To The Word – Day 104

“Khanibek' iindlebe,

ndlu kaYakobi;

nditsho nina babizwa ngoSirayeli,

nina bomnombo kaJuda,

nina bafunga igama likaNdikhoyo,

nina bathi banqula uThixo kaSirayeli,

kodwa ngenene nisitsho nje ngomlomo!

₂Kanti kwanina niyazidla,

niqhayisa ngokuthi nina ningabemi besixeko sikaNdikhoyo;

nithi nina nixhomekeke kuThixo kaSirayeli,

ogama linguNdikhoyo uSomandla-onke.

₃“Kudala-dala ndatsho kwangonoquku;

ewe, ndazixela izinto eziza kuhla,

kamva ke ndatsho suka zenzeka njengoko.

₄Kambe ke wena bendisazi ukuba uneenkani nqwa nesele,

ntondini eqinis' intamo,

lityendini lenyengane!

₅Kungoko ndazibhengeza kwakudala ezi zinto,

izehlo ndazixela ngaphambi kokuba zenzeke,

khon' ukuze wena ungabi nako ukuthi leyo yimisebenzi *yezithixo ozinqulayo.

₆Konke endakuxelayo kwenzekile.

Vuma kaloku!

Kanti ke ngoku ndiza kuxela into entsha,

imfihlakalo eningazange nayazi.

₇Ewe, ndiyidala ngoku;

into enje zange yenzeke ngaphambili.

Okanye ke ngowusithi ubuyazi kakade.

₈Zange uve uqonde nakuqonda,

kuba ubungenako kakade.

Bendikwazi ukuba wena awuthembekanga;

ndiyakwazi ukuba ungumvukeli owaziwayo.

₉Ngenxa yegama lam ndibuya nganeno ngomsindo;

ngenxa yodumo lwam ndiyazithibaza

ukuze ndingakutshabalalisi.

₁₀Andinivavanyanga eziko okwesiliva,

kodwa ndinivavanye ngehambo-nzima.

₁₁Kungenxa yam ukuba ndenjenje;

soze ndiliyekele ngehlazo igama lam,

kungekho bani wosizuza neso sihomo.

Andinikisi ngaso; sesam ndodwa.”

₁₂*UNdikhoyo uthi:

“Bek' iindlebe uphulaphule, Yakobi,

nditsho wena, Sirayeli endakubizayo.

Mna ndinguNdikhoyo: ndingowokuqala,

ndikwangowokugqibela.

₁₃Ndim owamisa iziseko zehlabathi;

ndim lo owawatwabululayo amazulu.

Ndithetha ngelizwi, zisuke zibekho.

₁₄Qokelelanani niphulaphule xa ninonke.

Kakade sisiphi *isithixo esinokuvakalisa into enjengale?

Ndinyule oza kuhlasela iBhabheli.

Yena uza kwenza oko kufunwa ndim.

₁₅Kaloku ndim ngokwam endathethayo,

ndim endambizayo, ndamthi jize ngempumelelo.

₁₆Khawusondele ke uphulaphule.

Kwasekuqaleni ndathetha ngokuphandle,

futhi nokufezeka kwazo kokwam.”

Ewe, uMhlekazi uNdikhoyo undithumile,

wandixhobisa ngoMoya wakhe.

₁₇Utsho ke *uNdikhoyo,

uMkhululi wakho,

uYedwa kaSirayeli:

“Mna ndinguNdikhoyo uThixo wakho.

Ndikufundisa nje kaloku ndiyakunceda;

ndikufaka endleleni ekufaneleyo.

₁₈Akwaba wawuyiphulaphule imiyalelo yam.

Ngelumpompoza njengamanzi uloyiso lwakho,

budlobe okwamaza ubulungisa bakho.

₁₉Ngeba ke namhlanje inzala yakho yinyambalala engenakubalwa,

lingaze linqanyulwe igama lakho,

kananjalo lingaze litshabalale.”

₂₀Phuman' eBhabheli; washiyeni amaKaledi!

Bhengezani ngemihlali;

ewe, memezani nazis' abantu bonke, nithi:

“UNdikhoyo usihlangule isicaka sakhe uYakobi.”

₂₁Ngokuya wayebakhokela kwinkqantosi ebharhileyo

abantu bakhe zange bafe lunxano;

wabakhuphela amanzi eliweni,

suka waliqhekeza, aza ampompoz' amanzi!

₂₂Ewe, uNdikhoyo uthi:

“Akukho ukonwaba kwabakhohlakeleyo!”

₁I-i-i-nzwi! Bekan' iindlebe, zizw' ezikude!

Yivani ke, nina nto zihlal' ekudeni!

*UNdikhoyo wandibiza ndingekaliboni ilanga;

ewe, wandikhankanya ndingekazalwa.

₂Wawenza amazwi am ahlaba njengekrele;

ewe, yena wandifumbatha ngesandla,

wandicikiza ngathi uhombisa utolo,

wandithi xhwa sendilind' umayenzeke.

₃Ke yena wathetha nam, wathi:

“Wena usisicaka sam, Sirayeli;

ngawe ndibhengeza ubungangamsha bam.”

₄Ke mna ndithe: “Ndibulalekele ilize;

umzabalazo wam ungamampunge.

Kambe ke ibango lam likuNdikhoyo;

nguThixo wam oya kundibuyekeza.”

₅UNdikhoyo owandibumba esizalweni,

wandenza isicaka sakhe,

ukuze ndibuyisele uYakobi kuye,

ndiphuthume uSirayeli owabhacayo.

Kaloku isidima ndisizuza kuNdikhoyo;

amandla am ampompoza kuThixo wam.

₆UNdikhoyo uthethe wenjenje:

“Njengesicaka sam akwanele okokuba ubuyisele ubuhandiba kwaYakobi,

uphuthume amasalela kaSirayeli endiwalondolozileyo,

koko ndikumisela ukuba ube lukhanyiso lweentlanga,

ube lusindiso lwam olubandakanya ihlabathi jikelele.”

₇UYedwa, uNdikhoyo, uThixo kaSirayeli,

lowo unguMkhululi wakhe,

uthi kulowo udelwe mpela-mpela,

nditsho lowo ucatshukelwayo zizizwe,

lowo usisicaka seziphathamandla:

“Izikumkani ziya kukubona;

ewe, ziya kuphakama zikhahlele,

namatshawe aya kuvova ee guqaqa!”

Yonke loo nto ke iza kwenzeka

kuba uNdikhoyo ekunyule wena ukuze ube sisicaka sakhe,

nditsho uThixo onguYedwa kaSirayeli othembekileyo.

“Ayeza amathuba akholekileyo,

imihla yokusindiswa.

Ke mna ndiya kukusiza,

ndisabele ndakuva uzibika.

Ndiya kukwalúsa ndikukhusele,

ngawe ndenze umnqophiso nabantu.

Ngawe ndolibuyisela kubantu bam ilizwe,

ndilabe eliyinkangala libe lilifa,

₉amabanjwa uwathethele uthi:

‘Yinkululeko; khululekani;’

uthi kwabo basebumnyameni:

‘Phumani, nize ekukhanyeni.’

“Bona baya kutya ngasezindleleni

njengeegusha ezitya ezindulini.

₁₀Abayi kubuya balambe banxanwe;

ilanga lentlango aliyi kubenzakalisa.

Baya kwaluswa ngulowo unovelwano,

abakhokelele kwimithombo empompozayo.

₁₁Ndogqobhoz' iintaba, ndivul' uhola,

abantu bam ndibahlahlel' indlela.

₁₂Bona bothi gqi kwelikude –

nditsho kwelasentla nasentshonalanga –

bophum' eSinim kwelasezantsi.”

₁₃Memelelani ngovuyo, nina mazulu;

yeyezela uhlahlambe, wena mhlaba;

hlokomani nivume, nina zintaba!

Kaloku uNdikhoyo uyabathuthuzela abantu bakhe;

uhlabekile ziinkxwaleko zeentsizana zakhe.

“Hayi bo! UNdikhoyo undifulathele;

iNkosi isuke yandilibala.”

“Ngaba umfazi angalulibala na usana lwakhe,

ade angavakalelwa ngowakhe umntwana?

Noba ke yena angade amlibale,

okokwam ke mna soze ndikufulathele,

₁₆kuba igama lakho ndilivambile,

ndilithe tyaba esandleni sam;

iindonga zakho zihlala zisemehlweni am.

₁₇Bayeza oonyana bakho;

baza kuphinda bakuvuse;

abakutshabalalisayo bayemka.

₁₈Khawulaqaze uqwalasele:

nâbo oonyana bakho bexhontelana;

nâbo bebuya begxalathelana.

Ndiyafunga mna Thixo ophilayo,

nawe wozingca ngoonyana bakho,

uxel' umtshakazi ngobuyoko-yoko bakhe.

₁₉“Ngenene ilizwe lakho labhukuqwa lada labharha,

kodwa ngoku loba lincinane kunabo,

lingabalingani abo babuyela kulo;

abo balibhukuqayo boba sebekude.

₂₀Abantwana obazalele ekuxhwalekeni

ngeny' imini baya kuthi kuwe:

‘Lo mhlaba mncinane gqitha;

sivulel' indawo, ukuze sime nathi!’

₂₁Uya kwandula ke uthi:

‘Ndibathathe phi abantwana abangaka?

Ndandingaphathi, ndiludlolo;

kaloku ndathinjwa ndagxothwa.

Kambe ke bakhuliswe ngubani aba?

Mna ndasala ndiyimpula kalujaca,

ngaba luphuma phi na usapho olungaka?’ ”

₂₂UMhlekazi uNdikhoyo uthi:

“Ndiya kuzikhweba iintlanga,

ndiziphakamisele imbasa yam izizwe,

zitsho zize nalo usapho lwakho,

zibabeleke oonyana bakho,

zizifunqule iintombi zakho.

₂₃Ookumkani boba ngabondli bakho,

ookumkanikazi babe ziineni zakho;

bothi vovololo, benik' imbeko kuwe,

borhuqa phantsi ngentlonipho,

utsh' uqond' ukuba ndinguNdikhoyo,

soze badane abo bathembela ngam.”

₂₄Ungalohlutha na ixhoba lejoni?

Ungamkhulula na umthinjwa kulowo umthimbileyo?

₂₅Kambe yena uNdikhoyo uthi:

“Yiloo nto kanye eza kwenzeka:

amaxhoba othathwa kumajoni,

abathinjwa bakhululwe kubathimbi.

Baxabene nam abo balwa nawe;

usapho lwakho lona ndiluhlangule.

₂₆Abakucinezelayo ndobatsho bavukelane;

boqumba babe ngoomnqay' ulambile,

noluntu lonke lutsho lundiqonde

ukuba ndinguNdikhoyo okusindisayo,

mna Mkhululi wakho, iNgangamsha kaYakobi.”

“Ùthi abantu bam ndabagxotha

okomfo esahlukana nomfazi wakhe?

Ziphi ke iincwadi zolo qhawukano?

Ngaba ndanithengisa kubani

njengomfo othengisa ngekhoboka lakhe?

Hayi kaloku, nathengiswa ngenxa yezono zenu;

nagxothwa wena nonyoko ngenxa yamatyala enu.

₂Ndakufika akubangakho bani undamkelayo;

ndaba ngamemeza akwasabela mntu.

Ngaba imfutshane na ingalo yam?

Ngaba andinako na ukukukhulula?

Mhlawumbi makube andinamandla na ukuze ndikusindise?

Ndithi ndingakhalima lome qoko ulwandle,

imilambo itsho ibharhe,

iintlanzi zife kukunqaba kwamanzi;

yeka ke elo phunga!

₃Isibhakabhaka ndisivathisa ngobumnyama,

amazulu anxibe ezokuzila.”

₄UMhlekazi *uNdikhoyo undazisile into emandiyithethe,

ukuze ndikhuthaze abo batyhafileyo.

Ntsasa zonke undivusa ndiphulaphule

njengalowo ufundiswayo.

₅UMhlekazi uNdikhoyo undivule ingqiqo;

nam ke zange ndivukelane naye,

ngenene zange ndirhoxe kuye.

₆Ndazinikezela kwabo bandibethayo,

kwabo banditsala-tsalayo, bencothula intshebe yam,

bephatha kunditshicela ebusweni bendinyelisa.

₇Kaloku uMhlekazi uNdikhoyo uyandisiza;

ngoko ke andiyi kuhlazeka.

Ndikulungele ukunyamezela;

ewe, andisayi kudana.

₈UThixo ondithethelelayo ukufuphi nam;

yena wosuka andigwebele.

Ngubani ke ongade andimangalele?

Makeze kaloku, siye enkundleni;

makachaze izityholo andibeka zona.

₉Mna ndithethelelwa nguMhlekazi uNdikhoyo.

Ngubani ke onako ukundigweba?

Abandimangalelayo boguga njengengubo;

nabo baya kumemethwa ngamanundu.

₁₀Ngoobani na abamnqula ngentlonelo uNdikhoyo,

abasiphulaphulayo isicaka sakhe?

Ofikelwa bubumnyama, ekude nokukhanya,

makathembele ngoNdikhoyo;

ewe, makakholose ngoThixo wakhe.

₁₁Nina baphembi bamayelenqe,

isikhuni sobuya nomkhwezeli.

NguNdikhoyo oya kuyenza loo nto,

ke wena ufe ungcungcuthekile.

“Phulaphulani, nina banxanel' ubulungisa,

nina babongozana noNdikhoyo.

Khangelani kwiliwa enathwetyulwa kulo,

kuloo mqhokro navunjululwa kuwo.

₂Khanicinge ngoAbraham inyange,

nangoSara yena ungumawokhulu.

Ndambiza eyedwa kuphela,

ndaza ndamsikelela waba sisizwe.

₃Inene uNdikhoyo woyithuthuzela iZiyon,

akhathazeke ngenxa yamabhodlo ayo.

Elibharhileyo wolijika libe ngumyezo,

nentlango ibe njengomyezo waseIdeni,

khona kulawule uvuyo nemincili,

ibe yintsholo yengoma yokudumisa.

₄“Ndiphulaphuleni ke, bantu bam,

nibek' iindlebe, sizwe sam.

Mna ndowisa umthetho;

ulawulo lwam lukhanyisele izizwe.

₅Ngokukhawuleza ndiza kuhlengahlengisa;

usindiso lwam lusendleleni;

izizwe zolawulwa ndim ngenkqu.

Kaloku nezikude zindilindele;

nazo zikholose ngamandla am.

₆Khanijonge amazulu phezulu,

nijonge umhlaba phantsi.

Amazulu othi pheselele njengomsi,

umhlaba uguge njengengubo,

abantu bafe njengeempukane.

Ke lona usindiso lwam lohlala luhleli;

ubulungisa bam soze buthini.

₇“Ndiveni, nina babaziyo ubulungisa,

luhlangandini lunomthetho wam entliziyweni.

Sanukuzihlupha ngâbo baninyelisayo,

ningazidubi nangabo banithukayo.

₈Bonyamalala ngathi yingubo edliwe ngamanundu,

ngathi buboya begusha obudliwe ngumbungu.

Ubulungisa bam bona boma bumi;

usindiso lwam lukwizizukulwana ngezizukulwana.”

₉Hoyina, Ndikhoyo! Sihlangule!

Xhoba ngamandla akho usihlangule;

makube njengemihla yamandulo.

Kaloku nguwe owahlanganisela inabulele;

nguwe owamqwenga-qwengayo uRahabhi.

₁₀Nguwe owalomisayo nolwandle;

nguwe owavula indlela enzonzobileni,

baza badlula abakhululwa bakho.

₁₁Abo bahlawulelweyo nguNdikhoyo

baya kungena eJerusalem bechulumacha,

bengqungqa bememelela ngemihlali,

bathiwe jize ngovuyo ngonaphakade,

bonwabe babe nemincili,

bangaze babuye bazane neenzingo neenkxwaleko.

“Mna ndingulowo ukuthuthuzelayo;

ngani ke ukuba woyike umntu –

into evuthuluka njengengca?

₁₃Kanti umlibele na uNdikhoyo uMenzi wakho,

yena wawatwabululayo amazulu,

yena walisekayo ihlabathi?

Ngani ukuba uhlale ngedyudyu,

usoyika ingqumbo yomcinezeli?

Lowo uzungula ukukutshabalalisa

soze abe nako ukukuchukumisa.

₁₄Abo babanjiweyo sebeza kukhululwa;

abayi kufa, koko bodla ubomi obude,

bangalambi, koko baxhamle intlutha.

₁₅Mna ndinguNdikhoyo uThixo wakho;

mna ndiyalushukumisa nolwandle,

amaza alo atsho agragrame.

Igama lam nguNdikhoyo uSomandla-onke.

₁₆Mna ndawatwabulula amazulu,

ndazaneka iziseko zehlabathi.

KwiZiyon ke ndithi:

‘Ke wena ungowam;

imfundiso yam ndikunikile,

futhi ke ndiyakukhusela.’ ”

₁₇Vuka! Vuka, Jerusalem!

Phaphama ude uphakame!

Kaloku usizekile isohlwayo akuphathele sona *uNdikhoyo;

usiqongqoloze sada sakunxilisa.

₁₈Ngoku ke akakho okukhokelayo –

namnye kubantu bakho –

engekho nakoonyana obazeleyo;

tu umntu wokukurhuqa.

₁₉Kuwe ilishwa lishwabene ngokuphindiweyo:

umhlaba wakho uvukuzeliswe yimfazwe;

abantu bakho bamemethwa yindlala.

Ngubani ke onokukuthuthuzela?

₂₀Oonyana bakho zizigede eziyobayo;

bathe tywaa ezitalatweni phaya.

Sebefana nenxala emgibeni.

Batyakatywa yingqumbo kaNdikhoyo;

umsindo woThixo wakho uphezu kwabo.

₂₁Yiva, Jerusalem ebandezelekileyo,

wena ugxadazela ungaselanga.

₂₂Utsho uMhlekazi uNdikhoyo,

nditsho uThixo wakho lo ukuthethelelayo:

“Ngoku ndiyayisusa kuwe le ndebe,

ingqumbo le ndakuseza yona,

le isuke yakugxadazelisa;

ngoku sobe ube sayixhamla.

₂₃Ndoyinika abakuphakele ingcinezelo,

abo bakwenze umgaqo wokuhamba,

abo bakuxangxathe ngeenyawo,

abo bakuxovule njengomhlaba.”

₈“ ‘Aba bantu bandibeka ngomlomo,

kanti yona intliziyo ikude lee kum,’ itsho iNkosi.

₉‘Bafumana bendihlonela,

kuba bafundisa iimfundiso eziyimithetho nje yabantu.’”