To The Word – Day 127

₁“Yitsho ngomtyangampo wesigodlo!

Nal' ixhalanga lirhiwula abantu *bakaNdikhoyo.

Kaloku bawaphule umnqophiso wam,

suka bawuvukela umthetho wam.

₂Ewe, ngoku uSirayeli uyazibika kum;

uyandivuma esithi: ‘Thixo wam endimaziyo!’

₃Ngokutshikilela kwakhe okulungileyo

uSirayeli wathiwa mbende lutshaba.

₄Bazikhethele ookumkani ngaphandle kwam,

bamisa namaphakathi ndingakwazi oko.

Ngesiliva negolide yabo bazenzele izithixo;

nto leyo iyintshabalalo kubo.

₅Mh-mh-mh, ndiyalenyanya ithole laseSamariya!

Ingqumbo yam iyavutha ngakubo;

koda kube nini benyhuku-nyhuku?

₆Tholendini lenziwe yingcibi yakwaSirayeli!

Hayi, asiThixo le nto iyenzileyo.

Ngenene elo thole laseSamariya liya kuntlekeka libe ziingceba.

₇“Bona bahlwayela umoya,

kanti bavuna isaqhwithi.

Ingqolowa ziziphunzi ezingathwalanga;

ngoko ke tu isivuno.

Enoba besingade sifumaneke

bezingafikayo iintlanga zizenzele.

₈USirayeli uthiwe bimbilili.

Utshone phakathi kwezizwe;

unjengesitya ekungekho yaso mpela.

₉Usuke wanyukela eAsiriya,

wanjengeqwarha elibhadulayo;

uEfrayim uzithengisile kwizithandwa zakhe.

₁₀Angade aziqeshise, nditsho nakwiintlanga,

kodwa ndosuka ndimqokelele.

Phofu ke uya kuncipha,

ingcinezelo yokumkani imthi nca.

₁₁KwaEfrayim andisiwe amaqonga –

nditsho awokungxengxezela isono.

Ngoku angamaqonga okwenza isono.

₁₂Ndaba ngababhalela imithetho,

nayo ke ingembalwa iyintaphane,

suka nayo leyo bayikhaba,

bayithatha njengento yasemzini.

₁₃Ewe, bona amadini bayandenzela;

inyama yona bajika bayitye.

*UNdikhoyo ke akanelisekanga ngabo,

engabulibalanga nobugwenxa babo.

Ewe, yena uza kubohlwaya;

baza kuphindela kwaseJiputa.

₁₄USirayeli umlibele umenzi wakhe,

suka wazakhela amabhotwe.

UJuda wazandisa izixeko ezinqatyisiweyo –

zixeko ezo ndozithumela ngomlilo,

ulenye konke, nditsho nezo nqaba.”

₁Musa ukonwaba, Sirayeli;

ewe, sukuvuya njengezinye izizwe.

Kaloku wena umphambile uThixo wakho;

wena usuke wamfulathela.

Uthe phithi yimali yokuzithengisa

kuzo zonke izanda zokubhula.

₂Izanda nezixovulelo aziyi kuvelisa nto,

newayini entsha yosuka inqongophale.

₃Awuzukuhlala kulo mhlaba *kaNdikhoyo.

Ewe, úza kuphindela eJiputa uEfrayim;

uya kutya ukutya okunomlaza eAsiriya.

₄Ewe, uNdikhoyo abayi kumenzela iminikelo yewayini;

ayiyi kumanelisa iminikelo yabo.

Kubo lo mnikelo wofana nesonka sabazili –

abawutyileyo baya kuba nomlaza.

Ukutya kwabo kolungela bona kuphela –

akuyi kunikelwa kwindlu kaNdikhoyo.

₅Hee, niya kwenza ntoni ke ngemihla yemibhiyozo emisiweyo,

ngomhla wetheko likaNdikhoyo?

₆Xa bangasindiyo ekutshatyalalisweni

iJiputa yofika yona ibaqokelele,

ke yena uMemfisi abangcwabe.

Ubutyebi besiliva buya kukhulelwa lukhula,

imizi yabo ibhijelwe yimithana enameva.

₇Iyeza imihla yesohlwayo –

nditsho imihla yembuyekezo –

noSirayeli ke uza kuqonda.

Ngenxa yokwanda kobugwenxa benu,

nobunzulu bentiyo yenu,

*umshumayeli nithi sisityhakala,

umntu onefuthe likaMoya uphambene.

₈Umshumayeli ngumlindi kaEfrayim,

bantu abo bangaboThixo wam,

kodwa ubekelwa izabatha,

kuliwe naye endlwini yoThixo wakhe.

₉Ewe, bonakele ngokungathethekiyo;

kunjengaloo mihla yaseGibheya.

UThixo akabulibalanga ubugwenxa babo,

yaye ke uza kubohlwaya

ngenxa yezono zabo.

₁₀Ndathi mhla ndamfumana uSirayeli

kwanga ndibhaqe iidiliya entlango;

mhla ndabafumana ookhokho benu

yaba ngathi ndibhaqe amakhiwane,

makhiwane ke alulibo.

Bathe bakufika eBhali-pehore

suka bazinikela kuBhali,

baza bagqwaliseka njengaye kum.

₁₁Udumo lukaEfrayim lothi shwaka,

luntinge lumke njengentaka.

Akukho mfazi uya kukhulelwa;

ewe, akukho mfazi uya kubeleka.

₁₂Naxa benabo abantwana abakhulayo

ndobatshayela kuthi tu.

Mawo-o-o! Yeka mhla ndabafulathela!

₁₃Ndambona uEfrayim enjengeTire,

emi kwisithabazi somhlaba.

Kambe abantwana bakhe baya kuzingelwa,

bona boba zizisulu zokubulawa.

₁₄Azi ndothini na *kuNdikhoyo?

Mandithi banike ntoni na kodwa?

Izizalo ezingaphathi nto;

amabele awomileyo.

₁₅Ngenxa yezono abazenza eGiligali

mna ndatsho ndabacaphukela.

Ngenxa yezenzo zabo ezigwenxa

ndiza kubagxotha endlwini yam.

Ukubathanda kwam kwaphusile;

kaloku iinkokheli zabo zindivukele.

₁₆Ngenene uEfrayim uphanzile,

womile ukususela ezingcanjini;

ewe, akathwali ziqhamo.

Noba angade azale

ndoyibhubhisa loo nzala ayithandayo.

₁₇UThixo wam wabalahla kwesinomhlwa;

kaloku bona abamphulaphulanga.

Ngoko ke boba ziimbacu ezizweni.

₁USirayeli wayenjengomdiliya othe xazalala,

ovelisa iziqhamo ngexesha lazo.

Kanti ngokwanda kwezo ziqhamo

wenjenjalo nokwandisa amaqonga.

Ngokwanda kwenkqubela yelizwe

wenjenjalo ukuzihombisa neentsika zakhe.

₂Intliziyo yabo iyinkohliso!

Ngoku baza kuvuna leyo bayilimileyo.

*UNdikhoyo wowadiliza amaqonga abo,

azisiphule ezo ntsika zabo.

₃Kaloku ngoku baza kuthi:

“Thina asinaye ukumkani,

kuba kaloku asimhloneli uNdikhoyo.

Ukuba besinaye ke,

angasenzela ntoni ukumkani?”

₄Ewe, bathetha amazwi alambathayo;

benza izibhambathiso zelize;

bangena kwiminqophiso ephuthileyo.

Suka ke ukubambana kwabo ezinkundleni

kwafana nokhula oluyityhefu

oluhluma emasimini alinyiweyo.

₅AbaseSamariya ke bayangcangcazela

ngenxa yethole laseBhetaven.

Abemi bakhona botsho ngesijwili;

nababingeleli balo baya kulililela

ngenxa yokutshitsha kwesidima salo.

₆Loqweqwediselwa eAsiriya;

liya kuba ngumrhumo kukumkani uYarebhi.

UEfrayim uya kuhlaziswa,

uSirayeli abe neentloni ngecebo lakhe.

₇Ukumkani waseSamariya wonqanyulwa;

wothi shwaka ngathi luluthi emanzini.

₈Asisathethi ke ngamaqonga asezindulini,

kuba wona aya kutshatyalaliswa.

Angundoqo wesono sikaSirayeli.

Kokhula ameva kunye nenkunzane,

atsho angabonakali amaqonga abo.

Ngoko bosuka bathi ezintabeni:

“Siweleni, nisifihle!”

ezindulini bathi: “Sigqumeleleni!”

₉Kusukela kwimihla yaseGibheya

uthe rhoqo ukona, Sirayeli.

Ewe, awushenxanga kulo mkhwa.

Kwenzeka ntoni na eGibheya?

Andithi bagutyungelwa yimfazwe?

₁₀Ndosuka ndibohlwaye abanxaxhayo,

nditsho olu hlanga lonayo.

Izizwe ziya kuluhlanganyela;

ewe, zona ziya kulukhonkxa ngesi sono siphinda-phindeneyo.

₁₁UEfrayim yena nqwa nethokazi lenkomo –

nditsho ithokazi eliqeqeshiweyo,

elo libhula ngentumekelelo.

Ke ndolifaka edyokhweni,

ndiyibeke kuloo ntamo yalo.

Ewe, ndomqhuba uEfrayim,

uJuda ndimfake ekulimeni.

Ewe, uYakobi uza kuyerha.

₁₂Khanizihlwayelele ubulungisa,

nixhamle iziqhamo zobubele.

Ewe, khaniwukhubele umhlaba.

Eli lixesha lokufunana noNdikhoyo,

ade ke yena afike,

anithululele amathamsanqa.

₁₃Kambe ke nihlwayele inkohlakalo,

naza ke navuna kwayona.

Nizixhamle iziqhamo zokukhohlisa.

Kaloku suka nakholosa ngobugorha benu,

naqamela ngobuninzi bamajoni.

₁₄Anikho sisidube-dube semfazwe;

zonk' iinqaba zenu zotshatyalaliswa

njengoShalman mhla ngedabi,

mini wavuthulula iBhetarbhele,

abadlezana bagileka bawa

neentsana zathi geqe phaya.

₁₅Bantundini baseBhetele, nakuni kuya kuba njalo

ngenxa yobukhulu benkohlakalo yenu.

Ewe, ukuthwasa kwaloo mini

ukumkani kaSirayeli wotshabalala.

₁“USirayeli ndamthanda kwasebuncinaneni bakhe;

ndambiza ukuba aphume eJiputa unyana wam.

₂Ndaba ngakhwaza ndimbiza uSirayeli,

suka waya ebhekela kum.

Baphikela ukunikela *kooBhali;

imifanekiso eqingqiweyo bayenzela iziqhumiso.

₃Kodwa ndim ofundise uEfrayim ukucathula;

ndim owamthi chu ngengalo.

Kodwa abaqondi ukuba ndim obanyangileyo.

₄Bona ndabakhokela ndinovelwano;

ewe, ndandiyimvuze-mvuze bububele.

Ndabathula idyokhwe ebatyabulayo,

ndaza ndathoba ndabafunzela.

₅Kambe ke abayi kubuyela kwaseJiputa,

kodwa uAsiriya uya kubalawula.

Kaloku abavumi ukubuyela kum.

₆Ezixekweni zabo komenyezel' ikrele.

Lowanqunqa amanqwanqwa amasango,

liwaphanzise namacebo abo.

₇Abantu bam bazimisele ukundishiya.

Noba bangade bakhale kOphezu-konke

yena soze abaphakamise.

₈“Kodwa ndingathini ukukulahla, Efrayim?

Ndingathini ukukuncama, Sirayeli?

Ndingathini ukukuphatha njengeAdama,

ndikwenze ufane neZebhoyim?

Intliziyo yam iguqukile ngakuni;

imfobe yam itsho yavuseleleka.

₉Andiyi kubuphumeza ubushushu bomsindo wam;

andiyi kuphinda ndimbhubhise uEfrayim.

Kaloku andimntu, ndinguThixo,

uYedwa othe zwabha phakathi kwenu.

Andiyi kuza ndinobushushu bomsindo.

₁₀Bosuka bamlandele *uNdikhoyo.

Yena wovungama njengengonyama.

Ke kaloku akubhavumla

usapho lwakhe loza lungcangcazela;

ewe, luya kuza ngasentshonalanga.

₁₁Boza benkwantya okweentaka bevela eJiputa;

boba njengamahobe bevela eAsiriya.

Ndobabuyisela emakhayeni abo.”

Lowo ngumlomo kaNdikhoyo.

₁₂UEfrayim undijikeleza ngobuxoki;

indlu kaSirayeli indithe nca ngenkohliso.

UJuda yena uvukelana noThixo,

nditsho uYedwa lowo uthembekileyo.

₁UEfrayim walusana nomoya;

usukelana nolophu lwasempuma;

imini yonke wandisa ubuxoki nobubhoja.

Yena unqophisana neAsiriya;

nango amafutha omnquma ewasa eJiputa.

₂*UNdikhoyo umangalela uJuda;

uYakobi womohlwaya ngezono zakhe,

ambuyekeze ngezinto azenzileyo.

₃Engekaveli wabamba umntakwabo,

wamthi nqaku ngesithende.

Ebudodeni wabambana noThixo,

₄wajijisana nesithunywa woyisa,

wakhala ecela inceba.

Wahlangana noThixo eBhetele,

waza wathetha-thethana naye khona apho –

₅uNdikhoyo uThixo uSomandla.

Gama lakhe ke nguNdikhoyo;

uthuthwa ngalo xa enqulwa.

₆Ngoko ke buyela kuThixo wakho;

gcina uthando nobulungisa,

uhlale uthembele kuThixo wakho.

₇Isikali somrhwebi sesobuqhophololo;

yena uthanda ukuxhaphaza.

₈Kodwa uEfrayim uthi:

“Ndimi kakuhle, ndisisinhanha.

Ekuzityebiseni kwam akukho bugwenxa nasono esinokufunyanwa.”

₉“NdinguNdikhoyo uThixo wakho

owakukhuphulula kwelaseJiputa.

Ndophinda ndinihlalise ezintenteni

njengakwimihla yamatheko amisiweyo.

₁₀Ndim owathetha nabashumayeli,

ndabathi jize ngemibono,

ndathetha ngemizekeliso ngemilomo yabo.”

₁₁IGiliyadi ibimi kakuhle,

kodwa ngoku ayisento yanto.

Koba njalo naseGiligali –

noxa kwakubingelelwa ngeenkunzi khona

amaqonga ayo ofana neengqumba zamatye,

nditsho ezo zikumasimi alinyiweyo.

₁₂UYakobi wabhacela kwa-Aram,

uSirayeli wamsebenzela umfazi –

ukuze amlobole walusa iigusha.

₁₃UNdikhoyo wasebenzisa *umshumayeli

ukukhupha uSirayeli eJiputa;

ewe, wabalondoloza ngomshumayeli.

₁₄Kodwa uEfrayim umcaphukise gqitha.

Ngoko ke ityala legazi liza kumfumana,

iNkosi yakhe imbuyekeze ngehlazo alenzileyo.

₁Fudula esithi akuthetha uEfrayim

abantu bona bangcangcazela;

ewe, yena wayehlonelwa kwaSirayeli.

Kodwa ke suka wazixabhela;

suka wanqula uBhali waphutha.

₂Ngoku wongeza isono phezu kwesono;

uzenzela imifanekiso etyhidiweyo ngesiliva,

izithixo ezenziwe ngokweembono zakhe.

Ewe, bubuchule bezandla zomntu.

Ngoku ke sekusithiwa:

“Ofuna ukwenza idini makawange la mathole.”

₃Ke ngoko bothi shwaka njengenkungu yakusasa,

njengombethe osuka uvuthuluke.

Bofana nomququ ophetshethwa ngumoya,

umququ wesanda ophel' emehlweni,

ngathi ngumsi otyhoboza ngefestile.

₄“Ukanti ke *ndinguNdikhoyo uThixo wakho.

Mna ndakukhuphulula eJiputa.

AwunaThixo ngaphandle kwam,

kungekho namsindisi ingendim.

₅Ndim owakulondolozayo entlango,

ndakugcina kwilizwe lembalela.

₆Ndanondla natsho nahlutha,

nathi ningahlutha nakhukhumala;

ewe, nasuka nandilibala.

₇Ndosuka ndinihlasele njengengonyama;

ndosuka ndinilalele njengengwe.

₈Ndohlasela njengebhere eyohluthwe amathole ayo;

ewe, ndosuka ndiniqwenga-qwenge.

Ndonidlavula njengemazi yengonyama,

ndiniqwenge ngathi nihlaselwa lirhamncwa.

₉“Ngenene uzonakalisile, Sirayeli,

ngokundichasa kwakho, mna luncedo lwakho.

₁₀Uphi khona loo kumkani wakho

ukuba angakusindisi ezixekweni zakho zonke?

Ziphi kaloku iinkokheli zakho?

Ngani zingakuncedi nje?

Kaloku nankqangaza nisithi:

‘Sinike ookumkani nabalawuli.’

₁₁Ewe kaloku, ndasuka ngomsindo,

ndaza ndaninika ookumkani.

Kwangomsindo ndisuke ndabohlutha.”

₁₂“Ubugwenxa bukaEfrayim budityanisiwe babotshwa;

izono zakhe zigcinwe kuvimba.

₁₃Uyapena-pena ziintlungu zenimba;

kambe sisiyatha sosana –

lakufika ixesha lokuzalwa aluvumi ukuvela.

₁₄Ndomhlawulela na kwigunya lengcwaba?

Ngaba ndomhlangula na ekufeni?

Wena kufa, siphi isibetho sakho?

Nawe ngcwaba, luphi ulwamvila lwakho?

Ngenene andisayi kuba nanceba mpela!

₁₅“Noba uEfrayim angaba nempumelelo phakathi kwezizalwane zakhe,

uya kufikelwa lulophu lwasempuma,

umoya kaNdikhoyo ovela entlango,

utshe umthombo wakhe,

amaqula akhe ome qoko.

Oovimba bakhe baya kuphangwa

nabo bonke ubuncwane babo buthathwe.

₁₆ISamariya yona iza kohlwaywa;

kaloku bavukelene noThixo wabo.

Baza kuba zizigede likrele;

iintsana zophihlizwa emhlabeni,

nabakhulelweyo baya kuqangqululwa.”

₁Khanibuye kaloku, maSirayeli;

buyelani *kuNdikhoyo, kuThixo wenu.

Kaloku niwile ngenxa yezono zenu.

₂Thathani la mazwi nibuyele kuNdikhoyo,

nithethe naye nithi:

“Sixolele bonke ubugwenxa bethu,

uze wamkele okulungileyo;

endaweni yeenkunzi zeenkomo sinikela kuwe ngamazwi emilebe yethu.

₃Akanakusisindisa uAsiriya;

asiyi kukhwela mahashe emfazwe.

Asiphindi sithi: ‘Thixo wethu,’ entweni esiyenze ngokwethu,

kuba kukuwe apho inkedama ifumana inceba khona.”

₄“Ndiza kukunyanga ukunxaxha kwabo,

ndibavave ngesisa sothando,

kuba kaloku andisabaqumbelanga.

₅KuSirayeli ndoba njengombethe,

atsho aqhakaze njengenyibiba,

endele azike emhlabeni,

afane nomsedare waseLebhanon.

₆Amasebe akhe aya kunaba,

abe nomkhitha njengomnquma,

aqhole njengomsedare waseLebhanon.

₇Abaphila phantsi kwephiko lakhe

baya kuchuma njengengqolowa,

badubule njengediliya,

badume njengewayini yaseLebhanon.

₈Efrayim, andinanto yakwenza *nezithixo.

Ndim osabelayo akukhathalele;

ndifana nompayini ohlal' uluhlaza.

Kungenxa yam uneziqhamo nje.”

₉Osisilumko uya kuziqonda ezi zinto;

oqaphelayo uya kukwazi oku.

Iindlela *zikaNdikhoyo zithe ngqo.

Ke amalungisa ahamba ngazo;

ke bona abakreqi ziyabakhubekisa.