To The Word – Day 157

₁Akunani kwaukutya iqhekeza lesonka uxolile

kunokuba semzini ozele yinyama yamadini kodwa kugquba imbambano.

₂Isicaka esinobulumko sifumana amagunya ngaphezu konyana oza namahlazo,

size naso sibe nenxaxheba elifeni njengabanye oonyana.

₃Isiliva ivavanywa ngokuyinyibilikisa embizeni;

igolide ivavanywa ezikweni lomlilo;

kodwa yona intliziyo yomntu ivavanywa nguNdikhoyo.

₄Umenzi wobubi uyawuphulaphula umlomo onenkohliso,

kanti ke ixoki liyibazela iindlebe intetho eyenzakalisayo.

₅Umntu ohlekisa ngehlwempu ugxeka uMdali walo;

umntu ozivuyelayo iinkxwaleko zabanye uyohlwaywa.

₆Abazukulwana libhongo lookhokho,

kanti ke igugu labantwana ngabazali.

₇Amazwi obuciko akanakufumaneka emlonyeni wesiyatha;

amazwi obuxoki akalindelekanga emilebeni yesikhulu.

₈Ukunyoba kufana nomlingo kulowo ukwenzayo;

uba kuza kumphumelelisa naphi na apho aya khona.

₉Obugubungelayo ubugwenxa uzicengezelela ukuthandwa,

kodwa lowo umana ewunokoza umcimbi uchitha ubuhlobo.

₁₀Ukukhalinyelwa kuyamakha umntu onengqondo,

kunokuba imivumbo elikhulu injalo kwisiyatha.

₁₁Umvukeli uqhwaya ingxwaba-ngxwaba;

ke ngoko uthunyelwa isigidimi esingenanceba.

₁₂Kubhetele ukuhlangana nebhere eyohluthwe amathole ayo,

kunokuhlangana nesityhakala sisenza ubudenge.

₁₃Umntu ophindezela ubuhle ngobubi

soze yahlukane nelishwa indlu yakhe.

₁₄Ukuphemba inkathazo kufana nokuqhekezwa kodonga lwedama;

ngoko ke nyawuka ingekakongameli.

₁₅Okhulula umntu onetyala nogweba umntu omsulwa

bobabini uNdikhoyo uyabacekisa.

₁₆Kunceda ntoni ukuba isiyatha siphathe imali, sifune ulwazi,

kanti asinangqondo?

₁₇Umhlobo unothando ngamaxesha onke;

ke yena umntakwenu uzalelwe ukuba nawe kwiimbandezelo.

₁₈Ngumntu ongenangqondo obamba isandla ebhambathisa,

emela ityala lommelwane.

₁₉Umntu othanda ingxwaba-ngxwaba uthanda ubugwenxa;

umntu osoloko eqhayisa ngezinto zakhe uzibizela iingxaki.

₂₀Umntu ontliziyo ikhohlisayo akabi nampumelelo;

kanti nomntu ontetho ikrwada ungena enkathazweni.

₂₁Yinto ebuhlungu ukuba nonyana ongenangqondo;

uyise wesityhakala soze onwabe.

₂₂Umntu onentliziyo echwayitileyo uba nempilo;

kanti ke wona umoya odakumbileyo uyimpehla emathanjeni.

₂₃Umntu okhohlakeleyo uyanyotywa ngasese,

usuke ke wona umthetho ugqwetheke.

₂₄Umntu onengqondo unonophela ubulumko;

ke sona isityhakala amehlo aso athi elapha abe ephaya.

₂₅Unyana osisiyatha uzisela uyise ukukhathazeka;

kanti ke ungumva-ndedwa kunina omzeleyo.

₂₆Yinto embi ukuhlawulisa abantu abamsulwa;

kuyalumeza ukohlwaya izikhulu ezithembekileyo.

₂₇Umntu onengqondo uyawakhetha amazwi akhe,

kanti ke nomntu oqondayo uhlala epholile.

₂₈Kanti ke nesiyatha sicingelwa ukuba sisilumko ukuba asithandi kuthetha;

kaloku umntu othuleyo ubalelwa ukuba yingqondi.

₁Umntu ozahlulayo kwabanye ujongana nokwakhe ukulungelwa;

uwasengela phantsi onke amacebiso aphilileyo.

₂Umntu osisiyatha akanamdla wakuqonda nto –

nto angxamele ukuyenza kukuvakalisa ezakhe iimbono.

₃Xa kuvela umntu okhohlakeleyo ngokunjalo nokudelela kuthath' indawo;

ukuphoxa ke kuhambisana nehlazo.

₄Amazwi omlomo womntu anjengesiziba samanzi;

kambe ke umthombo wobulumko yintlambo enkcenkcezayo.

₅Yinto embi ukuba nesheyi kumntu onenkohlakalo;

akulunganga ukumenzela igobe umntu omsulwa.

₆Ukuthetha komntu osisiyatha kuzala ingxwaba-ngxwaba;

amazwi akhe ambizela ukubethwa.

₇Ukuthetha komntu osisityhifili kumzisela inkathazo;

umlomo wakhe ngumgibe wakhe.

₈Amazwi entlebendwane ayanambitheka;

ahla kamnandi athi ngcoo embilinini.

₉Umntu owuphath' ewuyeka umsebenzi wakhe

uyintlaka nexolo notshabalalisayo.

₁₀UNdikhoyo ngumqolomba:

bazimela kuye abalungisayo, basinde.

₁₁Izinhanha zicinga ukuba ubutyebi yinqaba yazo;

kuzo ngathi buludonga oluphakamileyo lokuzifihla.

₁₂Ikratshi lomntu lilandelwa yintshabalalo;

ke lona udumo lukhokelwa yintobeko.

₁₃Ophendula engevanga kuqala

bubudenge obo kuye nehlazo.

₁₄Umoya onganikezeliyo wenza ukuba umntu amelane nokufa.

Ke wona umxhelo xa uwile ngubani ongawuvuselelayo?

₁₅Umntu onengqiqo ufunana nolwazi;

ewe, iindlebe zezilumko zibazele lona.

₁₆Xa ufuna ukuviwa ngabo basemagunyeni

phatha umngena-ndlwini xa uya kubo.

₁₇Intetho yommangali etyaleni iba ngathi iyavakala,

xa engekaphicothwa ngemibuzo.

₁₈Liphelisa ingxabano *iqashiso,

libahlule abantu abanamandla.

₁₉Isizalwana esikhutyekisiweyo silukhuni ngaphezu kwesixeko esinqatyisiweyo;

ingxabano yabazalanayo injengemivalo yamasango enqaba.

₂₀Umntu uzalisa iphango lakhe ngeziqhamo zokuthetha kwakhe;

uhlutha sisivuno somlomo wakhe.

₂₁Ukuthetha komntu kulawula ukuphila nokufa;

ke othetha kakhulu uvuna iziqhamo zaloo nto.

₂₂Umntu ofumene umfazi uzuze okulungileyo;

ewe, ufumene okukholekileyo kuNdikhoyo.

₂₃Ihlwempu liyacenga libongoze,

ukanti ke sona isinhanha siphendula rhabaxa.

₂₄Iitshomi ezininzi ziyamvuthulula umntu;

kanti ke sikho sona isihlobo esithembekayo kunomntakwenu.

₁Akunani kwaukuhleleleka unyanisekile

kunokuba sisiyatha esinganyanisekanga.

₂Ukutyhuthuzela kungekho kuqonda akulunganga;

onyawo zingxamileyo uyayiphosa indlela.

₃Ubuyatha bomntu buyabulimaza ubomi bakhe,

aze ke entliziyweni yakhe asole uNdikhoyo.

₄Isinhanha siba nezihlobo ezininzi,

kodwa lona ihlwempu libalekwa nazezikhoyo.

₅Ingqina elixokayo liyohlwaywa;

umntu ongathethi nyani enkundleni akasindi.

₆Baninzi abacenga izikhulu;

bonke abantu bazizihlobo zomntu ophayo.

₇Ihlwempu alifunwa nangabakowalo; yeka ke ukungafunwa kwalo zizihlobo!

Noba selizifuna linezicengo soze lizifumane.

₈Ozingela ubulumko uyazithanda ngokwakhe;

okuxabisileyo ukuqonda uzuza ukonwaba.

₉Ingqina elixokayo liyohlwaywa;

umntu ongathethi nyani enkundleni uyatshabalala.

₁₀Isiyatha asifanelwa kukuthi zava –

kobeka phi ukuba kubi kokuba amatshawe aphathwe sisicaka?

₁₁Umntu onengqondo akacaphuki msinya;

kuye linqaku ukungakhathali noba selesoniwa.

₁₂Umsindo kakumkani unjengokugragrama kwengonyama;

ke kona ukwamkeleka kuye kunjengombethe phezu kohlaza.

₁₃Unyana osisiyatha uyamtshonisa uyise;

kanti ke yena umfazi onochuku ufana nendlu enethontsi.

₁₄Indlu nobutyebi lilifa looyise,

kodwa umfazi onengqondo uvela kuNdikhoyo.

₁₅Ubuvila bufuthanisela umntu ngobuthongo;

ukanti ke umntu ongasebenziyo ubhuqwa yindlala.

₁₆Umntu ozithobelayo iziluleko uzuza ubomi;

ke yena ongayikhathaleliyo ihambo yakhe uyafa.

₁₇Umntu opha ohlelelekileyo ufana noboleka uNdikhoyo;

uNdikhoyo uya kumbuyisela.

₁₈Mqeqeshe unyana wakho, kuba oko kunika ithemba,

kodwa ke ungagabadeli ude umbulale.

₁₉Umntu ocaphuka msinya uvuna loo nto ayilimileyo;

ukuba ukhe wamnceda kwaba kanye uya kuphinda-phinda.

₂₀Waphulaphule amacebiso, ukwamkele ukululekwa –

ekugqibeleni uya kuba nobulumko.

₂₁Umntu uyaceba acwangcise entliziyweni yakhe,

kodwa ke licebo likaNdikhoyo eliphumelelayo.

₂₂Umntu uzilahlela kuloo nto ayinqwenelayo;

phofu akunani kwaukuba lihlwempu kunokuba lixoki.

₂₃Obona bomi kukuhlonela uNdikhoyo;

umntu owenjenjalo uyazonwabela, inkathazo ingamchaphazeli.

₂₄Ivila liyakha esityeni,

kodwa lingabi nako ukusa emlonyeni.

₂₅Mohlwaye umntu odelelayo, ukuze bazuze ukuqonda abangekabi namava;

isilumko siyafunda sakululekwa.

₂₆Unyana ophatha gadalala uyise, agxothe unina,

ngunyana olihlazo nonamanyondololo.

₂₇Nyana wam, ukuba uthe walutyeshela uqeqesho,

uya kuphulukana namazwi anolwazi.

₂₈Ingqina elingungantweni liyabugqwetha ubulungisa;

okuphuma emlonyeni womntu okhohlakeleyo bububi bodwa.

₂₉Umgxeki ufanelwe kukugwetywa;

ke sona isiyatha silindelwe kukutyatyushwa emhlana.

₁Ndakhala ndijonge *kuNdikhoyo,

wada wandiva ndakuzibika kuye.

₂Wandikhupha emhadini onengozi, nasemgxobhozweni,

wandibeka endaweni eyomileyo,

ndatsho ndee ngxishishi, ndema.

₃Wandifundisa ingoma yombongo entsha,

ingoma yokubonga uThixo wethu.

Boyika abaninzi bakuyiqonda loo nto,

balibeka kuNdikhoyo ithemba labo.

₄Hay' uyolo lomntu othembele ngoNdikhoyo,

ongadlelaniyo nabanekratshi, abo banqula izithixo.

₅Mikhulu, Ndikhoyo, Thixo wam, imimangaliso osenzele yona.

Kukwangako nokusazelelela kwakho;

akakho onjengawe, Nkosi!

Ngeba ndiyabalisa, koko ndiswel' imilomo eliwaka.

₆Wena akuwananze nganto amadini neminikelo,

akuwathandanga amadini atshiswayo nawesono,

kambe ke undinike indlebe evayo.

₇Kungoko ke ndathi mna:

“Njengoko kubhaliwe ngam encwadini, ewe, ndim lo.

₈Iyandivuyisa intando yakho, Thixo wam;

umthetho wakho ndiwumilisele entliziyweni.”

₉Ndizixelile ebandleni iindaba zakho zosindiso;

Ndikhoyo, uyazi ukuba andikuyeka ukuzibalisa.

₁₀Andilufihlanga udaba losindiso lwakho;

bendisoloko ndibalisa ngokunyaniseka noncedo lwakho;

andilifihlelanga ibandla lakho izibele zakho nenyaniso yakho.

₁₁Uzungandibandezeli inceba yakho, Ndikhoyo;

ndilondoloze ngenceba nenyaniso.

₁₂Zindivelela macal' onke iingxaki.

Ndixakene nezono zam, azindiphi mtyhi konke.

Nditsho ndatyhafa, kuba zininzi ngangeenwele zentloko yam.

₁₃Khawuncede undihlangule, *Ndikhoyo!

Phuthuma, Ndikhoyo, undincede!

₁₄Mabadane badideke abandizondayo;

mabarhoxe baphoxeke abazungula ukundenzakalisa.

₁₅Mabajike benyoshoza abo bathi tshotsho vityo.

₁₆Abakulangazelelayo mabavuye bagcobe ngawe;

abaluthandayo usindiso lwakho mabangaphezi ukuthi:

“Huntshu – uyingangalala uNdikhoyo!”

₁₇Ke mna ndilihlwepu, ndiludwayi;

awu, Nkosi, khawundivelele!

Umncedi nomhlanguli wam nguwe;

sukuba saphozisa maseko, Thixo wam!

₁Hayi uyolo lomntu obonelela amahlwempu;

womhlangula *uNdikhoyo xa yena esengxakini.

₂Womkhusela amlondoloze ebomini.

Womthamsanqela emhlabeni,

angamyekeli kwiintshaba zakhe.

₃UNdikhoyo womonga xa angaphilanga,

ambuyisele empilweni.

₄Ke mna ndathi: “Ndikhoyo, ndenzele inceba!

Ndikonile; nceda ndiphilise!”

₅Zahlekisa ngam iintshaba zisithi:

“Uya kufa nini kakade, angabi sakhunjulwa bani?”

₆Nabo baze kundivelela abakho ntweni,

bezela nje ukuza kuva ulwimi,

bahambe besasaza intlebendwane.

₇Zihamba zindihleba iintshaba zam,

zindinqwenelela okubi.

₈Zihamba zisithi: “Ukufa mumosele!

Akanakuba savuka kumandlalo wakhe!”

₉Ewe, nesihlobo sam esisenyongweni ebendisithembile,

nditsho kanye eso sabelana ngeqhekeza lesonka,

naso sindivukele.

₁₀Ndikhoyo, ndenzele inceba, ndiphakame,

ndize ndiziphindezele kwiintshaba zam.

₁₁Phofu ke ndiyazi ukuba undikhathalele,

kuba azinakundivuyelela iintshaba zam.

₁₂Uyandinceda kuba ndimsulwa;

undibeka phambi kwakho ngalo lonke ixesha.

₁₃Makabongwe uNdikhoyo,

uThixo kaSirayeli,

ngoku kude kube nini-nini!

Amen, ewe, makube njalo!