To The Word – Day 130

“*UNdikhoyo angabharhumla kwintab' iZiyon,

iziwi lakhe lingazongoma livela ngaseJerusalem,

amadlelo atsho abharhe,

yona incopho yentaba iKarmele itshaze.”

“Nokuba iDamasko yayone izihlandlo zazithathu

ngendingasirhoxisanga isohlwayo sam.

Kambe ke suke yagqithisa ngokona isihlandlo sesine.

Kaloku ibhule iGiliyadi ngesileyi sokubhula esimazinyo ayintsimbi.

₄Ngoko ke ndiza kulintumeka ngomlilo ibhotwe likaHazayeli,

zitshe ziphele nqu iinqaba zikaBhenadadi.

₅Ndiza kuwadiliza amasango aseDamasko,

ndibasiphule neengcambu abemi bentili yaseAven

kunye nezo ziphathamandla zaseBhete-eden.

Ama-Aram aya kuthinjwa, asiwe eKire.”

Utsho uNdikhoyo.

“Nokuba iGaza yayone izihlandlo zazithathu

ngendingasirhoxisanga isohlwayo sam.

Kambe ke suke yagqithisa ngokona isihlandlo sesine.

Kaloku bona bathimba isizwe siphela,

basithengisa saba ngamakhoboka kwaEdom.

₇Ngoko ke ndiza kuluntumeka ngomlilo udonga lwaseGaza,

zitshe ziphele nqu iinqaba zalapho,

₈ndibasiphule neengcambu abemi baseAshdode

kunye nezo ziphathamandla zaseAshkelon,

ndiziphanzise iidolophu zase-Ekron,

kungasali nempunde le kumaFilistiya.”

Itsho iNkosi uNdikhoyo.

“Nokuba iTire yayone izihlandlo zazithathu

ngendingasirhoxisanga isohlwayo sam.

Kambe ke suke yagqithisa ngokona isihlandlo sesine.

Kaloku bona bathimba isizwe siphela,

basithengisa saba ngamakhoboka kwaEdom,

suka bawutyeshela umnqophiso wobuzalwana.

₁₀Ngoko ke ndiza kuluntumeka ngomlilo udonga lwaseTire,

zitshe ziphele nqu iinqaba zalapho.”

“Nokuba amaEdom ayone izihlandlo zazithathu

ngendingasirhoxisanga isohlwayo sam.

Kambe ke suke agqithisa ngokona isihlandlo sesine.

Kaloku wona awaqweqwedisa ngekrele amawabo,

ayitsho yaphela tu imfobe yokuzalana,

awaqwenga enomsindo ongapheliyo,

umsindo ongathibazekiyo.

₁₂Ngoko ke ndiza kuyintumeka ngomlilo iTeman,

zitshe ziphele nqu iinqaba zaseBhozera.”

“Nokuba ama-Amon ayone izihlandlo zazithathu

ngendingasirhoxisanga isohlwayo sam.

Kambe ke suke agqithisa ngokona isihlandlo sesine.

Kaloku wona aqangqulula abafazi abakhulelweyo baseGiliyadi

ukuze bandise imida yabo.

₁₄Ngoko ke ndiza kuluntumeka ngomlilo udonga lwaseRabha,

zitshe ziphele nqu iinqaba zalapho.

Kovakala intlaba-mkhosi mhla ngedabi,

kuvuthuze umoyakazi ngemini yesaqhwithi.

₁₅Uya kuthinjwa ukumkani wawo,

yena kunye namaphakathi akhe.”

Utsho uNdikhoyo.

“Nokuba amaMowabhi ayone izihlandlo zazithathu

ngendingasirhoxisanga isohlwayo sam.

Kambe ke suke agqithisa ngokona isihlandlo sesine.

Kaloku wona awatshisa aluthuthu amathambo kakumkani wase-Edom.

₂Ngoko ke ndiza kulintumeka ngomlilo elakwaMowabhi,

zitshe ziphele nqu iinqaba zaseKeriyoti.

Aya kufa kuloo mbodamo amaMowabhi,

kuvakala intsholo yentlaba-mkhosi nezigodlo.

₃Ndiya kuzicim' igama iziphathamandla zalapho,

nezinxiba-mxhaka zabo zife kunye nabo.”

Utsho uNdikhoyo.

“Nokuba amaJuda ayone izihlandlo zazithathu

ngendingasirhoxisanga isohlwayo sam.

Kambe ke suke agqithisa ngokona isihlandlo sesine.

Kaloku wona awulahlile umyalelo kaNdikhoyo,

akayigcina imimiselo yakhe,

suka alahlekiswa ngamampunge,

nditsho amampunge awayelandelwa ngooyise.

₅Ngoko ke ndiza kulintumeka ngomlilo elakwaJuda,

zitshe ziphele nqu iinqaba zaseJerusalem.”

“Nokuba amaSirayeli ayone izihlandlo zazithathu

ngendingasirhoxisanga isohlwayo sam.

Kambe ke suke agqithisa ngokona isihlandlo sesine.

Kaloku wona azuza imali ngokuthengisa ngabantu abathembekileyo,

ihlwempu lona ananise ngalo ngeembadada.

₇Iindwayi azinyhasha iintloko zibe luthuli,

zona iimpula-kalujaca azitsho ziphume endleleni.

Unyana noyise babolekisana ngenkazana enye,

benyelisa igama lam elingcwele.

₈AmaSirayeli ahamba ezandlala kumaqonga ngamaqonga,

etsho ngezambatho azithimbileyo,

endlwini yothixo wawo asele iwayini ayithathe kubantu abadliweyo.

₉“Ndim kaloku owawatshabalalisayo ama-Amori phambi kwamaSirayeli –

nditsho eziya ngxilimbela zibude bunga ngumthi womsedare,

nokomelela kunga ngum-oki,

ndazitshabalalisa iziqhamo zawo phezulu,

ndazisiphula iingcambu ezantsi.

₁₀Ndim owanikhupha eJiputa,

ndanikhapha amashumi amane eminyaka nisentlango,

nada naya kuhlutha umhlaba wama-Amori.

₁₁Ndim owenza abanye boonyana benu baba *ngabashumayeli,

abanye baba ngamalolo kaNdikhoyo?

Akunjalo yini na, bonyana bakaSirayeli?”

Nguwo lowo umlomo kaNdikhoyo.

₁₂“Loo malolo nina niwangxale iwayini,

*kubashumayeli nathi: ‘Musani ukushumayela.’

₁₃“Mna ke ndiza kunenza nixinge apho nikhoyo,

oku kwenqwelo exinga kukuzala zizithungu.

₁₄Akuyi kusinda noyena unamendu umntu,

nezigantsontso ziya kutsho ziphelelwe ngamandla,

ikroti lingabi nako ukusindisa ubomi balo,

₁₅kunkwantye nkqu neencutshe zeentolo,

imbaleki ingabi nakuphuncuka,

kungasindi nokhwele ehashini.

₁₆Ewe, nelona laziwayo igorha liya kuswantsula zé ngaloo mini.”

Nguwo lowo umlomo kaNdikhoyo.

₁Liveni eli lizwi alibhekisa kuni *uNdikhoyo, bantu bakwaSirayeli,

kuni nalo lonke usapho lwakhe awalukhuphayo eJiputa:

₂“Nini kuphela abantu endabanyulayo kwizizwe zonke zehlabathi;

yiyo ke loo nto ndiza kunohlwaya ngenxa yobugwenxa benu bonke.”

₃Bakha bahamba kunye na ababini bengavani?

₄Kanene, ikhe igqume ehlathini ingonyama ingenalo ixhoba?

Khona, ikhe irgargame ingonyama entsha esikhundleni sayo ingabambanga nto?

₅Yona intaka ikhe ingene kwisabatha apho kungabekwanga mgibe khona?

Sona isigu khe sifane sibambise nje, kungekho nto ibanjiweyo?

₆Kanene, khe kubekho intlaba-mkhosi ingabothusi abantu esixekweni?

Hee, khe kuvele ishwangusha esixekweni lingasuki kuNdikhoyo?

₇Ukanti ke yona iNkosi uNdikhoyo ayenzi nto ingathanga ilityhile icebo layo kwizicaka zayo *abashumayeli.

₈Yakugquma ingonyama, ngubani ongakhwankqiyo?

Yakuthetha iNkosi uNdikhoyo, ngubani ongalayo ukushumayela?

₉Luvakalise olu daba kumabhotwe aseAshdode;

luxele nakumabhotwe aseJiputa, uthi:

“Buthelani ezintabeni zaseSamariya,

niye kubona imbudumbudu ekweso sixeko,

niyijonge ingcinezelo elapho.”

₁₀Utsho uNdikhoyo ukuthi:

“Abo bantu abazani tu nobulungisa;

amabhotwe abo azele zizinto abazizuze ngobugebenga nangokuxhaphaza.”

“Umhlaba wenu uza kurhawulwa ziintshaba,

zinaphule iimpondo,

zithimbe naloo mabhotwe enu.”

“Kuloo maSirayeli athe zava kwezo sofa zaseSamariya,

ehleli kwezo zihlalo zitofo-tofo,

kosinda nje imbinana,

ngathi yimilenze yegusha

okanye isijungqe sendlebe

efane yaxhwilwa ngumalusi emlonyeni wengonyama.”

₁₃Nguwo lo umlomo kaNdikhoyo uThixo onamandla onke:

“Yivani, nize niyilumkise inzala kaYakobi.

₁₄Kaloku ngaloo mini ndomohlwaya uSirayeli ngenxa yeziphoso zakhe,

ndiwadilize amaqonga aseBhetele,

nezo mpondo zawo ndizinqumle ziwe phantsi.

₁₅Ndozichitha izindlu zasebusika nezasehlotyeni,

ndiwatsho abe ngamabhodlo loo mabhotwe ahonjiswe ngamabamba eendlovu,

aphele amapomakazi alapho.”

Nguwo lowo umlomo kaNdikhoyo.

₁Liphulaphuleni eli lizwi, bafazindini basezintabeni zaseSamariya,

zintondini ezityebe okweemazi zeenkomo zaseBhashan,

nina nicinezela iindwayi, niwaxhaphaze amahlwempu,

ezi zinto zithi kumadoda azo: “Thungani sisele!”

₂Ifunge ubungcwele bayo iNkosi *uNdikhoyo, yathi:

“Seyinifikele imini yokuqweqwediswa kwenu nirhuqwa ngamagwegwe,

abantwana benu betsalwa ngomlobothi.

₃Niya kukhutshwa ngeemfanta zeendonga ezilungelelene nani;

niya kulahlwa kweziya ntaba zaseHarmon.”

Nguwo lowo umlomo kaNdikhoyo.

₄“Yiyani eBhetele, none;

niye naseGiligali, nigabadele ukona;

nivuke mihla le nisondeze amadini;

nizise izishumi qho ngosuku lwesithathu!

₅Zitshiseni izonka ezinegwele zibe ngumnikelo wombulelo,

nibhengeze iminikelo yenu yokuqhutywa yintliziyo,

nihambe niqhayisa ngaloo nto.

Nantso ke into enikholwa yiyo, nina maSirayeli.”

Nguwo lowo umlomo kaNdikhoyo.

₆“Ndanizisela indlala ezixekweni zenu zonke,

akwabikho nesuntswana eli lesonka emizini yenu,

kodwa anibuyelanga kum.”

Nguwo lowo umlomo kaNdikhoyo.

₇“Ndim ozise imbalela iinyanga ezintathu phambi kwesivuno,

ndanisa imvula kule dolophu, ndayishiya leya;

yanetha kule intsimi, enye ndayishiya ibharhile.

₈Basuka kule dolophu baya kuleya abantu,

befuna amanzi okusela,

suka akabanela.

Kodwa phezu koko anibuyelanga kum.”

Nguwo lowo umlomo kaNdikhoyo.

₉“Ndahlisa ulophu olutshisayo nomngundane,

zazitsho zee waca izityalo nezidiliya zenu,

iinkumbi zawanqunqutha amakhiwane enu nemithi yeminquma.

Phezu koko anibuyelanga kum.”

Nguwo lowo umlomo kaNdikhoyo.

₁₀“Ndanihlisela isibetho esifana nesaseJiputa,

oonyana benu bawa ngekrele edabini

kunye namadoda akhwela amahashe.

Zanuka phu iikampu zenu liphunga lezidumbu zabo,

suka nina anabuyela kum.”

Nguwo lowo umlomo kaNdikhoyo.

₁₁“Abanye benu ndababhubhisa ngalaa ndlela ndabhubhisa iSodom neGomora ngayo.

Nina nasinda ngathi sisikhuni sixwilwe emlilweni,

kodwa anifuni kude nibuyele kum.”

Nguwo lowo umlomo kaNdikhoyo.

₁₂“Ke ngoko, Sirayeli, ndophinda ndikwenze konke oku.

Ke, njengoko ndiza kwenjenjalo,

zilungiseleleni, maSirayeli, ukuhlangana noThixo wenu.”

₁₃Ulodala iintaba, adal' umoya,

ulozityhilayo iinjongo zakhe eluntwini,

ulojik' umsobomvu kuvel' urhatyazo,

ulonyathela imimango ephakamileyo yomhlaba,

nguNdikhoyo uThixo onamandla onke igama lakhe.

₁Liveni ilizwi lam, ndlu kaSirayeli;

nditsho esi sililo ndisenzayo ngenxa yenu:

₂“Iwile bhaxa, ayiyi kube ivuke intombi enguSirayeli!

Ithe qungqululu yodwa kumhlaba wakowayo,

kungekho bani wokuyiphakamisa.”

“Kuya kusinda ikhulu kuloo dolophu ithumela iwaka edabini,

kusinde ishumi lamaSirayeli kuleyo ithumela ikhulu lamadoda.”

“Quqelani kum, niphile.

₅Musani ukuquqela eBhetele,

ningayi naseGiligali,

ningatyeleli eBheshebha,

kuba abantu baseGiligali baza kuthinjwa,

iBhetele ingabi nto yanto.”

₆Quqelani kuNdikhoyo, niphile,

kungenjalo uya kuza evutha,

ayitshise iphele indlu kaJosefu,

kungekho nabani eBhetele ongawucimayo loo mlilo.

₇Nina nigqwetha ubulungisa bube krakra njengekhala,

nibukhahlele phantsi eluthulini.

₈Ulomenzi woomakroza noozilimela,

ulojik' isithokothoko sobumnyama sibe ngumsobomvu, nemini ibe yintsunguzi yobusuku,

ulovulela amanz' olwandle ankcenkceshe ngawo umhlaba,

nguNdikhoyo igama lakhe.

₉Nguye umtshabalalisi wezigantsontso;

nguye umdilizi weenqaba zazo.

₁₀Niyamcaphukela umntu othanda ubulungisa ezinkundleni,

nilithiye ingqina elidandalazisa inyaniso.

₁₁Njengoko niwacinezela amahlwempu,

niwarhumisa nangengqolowa ayivunileyo,

anisobe nizihlale ezo zindlu zenu zamatye aqingqiweyo,

ningasobe niyisele newayini evela kwezo zidiliya zenu zinqwenelekayo.

₁₂Ndiyabazi kaloku ubuninzi bobugwenxa benu

nobukhulu bezono zenu.

Nitshutshisa abantu abamsulwa;

niyakuthanda nokunyotywa.

Amahlwempu niyawavala angeviwa ezinkudleni zenu.

₁₃Yiyo ke loo nto zona izilumko zisuka ziwuvale owazo zingathethi,

kuba eli lixesha lezinto ezimanyumnyezi.

₁₄Quqelani kokulungileyo, ingekuko okubi,

khon' ukuze niphile,

naye uNdikhoyo, uThixo onamandla onke, abe phakathi kwenu,

njengoko nizingca ngaloo nto.

₁₅Inkohlakalo yithiyeni,

nithande ukwenza okuhle,

nivuselele ubulungisa ezinkundleni zenu,

mhlawumbi uNdikhoyo, uThixo onamandla onke, angaba nenceba kumasalela endlu kaJosefu.

“Koba sisijwili kwiindawo zonke zembutho;

ezitalatweni zonke ibe ngooyoo-yoo zizikhalo.

Kobizwa kwanabalimi ukuza kulila,

kumenywe nabazili ukuza kubhomboloza.

₁₇Koba seso sijwili nakwizidiliya zenu,

kuba ndobe ndize kunohlwaya.”

Utsho uNdikhoyo.

₁₈Mawoo kwabo balangazelela imini *kaNdikhoyo!

Ngaba kanene kuni loo mini yoba yimini enjani?

Imini kaNdikhoyo yoba sisithokothoko sobumnyama, ingabi kukukhanya.

₁₉Koba ngathi umntu ubaleka ingonyama,

aye kugagana nebhere.

Koba ngathi umntu ungena endlwini, abambelele eludongeni,

suka alunywe yinyoka kweso sandla.

₂₀Imini kaNdikhoyo iya kuba bubumnyama, ingabi kukukhanya.

Yoba sisithokothoko sentsunguzi engenalitha.

₂₁“Ndiwathiyile, ndiwacekisa amatheko enu,

andinamdla konke yimisitho yenu.

₂₂Loo madini atshiswayo niwenzayo, kunye naloo minikelo yenu yeenkozo, andiyi kuyamkela;

andiyi kuyisa so konke iminikelo yenu yobudlelane yeenkomo ezityetyisiweyo.

₂₃Niyandifundekela ngezo ngoma zenu;

andifuni nokusiva isandi sezo hapu zenu.

₂₄Makuqukuqele ukunyaniseka njengomlambo,

nobulungisa njengomsinga ongatshiyo.

₂₅“Ndlu kaSirayeli, yayingendim enanimxhelela,

nimenzela amadini iminyaka emashumi mane entlango.

₂₆Ngoku ke niza kuyithwala loo mifanekiso kaSikuti, loo kumkani wenu,

kunye nokaKiyuni, inkwenkwezi yothixo wenu enazenzelayo,

₂₇kuba ndizimisele ukunigxothela kude lee ngaphaya kweDamasko,

apho niya kuba ngabathinjwa khona.”

Utsho uNdikhoyo.

NguThixo onamandla onke igama lakhe.

₁Ndiwuphakamisela kuwe, *Ndikhoyo, umphefumlo wam;

₂Thixo wam, ndithembele kuwe.

Mandingakhe ndidane konke;

mazingakhe zindivuyelele konk' iintshaba zam.

₃Ewe, mabangadani bonk' abathembele kuwe;

mayibe ngâbo banxaxhayo amabadane.

₄Ndibonise indlela yakho, Ndikhoyo;

ndifundise iindlela zakho.

₅Ndikhokelele enyanisweni yakho, undifundise.

Kaloku nguwe, Thixo, umkhululi wam;

ndihleli ndikulindele imini yonke.

₆Khumbula, Ndikhoyo, inceba yakho,

nothando lwakho obukade unalo kwakudala.

₇Ungazikhumbuli izono zobutsha bam,

nokungathobeli kwam umthetho wakho;

kanye ndazelelele ngothando olungagungqiyo,

ngenxa yobubele bakho, Ndikhoyo.

₈UNdikhoyo unobubele, ulungile.

Yiyo loo nto abafundisayo indlela yakhe aboni.

₉Abathobekileyo ubakhokelela kokulungileyo,

abafundise indlela yakhe abalulamileyo.

₁₀Zonk' iindlela zikaNdikhoyo zezothando nenyaniso

kwabo bathobela umnqophiso nemithetho yakhe.

₁₁Ngenxa yegama lakho, Ndikhoyo, ndixolele ityala lam

nakuba lilikhulu kangaka.

₁₂UNdikhoyo uya kumbonisa indlela umntu omoyikayo.

₁₃Uya kuhlala enenkqubela

nabantwana bakhe ube lilifa labo umhlaba.

₁₄Ungumhlobo kwabo bamhlonelayo uNdikhoyo,

uyabaqondisa umnqophiso wakhe.

₁₅Ndihleli ndilindele uncedo lukaNdikhoyo,

kuba uyawusombulula umgib' ezinyaweni zam.

₁₆Buyela kum, Ndikhoyo, undenzele inceba;

kaloku ndilikheswa, ndixhwalekile.

₁₇Ndikhulule kwintlungu endikuyo,

undikhuphe ezimbandezelweni.

₁₈Qwalasela ubunzima nosizi endikulo,

undixolele zonk' izono zam.

₁₉Zigqale ubuninzi bazo iintshaba zam,

nendlela ebuhlungu ezindiphethe ngayo ngolunya.

₂₀Bukhusele ubomi bam, undihlangule;

mandingadaniswa kaloku, kuba ndithembele ngawe.

₂₁Mandihlale ndingasoleki ndililungisa,

kuba kaloku ithemba lam likuwe.

₂₂Bakhulule, Thixo, abantu bakho amaSirayeli

kuzo zonke iimbandezelo zabo.