To The Word – Day 131

₁Mawoo! Lusizi okwenu, nina bantundini bathe zava eZiyon,

nina nizicingelayo ukuba nikhuselekile kwintaba yaseSamariya –

nditsho nina, zindwalutho zesizwe,

nina kuziwa kuni ngabantu bakwaSirayeli.

₂Khanenjenjeya niye kuvelela iKalene,

nidlule apho niye kwesaa sixekokazi iHamati,

nihle nibheke eGati isixeko samaFilistiya.

Ngaba loo mimandla iyidlula ngantoni eyenu?

Ngaba kanene loo mihlaba mikhulu kuneyenu na?

₃Nina niwubekela kude umhla weshwangusha,

kanti nisondeza ukulawulwa lugonyamelo.

₄Nithe zukumfa kwiibhedi ezihonjiswe ngamabamba eendlovu,

nee ngqendevu kwezo sofa zenu,

nisitya eyona nyama ikhethiweyo yegusha nenkomo.

₅Nivukwa yinkenkqe yakutsho ihapu,

niqambe ingoma nixelise uDavide.

₆Nizibetha zichuchumale iindebe yiwayini,

niziqhole ngawexabiso amafutha,

ningabi nantlungu ngokutshabalala kwendlu kaJosefu.

₇Ngoko ke kuya kuqala kuthinjwe nina,

aphele loo matheko enithe zava kuwo.

₈INkosi *uNdikhoyo ifunge igama layo;

ewe, nguwo lo umlomo kaNdikhoyo, uThixo onamandla onke,

uthi: “Ndiyalicekisa ikratshi lenzala kaYakobi;

ndithiye nkqu loo mabhotwe bahlala kuwo.

Ke ngoko isixeko nako konke okukuso ndiza kusinikela kwiintshaba.”

₁₁Niyabona, uthethile uNdikhoyo;

umzi omkhulu uwudiliza ube ngamabhodlo

nomncinane ube ziintanda.

₁₂Akhe aphale na amahashe emaweni?

Ngaba ukho olima apho ngeenkabi zeenkomo?

Kodwa nina ubulungisa nibujike baba yityhefu,

nokunyaniseka nakutsho kwaba likhala elikrakrayo.

₁₃Nivuyiswa kukuthimba iLodabhare,

futhi niqhayisa ngokuthi iKarnayim nayoyisa ngamandla enu.

₁₄Nguwo lo umlomo kaNdikhoyo, uThixo onamandla onke,

uthi: “MaSirayeli, ndinizisela isizwe!

Siza kuniphatha gadalala ukususa kulaa ngxingwa yaseHamati

kude kuye kutsho kulaa ntili ingaseArabha.”

₄Phulaphulani, nina niwacinezelayo amahlwempu,

nizama ukuzicim' igama iindwayi.

₅Nina nithi: “Yaz'ba iya kuphela nini le misitho yentwasa-nyanga,

side size kuthengisa isivuno sethu?

Iya kuda idlule nini yona le mihla yokuphumla,

khon' ukuze sananise ngengqolowa?”

Ibe kanti umlinganiselo niza kuwucutha,

ixabiso lona nilinyuse,

nenze ubuqhetseba ngezikali ezinganyanisekanga.

₆Amahlwempu niza kuwathenga ngesiliva,

abasweleyo nibafumane nokuba kungeembadada,

nithengise nkqu nangomdlungu wengqolowa.

₇UNdikhoyo, iqhayiya likaYakobi, ufunge esithi:

“Ndikhonje, andisobe ndizilibale nanini na izenzo zabo!

₈Aliyi kunyikima na ilizwe ngenxa yoku,

baze benze isijwili bonke abemi balo?

Awuyi kuphakama na umhlaba uxele iNayile,

uphinde uthothe njengaloo mlambo waseJiputa?”

₉Nguwo lo umlomo weNkosi uNdikhoyo:

“Ngaloo mini ilanga liya kutshona emini emaqanda,

kube sisithokothoko emhlabeni ngexesha lasemini.

₁₀Amatheko enu aya kujika abe yinzila,

iingoma zenu zibe sisililo.

Niya kuzibhijela amarhonya nizile,

iintloko zenu zibe nenkqayi.

Kuya kuba ngathi ningumntu ozilele umntwana okuphela kwakhe.

Loo mini yesiphelo iya kuba krakra.”

₁₁Nguwo lo umlomo weNkosi uNdikhoyo:

“Seyisondele imihla yokuba ndihlise indlala ehlabathini,

ingabi kukulambela ukudla okanye ukunxanelwa amanzi,

koko ibe kukufuna ukuva amazwi kaNdikhoyo.

₁₂Baya kubhadula abantu, bebheka ngapha nangapha,

bathi bengasentla babe bengasempumalanga,

bezingela ilizwi likaNdikhoyo.

Kambe ke abasayi kulifumana.

₁₃“Ngaloo mini iinzwakazi neenzwana ziya kuyoba lunxano.

₁₄Abo bafunga loo nto ilihlazo laseSamariya,

besithi: ‘Ekhonje uthixo wakho, Dan,’

besithi: ‘Ikhonje indlela abanyuka ngayo abantu ukuya kunqula eBheshebha,’

bona baya kuwa, bangabi sabuya bavuke.”

“Betha ezo ntsika phezulu kude kushukume umgubasi.

Zaphule, ziwele phezu kwabo bantu balapho.

Bonke abantu abaseleyo ndiza kubabulala ngekrele.

Akukho namnye uya kubaleka;

akukho bani uya kusinda konke.

₂Nokuba bangade bazembele baye kutsho kwelabafileyo,

ndiya kubakhupha apho.

Nokuba bangade banyukele phezulu ezulwini,

ndiya kubathula nalapho.

₃Ndithi nokuba bangade baye kuzimela phezu kwentaba iKarmele,

ndiya kubazingela nalapho, ndibakhuphe.

Bangade baye kuzimela ezantsi elwandle, bazifihle kum,

nalapho ndobathumela ngenyoka yaselwandle, ibadle.

₄Nokuba bangade basiwe ekuthinjweni ziintshaba,

nalapho ndothi mababulawe ngekrele.

Ndowatsolisa amehlo am phezu kwabo,

kungenganjongo yakubenzela okuhle,

kodwa kungenjongo yokubenzela ububi.”

₅Itsho linyibilike yakulichukumisa ihlabathi iNkosi uNdikhoyo onamandla onke,

kube sisijwili kubo bonke abemi balo.

Ihlabathi liya kuphakama lixele iNayile,

liphinde lithothe njengaloo mlambo waseJiputa.

₆Ulobhotwe lakhe lakhiw' ezulwini,

amis' uphahla lwesibhakabhaka phezu komhlaba;

ulobiz' amanz' olwandle awagalele phezu komhlaba –

nguNdikhoyo igama lakhe.

₇Nguwo lo umlomo kaNdikhoyo:

“Kum nina maSirayeli anahlukanga nganto kumaKushe.

Andithi kanene ndim lo wakhupha amaSirayeli eJiputa,

amaFilistiya ndawakhulula kumaKrete

namaSiriya eKire?

₈Inene, ndiyiNkosi uNdikhoyo nje, ndibuqwalasele ubukumkani obonayo,

ndaye ndiza kubususa ehlabathini.

Phofu andiyi kuyicima kuphele indlu kaYakobi.”

Nguwo lowo umlomo kaNdikhoyo.

₉“Ukususela ngoku ndiza kuthi makahlukuhlwe ahlelwe amaSirayeli phakathi kwezizwe,

kanye njengokuba ingqolowa ihlukuhlwa ihlelwe esefini,

kambe akuyi kubakho lukhozo luwa emhlabeni.

₁₀Bonke aboni phakathi kwabantu bam baza kufa ngekrele,

nditsho nkqu abo bathi: ‘Intlekele ayikusihlela; ewe, ngekhe isifikele.’ ”

₁₁“Ngaloo mini ndiya kuwuvusa umzi kaDavide ongamanxiwa.

Ndozityabeka iimfanta zeendonga zawo,

ndiwavuse loo mabhodlo, abe njengoko ayenjalo ngaphambili.

₁₂Abantu bam baya kuthatha umhlaba wamaEdom oseleyo,

nalowo wezizwe ezazikade zibizwa ngegama lam.”

Nguwo lowo umlomo kaNdikhoyo,

yena oya kukwenza konke oku.

₁₃Ewe, nguwo lo umlomo kaNdikhoyo:

“Kuza imihla ekuya kuthi kusavunwa kube sekulinywa kwakhona,

kuthi isatyalwa imbewu yediliya kube sekuxovulwa.

Ewe, iintaba ziya kuvuzisa incindi yeediliya,

iinduli zitsho zinyibilike.

₁₄Ndiya kubabuyisa ekuthinjweni abantu bam amaSirayeli,

bawavuse amanxiwa ezixeko zabo, bahlale kuzo,

balime izidiliya, basele iwayini yazo,

balime izitiya, badle iziqhamo zazo.

₁₅Ndiya kubazinzisa emhlabeni wabo,

bangabe babuye basuswe kuwo umhlaba endibanike wona.”

Utsho uNdikhoyo uThixo wenu.

Luvakele udaba oluvela kuNdikhoyo;

sigalelekile ezizweni isigidimi, sisithi:

“Vukani, siye kulwa naye uEdom!”

₂UNdikhoyo uthi kwiEdom:

“Uyabona, ndokwenza ube mncinane phakathi kwezizwe;

uya kusuka udeleke mpela.

₃Ikratshi elisentliziyweni yakho likukhohlisile.

Wena uhlala ezimfanteni zamawa,

wena ukhaya likweliphezulu,

xa uzithethela uman' usithi:

‘Ngubani oya kundithula andise emhlabeni?’

₄Noba ungade untinge njengokhozi,

ewe, noba usezinkwenkwezini umzi wakho,

nalapho mna ndiya kukuthoba.”

Lowo ke ngumlomo kaNdikhoyo.

₅“Xa ufikelwe ngamasela,

ewe, nokuba zizihange ebusuku,

aya kûba kangangoko anako,

akushiyele kodwa.

Nabavuni beediliya bavuna bagqibe,

kushiyeke umkhwahlazo.

Kodwa eyakho intshabalalo iya kugqithisa.

₆Kaloku, wena Esawu, uya kugqogqwa uphengululwe,

konke okwakho okunexabiso kuthinjwe.

₇Oogxa bakho bokududulela emideni.

Izihlobo zokukhohlisa utsho woyisakale.

Abo ubusidla kunye nabo bokugcayisela,

kodwa sobe uyiqonde loo nto.”

₈Nguwo lo umlomo kaNdikhoyo:

“Mhla ndamohlwaya uEdom

ndozitshabalalisa izilumko zakhe,

kungabikho mntu uqiqayo kwezo ntaba zakwaEsawu.

₉Ke wona amadoda omkhosi waseTeman osuka arhwaqele;

bonke abakwiintaba zakwaEsawu baya kunqunyulwa babulawe.

₁₀Ngenxa yobundlobongela obenze kumntakwenu,

nditsho umninawe wakho onguYakobi,

ihlazo liya kukugubungela,

utshatyalaliswe ngonaphakade.”

₁₁“Ngaloo mini wena wema bhuxe

ngeli xesha utshaba luthath' ubutyebi.

Iintlanga zangena emasangweni,

zenza *amaqashiso ngeJerusalem,

suka wena waba njengomnye wazo.

₁₂Akwaba ubungamdelanga umntakwenu,

nditsho ngemini yakhe yelishwa.

Akwaba ubungagcobanga ngenxa kaJuda

ngemini yakhe yentshabalalo.

Akwaba ubungaqholosanga

mhla lalibhek' umoya kuye.

₁₃Ngewungangenanga kumasango abantu bam

ngomhla wabo wesithwakumbe.

Ngewungabajongelanga phantsi ngenkxwaleko yabo

ngemini yentlekele yabo.

Ngewungabuxhaphazanga ubutyebi babo

ngomhla weshwangusha labo.

₁₄Akwaba ubungemanga eziphambukeni

ukuze unqakule iimbacu zabo.

Amasalela ngewungawanikelanga elutshabeni

mhla kwakugos' okwaphukayo.”

₁₅“Ewe, kuzo zonke izizwe imini *kaNdikhoyo isondele.

Loo nto uyenzileyo, wena Edom, iya kubuya yenziwe nakuwe;

isikhuni siya kubuya nomkhwezeli.

₁₆Njengoko nina nayisezwayo ibhekile yesohlwayo entabeni yam engcwele,

ngokunjalo nezinye izizwe ziya kuyisezwa,

phofu ziyisele zingayeki.

Ewe, ziya kusela zibimbilize,

zide zibe ngathi zange zabakho.”

₁₇“Ke kwintaba iZiyon kuya kubakho abasindileyo;

yona yobuya ibe yindawo engcwele.

Indlu kaYakobi iya kulixhamla ilifa layo,

libe sezandleni zayo.

₁₈Indlu kaYakobi iya kuba ngumlilo,

indlu kaJosefu ibe lidangatye.

Ke yona ekaEsawu ibe ngumququ,

bayintumeke umlilo itshe iphele.

Akusayi kubakho masalela kule ndlu kaEsawu mpela-mpela.”

Etshilonje *uNdikhoyo, utshilo.

₁₉“Ke zona iintaba zakwaEsawu zomiwa ngabantu belasezantsi;

ke bona abakumazantsi eentaba beme kumhlaba wamaFilistiya.

Bowuthatha umhlaba kaEfrayim nowaseSamariya,

abakwaBhenjamin beme eGiliyadi.

₂₀Iimbacu zamaSirayeli ziya kuyithimba iKanana ziye kutsho eZarefa,

iimbacu zaseJerusalem eziseSefaradi zithimbe iidolophu zelasezantsi.

₂₁Abahlanguli bophuma eZiyon,

bazilawule iintaba zakwaEsawu,

ubukumkani bube bobukaNdikhoyo.”

Unyana osisilumko ulibhongo likayise,

ke yena osisityhakala ungumva-ndedwa kanina.

₂Ubutyebi obufunyenwe ngobuqhophololo abuphumelelisi,

kodwa ke kona ukuziphatha kakuhle kuhlangula ekufeni.

₃*UNdikhoyo soze abayeke abantu abalungileyo balambe,

kambe ke zona izikhohlakali uyazithintela ingafezeki iminqweno yazo.

₄Umntu oqhokrwe izandla uba lihlwempu;

ke yena okhutheleyo uba sisityebi.

₅Unyana oxakekayo evuna ngexesha lokuvuna ukhaliphile;

kambe ke yena olalayo xa isivuno silungile lihlazo.

₆Amalungisa athiwa jize ngesithsaba sentsikelelo,

ke zona izikhohlakali ubundlobongela zibufihla ngokuthetha.

₇Kuyintsikelelo ukukhumbula amalungisa,

kambe ke lona igama lezikhohlakali liyaphutha.

₈Umntu onengqondo uyayiphulaphula imiyalelo;

kambe ke sona isityhakala esilavuzayo siya kubhanga.

₉Umntu onyanisekileyo uhamba engaxhalele nto;

ke yena onamaqhinga uya kubhaqwa.

₁₀Umntu oyivalela amehlo inkohlakalo ubangela intlupheko,

kambe ke isityhala esilavuzayo siya kubhanga.

₁₁Amazwi omntu olilungisa angumthombo wobomi;

kanti ke zona izikhohlakali ubundlobongela zibufihla ngokuthetha.

₁₂Intiyo iphembelela ingxabano;

ke lona uthando luyazingcwaba zonke izono.

₁₃Umntu oqondayo uthetha ubulumko,

kanti ke umhlana wesinyabi ufanelwe yintonga.

₁₄Isilumko siyaluqoqosha ulwazi,

kanti ke kona ukuthetha kwesityhakala kuza nentshabalalo.

₁₅Ubutyebi besinhanha lixhadi laso;

ke bona ubuhlwempu yintshabalalo yosweleyo.

₁₆Ilungisa lixhamla ubomi ngemigudu yalo;

ke yona inzuzo yesikhohlakali iphelela esonweni.

₁₇Umntu oyithobelayo ingqeqesho usekhondweni lobomi;

ke yena ongaphulaphuliyo ulahlekene nendlela.

₁₈Umntu oyifihlayo intiyo lixoki;

ke yena osasaza iindaba zolwimi sisiyatha.

₁₉Ekuthetheni kakhulu isono sidla ngokubakho,

kambe ke ozibambayo ekuthetheni unengqiqo.

₂₀Amazwi elungisa afana nesiliva ecwengileyo;

ke zona iingcinga zesikhohlakali ziphuthile.

₂₁Amazwi omntu onengqondo ayinzuzo kwabaninzi;

kanti ke zona izityhakala zibulawa kukungayisebenzisi ingqondo.

₂₂Yintsikelelo kaNdikhoyo enika umntu ubutyebi;

kambe ke yona ayihambi nazintsizi.

₂₃Isiyatha siyavuya xa sisenza ubugwenxa;

phofu ke yena umntu onengqondo uyabuvuyela ubulumko.

₂₄Umntu okhohlakeleyo uzuza kanye le nto imnxunguphalisayo,

kodwa yena olilungisa unikwa oko akufunayo.

₂₅Zakufika iinkqwithela zimka nabo abantu abakhohlakeleyo;

kanti ke bona abanyanisekileyo bema ngxishi ngonaphakade.

₂₆Asinto umdintsi ukusetyenzelwa livila,

nqwa neviniga emazinyweni okanye umsi emehlweni.

₂₇Ukuthobela uNdikhoyo kuyabongeza ubomi bomntu;

kanti ke yona iminyaka yezibhoja iyanqanyulwa.

₂₈Ithemba lelungisa liza novuyo;

ke lona ithemba lesikhohlakali liphelel' emoyeni.

₂₉Indlela kaNdikhoyo yinqaba yamalungisa;

kodwa ke yintshabalalo kwabenza ububi.

₃₀Ilungisa alisoze libhukuqwe;

ke yena okhohlakeleyo ngekhe eme elizweni.

₃₁Umntu obhadlileyo uphuphuma ubulumko,

kambe ke yena umntu ogqwethayo uya kunqunyulwa ulwimi.

₃₂Umntu onengqondo uthetha amazwi afanelekileyo;

kambe ke sona isikhohlakali sithetha amazwi akrwempayo.