To The Word – Day 132

₂“Ndosuka nditshayele konke nje,

ndikhucule konke ehlabathini.”

Nguwo lowo umlomo *kaNdikhoyo.

₃“Ndotshayela nje umntu nesilwanyana.

Ewe, ndozitshabalalisa iintaka esibhakabhakeni,

ndenjenjalo nasezintlanzini zolwandle.

Ndobasusa abakhohlakeleyo bezizikhubekiso,

ndimnqamle kuphele umntu ehlabathini.”

Nguwo lowo umlomo kaNdikhoyo.

₄“Isandla sam ndosolulela kuJuda

nakubo bonke abemi beJerusalem,

ndiwanqamle kule ndawo amasalela kaBhali,

ndiwacime amagama abanquli-zithixo kunye nababingeleli bazo –

₅nditsho bona abo baguqa phezu kwezindlu benqula iinkwenkwezi,

abo baguqayo bafunge uNdikhoyo,

ukanti ke bakwafunga noMalkam,

₆abo bakreqileyo ekulandeleni uNdikhoyo,

abo bangasamfuni nganto uNdikhoyo,

kungekho nanto bayibuzayo kuye.

₇Ewe, yithini cwaka phambi kweNkosi uNdikhoyo;

kaloku imini kaNdikhoyo isemnyango.

Yena ulilungisile idini,

ubangcwalisile abo abamemileyo.

₈Ngaloo mini yedini likaNdikhoyo

ndiya kuwohlwaya amatshawe,

ndibabethe oonyana bokumkani

nâbo bavatha impahla yasemzini.

₉Ngaloo mini ndiya kubohlwaya bonke abatsiba umgubasi womnyango,

abazalisa indlu yothixo wabo ngogonyamelo kunye nenkohliso.

₁₀“Ngaloo mini,” nguwo lowo umlomo kaNdikhoyo,

“kovakala isikhalo ngakwiSango leeNtlanzi,

ibe sisijwili ngakuMzi oMtsha,

kuvakale isithonga ngasezindulini.

₁₁Yenzani isijwili, nina bahlala esigingqini.

Bonke abarhwebi botshatyalaliswa,

bavuthululwe abashishina ngesiliva.

₁₂Ngelo xesha ndophath' izibane ndiphicothe iJerusalem,

ndibohlwaye abo bangakhathalele nto,

abo bafana newayini enentlenge,

abathi: ‘UNdikhoyo soze enze nto,

nditsho nokuba intle okanye imbi.’

₁₃Ubutyebi babo buya kuxhatshazwa,

izindlu zabo zona zibhodlozwe.

Boba ngazakha ke izindlu,

kodwa bangaze bahlale kuzo.

Ewe, bozilima izidiliya,

kodwa bangaze basele wayini yazo.”

₁₄Isondele imini enkulu *kaNdikhoyo;

ewe, isondele, yaye iza ngokukhawuleza.

Yivani! Isikhalo soba krakra ngemini kaNdikhoyo –

nditsho imikhwazo yamagorha ngaloo mini.

₁₅Leyo yoba yimini yengqumbo,

imini yokuxhwaleka nosizi,

umhla wentshabalalo nembubho,

umhla wobumnyama nesithokothoko,

imini yamafu nomnyam' ombonde-mbonde,

₁₆umhla wesigodlo nentlaba-mkhosi

ebhekisa kwizixeko ezinqatyisiweyo

nakwezo nqaba ziphakamileyo.

₁₇Abantu ndobazisela inkxwaleko;

bosuka bafathule ngathi ziimfama.

Kaloku bamonile uNdikhoyo.

Igazi labo lophalala njengothuli,

imizimba yabo ivuthuluke njengobulongwe.

₁₈Soze yabasindisa igolide nesiliva yabo

ngaloo mini yengqumbo kaNdikhoyo.

Umhlaba wotshiswa wonke ngumlilo wekhwele lakhe.

Uya kubenzela isiphelo esipheleleyo nesikhawulezileyo bonke abemi behlabathi.

₁Qokelelanani nihlanganisane, sizwendini esingenantloni,

₂lingekafiki ixesha elimisiweyo, imini eyonitshayela njengomququ,

ingekanifikeli ingqumbo eshushu kaNdikhoyo,

ningekafunyanwa ngumhla wengqumbo yakhe.

₃Mfuneni uNdikhoyo, bemi abathobekileyo behlabathi,

nina benza umyalelo wakhe.

Zingelan' ubulungisa nentobeko,

mhlawumbi nokhuseleka ngemini yomsindo kaNdikhoyo.

₄IGaza yolil' ibhungane,

iAshkelon isale ingamabhodlo.

Kanye emin' emaqanda

iAshdode iya kuqongqothwa,

ke yona iEkron incothulwe.

₅Yeha ke, nina bemi ngaselwandle!

Yeha ke, nina maKreti!

Ilizwi *likaNdikhoyo lichasene nani:

“Wena Kanana, mhlaba wamaFilistiya, ndokutshabalalisa,

kungabikho namnye umi kuwe.”

₆Loo mhlaba ungaselwandle, apho kumi amaKreti,

woba zizikhundla zabelusi nezibaya zeegusha.

₇Umhlaba lowo woba ngowamasalela endlu kaJuda;

khona bozuza amadlelo.

Ngokuhlwa bolala kwizindlu zaseAshkelon;

kaloku uNdikhoyo uThixo wabo wobanonophela,

abenze badle ngendeb' endala.

₈“Ndizivile izithuko zikaMowabhi,

ngokunjalo nezingcikivo zoonyana baka-Amon.

Ewe, babathukile abantu bam,

bangenelela emideni yabo.

₉Ngoko ke, ndikhonje, ndiyafunga,”

nguwo lowo umlomo kaNdikhoyo onamandla onke, uThixo kaSirayeli:

“Inene, iMowabhi yofana nqwa neSodom,

ama-Amon abe njengeGomora,

indawo yokhula nemihadi yetyuwa.

Yoba yinkangala ngonaphakade.

Amasalela abantu bam aya kubaxhaphaza;

ewe, amasalela esizwe sam owudla ilifa umhlaba wabo.”

₁₀Yonke loo nto ingenxa yekratshi labo,

ngenxa yokuthuka nokuphoxisa ngabantu bakaNdikhoyo onamandla onke.

₁₁UNdikhoyo woba ngorhwaqelisayo kubo,

kuba wozitshabalalisa *izithixo zelizwe.

Izizwe macala onke ziya kumnqula;

bebonke ke kwimihlaba yabo.

₁₂“Nani ngokwenu, maKushe,

niya kubulawa ngekrele lam.”

₁₃Uya kusolula isandla sakhe kwelangasentla,

ayitshabalalise iAsiriya,

ayenze ibe linxuwa iNiniva,

isale iyinkangala enjengentlango.

₁₄Iya kubutha phakathi kwayo imihlambi;

ewe, yoba likhaya lazo zonke iindidi zezilwanyana.

Soba lapho isikhova nesihulu-hulu,

side silale kuloo miwewe,

zikhwazane kwezo festile,

ibe emnyango iyinkunkuma yodwa,

imiqadi yomsedare isele izé.

₁₅Koba njalo okwesixeko esonwabileyo,

esisoloko sihleli sikhuselekile.

Kaloku sona sasisithi:

“Ndim ndodwa; akukho wumbi.”

Ndlela le singamabobosi ngayo!

Ngoku seyilikhaya lamarhamncwa.

Ke abadlulayo bobetha umlozi,

babambe ongezantsi.

₁Yeha ke, mvukelindini uxabhelekileyo,

sixekondini sabacinezeli!

₂Kaloku asithobeli mntu;

ewe, asiva kululekwa.

Sona asimthembi *noNdikhoyo;

asisondeli nokusondela kuThixo waso.

₃Sitsho ngâbo balawuli baso,

izinto ezibhavuml' okweengonyama.

Abagwebi banjengeengcuka zangorhatya,

izinto ezingashiyi nethambo eli elinokukhukhuzwa ngengomso.

₄*Abashumayeli bakhona zizintw' ezingenazimilo,

abafo abaqamela ngobuqhetseba.

Ababingeleli bayayixabhela ingcwele;

ewe, bona bayawuvukela umthetho.

₅Ke uNdikhoyo uphakathi kwaso,

yena olilungisa elingenzi bugwenxa.

Uphak' ubulungisa ntsasa zonke;

akukho nanye imini asilela ngayo.

Ke bona abagwenxa abazi nehlazo eli.

₆“Mna ndizinqamle izizwe,

ndazivuthulula iinqaba zazo,

ndatsho kwalil' ibhungane ezitalatweni zabo.

Akusekho nomntu lo odlulayo;

ewe, izixeko zabo zitshatyalalisiwe.

Ngenene akusekho bani useleyo,

kungekho namnye ummi kuyo.

₇Bendisithi iJerusalem iya kundoyika,

ikwamkele ukululekwa,

nendawo yokuhlala kwayo inganqanyulwa,

nditsho konke endayibonelela ngako.

Kambe ke basuka baxhinela phambili

besenza loo mikhuba yabo mibi.

₈“Ngoko ke lindelani kum,”

utsho uNdikhoyo,

“nijonge usuku endothimba ngalo.

Ndosuka ndiziqokelele izizwe,

ndizihlanganisele ndawonye izikumkani,

ndizigalele ngomsindo wam,

ndiyibhokoxele kuzo ingqumbo yam eshushu,

ihlabathi liphela litshabalale,

ndililenye ngomlilo womsindo wekhwele lam.

₉“Nezizwe ke ndosuka ndiziguqule

ukuze zonke zimnqule uNdikhoyo;

ewe, zimbuse ngamxhelo mnye.

₁₀“Abakhonzi bam, abantu bam abasarhazekileyo,

bophuma phesheya komlambo waseKushe,

bandizisele iminikelo.

₁₁“Ngaloo mini aniyi kudana ngobugwenxa enibenze kum,

kuba ndobasusa kwesi sixeko abo baziqhayisa ngekratshi.

Soze niphinde nidelele kuloo ntaba yam ingcwele.

₁₂Ke kaloku ndonishiyela abantu abanobulali nabathobekileyo,

abantu abakholosa ngegama likaNdikhoyo.

₁₃“Amasalela kaSirayeli soze anxaxhe.

Akasayi kuthetha buxoki,

kungàfunyanwa nankohliso emilonyeni yabo.

Aya kutya angqengqe,

kungabikho bani unokuwoyikisa.”

₁₄Khawuhlabel' ingoma, ntombi inguZiyon;

uyiyizele, wena Sirayeli!

Vuya uchwayite ngentliziyo yakho yonke –

ndixela wena, ntombi inguJerusalem!

₁₅*UNdikhoyo usirhoxisile isigwebo sakho,

neentshaba zakho uzijikile.

Ke yena uNdikhoyo, uKumkani kaSirayeli, ungakuwe;

soz' uphinde uboyike ububi.

₁₆Ngaloo mini kothiwa kwiJerusalem:

“Musa ukoyika, Ziyon!

Mazingabi namkhinkqi izandla zakho.

₁₇UNdikhoyo uThixo wakho unawe;

uligorha elisindisayo.

Yena unemihlali ngawe, enovuyo;

uya kukuthulisa ngothando lwakhe;

ugcoba ngawe eyiyizela,

₁₈ngathi ngabantu ngomhla wetheko.”

Kaloku uNdikhoyo uthi:

“Ndonikhusela kuyo intlekele,

ningabi saba sisingcikivo.

₁₉Uyabona, ngelo xesha ndiya kuphathana nabo abo bakucinezeleyo.

Ndiya kusihlangula isiqhwala,

ndibaqokelele abo basarhazekileyo.

Ndiya kubanika udumo nokuhlonelwa

kuloo mazwe onke ababehlaziswa kuwo.

₂₀Ngelo xesha ndoniqokelela;

ewe, ndinibuyisele ekhaya,

ndinithi jize ngesidima nendumiso

kuzo zonke izizwe zehlabathi,

xa ndinibuyisela kundalashe.

Nani ke noyibona loo nto ngala wenu amehlo!”

Utsho uNdikhoyo.

₁Mandikubonge ngomxhelo wam wonke, *Ndikhoyo,

ndibalise ngayo yonke imimangaliso oyenzileyo.

₂Ndomemelela ngemincili,

ndikuvumel' ingoma, ndibonge wena, Phezukonke.

₃Zithe xa zihlehlayo iintshaba zam,

zawa zatshabalala, wakuvela wena, Ndikhoyo.

₄Kaloku undigwebele ityala lam;

ungqendeve esihlalweni sakho,

wena mgwebi olungileyo.

₅Uzikhalimele iintlanga,

wabatshabalalisa abantw' abagwenxa,

waliphanzisa kwaphela igama labo.

₆Iintshaba zethu zibhangile mpela,

uzidilize didli izixeko zazo;

sele zacimayo nasezingqondweni.

₇Kodwa uNdikhoyo uya kuhlal' elawula kude kube nini-nini;

selengqendeve enkundleni yakhe, elungele ukugweba.

₈Ulilawula ngobulungisa elimiweyo;

azigwebe kakuhle zonke iintlanga.

₉NguNdikhoyo inqaba yokuzimela abacinezelwayo;

nguye ikhusi ngamaxesha eembandezelo.

₁₀Bathembele ngawe, Ndikhoyo, bonke abakwaziyo;

kaloku akuzange ubafulathele abo bakufunayo.

₁₁Mbongeni uNdikhoyo ongqendeve ebhotwe eZiyon;

zibhengezeni eluntwini izinto asenzele zona.

₁₂Uyaliphindezela igazi labacinezelweyo;

akasilibali isikhalo sabo baselusizini.

₁₃Ndenzele inceba, Ndikhoyo;

bona indlela abandiphethe ngayo abo bandithiyileyo,

wena ondihlangula ethunzini lokufa.

₁₄Mandiluxele udumo lwakho

phakathi kwabantu bakho eJerusalem.

Ewe, ndinemincili ngenxa yokuba undihlangule.

₁₅Iintlanga zeyele kumhadi ebeziwembile,

zabhajiswa sisabatha ebezisithiyile.

₁₆Uzibonakalisile uNdikhoyo, wasiwisa isigwebo;

izikhohlakali zarhintyelwa kwayimisebenzi yazo.

₁₇Ziya kwelabafileyo izikhohlakali,

neentlanga zonke ezimfulathelayo uThixo.

₁₈Kaloku akayi kusoloko elityalwa amahlwempu;

ithemba labahlelelekileyo aliyi kusoloko lifuthaniselwe.

₁₉Lamla, Ndikhoyo; malungaphakami uluntu;

mazize phambi kwakho uzigwebe iintlanga.

₂₀Zenze zikoyike, Ndikhoyo,

ziqonde ukuba zingabantu nje kuphela.

₁Ndithembele *ngoNdikhoyo nje,

ningathini ukuthi: “Balekela ezintabeni zenu njengentaka!

₂Kaloku abantw' abagwenxa sebejolisile ngesaphetha esinotolo,

bajolisel' ukulidubul' emnyameni ilungisa.

₃Xa sekudilike neziseko nje,

lingenzani ke lona ilungisa?”

₄UNdikhoyo ukwibhotwe lakhe elilodwa,

uhlel' esihlalweni sakhe ezulwini.

Uyabagqala oonyana babantu,

uyazibona izintw' abazenzayo,

₅uyabavavany' abalungileyo nabagwenxa,

abathiye ngentiyokazi enkulu abaphalazi-gazi.

₆Uya kubabetha ngesichotho sesalfa namalahl' avuthayo abantw' abagwenxa;

iziphango nezaqhwithi ziba sisabelo sabo.

₇Kaloku ulilungisa uNdikhoyo;

uyazithanda izenzo ezilungileyo.

Abo balungisayo bobonana naye ubuso ngobuso.

₁UNdikhoyo umthiyile umntu osebenzisa isilinganiso esinegobe;

kambe ke uyamthanda lowo usebenzisa isilinganiso esingenaxanasi.

₂Umntu ozigwagwisayo uyakhawuleza ukuhlazeka;

kambe ke kona ukuzithoba kuhamba nobulumko.

₃Ukunyaniseka kuyamalusa umntu othe ngqo,

kodwa ke bona ubuqhokolo buyawabhangisa amaqhophololo.

₄Ubutyebi bomntu abumsindisi kwingqumbo kaThixo;

sisimo esisulungekileyo kuphela esimhlangulayo umntu ekufeni.

₅Indlela yabantu abamsulwa igudiswa sisimo sabo;

ke bona abakhohlakeleyo bawiswa yinkohlakalo yabo.

₆Isimilo siyamsindisa umntu othe ngqo;

kodwa bona abangcatshi babhajiswa kukunyoluka.

₇Akufa umntu okhohlakeleyo amathemba akhe ayadaka,

nokukholosa kwakhe ngamandla akhe kuyaphutha.

₈Umntu olilungisa uyahlangulwa enkathazweni –

endaweni yakhe iwa phezu kwesikhohlakali.

₉Umlomo womntu ongakhathalele Thixo wenzakalisa ummelwane wakhe;

ke bona abathobela uThixo balondolozwa lulwazi.

₁₀Inkqubela yamalungisa itsho uchulumance umzi wonke;

kanti ke ukufa kwezikhohlakali kutsho kuhlokome yimivuyo.

₁₁Isixeko siyaphakanyiswa sakuthamsanqelwa ngabantu abathe ngqo;

kambe ke wona amazwi ezikhohlakali ayasitshabalalisa isixeko.

₁₂Umntu ongenangqondo uyabanyemba abanye abantu;

ke yona ingqondi ithi cwaka.

₁₃Umntu ongenasifuba uyazidiza iimfihlelo;

kambe ke yena othembekileyo uyaligcina ihlebo.

₁₄Isizwe esingenamcebisi siyawa;

kanti ke xa sinabacebisi abaninzi siba luqilima.

₁₅Umntu omela omnye angamaziyo uyenzakala;

ke yena ongavumiyo ukubamba isandla somnye ebhambathisa ukhuselekile.

₁₆Umfazi onesimilo uyahlonitshwa;

ke wona amadoda aziindlavini azizuzela kuphela ubutyebi.

₁₇Umntu onobubele uyazimaseka;

kambe ke yena ongqwabalala uyazenzakalisa.

₁₈Okuzuzwa ngumntu okhohlakeleyo ngenkohliso kuyaphela,

phofu ke ohlala esenza okulungileyo ufumana umvuzo oqinisekileyo.

₁₉Ubulungisa obububo busingisa ebomini;

ke yena oleqa ububi usingisa ekufeni.

₂₀UNdikhoyo ubathiyile abantu abantliziyo zinenkohlakalo;

kanti ke ukholiswa ngabasimo sisulungekileyo.

₂₁Ngokuqinisekileyo baya kohlwaywa abantu abenza izinto ezimbi;

kambe ke bona abenza izinto ezilungileyo baya kusinda.

₂₂Ubunzwakazi bomfazi ongenangqiqo

bufana nomsesane wegolide empumlweni yehagu.

₂₃Umnqweno womntu olilungisa uzala ubuhle;

ke lona ithemba lesikhohlakali liza nengqumbo.

₂₄Abanye abantu banezinwe kodwa bahambela phambili ngenkqubela;

kanti ke bambi abasoluli isandla noko baya beswela ngokuswela.

₂₅Umntu ophayo uba nenkqubela;

ukuba ùyabanceda abanye abantu nawe uya kuncedwa.

₂₆Abantu bayamshwabulela umntu okubandezayo ukudla;

kanti ke bayamthamsanqela lowo ukuthengisayo.

₂₇Umntu ofuna okuhle uzuza okulungileyo;

phofu ke yena ozungula ububi uzuza kwabona.

₂₈Umntu okholosa ngobutyebi bakhe uvuthuluka njengamagqabi ebusika;

ke yena umntu ofanelekileyo uhluma njengamagqabi entlakohlaza.

₂₉Umntu oyinkathazo ekhayeni udla ilifa elingumoya;

sona isiyatha siba sisicaka sesilumko.

₃₀Isiqhamo sâbo balungisayo ngumthi onika ubomi;

umntu onobulumko uhlangula imiphefumlo yabantu.

₃₁Umntu olilungisa umvuzo wakhe uwuzuza kwalapha emhlabeni;

kobeka phi ke ukohlwaywa komqhankqalazi nomoni?