To The Word – Day 107

₁Ngenene isandla *sikaNdikhoyo asisifutshane

ukuba ade angabi nako ukumhlangula umntu.

Ewe, yena akasiso isithulu

ukuba ade angeva.

₂Nto nje ubugwenxa benu bungumqobo;

buthe zinzi phakathi kwenu noThixo.

Ewe, zizono zenu ezimsithayo uThixo kuni,

yiyo nale nto ngáthi akaniva.

₃Izandla zenu zidyojwe ligazi,

neminwe yenu inkone kukona.

Ngemilomo yenu niyaxoka,

kananjalo nithulula inkohlakalo.

₄Akukho ukhathalele ubulungisa;

xa bemangalelana bubuqhophololo bodwa.

Bakholosa ngenkohliso nobuxoki;

bakhawula inkathazo, bazale inkohlakalo.

₅Baqandusela amaqanda erhamba,

batsho ngobobo lwamayelenqe.

Maqanda lawo ke ayityhefu –

lithi lingakroboka kuthi gqi irhamba.

₆Amayelenqe abo akancedi mntu;

ewe, akambathwa njengengubo.

Imisebenzi yabo ngamanyondololo;

ngezandla zabo basebenza ububhoja.

₇Bahamba ngezantya xa besiya kona;

bayakhawuleza xa babulala ongenatyala.

Ngeengcinga bayila inkohlakalo yodwa;

endleleni yabo yimbubho nentshabalalo.

₈Ewe, indlela yoxolo abayazi;

umthetho nesiko abahambi ngawo.

Iindlela zabo bubuqili nobuqhophololo;

abahamba ngazo soze babe noxolo.

“Ewe, ngenene asilungiselelwa;

ubulungisa abufikeleli kuthi.

Silindela ukukhanya, kuthi gqi ubumnyama;

silindela ilitha, suka kusibekele.

₁₀Siyaphuthaphutha ngathi siziimfama;

siyaphampatha ngathi asinamehlo.

Sikhubeka emini ngathi kusebusuku,

kwabaphilayo ngathi singabafileyo.

₁₁Sibhomboloza ngathi singamarhamncwa;

sitsho ngesimbonono ngathi ngamahobe.

Sibe ngafuna ukulungiselelwa, kungabikho;

sakuthalaza usindiso suka lube ziinkwenkwezi.

₁₂“Ndikhoyo, sikone ngokuphinda-phindeneyo;

izono zethu nâzo zisimangalela.

Ewe, ngenene singabakreqileyo;

siyabuqonda yaye sibuvuma ubugwenxa bethu.

₁₃Sikuvukele ngobuqhetseba, wena Ndikhoyo;

suka safulathela asamlandela uThixo wethu;

suka saphul' izikeyi, sifuth' ingcinezelo,

sayil' inkohliso, satheth' ubuxoki.

₁₄Ngoku ke umthetho urhoxile,

nobulungisa bumele qelele.

Phandle phaya inyaniso iyaphephetheka,

nokunyaniseka akungeni ndawo.

₁₅Ewe, inyaniso yafuduka mpela-mpela;

oshiy' ububi uzibhaqa elixhoba.”

Akukhangela *uNdikhoyo suka wakhathazeka

akubona umthetho unyathelwa ngeenyawo.

₁₆Akukhangela akabonanga mncedi konke,

suka wakhathazeka kwakungabikho mlamli.

Ngoko ke suka waxhabasha ngamandla akhe asindisayo,

ukuze azuze uloyiso ngobulungisa bakhe.

₁₇Uthe gaxa ubulungisa esifubeni,

watsho ngomnqwazi wosindiso entloko.

Ewe, kaloku uvath' impindezelo,

wada wazithándela ngekhwele.

₁₈Abantu wobohlwaya ngokwezono abazenzileyo;

iintshaba uza kuziphakel' ingqumbo,

abalwa naye ababel' impindezelo,

ade aye kuqhina nakwabo bakude.

₁₉Entshonalanga bonkwantya besoyika uNdikhoyo,

lufikelele nasempuma udumo lwakhe.

Ekuhlaseleni kotshaba oluza ngokomlambo otyhulubayo,

uMoya kaNdikhoyo uya kuluswantsulisa.

₂₀“UMkhululi uyeza eZiyon;

uza kukhulula abakwaYakobi abazisolayo ngezono zabo.”

Lowo ke ngumlomo kaNdikhoyo.

₁Khawuvuke! Vuka, Jerusalem!

Khanya! Ukhanyiso lwakho luthwasile;

isihomo *sikaNdikhoyo sikujikelezile.

₂Nâbo ubumnyama phezu kwehlabathi;

umnyam' ombonde-mbonde uvalel' izizwe.

Kodwa ke uNdikhoyo uyakukhanyisela;

ukukhanya kwesihomo sakhe kuphezu kwakho.

₃Oko kukhanya kotsala neentlanga,

nezikumkani ngokwazo uzikhange loo mso.

₄Khawubheka-bheke ude uqwalasele;

bonke bayaqokelelana, bayeza!

Oonyana beza bevel' ekudeni;

iintombi zona ziza zisingathiwe.

₅Wothi ungabona, utsho ube nemihlali;

uya kutsho uhlasimle kukuchulumacha.

Kaloku ubutyebi bezizwe boza kuwe;

ubutyebi bothi gqi naphesheya kweelwandle.

₆Ilizwe lozala yimihlambi yeenkamela

namankonyane aseMidiyan naseHefa.

NabaseShebha baya kuza begxalathelana,

bepheth' igolide kunye nesiqhumiso,

bebhengeza bedumisa uNdikhoyo.

₇Zonke iigusha zakwaKedare zoba zezakho;

wosebenzisa iinkunzi zeegusha zakwaNebhayoti.

Zona ziya kutsho ngamadini amkelekileyo eqongeni lam;

ndoyihombisa indlu yam enesihomo.

₈Zinto zini ezi zibhabha njengamafu,

ezi zingathi ngamahobe egoduka?

₉Ziinqanawe ezivela emazweni,

kukhokel' ezaseTashishe –

nâzo zigodusa abantu bakaThixo.

Beza bepheth' igolide nesiliva;

ngazo badumisa igama likaNdikhoyo.

Lowo ke nguThixo oyedwa kaSirayeli,

yena unithe jize ngesihomo nesithozela.

₁₀KwiJerusalem ke uNdikhoyo uthi:

“Iindonga zakho zokwakhiwa ziintlanga,

izikumkani zazo ke zona zikuququzelele.

Kuba kaloku ndanohlwaya ngomsindo,

ke ngoku ndiyimvuze-mvuze ngobubele.

₁₁Amasango akho ohlala evulwe ng'aa!

Imini nobusuku wona soze avalwe,

ukuze abantu bakuzisele ubutyebi bezizwe,

izikumkani zazo ziluludwe,

zona zingumngcelele wabathinjwa.

₁₂Ke sona isizwe ndawonye nookumkani

bonke abangakubusiyo botshabalala;

baya kuvuthululwa baphele tu.

₁₃“Iqhayiya lamahlathi aseLebhanon loza kuwe,

imithi yesipresi, umpleyini, nompayini,

yoziswa kuhonjiswe ngayo indlu kaThixo,

ukuze umzi wakhe undiliseke.

₁₄Baya kuza abo babekade bekucinezela,

bafike bakhahlele babuse kuwe.

Nabo bonke abebekade bekudelile baya kuwisa kuwe bekhahlela,

besithi wena usisixeko sikaNdikhoyo,

iZiyon kaYedwa kaSirayeli.

₁₅“Nangona ushiyiwe uthiyiwe,

kungasekho bani udlulayo,

ndiya kukwenza iqhayiya laphakade,

uvuyo lwezizukulwana ngezizukulwana.

₁₆Izizwe nezikumkani ziya kukuququzelela,

zifane nomfazi okhulisa usana lwakhe.

Nawe ke uya kutsho uqonde ukuba ndim mna Ndikhoyo okusindisileyo,

wazi ukuba ngenene ukhululwe yiNgangalala enguThixo kaYakobi.

₁₇Ndaweni yobhedu ndokunika igolide,

ndaweni yentsimbi ndikunike isiliva;

esikhundleni somthi ibe lubhedu,

ndikunike intsimbi endaweni yelitye.

Uya kuphathwa luxolo,

ulawulwe bubulungisa.

₁₈Ubundlobongela buya kuba yintsomi,

imbubho nentshabalalo ziphele emideni yakho.

Uya kubiyelwa ngosindiso,

uvalwe ngendumiso.

₁₉Emini awusayi kukhanyiselwa lilanga;

ebusuku alisayi kubakho ilitha lenyanga;

koko wokhanyiselwa bubungangamsha bam;

mna Ndikhoyo ndokukhanyisela ngonaphakade.

₂₀Awusayi kuphinda utshonelwe langa,

nenyanga ayisayi kubuya iphele;

uNdikhoyo wokukhanyisela nanini-nanini,

ingaze ibuye ibekho imihla yesingqala.

₂₁Abantu bakho boba ngabalungileyo,

umhlaba bawume kude kube ngunaphakade.

Bona basisithole esimiliselwe ndim;

ewe, bangumsebenzi wezandla zam,

ukuze babhengeze udumo lwam jikelele.

₂₂Noyena ungathangani uya kuba njengomkhosi,

kanti noyena ungazelwe nto woba sisizwe esomeleleyo.

Lakufika ixesha le nto ndoyenza ngesiquphe,

kuba kaloku mna ndinguNdikhoyo.”

₁Ke mna ndonganyelwe nguMoya woMhlekazi *uNdikhoyo,

kuba kaloku uNdikhoyo undithambisile.

Undithume ukubhengeza iindaba ezimnandi kumahlwempu,

ndibophe abantliziyo zingamahlwili,

ndibhengeze ukukhululeka kwabathinjwa,

ndazise inkululeko kumabanjwa.

₂Undithume ukuba ndivakalise ndithi

uthwasile unyaka wobabalo lukaNdikhoyo,

umhla wempindezelo yoThixo wethu.

Uthi mandithuthuzele abo banesingqala;

₃ewe, abo banesingqala eZiyon mandibathi jize ngesithsaba endaweni yezimnyama,

intambiso yolonwabo endaweni yokulila,

ndibathi wambu ngengoma yochulumacho endaweni yomva-ndedwa.

Kaloku bona kothiwa bayimithi yobulungisa,

imithi etyalwe nguNdikhoyo ngokwakhe,

ukuze baphuhlise isihomo sakhe.

₄Bona baya kuzivusa izixeko zamandulo,

bawavumbulule namabhodlo asel' adilizwa.

Baya kuzakha izixeko esezingamabobosi,

ezo zatshatyalaliswa kwizizukulwana ezadlulayo.

₅Ke zona iintlanga ziya kwalusa imihlambi yenu,

zilime amasimi, zijonge nezidiliya zenu.

₆Ke nina noba ngababingeleli bakaNdikhoyo;

niya kuba zizicaka zikaThixo wethu;

niya kubuxhamla ubutyebi bezizwe,

nitsho nizingce niqhayise ngabo.

₇Endaweni yokuhlazeka abantu bam bofumana isabelo esiphinda-phindiweyo,

endaweni yokunyoshoza bofumana ilifa elonwabisayo;

ewe, boba nenxaxheba yelifa eliphinda-phindiweyo kwelakowabo,

bahlale ngolonwabo olungasoze luthini.

₈Ke yena uNdikhoyo uthi:

“Mna Ndikhoyo ndithanda impatho enolungelelwano;

ndikuthiyile ukuphanga nobubhovu-bhovu.

Ndingothembekileyo nje, abantu bam ndobanika umvuzo,

ndibenzele umnqophiso ongasoz' uthini.

₉Isizukulwana sabo soba ngoodumezweni,

inzala yabo yaziwe naziintlanga.

Bonke abababonayo baya kuvuma bathi:

‘Luhlanga oluthamsanqelweyo nguNdikhoyo.’ ”

₁₀Nditsho ndanemihlali ngenxa kaNdikhoyo;

umoya wam uyachulumacha ngoThixo wam.

Kaloku undithe wambu ngomnweba wosindiso,

ewe, yena undambathise isivatho sobulungisa,

ndatsho ndanjengomyeni eqhoqhonye intloko yakhe njengombingeleli,

ndanjengomtshakazi ozihombisa ngobuyoko-yoko bamaso.

₁₁Kwanjengokuba umhlaba uyintshulisa imbewu,

zitsho zikhule nezityalo ezisemyezweni,

noMhlekazi uNdikhoyo wotyala ubulungisa nendumiso,

zintshule zikhule kuzo zonke izizwe.

₁Ngenxa yeZiyon andinakuthi cwaka,

ngenxa yeJerusalem andinakuthi tu,

bude ubulungisa bayo butshisele njengomsobomvu,

lude usindiso lwayo lukhanye njengesibane.

₂Izizwe zobubona ubulungisa bakhe,

nabo bonke ookumkani baluqonde udumo lwakho.

Ewe, uya kufumana igama elitsha

oya kulinikwa *nguNdikhoyo ngokwakhe.

₃KuNdikhoyo uya kuba sesingayiwayo isithsaba;

kuThixo wakho uya kuba yindwe yezinxiba-mxhaka.

₄Akusayi kuthiwa ungumshiywa,

umhlaba wakho kuthiwe yinkangala.

Kaloku kuya kuthiwa unguKholisile,

umhlaba wakho kuthiwe nguManyiwe.

Kaloku uNdikhoyo wanelisekile nguwe;

wozimanya neli lizwe ngokomyeni.

₅Kwanjengokuba umfana ethatha intombi

noonyana bakho baya kukuthatha;

njengokuba umyeni engaziva ngomtshakazi

noThixo wakho akayi kuziva ngawe.

₆Wena Jerusalem, ndokujikeleza ngabalindi;

imini nobusuku bayo bona soze bathi cwaka.

Nina ke, balindi,

nina nimkhumbuzayo uNdikhoyo ngezithembiso zakhe,

ze ningaphumli,

₇noNdikhoyo ngokwakhe ningamphumzi,

ade yena ayimisele iJerusalem

ibe sisixeko esidunyiswa lihlabathi jikelele.

₈UNdikhoyo ke yena wenze isifungo;

ngamandla akhe uya kusifezekisa:

“Ingqolowa yakho ayiyi kuphinda ibe sisisulu seentshaba zakho,

iintlanga azisayi kuyisela iwayini yakho,

yona leyo ubulaleke wedwa ngayo,

₉kodwa abo bayihlwayeleyo boyivuna –

baya kuyitya badumise uNdikhoyo ngayo;

ewe, abo bayiqokelelayo idiliya

bosela iwayini enkundleni yendlu kaThixo.”

₁₀Nina maJerusalem, phumani esixekweni,

niye kuhlahlela abantu indlela;

gqalan' amatye nivule, nitsho ngohola,

nimise imbasa, nezizwe zitsho ziqonde.

₁₁UNdikhoyo ke wenze isihlokomiso kwihlabathi jikelele:

“Yithi kwintombi enguZiyon:

‘Uyambona, nanko esiza uMsindisi wakho!

Nanko ekuphathel' umvuzo;

uza egushe imbuyekezo.’ ”

₁₂Bantu abo kothiwa ngabakhethekileyo,

uhlanga olukhululwe nguNdikhoyo;

iJerusalem ke kuthiwe nguThandiwe,

isixeko esingashiywanga sikhal' ibhungane.

₁Ngubani na lo uthi gqi kwaEdom?

Ngubani na lo uthi nyalulu ngaseBhozera,

lo uvathileyo, utsho ngezimfusa,

lo unyalasa ngesidima nondiliseko?

“Ndim kanye mna ndisindisa ngegunya;

ndiyavakalisa ndibhengeza uloyiso.”

₂Kutheni zibomvu nje iimpahla zakho,

le nto ngathi zezabaxovula iidiliya?

₃*UNdikhoyo ke yena uthi:

“Izizwe mna ndizixovule njengeediliya,

kungekho namnye weza kundincedisa;

ndazixangxatha ngeenyawo ndinomsindo,

latsaza igazi lazo, landitsho ndankone.

₄Umhla wokuziphindezela wandifikela,

yaye ixesha lokukhulula abantu bam lithwasile.

₅Ndaba ngathalaza, akwabikho undisizayo;

ndamangaliseka kwakungabikho uxhasayo.

Ngoko ke ndazizuzela uloyiso ngokwam;

ewe, ndaxhaswa yingqumbo yam.

₆Emsindweni ke mna ndazinyhasha izizwe;

ewe, mna ndazitsho zagxadazela,

igazi lazo ndaligalela emhlabeni.”

₇Ndiya kuthetha ngezibele *zikaNdikhoyo;

ndiya kumncoma ndimbonge ngemisebenzi yakhe,

ngenxa yeentsikelelo zakhe kuSirayeli,

nangenxa yenceba amthululele yona –

ezingako zona izibele zothando lwakhe.

₈Ewe, uNdikhoyo suka wathi:

“Bona ngabantu bam ncakasana;

lusapho lwam, soze bandiqhathe.”

Ngoko ke suka yena wabahlangula.

₉Embandezelweni yabo akachasananga nabo,

basindiswa bubukho besithunywa sakhe.

Ngenxa yothando novelwano yena wabakhulula;

ewe, yena wabaphakamisa wabalondoloza,

wahamba nabo ngayo yonke loo mihla yamandulo.

₁₀Phi ke, basuka bamvukela nje!

Ewe, bangcungcuthekisa uMoya wakhe oyiNgcwele.

Suka ke yena waba lutshaba lwabo,

waza ke walwa nabo ngokwakhe.

₁₁Bada ke bona bayikhumbula imihla yamandulo;

leyo ke yimihla kaMosis nabantu bakhe.

Bakhalaza ke ngoko bathi:

“Uphi ke ngoku lowo wabawezayo elwandle,

ekhokela umhlambi nomalusi wawo?

Yaz'ba uphi na ke ngoku uNdikhoyo,

yena wabambesa ngoMoya wakhe oyiNgcwele?

₁₂Ngobungangamsha bakhe wamomeleza wamxhasa uMosis,

wawahlula-hlula amanzi phambi kwabo,

waza wazenzela igama elingasoze litshitshe.

₁₃Yena wabakhokela bacanda inzonzobila,

baqhathula njengehashe entlango,

babetha kuhle, abaze bakhubeke.

₁₄Baba njengeenkomo eziya kwisithabazi samadlelo,

wenjenjalo uMoya kaNdikhoyo ukubaphumza.

Wabakhokela ngaloo ndlela ke abantu bakho,

ndlela leyo ke yakwenzela igama.”

₁₅Usezulwini apho, *Ndikhoyo, khawuthob' amehlo;

khawukrwaqule ukwelo khaya lesidima nobungcwele.

Kodwa-kodwa ngani ukuba ungakhweleti?

Khona ke aphi amandla akho?

Iphi ke imfobe novelwano lwakho?

Hayi kaloku, nceda sukusifulathela!

₁₆Kaloku wena unguTata wethu,

nakuba singaziwa nje nguAbraham;

ukanti noSirayeli akasihoyi.

Kambe ke wena, Ndikhoyo, unguBawo;

wena waba nguMkhululi wethu kwamandulo.

₁₇Usiyekelani kodwa, siphambuke endleleni yakho, Ndikhoyo?

Ngani ukuba usiyeke sinkanize kangaka,

side siphelelwe ziintloni nakukukoyika?

Buyela kuthi, thina zicaka zakho;

sincede, thina zizwe zililifa lakho.

₁₈Indlu yakho eyodwa yaba yeyabantu bakho umzuzwana,

suka ke zona iintshaba zayidobonga zayidiliza.

₁₉Ngoku thina sesifana nâbo bangaziwayo nguwe,

abo ungazange wabalawula;

ewe, sesifana nabangazange babizwe ngawe.

₁Akwaba ubungawakrazul' amazulu,

uhle esibhakabhakeni,

khon' ukuze neentaba zitsho zinyikime,

₂kutsho kube ngathi ngumlilo weentsasa,

kube ngathi ngumlilo ubilisa amanzi.

Yiza, zitsho neentshaba zakho zikuqonde,

nezizwe zitsho zingcangcazele kukoyika,

₃uxelise ngokuyâ wakha wenza iziqwenga.

Kaloku ngoko wasiqubula singalindele;

ewe, wena wasiqubula warhiwula,

zatsho neentaba zothuka zangcangcazela.

₄Kwamandulo akukho bani wakha weva;

kwakudala akakho owakha wambona nanini na uThixo onjengawe lo,

obancedayo abantu abakholosa ngaye.

₅Kaloku wena ubahlangabeza ngoncedo

bonke abazinikezele ekwenzeni okulungileyo,

abo ke bazikhumbulayo iindlela zakho.

Sakuqhubela phambili sikuchasa wakhathazeka.

Yaz'ba sohlangulwa kanjani na ke?

₆Sonke sifana nalowo ungahlambulukanga;

ewe, neyona misebenzi yethu yobulungisa:

mh-mh-mh, ilizothe phambi kwakho!

Sisuke sashwabana njengegqabi liphetshethwa ngumoya;

ngokunjalo izono zethu zisiqweqwedisile.

₇Kaloku akusekho mntu ukunqulayo;

ewe, akasekho obalekela kuwe.

Kaloku wena ngoku usifulathele;

usishiye ukuze siqwengwe zizono zethu.

₈Kambe ke, unguTata, wena Ndikhoyo.

Ke thina siludongwe;

wena ke ungumbumbi,

thina singumsebenzi wezandla zakho.

₉Ungàqumb' ud' uqalekise, Ndikhoyo;

nceda ungasixhibi ngezono esizenzileyo.

Siyakuthandaza, noko buya nganeno;

kaloku sonke singabantu bakho.

₁₀Kwizixeko zakho zegugu kusenkangala;

nkqu neZiyon ikhal' ibhungane,

neJerusalem ngokwayo ngamabhodlo.

₁₁Loo nzwakazi yendlu entle kunene,

apho babekudumisa khona oobawo,

kunamhlanje nje itshe yaluthuthu,

okwakuziindawo zebhongo sekungamabhodlo.

₁₂Ngaba azikushukumisi na ezi ziganeko, Ndikhoyo?

Ngaba uza kuhlala nje ungachukumiseki?

Naxa sekunje usazimisel' ukudl' imu?

Hleze senzakale xa usohlwaya ngaphezu koku!