To The Word – Day 108

“Ndaba ngazibonakalisa kwathi nya.

Kanti ndilindele abangandifuni nganto.

Ndandisithi bokhala kum;

kwathi kanti bona abakhw' apho.

Ndandikulungele ukuthi: ‘Yizani, ndim lo.’

Gxebe kanti sisizwe esingandinquliyo.

₂Imini yonke ndahlala ndikhongozele.

Phi ke, ingunkanishe wesizwe nje,

esiphikelene neendlela ezigwenxa,

silandelana neengcamango zaso;

₃uhlanga olungandihoye nganto,

olwasoloko luphikelene nokundicaphukisa

ngokwenza amadini *ezithixo emiyezweni,

lusenz' iziqhumiso kumaqonga ezitena;

₄abantu ungafika behlel' emangcwabeni,

ebusuku bejikelezana nabangasekhoyo;

zizintw' ezity' inyam' ehagu,

ezithebeni lizothe lodwa;

₅baze ke bathi:

‘Bhekelani, sanukusondela kuthi;

musan' ukusichukumisa; singcwele.’

Abantu abanjalo ke bayanditsarha;

ngumlilo ondiqhumisela imini yonke.”

“Uyabona ke, sendigqibe konke,

ibe ke andiyi kuthi cwaka;

isohlwayo sabo sesijinga phezu kwabo;

ngoko ndiya kubabuyekeza

₇ngenxa yezabo nezono zooyise.

Kaloku bênza iziqhumiso ezindulini,

baza ke mna bandingcikiva.

Ngoko ke ndobabuyekeza kangangoko,

ndibohlwaye ngezono zabo.”

“Idiliya entle ayitshatyalaliswa kunye naleyo yonakeleyo, koko ngayo kwenziwa iwayini.

Nam ke ngenxa yazo izicaka zam andiyi kubatshabalalisa bonke.

₉Ndosuka ndimvelisele inzala uYakobi;

abakwaJuda baya kuma kwilizwe lam,

iintaba zalo zibe lilifa labanyulwa bam –

ziya kuma kuzo izicaka zam.

₁₀ISharon yoba lidlelo lempahla,

iinkomo ziphumle kwintili yeAkore;

ezo ke zezabantu abalangazelela intando yam.

₁₁“Ke nina bamfulathelayo uNdikhoyo,

abangayikhathaleleyo intaba yam eyodwa iZiyon –

nina banqula uGadi noMeni, *izithixo zelaka nekamva –

₁₂nina nimiselwe ikrele;

ewe, xa ninonke niya kutshatyalaliswa.

Kaloku anisabelanga ndakunibiza,

aniphulaphulanga naxa ndithetha;

suka nakhetha ukwenza ububi

ndaweni yokwenza oko ndikuthandayo.”

₁₃Ngoko ke uMhlekazi uNdikhoyo uthi:

“Izicaka zam zona zothi zisitya zihlutha,

nibe ke nina nithe nca yindlala.

Izicaka zam aziyi kuswela manzi,

nibe ke nina nikhothekile lunxano.

Zothi zona zichulumacha yimincili,

nibe nina ninyoshoza ngamahlazo.

₁₄Izicaka zam zomemelela zinemihlali,

ukanti nina nobhomboloza yintlungu,

nincwine nikhwiniswa yinkxwaleko.

₁₅Ke lona igama lenu loba sisigculelo kubantu bam;

uMhlekazi uNdikhoyo uya kunitshabalalisa,

zona izicaka zakhe azinike igama elitsha.

₁₆Kweli lizwe ke othamsanqelayo

uya kwenjenjalo ngegama likaThixo onguThembekile,

nofungayo uya kubiza uThixo onguThembekile.

Kaloku iinkathazo zamandulo zoba sezalityalwa;

ngenene, zoba zifihlakele ndingasazikhumbuli.”

“Ewe, ndiza kudala amazulu amatsha,

ngokunjalo nehlabathi elitsha.

Ke yona indalo yamandulo iya kulityalwa ingabi sakhunjulwa.

₁₈Ngoko ke vuyani niqakathe ngenxa yale ndalo yam intsha;

iJerusalem ndoyitsho ibe liqhayiya,

nabantu bayo bavelise uchulumacho.

₁₉Nam ndoba nemincili ngenxa yeJerusalem,

ndithatheke ndidlokove ngabantu bam.

Khona soze sibe saviwa isijwili;

ukufixiza nesilokozi ziya kuphela tu.

₂₀“Nokufa kweentsana kuya kunqamka;

abantu bokhula bade bakhokhobe.

Umntu ofe enekhulu leminyaka

uya kunconywa ngokuf' emncinci;

kanti ke ongafikelelanga ekhulwini

yena kothiwa wambethwe lishwangusha.

₂₁Imizi abayakhayo abantu boyima;

baya kutyala izidiliya, bazitye iziqhamo zazo.

₂₂Imizi abayakhayo ayiyi kumiwa ngabanye,

nezinto abazilimileyo zingaxhatshazwa ngabanye.

Kwanjengobude bobomi bemithi yoba njalo nemihla yabantu bam;

ewe, abanyulwa bam baya kuwuxhamla ngenene umsebenzi wezandla zabo.

₂₃Bona abasayi kusebenzela ilize,

bengasayi kuzalela isithwakumbe;

koko boba ngabantu abathamsanqelweyo nguNdikhoyo,

ngokunjalo nezizukulwana zabo.

₂₄Mna ndosabela bengekakhali nokukhala;

ndobeva besathetha nje kuphela.

₂₅Ingcuka netakane ziya kutya ndawonye,

ingonyama igramze ingca njengenkomo,

yona inyoka itye uthuli.

Inene akusayi kubakho owonayo notshabalalisayo

eZiyon intaba yam eyodwa.”

Lowo ke ngumlomo kaNdikhoyo.

₁*UNdikhoyo ke uthethe wenjenje:

“Izulu lona likomkhulu lam;

ihlabathi ke lona ngamathânga am.

Ndluni ke leyo ningandakhela yona?

Yiyiphi indawo endingade ndiphumle kuyo?

₂Kaloku zidalwe ndim zonke ezi zinto;

zikho nje ziphuma kwezi zandla.”

Ewe, utsho uNdikhoyo.

“Ke yena umntu ondikholisayo

ngulo uzithobayo nozohlwayayo –

nditsho ondihlonela ngentobeko.

₃Kambe owenza intando yakhe,

noba uxhel' inkomo yedini,

nqwa nesibulala mntu;

noba wenza umnikelo ngegusha,

umatwa nowenz' idini ngenja;

noba wenza umnikelo weenkozo,

nqwa nobingelela ngegazi lehagu;

ewe, noba undenzela isiqhumiso,

ufana nonqula *umfanekiso.

Izinto ezimanyumnyezi zizo azilangazelelayo.

₄Ke abenjenjalo ndiza kubazisela ishwangusha,

ndibathobele ezi zinto bazoyika gqitha,

kuba ndibe ngakhwaza abasabela,

ndaba ngathetha bona abaphulaphula,

suka benza izinto ezingamanyondololo,

bakhetha ezo zinto ndingazithandiyo.”

₅Ke nina balihlonelayo ilizwi lakhe,

uNdikhoyo uthethe ngolu hlobo:

“Ngenxa yokunyaniseka kwenu kum

abanye kumawenu banithiyile.

Abasanifuni nganto;

ungafika beningcikiva besithi:

‘UNdikhoyo makabonakalise ubukhulu bakhe;

ewe, makanisindise sibone kaloku,

nathi khe sinibukele nonwabile.’

Kambe ke ngabo abaza kungena ehlazweni.

₆Niyayiva loo ngxokolo esixekweni phaya,

loo ngxolo ivakala endlwini kaThixo?

NguNdikhoyo ngenkqu ke lowo,

iintshaba zakhe uziphakela impindezelo.

₇“Suka isixeko sam safana nomfazi

osuke wabeleka engekalunywa;

ewe, engakhange eve nenimba le,

suka yena watsho ngenkwenkwe.

₈Wakha wayiva phi ke into enjalo?

Sakhe sabonwa phi isimanga esinjalo?

Sisizwe saphi esivela ngamini-nye?

Sizwe sini esiqingqwa ngomzuzwana nje?

Ewe, akuyi kuba kudala iZiyon ilunywa,

ingasivelisanga isizwe,

ingambelekanga lo mntwana.

₉Njengoko indim umseki wenimba,

ikwandim umbelekisi.”

Lowo ke ngumlomo kaNdikhoyo.

₁₀Vuyisanani nigcobe neJerusalem,

nonke nina basithandayo esi sixeko.

Qakathani nivuyisane naso kaloku,

nonke nina bebekade besililela.

₁₁Kaloku niza kuncanca nimfimfithe nanele;

nozifikisela ngolonwabo kwindyebo yaso,

nifane nosana luthuthuzelekile esifubeni sikanina.

₁₂Kaloku yena uNdikhoyo uthi:

“Mna ndiza kunithululela inkqubela nenzolo

impompoze njengomlambo,

ubutyebi bezizwe buphuphume njengentlambo.

Noba njengosana luncanca lusingathiwe;

ewe, niya kuthuthuzelwa ngemfobe.

₁₃Njengonina embambazela usana lwakhe

ndiya kwenjenjalo ukunithuthuzela,

nitsho nithuthuzeleke eJerusalem.”

₁₄Notsho nivuye xa isenzeka le nto;

nosuka nihlume nihlaziyeke njengengca.

Ngenene niya kutsho niqonde ukuba uNdikhoyo uyabanceda abamthobelayo,

nokuba ingqumbo yakhe iphezu kweentshaba zakhe.

₁₅Nanko uNdikhoyo esiza, edangazela njengomlilo;

iinqwelo zakhe zilatyuza njengesaqhwithi.

Umsindo wakhe uza kwenza iziqwenga,

akhalime ngamalangatye omlilo.

₁₆UNdikhoyo uza kugweba ngomlilo olenyayo,

uluntu aluhlasele ngomkhonto wakhe;

ewe, baninzi aya kubatshabalalisa.

₂₂“Kwanjengokuba amazulu amatsha nehlabathi elitsha –

nditsho la ndiza kuwadala –

aya kuhlala ehleli phambi kwam,

koba njalo kwigama lakho nakwizizukulwana zakho.

₂₃Ngayo yonke imibhiyozo yokuthwasa kwenyanga –

nditsho nangaleyo *yoMhla woPhumlo –

izizwe zonke ziya kuza zigxalathelana,

zize kundinqula.”

Lowo ke ngumlomo kaNdikhoyo.

₁*Ndikhoyo, ndibhenela kuwe; nceda ndivelele.

Khawubek' iindlebe, usabele ndakukhala.

₂Umthandazo wam mawube sisiqhumiso kuwe,

ukuphakama kwezandla zam kube ngumnikelo wamatshona.

₃Ndikhoyo, wumisele umlindi umlomo wam;

imilebe yam mayihlale yalusiwe.

₄Ndenze ndikucezele ukwenza ububi,

ndingazixakekisi ngezenzo zenkohlakalo,

ndingahambisani nabantu abakhohlakeleyo.

Mandingaze ndizixhamle izimuncu-muncu zabo.

₅Noba lingandohlwaya ilungisa – yinyhweba leyo;

nokuba liyandikhalimela – yintsikelelo leyo;

ewe, andinakuphikisana nayo.

Umthandazo wam uchasene nezenzo zamatshijolo.

₆Iziphathamandla ke zophoswa emaweni;

izikhohlakali ke zona zotsho ziqonde,

zivume ukuba amazwi am afanelekile.

₇Bosuka baphoxise ke bathi:

“Kutsho kwangathi kuyakhutyelwa,

namathambo ethu nango ethe saa;

ewe, athe xhaxhe ngamangcwaba.”

₈Ke mna ndijonge enkalweni

kuwe, Ndikhoyo, Thixo wam.

Ndilangazelela ukukhuselwa nguwe;

ungandishiyi ndisesichengeni.

₉Ndihlangule kwimigibe abandibekele yona,

nakuzo izabatha zabakhohlakeleyo.

₁₀Abakhohlakeleyo mababanjiswe kwayimigibe yabo,

mna ke ndingabi nawo nomkrwelo.

₁Ndiyabhomboloza, ndizibika *kuNdikhoyo;

ndiyahlahlamba, ndibhenela kuNdikhoyo.

₂Ndiphokoza isikhalo sam phambi kwakhe;

ndimbikela zonke iingxaki zam.

₃Ndakuba ndidakumbile yena uyayazi imeko yam.

Iintshaba zindithiyisela endleleni yam.

₄Ndakukhangela ngasekunene, akakho ozidubayo ngam;

ayikho indawo yokuzimela,

kungekho namntu undikhathaleleyo.

₅Ndibhenela kuwe, Ndikhoyo;

kaloku wena uyinqaba yam,

nguwe ibango lam kweli lizwe.

₆Sibazele iindlebe isikhalo sam,

kuba kaloku ndixhwalekile.

Ndihlangule kwabo banditshutshisayo;

kaloku bona bomelele kunam.

₇Ndikhulule kula makhamandela,

ukuze ndilibonge igama lakho.

Amalungisa aya kundiphahla,

kuba wena undithamsanqele.

₁Umntu okhohlakeleyo ubaleka kungekho mntu umsukelayo;

ke wona amalungisa anobuganga njengeengonyama.

₂Xa ilizwe linovukelo baba baninzi abafuna ukuphatha,

kodwa xa kukho ophatha ngengqiqo nolwazi uyazinza.

₃Umfo osweleyo otshutshisa amahlwempu

uyafana nesikhukula esizitshabalalisayo izilimo.

₄Izaphula-mthetho ziyazincoma izikhohlakali,

kambe ke bona abawuthobelayo umthetho bayazichasa izikhohlakali.

₅Abantu abagwenxa ababuqondi ubulungisa;

kanti ke abo bazondelela uNdikhoyo baqonda zonke izinto.

₆Lilungile ihlwempu elihambo ingenabala

ngaphezu komkhohlisi ondlela zimbaxa nokuba usisityebi.

₇Umntwana onengqondo uyawuthobela umyalelo;

ke yena otshomana noongantweni ubaphathela ihlazo abazali bakhe.

₈Umntu ozuza ubutyebi kuba ebolekisa aze axhaphaze abantu ngenzala ayibizayo,

obo butyebi abuqokelelayo busuka bufunyanwe ngumntu wumbi owazelelelayo amahlwempu.

₉Umntu ozivalayo iindlebe zakhe kuwo umthetho kaThixo

kwaumthandazo wakhe uyanyanyeka kuThixo.

₁₀Umntu owexulela amalungisa ekwenzeni ububi uya kweyela kwakuloo mgibe wakhe,

kanti ke bona abamsulwa baya kukudla ilifa okulungileyo.

₁₁Isinhanha silumkile kwawaso amehlo,

kanti ke lona ihlwempu eliqiqayo liyasibona into esiyiyo.

₁₂Xa amalungisa athe aphumelela kuba yimivuyo nemincili,

kodwa ke xa kuthe kwaphakama izikhohlakali abantu bayabaleka bazimele.

₁₃Umntu osifihlayo isono sakhe akabi nampumelelo;

kambe ke yena osivumayo, ahlukane naso, wenzelwa inceba.

₁₄Unoyolo umntu ohlala ezoyikela;

ke yena oqaqadekileyo uhlelwa ziinkathazo.

₁₅Isiphathamandla esikhohlakeleyo, esilawula abantu abangenakuzilwela,

sinjengengonyama egragramayo, okanye ibhere ehlaselayo.

₁₆Umlawuli ongenangqondo uba ngumcinezeli;

ke yena umlawuli oyithiyileyo inzuzo yobuqhetseba uba nexesha elide.

₁₇Umntu ongcungcuthekiswa lityala lokubulala woba ngumsabi ade afe;

makungabikho bani umxhasayo.

₁₈Umntu ohamba ngengqibelelo uyakhuseleka ebomini;

ke yena ondlela zimbaxa uyenzakala ngephanyazo.

₁₉Umntu owalimayo amasimi akhe akasweli kutya,

kanti ke yena osukelana namampunge uvuna ubuhlwempu.

₂₀Umntu othembekileyo uyathamsanqeleka;

kanti ke yena ongxamele ubutyebi akaze abe msulwa.

₂₁Ukujonga ubuso akulunganga;

kodwa ke abanye abantu bangade bone nangenxa yeqhekeza eli lesonka.

₂₂Umntu oligqolo usukelana nobutyebi;

akaqondi ukuba usenokufikelwa bubuhlwempu.

₂₃Omkhalimelayo umntu wothi kamva afumane ukuhlonitshwa

kunalowo untetho ilalanisayo.

₂₄Umntu oxhaphaza uyise nokuba ngunina, kodwa abe esithi: “Akukho nto imbi kuloo nto,”

akahluke nganto kwisikrelemnqa.

₂₅Umntu onyolukileyo uphemba uqhushululu;

kambe ke yena okholosa ngoNdikhoyo uya kuphumelela.

₂₆Umntu ozithembileyo akanangqondo;

kodwa yena ohamba ngendlela yobulumko ukhuselekile.

₂₇Umntu onezinwe kumahlwempu akasweli nto;

ovala amehlo akhe kwiintswelo zawo wohlala eqalekiswa.

₂₈Xa kulawula izikhohlakali abantu bayabaleka bazimele,

kodwa zakutshabalala amalungisa aba nempumelelo.

₁Umntu okhalinyelwa njalo, kodwa abe neenkani,

wosuka aphalale ngephanyazo, angaze abe nabuyambo.

₂Wakuba sezandleni zamalungisa umbuso, batsho bavuye abantu;

kambe ke kwakulawula isikhohlakali iba ziincwina zodwa.

₃Othanda ubulumko uvuyisa uyise,

kodwa ke yena othene nca namahenyukazi uchitha impahla yakhe.

₄Xa ukumkani elawula ngobulungisa litsho lizinze ilizwe lakhe;

kambe ke yena orhwiphiliza irhafu uyalibhuqa.

₅Umntu onyhwalaza ummelwana wakhe

uzenzela umgibe iinyawo zakhe.

₆Umntu ogwenxa uthiyelwa sisono sakhe;

kambe ke yena olilungisa uyaziculela onwabile.

₇Umntu olilungisa unemfobe ngâbo bahlelelekileyo,

ke yena umntu okhohlakeleyo akayiqondi nokuyiqonda into enjalo.

₈Abagxeki baphembelela udushe esixekweni,

kambe ke zona izilumko ziyawuthomalalalisa umsindo.

₉Umntu osisilumko xa emangalelene nesiyatha

sisuka sivuke umnyele siphoxise, kungabikho mvisiswano.

₁₀Izibulala-mntu zimthiyile umntu onyanisekileyo,

ke bona abathe ngqo bayamkhusela umntu onjalo.

₁₁Isiyatha asiwulawuli umsindo;

kambe ke sona isilumko siyaphola sizibambe.

₁₂Ukuba umlawuli nguthoba-sikutyele,

onke amaphakathi akhe oba ngoongcothoza.

₁₃Ihlwempu ndawonye nalowo ulingcungcuthekisayo

bafana ngale nto yokuba bobabini banikwe amehlo abonayo nguNdikhoyo.

₁₄Ukumkani ogweba ityala lehlwempu ngokunyanisekileyo

ulawulo lwakhe luya kuhlala luzinzile.

₁₅Uswazi lokululeka ludala ubulumko;

kambe ke umntwana ongaqeqeshwayo umzisela ihlazo unina.

₁₆Xa kulawula izikhohlakali siyanda isono,

kambe ke wona amalungisa aya kukubona ukuwa kwazo.

₁₇Umntwana olulekwayo uya kukunika ukuxola,

aze ayivuyise intliziyo yakho.

₁₈Abantu abangenawo umbono kaThixo baba ziindlobongela;

phofu ke unoyolo umntu owuthobelayo umthetho kaThixo.

₁₉Akuncedi nto ukulingxolisa ikhoboka,

kuba nokuba liyaqonda aliyi kuphulaphula.

₂₀Uyambona na umntu othetha nje engaqiqanga?

Akunani kwaisityhakala kunaye.

₂₁Ukuba uyalitefisa ikhoboka kwasebutsheni balo,

ekugqibeleni liya kukudela.

₂₂Umntu ofan' acaphuke udala ingxabano;

umfo onephuku uwa ewile esonweni.

₂₃Ikratshi liyamwisa umntu;

kambe ke othobekileyo uba nesidima.

₂₄Ihlakani lomntu olisela lizibeka emngciphekweni;

nakuba lisazi ukuba liza kohlwaywa nguThixo noko lithe cwaka.

₂₅Ukuxhalela abantu kusenokuba ngumgibe;

kambe ke othembela kuNdikhoyo ukhuselekile.

₂₆Baninzi abazithandekisa kwiziphathamandla,

kambe ke bona ubulungisa bufumaneka kuNdikhoyo.

₂₇Umntu onobuqhetseba uyacekiswa ngamalungisa;

ngokunjalo nomntu othe ngqo uyacekiswa ngabakhohlakeleyo.