

₁₂Loo nto ingaba njengomlilo otshabalalisayo,

otshisa yonke imveliso yam.

₁₃“Ukuba ndakha ndasigatya isikhalazo sesicaka sam,

okanye andasihoya isicakazana xa sinesikrokro ngakum,

₁₄bendingathini ke ukujongana noThixo?

Ndingathini ukuphendula xa efuna ingxelo?

₁₅Andithi na kaloku kwalo Thixo udale mna

zikwadalwe nguye nezicaka zam!

₁₆“Mna andizange ndikumangale ukunceda amahlwempu,

nabahlolokazi abazange bemke belambatha kum.

₁₇Andizange ndaneliseke kukutya ndedwa,

ibe yona inkedama ingenayo into etyiwayo.

₁₈Kaloku ndayikhulisa njengoyise kwasebuntwaneni bayo,

ndayondla ndayithantamisa kwasekuzalweni kwayo.

₁₉Ndakubona usizana oluze,

oluhlwempuzeke kangangokuba lungabi nayo impahla yokunxiba,

₂₀bendilunika impahla eyenziwe ngoboya obuyimveliso yeegusha zam,

lutsho lundincome luhambe lundidumisa.

₂₁Ngaba ndakha ndayivuyelela inkedama

kuba ndiqhayisa ngokuyitshonisa nasenkundleni?

₂₂Xa kunjalo ke ngamana ndakroboka iingalo;

akwaba zingancothuka emagxeni am.

₂₃Hayi bo! Ngenxa yokoyika isohlwayo sikaThixo,

nangenxa yokuhlonipha ubuhandiba bakhe,

into enjalo andizange ndayenza.

₂₄“Xa bendingaqamelela ngegolide,

kwecikizekileyo ndisithi: ‘Ulithemba lam!’

₂₅ukuba bendivuye ndada ndaqholosa ngenxa yentabalala yobutyebi bam,

nangenxa yokwanda kwemveliso yam,

₂₆ukuba bendisuke ndanqula ilanga ngenxa yokuqaqamba kwalo,

okanye inyanga ngenxa yomfaneleko wayo,

₂₇ukuba ngaba bendiwexulekile ndasanga isandla sam,

ndibusa zona ezi zinto,

₂₈nale ke into ibingaba bubugwenxa obufanele isohlwayo esiqatha,

kuba ukwenjenjalo ingaba kukuvukelana noThixo kweliphezulu.

₂₉“Andizange ndavuyiswa kukubandezeleka kotshaba lwam,

ndingazange ndakuthakazelela ukuminxeka kwalo.

₃₀Andizange umlomo wam ndiwuvule wone

ngokusuka ndilushwabulele utshaba lwam.

₃₁Namadoda andisebenzelayo akazange athi:

‘Yhu, besilamba phaya kwaYobi!’

₃₂Abahambi abazange balale ecaleni lendlela ndikho;

ndiyabamema beze, kuba iingcango zomzi wam zahlala zivulekile.

₃₃Bambi bayazigusha bazifihle iziphoso zabo,

kambe ke mna andibufihli ubugwenxa bam.

₃₄Kuba mna andiboyiki abantu,

andithi cwaka okanye ndizivalele endlwini,

kuba ndisoyika ukunyenjwa zizalamane.

₃₅“Akwaba bekukho ondiphulaphuleyo!

Ndiwandlalile umcimbi wam;

uSomandla makandiphendule.

Akwaba izityholo endibekwa zona ngondimangalelayo bezibhaliwe.

₃₆Bendiya kuzithwala emagxeni,

ndizithi jize ngazo entloko njengentshinga.

₃₇UThixo bendiya kumanekela konke okwam,

ndingqiyaze phambi kwakhe njengetshawe.

₃₈“Ukuba ngaba umhlaba wam ubundenzela isijwili,

zindigxeka neefolo zawo,

₃₉ukuba nditye imveliso yawo ndingabahlawulanga abaniniwo,

ndaza bona abalimi bawo ndabavimba,

₄₀ewe, endaweni yengqolowa mawuvelise imithi enameva,

ukuze endaweni yerhasi uvelise ukhula.”

“Kambe ke ndiyimveku ngeminyaka,

ke nina senikhulile, niziingwevu,

nto leyo ke esuke yanditsho ndamathidala,

ndoyika ukuphuhlisa olwam uluvo.

₇Ndithe: ‘Mandiyekel' iminyak' isiphakele.’

Bendisithi: ‘Izilimela zingasiph' ubulumko.’

₈Kambe ke ngoku ndiyaqonda ukuba ngumoya osemntwini,

ewe, lifuthe likaSomandla elimthi jize ngokuqonda umntu.

₉Hayi, abuyi ngaminyaka ubulumko,

kungayi nangabudala ukuqonda imfanelo.

₁₀“Ngoko ke bekan' iindlebe, khe ndiniphakele;

makhe ndinivakalisel' olwam uluvo.

₁₁Ewe, ndiniphulaphule xa beniphakula ubulumko benu;

ndibuvisisile xa benidimbaza nigalela.

₁₂Bendiziindlebe ndonke xa benithetha;

akukho namnye umchaniley' uYobi,

kungekho namnye ukwaziy' ukuchan' amagama.

₁₃Ke nina sanukuthi: ‘Sibuzuzile ubulumko.’

Kaloku nguThixo yedwa ongaphendulanayo noYobi, hayi umntu.

₁₄UYobi ubebhekisa kuni, ingekum.

Kambe ke bendingamphenduli njengani mna.

₁₅“Hayi, Yobi, bathethe kom' umqala;

kungokunje basik' umlomo.

₁₆Mandithini na ke mna?

Uthi mandithi cwaka kuba nabo bethule?

Ewe, nâbo bethe bhuxe, inkukw' isik' umlomo!

₁₇Hayi bo! Nam makhe ndenze owam umda,

ndiluvakalise nolwam uluvo.

₁₈Hayi, mna andisenakuzibamba ndithi cwaka,

kuba kuninzi ukuthetha kum.

₁₉Hayi, ngenene ndifana nemvaba yewayini ebila ingavulwanga –

xa ndingaphokozi ndosuka ndigqabhuke.

₂₀Ewe, manditheth' ukuze kuthi qabu;

mandiwuvule umlomo wam ndiphendule.

₂₁Mna andiz' ukuceng' usolala phi,

ndiza kutheth' utyhatyhiwe ndingalalanisi.

₂₂Kambe akunto yam ukulalanisa;

xa bekunjalo uMdali wam ebengandicim' igama ngoko nangoko!”

₁“Ewe ke ngoku, Yobi, khawukuve ukuthetha kwam,

uwaphulaphule onke amazwi am.

₂Khawundibolek' iindlebe, nam khe ndikuphokozele.

Phulaphula, ulwimi lwam selubeth' inkalakahla.

₃Ewe kaloku, ndithetha ndinyanisekile;

andikufihli oko ndikwaziyo.

₄Kaloku nam ndidalwe nguMoya kaThixo;

ukuphefumla kukaSomandla kundidlise ubomi.

₅Ndiphendule ukuba unako;

qula uzilungiselele amagama.

₆Kaloku phambi koThixo siyafana sobabini;

ewe, sobabini sabunjwa nguye ngodongwe.

₇Ngoko ke uzungatatazeli, mwethu;

noko nesandla sam asingeke sikucinezele.

₈“Ngokuya ubuthetha ndikuvisisile;

kaloku uthethe wenjenje:

₉‘Mna ndimsulwa, andinatyala;

andinachaphaza, ndingenasiphoso.

₁₀Koko uThixo uyandidlelelela nje;

ewe, ufumana endityhola ngokuba ndilutshaba!

₁₁Iinyawo zam uzikhonkxa ngezikhuni;

uyazigqala zonke iindlela zam.’

₁₂“Uyabona, uphazamile ngayo le ndawo;

mandikuphendule, kuba uThixo yena mkhulu kunomntu.

₁₃Ngani ke ukuba umangalelane naye,

usithi yena akaphenduli mntu?”

₁₄“Kaloku uThixo uthetha nomntu ngandlela zonke,

kambe ke yena umntu akahoyi.

₁₅Xa umntu ekobunzulu ubuthongo,

elele emandlalweni wakhe,

uThixo uthetha ngamaphupha nemibono yasebusuku.

₁₆Ewe, uzivula ngelo xesha iindlebe zabantu,

ebalumkisa batsho barhwaqele.

₁₇Ethethanje ke uthintela ukona;

unqanda umntu angazigwagwisi.

₁₈Ukhusela umphefumlo womntu engcwabeni,

amhlangule kwintshabalalo yekrele.

₁₉“Kananjalo umntu wolulekwa nangezigulo ezibuhlungu,

aphanjwe ziingqaqambo emzimbeni.

₂₀Ewe, ude angabi sakulangazelela nokutya,

nokona kumnandi akucekise.

₂₁Ubhitya abe ngumcinga,

nezo mbanjana zakhe bezifihlakele zithi gqi ngaphandle.

₂₂Kaloku selejinga phezu kwengcwaba;

ubomi bakhe bukhwetywa kukufa.

₂₃Mhlawumbi ke angeza kulamlelwa sisithunywa,

esinye kuloo mawaka-waka,

simkhumbuze ngeemfanelo zakhe.

₂₄Singatsho ngovelwano sithi:

‘Mkhulule; makangehli aye kwelabafileyo.

Nantsi kaloku intlawulo.’

₂₅Ulusu lwakhe luya kuhlaziyeka njengolosana,

lubuyiselwe kwimihla yobutsha bakhe;

₂₆athi ke akuthandaza eviwe nguThixo,

atsho amnqule ngothakazelelo,

abuye abe ngumntu oziphethe ngaloo ndlela ayifunayo uThixo.

₂₇Uya kuvuma esidlangalaleni athi:

‘Ndonile ndaphambuka endleleni,

kodwa uThixo akandohlwayanga ngako oko bekundifanele.

₂₈Ewe, undihlangule engcwabeni,

nobomi bam abuyi kucinyelwa langa.’

₂₉“Zonke ezi zinto ke zenziwa nguThixo;

ewe, uzenza umhla nezolo.

₃₀Umntu uyamhlangula engcwabeni,

ukuze naye axhamle ubomi.

₃₁“Ngamana wandiphulaphula ke, Yobi;

ewe, yithi cwaka khe ndithethe.

₃₂Kambe ke uphendule xa unako;

nam ndizimisele ukukulungiselela.

₃₃Phofu ke, xa ungenamazwi, yithi tu,

mna ndikufundise ubulumko.”