Bible Society of South Africa
Izicwangciso zokufunda
To The Word – Bible Reading Challenge
To The Word – Day 162

To The Word – Day 162

Job 8–10, Romans 6–8

Itekisi yeBhayibhile

UYOBI 8

UBhildadi: UThixo akabugqwethi ubulungisa

1Waphendula ke uBhildadi umfo waseShuwa, wathi:

2“Mfondini, koda kube nini ushwaqa,

usenza imbudede yamazwi afana nomoya obhudlayo?

3Uthi uThixo angakujika okulungileyo?

Uthi uSomandla angabugqwetha ubulungisa?

4Ukuba abantwana bakho bawaphule ummiselo wakhe,

yena ke ubawisele isohlwayo esibafaneleyo.

5Into omawuyenze wena kukuzibika kuThixo,

ubuse umbongoze uSomandla.

6Ukuba ungumntu onyanisekileyo omsulwa,

ngenene uya kukuva, akubuyekeze ngomzi wakho.

7Ewe, ubunayo inkqubela ngaphambili,

kodwa ayinakulinganiswa nendyebo owoba nayo esiphelweni.

8Khawuphonononge ulande imbali yemihla yamandulo;

phicotha ufunde kumava amanyange.

9Kaloku thina singabayizolo, asazi nto,

nemihla yethu emhlabeni idlula njengesithunzi.

10Ke bona baya kukululeka, bathethe nawe;

ewe, bangakuphokozela kuloo vimba wolwazi lwabo, bathi:

11‘Ngaba ingaphuma na imizí apho kungekho mgxobhozo?

Uthi ingakhula ingcongolo apho kungekho manzi?

12Zithi zingekalungeli kukhiwa,

zimbatshe kuqala kunezinye izityalo.’

13Iba njalo indlela yabo bonke abamlibalayo uThixo;

ewe, ithemba lâbo bangamnquliyo uThixo liyadaka.

14Kaloku bona bangqiyama ngentambo yesigcawu,

lisuke ke elo themba labo linqamke.

15Bayama ngendlu yesigcawu, ibe ke yona ingaqinanga;

babambelela kuyo ngoku yona igqashu-gqashu.

16Bahluma okwesityalo esinamanzi esibethwa yimitha yelanga,

sona esinwenwa siphinyele egadini.

17Iingcambu zaso zibhijela amatye,

zibambelele kuwo.

18Phofu ke uthi wakusincothula,

kungabi sabonakala ukuba sasikhe sakho.

19Uyabona, injalo indlela yokukhula kwaso:

indawo yaso ithathwa sesinye.

20“Ewe, uThixo akamlahli umntu othembekileyo,

kodwa akangeke azomeleze izandla zabenzi bokubi.

21Ngoko ke úya kulubuyisela uncumo emlonyeni wakho,

nemilebe yakho ibobotheke yimincili.

22Ke bona abakuthiyileyo baya kwambathwa lihlazo;

kanti ke yona imizi yabakhohlakeleyo iya kubhanga.”

UYOBI 8XHO96Vula kumfundi weBhayibhile

UYOBI 9

UYobi: UThixo sisilumko esibalasele ngamandla

1Ke uYobi waphendula wathi:

2“Ewe, ndiyazi ukuba kunjalo;

kambe ke umntu angaphumelela njani xa emi enkundleni noThixo?

3Noba ungade uzimisele ukuxoxa,

awungebi nako ukuphendula nomnye kwiwaka lemibuzo yakhe.

4Kaloku yena sisilumko esibalaseleyo ngamandla;

akukho mntu unokumelana naye aze aphumelele.

5Kaloku yena neentaba ezi usuka azisiphule zingazi zona;

ewe, ngaloo ngqumbo yakhe usuka azibhukuqe.

6Yena nomhlaba lo uyawugungxula,

neentsika zawo zitsho ziqhaqhazele.

7Nelanga uthetha nalo litsho lingaphumi,

ke zona iinkwenkwezi uzigubungela zitsho zingaveli.

8Nguye owawatwabululayo amazulu,

waza wandolosa phezu kwawo amaza olwandle.

9Nguye umenzi weendidi zeenkwenkwezi,

oozibhere noomakroza, isilimela nomthala wasezantsi.

10Yena ngumenzi wezinto ezinkulu ezingaphicothekiyo;

kanti nemiqondiso yakhe ayinakubalwa.

11Nokuba selegqitha ngakum andinako ukumbona;

uthi tshe ndingaqondanga mna.

12Khona selengade athathe into, ngubani ongamnqandayo?

Akekho nongabuzayo athi: ‘Wenza ntoni ke?’

13Kaloku uThixo akabuyi ngamva ngengqumbo yakhe;

neentshaba zakhe ezazithelela uRahabhi isilo saselwandle wazinyhasha.

14“Bendingubani ke mna ukuba ndingade ndiphendulane naye?

Khona, ndingawazuza phi amazwi okuxoxa naye?

15Nditsho sendimsulwa, andingeze ndamxoxisa;

nto endingayenzayo kukuzibika ndimbongoze uMgwebi wam.

16Nokuba sendizibika kuye, naxa angade andiphendule,

anditsho ukuba angakuva ukuzithethelela kwam.

17Kaloku yena undintlitha ngenzwinini yesaqhwithi,

anditsho imivumbo ixananaze ngaphandle kwesizathu.

18Akandiniki neli lokukhok' umoya ithuba,

koko unditsho ndanengcwangu.

19Xa kuthethwa ngamandla, nguye onawo;

xa kuthethwa ngobulungisa, nguye onokundimangalela.”

UYobi: Andinabala, kodwa andizibaleli ntweni

20“Ndimsulwa ndinjalo, kodwa ndigwetywa kwangumlomo wam.

Nangona ndingade ndibe andinabala, yena angandifumana ndinetyala.

21Ewe, andinabala, kodwa andizibaleli ntweni;

nto nje ndikruqukile bobu bomi.

22Kuba kaloku kuyafana;

yiyo loo nto ke ndithi:

‘Yena utshabalalisa bonke,

abamsulwa ngokunjalo nezaphula-mthetho.’

23Isithwakumbe sithi sakuzisa ukufa

yena aphoxise ngaso isibetho sabamsulwa.

24Ihlabathi lisezandleni zezikhohlakali;

ke bona abagwebi ubamfamekisile.

Xa ingenguye ke uthi ngaba ngubani?

25“Imihla yam ikhawuleza ngaphezu kwembaleki;

ewe, ibaleka gqitha, ibe ke ayinayo nanto incomekayo.

26Iphala njengesikhephe seengcongolo;

ikhawuleza ngathi lukhozi lurhiwula ixhoba.

27Noba sendisithi:

‘Hayi, ngoku ndiza kukhe ndizingcwabe izikhalazo zam,

ndibobotheke ndihlale ndizonwabele,’

28ndisuka ndoyike ndibe namanwele,

kuba ndiyaqonda ukuba wena akungeke undibalele njengongenatyala.

29Ke, ukuba ndiza kugwetywa, ngani ukuba ndibe sazabalaza?

30Noba ndingade ndihlambe ngekhephu,

izandla zam ndizicoce ngesephu,

31wena uya kundiphosa emhadini,

nditsho ndibe rhono-rhono,

kwankqu neempahla zam zingandamkeli.

32“Ebengumntu na kakade ukuba ndibe ndiphendulane naye?

Hayi, bendingeze ndime naye enkundleni!

33Kaloku phakathi kwethu sobabini

akukho mlamli unokusahlula ngezandla zakhe.

34Hayi bo! Khawumke noswazi lwakho

khon' ukuze ndingabi sankwantya ndisoyika isohlwayo.

35Xa kunjalo ke ndingatsho ndithethe ndingenaloyiko,

kodwa ngale ndlela izinto zimi ngayo ngoku andinako.”

UYOBI 9XHO96Vula kumfundi weBhayibhile

UYOBI 10

UYobi: Khawundiyeke ndiphumle

1“Kwowu, ndidikiwe bobu bomi!

Ngoko ke ndosuka ndithethe utyhatyhiwe,

isikhalo sam ndisitsho ndibindekile!

2Ewe, ndiya kuthetha naye ndithi:

‘Ngani ukuba undigwebe, Thixo?

Hayi kaloku, ndazise ityala kuqala.

3Ikunceda ntoni wena ingcinezelo enje,

ukutshabalalisa umsebenzi wezandla zakho,

uze uthelele amacebo ezikhohlakali?

4Ngaba amehlo akho afana nawabantu na?

Ngaba nawe ubona njengomntu?

5Ngaba imihla yakho ifana neyomntu?

Ngaba iminyaka yakho ifana neyakhe na?

6Ngani ke ukuba ugqogqe iziphoso zam,

uzingelane nesono sam?

7Kaloku uyazi ukuba andinatyala,

ibe ke futhi uyazi ukuba akekho ongandihlangulayo esandleni sakho.

8“ ‘Ndenziwa nguwe nje, ndabunjwa zizandla zakho,

ngaba ngoku uza kujika unditshabalalise?

9Khumbula kaloku ukuba wandibumba njengodongwe!

Ngaba ke ngoku uza kundivuthulula ndibe luthuli?

10Andithi na kaloku wandithulula njengobisi,

ndaza ke ndakhanywa njengengqaka?

11Kaloku wandibumba ngamathambo nemisipha,

wandinxibisa inyama, wandambathisa ufele.

12Wandinika ubomi, wandambesa ngezibele;

undinonophele ke wandixhasa.

13“ ‘Kambe ke zonke ezi zinto undifihlele,

kuba le ibiyinjongo yakho kakade.

14Kaloku wena ube ugade ukuba ndone

ukuze undigwebe ngenxa yesono sam.

15Ukuba ke ndisisikhohlakali kunyembelekile kum!

Kambe ke noba ndililungisa andinaqhayiya,

kuba ndibandezelekile, ndambethwe lihlazo.

16Noba ndingade ndiqholose wena ungandizingela njengengonyama,

uphinde wenze kum ngokwaloo mandla akho amangalisayo.

17Usoloko unamangqina andintywiliselayo,

ibe ke nengqumbo yakho iyakhula ngakum,

kuba uyaphindelela ukundihlasela.

18“ ‘Kwakutheni ukuze undiyeke ndizalwe?

Awu! Akwaba ndandife ndingekalanywa naliliso eli!

19Ngoku ngendifana nongazange abekho,

kuba ngendavela nje ndasiwa engcwabeni.

20Ewe, bufutshane kambe ubomi bam!

Hayi khona, khawundiyeke ndikhe ndiphumle kancinane!

21Kaloku ngoku ndiyahamba,

ibe ke soze ndibuye;

ndiya kwilizwe lethunzi nobumnyama.

22Ewe, ndiya kwilizwe lobumnyama namathunzi,

nelesithokothoko sobumnyama,

apho ukukhanya kufana nobumnyama.’ ”

UYOBI 10XHO96Vula kumfundi weBhayibhile

KWABASEROMA 6

Omanywe noKrestu ufile kuso isono

1Síthini na ke ngoko? Síhlale sihleli esonweni ukuze ubabalo lwande? 2Nakanye! Thina kaloku safa kuso isono. Singathini ke ukuba siqhubele phambili sisona? 3Anazi na ukuba thina sonke sibhaptiziweyo samanywa noKrestu Yesu, sabhaptizelwa ekufeni kwakhe? 4Ngokunjalo ngokubhaptizwa sangcwatywa kunye noKrestu. Njengokuba ke uKrestu wavuswayo kwabafileyo ngamandla obungangamsha bukaYise, nathi ngokunjalo masiphile ubomi obutsha.

5Kaloku xa simanywe naye ekufeni kwakhe, simanywe naye nasekuvukeni kwakhe ekufeni. 6Siyazi ke ukuba isimo sethu esidala sabethelelwa emnqamlezweni noKrestu, khon' ukuze igunya lesono liphuthiswe nasemizimbeni yethu, size singabi salawulwa sisono. 7Kaloku umntu ofileyo ukhululekile esonweni. 8Ukuba ke safa kunye noKrestu, siyakholwa ukuba sodla ubomi kwakunye naye. 9Siyazi ke ukuba uKrestu evusiwe nje kwabafileyo, akayi kuba safa – ukufa akusayi kuba nagunya kuye. 10Kuba wafa kwakanye, efela isono; kodwa ngoku udla ubomi, ephilela uThixo. 11Ngokunjalo nani zibaleleni ekubeni ningabafileyo okunene kuso isono, niphilela uThixo ngobomi enibudlayo, nimanywe noKrestu Yesu, iNkosi yethu.

12Ngoko ke isono masingayilawuli imizimba yenu efayo. Sanukuzivumela iinkanuko zemizimba yenu. 13Kananjalo imizimba yenu musani ukuyinikela esonweni, nize none ngamalungu ayo; koko zinikeleni nina ziqu kuThixo, ningabaphila bevuke ekufeni nje. Ngenxa yoko ke wanikeleni kuThixo amalungu emizimba yenu, ukuze nenze okulungileyo ngawo.

14Isono masinganilawuli, kuba anikho phantsi komthetho, niphantsi kobabalo lwesisa sikaThixo.

Abalawulwa sisono nabalawulwa bubulungisa

15Síthini na ke ngoko? Sóne na, kuba singekho phantsi kwawo umthetho, siphantsi kobabalo? Nakanye! 16Kakade niyazi ukuba lowo nizinikela kuye ukuba anilawule, ngokwenyani niyamkhonza, nimthobele. Abalawulwa sisono ke baba sisisulu sokufa, kodwa abamthobeleyo uThixo ubenza amalungisa. 17Ke kaloku, makubulelwe kuThixo, kuba nanifudula nilawulwa sisono, kodwa ngoku niyithobela ngokupheleleyo imfundiso eniyifundisiweyo. 18Nakhululwa ke kuso isono, naba phantsi kobulungisa. 19Ngenxa yobuthathaka bemvelo yenu mandingantsonkothi. Njengoko nanizinikele ngokupheleleyo ukuba nenze ukungcola nokwaphula umthetho, nize nichasane nomthetho; ngokunjalo ke nangoku zinikeleni ngokupheleleyo ukuze nenze okulungileyo, khon' ukuze nahluke.

20Okuya nanilawulwa sisono naningekho phantsi kobulungisa. 21Ke, benizuza ntoni ngaloo nto? Andithi izinto enanizizuza zezi nineentloni ngazo ngoku, ezi zikhokelela ekufeni? 22Ngoku ke, nikhululwe nje esonweni, naba ngabakaThixo, ninaso isiqhamo esibubungcwele. Le nto ke ikhokelela ebomini obungunaphakade. 23Isono sinomvuzo: samkelisa ukufa; ke sona isipho asibabala ngaso uThixo ngokumanywa kwethu noKrestu Yesu iNkosi yethu, bubomi obungonaphakade.

KWABASEROMA 6XHO96Vula kumfundi weBhayibhile

KWABASEROMA 7

Ukukhululwa emthethweni

1Mawethu, ndithetha nabantu abawaziyo umthetho welakowethu; niyazi ukuba umntu uphantsi kwegunya lomthetho kuphela ngeli xesha adla ubomi ngalo. 2Kaloku umfazi owendileyo ubotshelelwe ngumthetho endodeni yakhe, eli lixa idla ubomi; kodwa ukuba ithe yafa indoda, ukhululekile kuwo umthetho ombophelela endodeni yakhe. 3Ngoko ke, ukuba umfazi uthe waba ngowenye indoda isaphila indoda yakhe, kothiwa ungumkrexezi. Kodwa ke ukuba ithe yafa indoda yakhe, woba ukhululekile emthethweni, aze angabi ngumkrexezi ukuba uthe waba ngowenye indoda. 4Kukwanjalo ke nakuni, mawethu. Ngokumanywa nomzimba kaKrestu nani nafa ngokubhekiselele kumthetho kaMosis, ukuze nibe ngabomnye, ongulo Krestu ke owavuswa kwabafileyo. Le nto ke ibanga ukuba sibe nokumsebenzela uThixo. 5Kaloku ngokuya sasisidla ubomi, ngokweyethu intando, iinkanuko ezimbi ezivuselelwa ngumthetho zazilawula emizimbeni yethu, sisebenzela ukufa. 6Ke, ekubeni safayo nje ngokubhekiselele kwezo zinto zazisilawula, sikhululekile ngoku emthethweni. Ngenxa yoko asisakhonzi ngendlela endala yomthetho obhaliweyo, kodwa sikhonza ngendlela entsha yoMoya.

Umthetho nesono

7Ndithini ke xa nditshoyo? Ngaba ndithi umthetho usisono? Nakanye! Kodwa ke ngendingasazanga isono ukuba ubungekho umthetho. Kaloku nenkanuko ngendingayazanga ukuba umthetho ubungatshongo ukuthi: “Uze unganqweneli...” 8Isono ke sizuze ikroba ngawo lo mthetho, sandivusela yonke inkanuko. Kaloku xa kungekho mthetho, isono sifile. 9Mna ke bendifudula ndiphila ungekho umthetho. Uthe ke wakufika umthetho, savuka isono, 10ndafa ke mna; waza umthetho owawumiselwe ukuzisa ubomi, wafumaneka inguwona undisa ekufeni. 11Kuba kaloku isono sizuze ikroba ngawo lo mthetho, sandilukuhla, sandibulala ngawo.

12Okunene umthetho ungcwele; nomyalelo ungcwele, unobulungisa, ulungile. 13Umthetho ulungile nje, ungaba kukufa kum? Nakanye! Sisono esaba kukufa kum. Sona sisebenzise into elungileyo ukundizisela ukufa, saza ke sacaca into esiyiyo, khon' ukuze ngomthetho isono sibonakale sisisono ngakumbi nangakumbi.

Ukukrutha-kruthana okusemntwini

14Siyazi ke ukuba umthetho ngowoMoya kaThixo, kodwa mna ndiyinyama negazi; ndiphantsi kwegunya lesono. 15Into endiyenzayo yinkohla kum, kuba kaloku into endithanda ukuyenza andiyenzi, ukanti ndiyayenza endiyithiyileyo. 16Xa ke ndisenza into endiyithiyileyo, kucacile ukuba ndiyavuma ukuthi umthetho ulungile. 17Ngoko ke ayisendim owenza loo nto ndingayithandiyo, koko sisono esihleli kum esenza loo nto. 18Ndiyazi ukuba akuhlali nto ilungileyo kum – nditsho kwisimo sam esonakeleyo – kuba kaloku umnqweno wokwenza into elungileyo ukho kum, kodwa ukwenza andinako. 19Into elungileyo endithanda ukuyenza, andiyenzi; kodwa into embi endingathandi kuyenza, ndiyayenza. 20Ukuba ke ndenza loo nto ndingayithandiyo, ayisendim oyenzayo, koko sisono esi sihleli kum esiyenzayo loo nto.

21Kambe ke ndibhaqa le nto apha kum: Kuthi xa ndifuna ukwenza into elungileyo, ndisuke ndonganyelwe kukwenza ububi. 22Ndiyawulangazelela umthetho kaThixo ngentliziyo, 23kodwa ndibhaqa nto yimbi kwalapha kum echasene nomthetho endiwaziyo entliziyweni yam, nto leyo indithimbela esonweni esihleli kum. 24Hayi usizana endilulo! Ngubani na oya kundihlangula kulo mzimba usisisulu sokufa? 25Ndiyambulela uThixo ngoYesu Krestu iNkosi yethu!

Nantsi ke imeko endikuyo: Ngokuphathelele kwendikwaziyo entliziyweni yam, okunene ndikhonza uThixo; kodwa ngokwesimo sam esonakeleyo, ndikhonza isono.

KWABASEROMA 7XHO96Vula kumfundi weBhayibhile

KWABASEROMA 8

UMoya umniki-bomi

1Ngoko ke àbagwetywa abo bamanywe noKrestu Yesu. 2Kaloku ngokumanywa kwam noKrestu Yesu, uMoya umniki-bomi undikhulule ekulawulweni sisono nakukufa. 3Ke wona umthetho wawungenako ukusikhulula, ngenxa yokonakala kwesimo sethu. Kodwa yena uThixo wamthumela uNyana wakhe, ekwisimo esifana nesimo sethu esonakeleyo, waza wasigweba isono emntwini wenyama negazi. 4Le nto uThixo uyenzele ukuze injongo yomthetho izalisekiswe kuthi, thina singaphiliyo ngokwesimo esonakeleyo, koko siphila ngokoMoya. 5Abo besimo esonakeleyo banyamekela izinto zeso simo; ibe ke abo boMoya banyamekela izinto zoMoya. 6Ke ukunyamekela izinto zesimo esonakeleyo kusa ekufeni, kanti ke ukunyamekela ezoMoya kusa ebomini naseluxolweni. 7Abo banyamekela izinto zesimo esonakeleyo baziintshaba zikaThixo, kuba kaloku abawuthobeli umthetho wakhe. Kakade abanako ukuyenza loo nto. 8Ábenjenjalo ke àbanako ukumkholisa uThixo konke-konke.

9Ke nina aningabo abaphila ngokwesimo esonakeleyo, ningabo bakhokelwa nguMoya, ukuba kambe uMoya kaThixo uhleli kuni. Ke umntu ongenaye uMoya kaKrestu akangokaKrestu. 10Ukuba uKrestu ukho kuni, nangona umzimba ufile ngenxa yesono, uMoya yena uninika ubomi. Kaloku nenziwe amalungisa. 11Ukuba ke uMoya kaThixo owamvusayo uYesu ekufeni ukho kuni, neyenu imizimba uThixo uya kuyinika ubomi ngoMoya wakhe okhoyo kuni.

12Ngoko ke, mawethu, masingakholisi isimo sethu esonakeleyo. 13Kuba xa niphila ngokweso simo, niya ekufeni; kodwa ukuba niyazitshitshisa ngamandla oMoya izenzo ezibi zomzimba, niya kudla ubomi. 14Kaloku abo bakhokelwa nguMoya kaThixo, bangoonyana bakaThixo. 15UMoya enimamkeleyo akanenzi amakhoboka, wona aphakuzelayo. Kaloku namkele uMoya onenza oonyana abathi: “Tata!” kuThixo. 16UMoya ngokwakhe ungqinelana nathi ukuthi singabantwana bakaThixo. 17Ukuba ke singabantwana bakaThixo, sikwaziindlalifa zikaThixo. Ewe, siziindlalifa kunye noKrestu, kuba kaloku siva ubunzima kunye naye, siphinde siwongwe kwakunye naye.

Ubuncwane esiza kubuxhamla

18Ndigqiba kwelithi ezi ntlungu zangoku azinakufaniswa nobuncwane esiza kubuxhamla; 19kuba indalo iphela ilangazelela ukuba uThixo ade abaveze oonyana bakhe. 20Kaloku indalo yathotyelwa kwimeko ephuthileyo, kungengakuthanda kwayo, kodwa kungokuthanda kwalowo wayithobayo. Phofu likho ithemba lokuba 21nendalo ngokwayo iya kude ikhululwe kwiimbophelelo zokonakala, ize nayo isiwe enkululekweni nasebuqaqawulini babantwana bakaThixo. 22Kuba kaloku siyazi ukuba kude kube ngokunje yonke indalo iyancwina inenimba. 23Asiyiyo yodwa ke: nathi thina siphiwe uMoya osisiqinisekiso sokukhululwa kwethu nguThixo, siyancwina, silindele ukubekwa ewongeni lokuba ngoonyana bakaThixo. Yinkululeko yethu ke leyo. 24Okunene naxa sisindisiwe nje, sisesethembeni. Ukuba ke siyayibona into esithembe ukuyifumana, asilothemba elo. Kaloku akukho mntu uthemba ukufumana into aseleyifumene. 25Kodwa ke into esingayiboniyo, esithembe ukuyifumana, siyilindela ngomonde.

26Ngokukwanjalo noMoya uyasixhasa ekusweleni kwethu amandla, kuba kaloku asiyazi eyona ndlela singathandaza ngayo. Kodwa ke kweso singqala sethu sikhohliwe uMoya ngokwakhe uyasithethelela. 27Ke uThixo oziphengululayo iintliziyo uyazazi iingcamango zoMoya, kuba kaloku uMoya uthethelela abantu bakaThixo ngokwentando kaThixo.

28Siyazi ke ukuba kuyo yonke imeko uThixo ubenzela okulungileyo abo bamthandayo, ababizwe ngokwenjongo yakhe. 29Kaloku abo wayeselebazi kwangaphambili, wabamisela ukuba babe ngumfanekiso woNyana wakhe, ukuze uNyana wakhe abe ngowamazibulo kusapho olukhulu.

30Abo ke uThixo wabamiselayo kwangaphambili, wababiza kananjalo. Abo wababizayo, wabenza amalungisa. Abo wabenza amalungisa, wabanika iwonga.

Uthando uThixo asithanda ngalo ngoYesu Krestu

31Masithini na ke ngezi zinto? Ukuba uThixo ungakuthi ngubani onokusichasa? 32Yena kaloku akambandezanga owakhe uNyana, koko usuke wamnikela ngenxa yethu sonke. Angathini ke ukungasibabali asiphe zonke ezinye izinto? 33Ngubani na oya kubamangalela abanyulwa bakaThixo, inguThixo nje obagwebelayo? 34Ngubani onokubagweba, ethe wafa nje uKrestu, wathi ngaphezu koko wabuya wavuka, waza waya kuhlala ewongeni kwaThixo, apho asithethelela khona? 35Ngubani ke onokusahlukanisa nothando lukaKrestu? Yimbandezelo na? Yinkxwaleko na? Yintshushiso na? Yindlala na? Bubuzé na? Yingozi na? Likrele na? 36Kunjengoko *iziBhalo zitshoyo ukuthi:

“Ngenxa yakho sisesichengeni sokubulawa;

yiyo loo nto sesifana neegusha eziya kuxhelwa nje.”

37Kanti ke, kwezi zinto zonke sisuka soyise sitshatshele ngalowo wasithandayo. 38Kaloku ndiqinisekile kukuba asikuko nakufa, nabomi, nazithunywa zezulu, nazilawuli, nanto zikhoyo, nanto zizayo, naziphathamandla, 39nanto ziphezulu, nanto zingaphantsi, nditsho nasiphi na isidalwa, esiya kuba nako ukusahlula nothando lukaThixo olukuye uKrestu Yesu, iNkosi yethu.

KWABASEROMA 8XHO96Vula kumfundi weBhayibhile
Bible Society of South Africav.4.26.9
SIFUMANE KU-