To The Word – Day 126

₂“Thethani nonyoko nimmangalele.

Kaloku akasemfazi wam;

nam ke andindoda yakhe.

Yitshoni ahlukane nobuhenyu bakhe,

akuyeke ukukrexeza akutsala ngamabele akhe.

₃Kungenjalo ndomhluba abe ze,

abe njengamhla wazalwa.

Ndomenza abe njengentlango,

abe matwa nelo libharhileyo,

ndimbulale ngonxano.

₄Andiyi kuba nanceba kubantwana bakhe;

kaloku ngabantwana bobuhenyu.

₅Unina usuke wahenyuza;

lowo ubazeleyo wenze okuziintlondi.

Kaloku yena wathi:

‘Ndiya kulandelana nezithandwa zam

ezindinik' ukutya namanzi,

uboya nelinen,

amafutha kunye nesiselo.’

₆Ndosuka ndimbiyele ngobobo;

ndomakhel' udonga ndimvingcele,

athinteleke kwindlela ahamba ngayo.

₇Wosukelana nezithandwa zakhe,

phofu angaze azifumane.

Uya kuba ngafuna-funa

ibe yinqaba ukuzifumana,

ade asuke athi:

‘Mandibuyele kwindoda yam yokuqala;

kwakubhetele ngoko kunangoku.’

₈Kaloku yena akaqondi

ukuba yayindim omnikayo

ingqolowa newayini namafutha,

ndimvava ngesiliva negolide,

waza wanqula *uBhali ngayo.

₉Ngoko ke ndoyihlutha

ingqolowa ngexesha layo,

newayini ngethuba elimisiweyo;

ewe, ndomhlutha uboya kunye nelinen,

izinto afihla ubuze bakhe ngazo.

₁₀Ndosuka ke mna ndilityhile ihlazo lakhe

phambi kwezithandwa zakhe,

angahlangulwa bani kum.

₁₁Ndoyinqamla imibhiyozo yakhe –

nditsho amatheko enyanga entsha,

kananjalo *nawoMhla wokuPhumla –

yonke imisitho yakhe emisiweyo.

₁₂Ndoyibharhisa imithi yediliya nekhiwane,

le athi yena ukuyibiza:

‘Ngumvuzo endiwunikwe zizithandwa zam.’

Ndoyenza ibe lihlathi,

idliwe ziinyamakazi zasendle.

₁₃Ewe, ndiya kumohlwaya

ngenxa yemihla awayenqula uBhali

emenzela iziqhumiso,

ezihombisa ngamaso nemisesane,

esukelana nezithandwa zakhe,

esuke wandilibala ke mna.”

Lowo ke ngumlomo *kaNdikhoyo.

₁₄“Ndosuka ke mna ndicenga-cengane naye;

ndomthundezela entlango,

ndithethe naye kakuhle.

₁₅Ukususela apho ndombuyisela izidiliya zakhe,

yona iNtili yeAkore ndiyenze ibe lisango lethemba.

Yena uya kundamkela,

azinikezele kum njengakwimihla yobutsha bakhe,

mhla waphuma kwelaseJiputa.

₁₆“Ngaloo mini wondibiza uthi: ‘Myeni wam,’

ungabi sathi: ‘Bhali wam.’”

Utsho umlomo kaNdikhoyo.

₁₇“Ndosusa kwa-amagama athi: ‘Bhali,’

angabi sabikho emlonyeni wakhe,

angabi saphinda akhunjulwe.

₁₈Ngaloo mini ndobenzela umnqophiso

namarhamncwa asendle,

kunye neentaka zezulu,

nezinto ezirhubuluza emhlabeni.

Isaphetha nekrele nemfazwe

ndozinqamla kweli hlabathi,

ukuze konke nje kube luxolo.

₁₉Ndiya kukungeja, ndimanyane nawe ngonaphakade;

ewe, ndokungeja ngobulungisa nangokusemthethweni,

ngokunyaniseka nangenceba.

₂₀Ndokumanya nam ngentembeko,

khon' ukuze undazi mna *Ndikhoyo.

₂₁“Ngaloo mini ndophendula;

ndowaphendula amazulu,

nawo awuphendule umhlaba.”

Lowo ngumlomo kaNdikhoyo.

₂₂“Nawo umhlaba uya kuphendula,

uvelise ingqolowa newayini namafutha,

zona eziyimpendulo kwiYizereli.

₂₃Ndozihlwayelela yena emhlabeni,

ndimenzele inceba lowo bekusakuthiwa nguAkenzelwanga-nceba.

Kwabo kuthiwa: ‘Asibantu bam,’

ndiya kuthi: ‘Ningabantu bam,’

bona bathi kum: ‘Wena unguThixo wethu.’ ”

₁Hoyina; hoyina, maSirayeli!

Phulaphulani ilizwi *likaNdikhoyo!

Kaloku uNdikhoyo unesikhalazo,

umangalela abemi beli lizwe:

“Akukho tu ukunyaniseka nokuthembeka;

akazelwe nto uThixo kweli lizwe.

₂Intw' ekhoyo kukuqalekisa,

ukuxoka, ukubulala, ukûba, nokukrexeza.

Kugquba ubugebenga;

igazi liphalala liphalele.

₃Ngenxa yoko ilizwe lingumqwebedu,

nabo bonke abemi balo bayankolonkoza,

ngokunjalo oozilwanyana noozintaka;

nkqu neentlanzi elwandle phaya ziyafa.”

₄“Akafumani amangalelwe umntu,

asuke nje atyholwe ngomnye,

kodwa mna ndiza kuwamangalela amawenu, mbingelelindini!

₅Ùza kukhubeka uwe emini wena,

nomshumayeli akhubeke awe kunye nawe ebusuku;

ewe, nkqu nonyoko ndomcim' igama.

₆Kaloku abantu bam bayatshabalala

ngenxa yokuswela ulwazi ngam.

“Kaloku uyalubukula ulwazi ngam;

nawe ke ndiyakukhiqa kububingeleli bam.

Wena uwutyeshele umthetho woThixo wakho;

andiyi kubakhathalela ke noonyana bakho.

₇“Okukhona baye besanda ababingeleli,

kokukhona kwandayo nokundona kwabo.

Ke lona olo dumo lwabo ndolujika lube lihlazo.

₈Bona batya ngezono zabantu bam;

eyona nto bayifunayo kukuba makwenziwe ubugwenxa.

₉Ngoko ke mna ndobopha ngentamb' enye,

ndingakhethi mntu nambingeleli,

ndibohlwaye bonke ngenxa yeendlela zabo,

ndibabuyekeze ngenxa yeentlondi zabo.

₁₀Boba ngatya, banganeli noko;

boba ngahenyuza, bangandi kodwa;

kuba bakuyekile ukumphulaphula uNdikhoyo,

₁₁basuka bazilahlela ekuhenyuzeni.”

“Entsha nendala iwayini iyithimba kuthi tu ingqondo ₁₂yabantu bam.

Bade babuzise nakumfanekiso womthi;

bafun' ukutyhilelwa nayintonga yembala.

Kaloku balahlekiswa ngumoya wobuhenyu;

bakrexezile bamlahla uThixo wabo.

₁₃Benz' amadini kwiincopho zeentaba,

baqhumisele ezindulini,

phantsi kwemioki, iipampiri, nemiterebhinte,

apho kukho imithunzi epholileyo.

Zisuke ke iintombi zenu zihenyuze;

basuke oomolokazana bakrexeze.

₁₄“Andiyi kuzohlwaya iintombi zenu, nakuba zingenwa luhenyuzo nje,

ngokunjalo noomolokazana benu, noba bangade bakrexeza,

kuba namadoda ngokwawo ayahenyuza,

enza iminikelo kunye

namahenyukazi asezindlwini zonqulo-zithixo.

Awu, bantundini bangaqondiyo, anikho yintshabalalo!”

₁₅“Nangona ukrexeza nje, Sirayeli,

uJuda yena makangazibizeli ityala.

Mus' ukuya eGiligali, Juda,

ungayi naseBhetaven,

ungenzi zifungo zilambathayo,

usithi: ‘Ekho nje uNdikhoyo!’

₁₆“Hayi, kamb' iinkani zakhe uSirayeli, nqwa nethokazi elidlokovayo!

Ke uNdikhoyo angamalusa njani okwetakane edlelweni?

₁₇UEfrayim uthene nca nezithixo.

Suka, myeke enjalo!

₁₈Zithi zingahlutha yiwayini iinkokheli

zisuke zingene ekuhenyuzeni;

ndaweni yokukhusela zikheth' ihlazo.

₁₉UEfrayim wosuka aphephetheke nomoya,

amadini akhe amzisele ihlazo.”

₁“Bekan' iindlebe nive, babingeleli!

Khaniphulaphule, ndlundini kaSirayeli!

Qwalaselani niqiqe nani, makomkhulu,

kuba kaloku ngoku zidla kuni.

Kaloku nibe sisirhintyelo eMizpa,

suka nina nangumgibe eTabhore,

₂suka nemba umhadi eShitim.

Ukanti ke ndiza kunohlwaya xa ninonke.

₃Kaloku ndiyanazi, ndlundini kaEfrayim;

ewe, Sirayeli, awufihlakalanga apha kum.

Wena Efrayim, usahenyuza nangoku!

Mh-mh-mh! Urhono-rhono, Sirayeli!

₄“Izenzo zabo zisuke zaxaba,

zayivala indlela yokubuyela kuThixo wabo.

Kaloku bathiwe fithi luhenyuzo;

abamkhathalele nganto *uNdikhoyo!

₅Ikratshi likaSirayeli liyamjikela;

uSirayeli noEfrayim baza kukhubeka bawe ngenxa yobugwenxa babo,

kwanoJuda atsho akhubeke awe kunye nabo.

₆Baxhakazela behamba nemihlambi yabo,

befuna uNdikhoyo ngamadini,

kodwa soze bamfumane;

kaloku yena urhoxile kubo.

₇Kaloku bona bayamphamba uNdikhoyo;

ewe, bade bazale nemigqakhwe.

Ke amatheko abo okuthwasa kwenyanga

obaqwenga kunye namasimi abo.

₈“Hlokomisan' isigodlo eGibheya,

nihlab' umkhosi ngexilongo eRama.

Ze niwuvakalise naseBhetaven.

Phakath' emsini, wena Bhenjamin!

₉Yeka ke ngomhla wesohlwayo:

uEfrayim yena ndomvuthulula.

Nonke nina zindlu zikaSirayeli,

yazini, kuba oku kuqinisekile.

₁₀Kaloku wona amatshawe akwaJuda

selefana nâbo bahlehlisa umlimandlela.

Ndosuka ndibagalele ngomsindo wam,

babe ngathi bafikelwe ziimpuphuma.

₁₁Ewe, uEfrayim ubandezelekile;

suka wamvikiva umgwebo,

kuba yena usukelana nezithixo ezingento yanto.

₁₂Ndoba njengenundu kumaEfrayim,

ndibe njengombolisa kwaJuda.

₁₃UEfrayim wasibona isifo sakhe,

noJuda wazibona iinduma zakhe.

Suka uEfrayim wabhenel' eAsiriya,

wazibika apho kukumkani uYarebhi;

kodwa yena nkqi ukunyanga,

soze aziphozise ezo nduma.

₁₄Ke kuEfrayim ndoba njengengonyama;

ewe, ndibe lirhamncwa kwindlu kaJuda.

Ndobaqwenga-qwenga ndibashiye,

ndibafuduse bangahlangulwa bani;

₁₅ndize ke ndibuyele endaweni yam,

bade basivume isono sabo,

banqwenele ukububona ubuso bam.

Ewe, bondizingela bendifuna

ngenxa yokuminxwa ziimbandezelo.”

₁“Yizani kaloku, sibuyele *kuNdikhoyo.

Ewe, yena usidlakazile,

kodwa usenako ukubuya asinyange.

Ngenene yena usenzakalisile,

ukanti ke angabuya asibophe.

₂Emva kweentsuku ezimbini wosidlisa ubomi,

ngolwesithathu ke asivuse,

sitsho siphile phambi kwakhe.

₃Hayi ke, masimvume uNdikhoyo;

ewe, masikuxunele ukumazi.

Ukubonakala kwakhe kuqiniseke njengokuphuma kwelanga.

Uya kusifikela njengemvula yasebusika –

njengeemvula zentlakohlaza ezinyakamisa umhlaba.”

₄“Mandikuthini na kodwa, Efrayim?

Mandenze ntoni na ngawe, Juda?

Uthando lwenu lunjengenkungu yakusasa,

nqwa nombethe othi shwaka kwangoko.

₅Ngoko ke ndaninqunqa ngabashumayeli bam;

ewe, ndinixhelile ngamazwi am,

isigwebo silenya njengombane phezu kwenu.

₆Kaloku ndithanda inceba,

andithandi minikelo.

Ndinonelele ukwazi uThixo

ngaphezu kwamadini atshiswayo.

₇EAdam bawaphula umnqophiso;

ewe, khona basuka baqhankqalaza.

₈IGiliyadi sisixeko sabenza ububi,

umzila weenyawo zayo umtyibilizi ligazi.

₉Njengezihange ezilalel' umntu

nababingeleli sisigqubu esikwanjalo,

nasendleleni eya eShekem kulapho bagwinta khona.

Ewe, benza izinto ezimanyumnyezi.

₁₀Kwindlu kaSirayeli ndibone into enkwantyisayo;

kulapho ahenyuza khona uEfrayim.

Awu, yeka ukuxabheleka kukaSirayeli!

₁₁Nakuwe kambe, ndlundini kaJuda, uyeza umhla wesivuno.

“Ndakuba ndizimisele ukubabuyisela kundalashe abantu bam,

suka badandalaza ubugwenxa bukaEfrayim,

batyhileka ububi beSamariya.

Kaloku bahleli ngobuqhophololo.

Ngamasela aqhekezayo ebe;

basisigqubu sezikrelemnqa esiphanga phandle.

₂Ewe, bona abaqondi tu,

kanti izenzo zabo zithe thaa kum.

Ngoku bajikelezwe zizenzo zabo;

ziluzenge-zenge oluphambi kwam.

₃“Inkohlakalo yabo iyamvuyisa ukumkani;

inkohliso yabo iyawavuyisa namaphakathi.

₄Bakrexeza bonke bephela;

batshisa njengomlilo wokubhaka

oyekwayo ungakhwezelwa ngumbhaki

ukusukela ekuxovuleni kwakhe

de inyuke intlama.

₅Ngomhla wetheko lokumkani

suka amaphakathi ashushu yiwayini,

naye wabambana izandla nabahlekisi.

₆Kaloku iintliziyo zabo zinjengeziko;

ewe, zona zivutha ngamayelenqe.

Ingcwangu yabo ilala ubusuku bonke,

kusasa idangazele njengomlilo.

₇Bonke banobushushu oku kweziko lokubhaka,

abalawuli babo babathi lenye.

Iikumkani zikhahleleka phantsi,

kungekho bani ubhenela kum.

₈“UEfrayim uxubana neentlanga;

ewe, yena ufana nesonka esingaguqulwanga.

₉Abasemzini bawaxhaphazile amandla akhe;

ke kuye kurhidiwe, akaqondi.

Kaloku yena ngoku iinwele zakhe zixubile,

ibe ke phofu engaqondi.

₁₀Ikratshi likaSirayeli liyamkhonkotha,

kodwa nkqi kubo ukubuya beze kuNdikhoyo uThixo wabo;

ewe, abazidubi nangokumfuna.

₁₁“UEfrayim ukhamisile, nqwa nehobe;

yena usisimathane esingaqondiyo.

Uphatha kubhenela eJiputa,

maxa wambi abalekele eAsiriya.

₁₂Ndobabekela umgibe endleleni, ndibanqakule njengeentaka.

Xa ndibeva bexhontelana ndobabambisa.

₁₃Mawoo, ngokuba banxaxhile kum!

Yintshabalalo kubo,

ngokuba bemkile bandishiya!

Mna ndiyafuna ukubahlangula,

koko suka baxoka ngam.

₁₄Xa bekhala abatsho ngomxhelo wabo;

basuka bazibhuqa-bhuqe emandlalweni.

Baqokelelana ngenxa yokutya newayini,

kodwa mna bandichasile.

₁₅Ndabaqeqesha ndabomeleza,

kodwa ngoku bandijikeleza ngobubi.

₁₆Ababuyeli kuPhezukonke;

bafana nesaphetha esinenkohliso.

Iinkokheli zabo zohlatyaniselwa likrele,

kuba imilomo yazo iphokoza ububi.

Ewe, boba sisigculelo kwilizwe laseJiputa.”